Keniuj tikinpaleuiskej akin amo yekuelij taixtajtoltiaj

1. ¿Keyej ouij kisa tikinmachtiskej ika Biblia akin amo yektaixtajtoltiaj?

¹ Sekin akin tikinnojnotsaj kinekij motokiskej iuan Dios, sayoj ke kemej kinouijmaka taixtajtoltiskej, kimouiliaj kitaposkej Biblia uan okseki amaixmej. Yejua ika, xa amo semi tapaleuis maj tikinkauilikan amaix Tamachtia Biblia keman yekinika tikinkalpanoskej. ¿Keniuj uelis tikinpaleuiskej taltikpakneminij maj motokikan iuan Dios? Itech panoua veinte uejueyi altepemej kintajtanijkej tokniuan akin kiuikaj miak xiujmejya kemej tanojnotsanij, uan yejuan kijtojkej tein nikan moijtoua.

2. ¿Ika toni amaixmej uelis tikinpaleuiskej akin amo yekuelij taixtajtoltiaj?

² Komo se aksa akin momachtia amo yekueli taixtajtoltia, oso senkis amo ueli, uelis tipeuaskej ika amaix Maj tikakikan Dios oso Maj tikakikan Dios uan tinemiskej nochipaya. Se precursor ompa Estados Unidos kinextilia taltikpaknenkej nejin ome amaixmej uan kitajtania katiyejua okachi kiuelita. Itech kali Betel ompa Kenia kijtouaj ke nejin amaixmej senkis tapaleuianij, porin itech nejon xolalmej, taltikpakneminij momachtiaj sayoj tein kintapouiaj uan amo momattokej maj kinchiuilikan netajtanilmej nion tanankiliskej. Se akin kiselij se ueyi nemachtil amo ouij kikisas taixtajtoltis nion tanankilis, sayoj ke akin amo kipia ueyi nemachtil, xa ouij kikisas. Komo akin kimachtiaj ueli taixtajtoltia tepitsin, miakej tokniuan okachi kuali kikuij amaixmej Kuali tanauatilmej tein Dios kitemaka oso Uelis timochiuas tiitasojikniuj Dios, oso no kitekitiltiaj amaix Tanojnotsmej tein ualeuaj itech Biblia.

3. ¿Toni uelis tikelnamikiskej uan ijkon kuali tikinmachtiskej akin amo ueli taixtajtoltiaj?

³ Xiontayolchikaua. Akin amo uelij taixtajtoltiaj xa mopinaujmatiskej uan kinemiliskej ke teikneltijkej. Komo tikinpaleuiaj maj kuali momachilikan itech nemachtil, tapaleuis maj tiuelikan tikinmachtikan tein melauak. Miakej akin amo uelij taixtajtoltiaj tamattokej uan amo kinouijmaka momachtiskej teisa. Yejua ika, xikonnextili ke tikonpoujkaita kemej kinnamiki (1 Ped. 3:15). Nejin kinyolchikauas maj kisentokakan momachtikan komo kiitaj ke tein kichiuaj amo nenkaj uan ke okachi kinpaleuia maj motokikan iuan Dios. Yejua ika, miakpa xikonilui ke kuali tein kichiuaj.

4. ¿Keniuj uelis tikinyolchikauaskej akin amo yekuelij taixtajtoltiaj maj achto momachtikan tein moitas itech nemachtil?

⁴ Maski akin tikonmachtis kiouijmakas taixtajtoltis, xikonyolchikaua maj momachti achto tein nankiitaskej itech nemachtil. Seki tanojnotsanij ompa Sudáfrica kiniluiaj akin kinmachtiaj maj kitajtanikan nepaleuil se ininchankauj oso inintasojikniuj akin kuali taixtajtoltia. Se tokniuj kayot Gran Bretaña itech seki párrafos kintaneujtia iamaix uan ijkon kiitaj ke okachi amo ouij se kiajsi tanankilil keman se kitsojkuiloua, ijkon kinyolchikaua akin kinmachtia maj achto momachtikan. Se tokniuj kayot India kiniluia maj kiitakan taixkopimej itech tamachtilis tein kiitaskej itech okse semana uan maj itech tanemilijtokan achto ke ajsis tonal keman momachtiskej.

5. ¿Keniuj uelis tiknextiskej ke amo tiyolijsiuij keman tiktemakaj se nemachtil?

⁵ Amo xionyolijsiui. Okachi xikonmelaua tanemililmej tein tayekantokej itech amaix tein ika tiontamachtijtos uan xikonpaleui momachtijkej maj kuali kiajsikamati. Yekinika, xa okachi kuali yeski komo sayoj tionuejkaua majtakti oso kaxtol minuto. Amo xikonita tel miak tamachtilis, ta sayoj seki párrafo itech sejse nemachtil. Amo xionyolijsiui komo akin tikonmachtia yolik taixtajtoltia. Nejon xa okachi kipaleuis maj mochikaua yektaixtajtoltis ijkon kemej okachi kitasojtatiyas Jiova. Yejua ika, semi kuali yeski komo tikyoleuaj maj youi nechikolmej niman keman peuas tikalpanoskej.

6. ¿Keniuj uelis tikonmachtis aksa maj ueli taixtajtolti?

⁶ Momachtijkej okachi ijsiujka motokis iuan Dios komo momachtia kuali taixtajtoltis (Sal. 1:1-3). Miakej tanojnotsanij kipaleuiaj ika amaix Xionmochikaua tionuelis tiontaixtajtoltis uan tiontajkuilos seki minuto satepan keman tami sejse nemachtil. Komo momachtijkej kineki mosenkauas, xa uelis tikonpaleuis maj kuali momachili komo tikoniluia okseki taman tein yejua ueli kichiuaya. Xikonyekilui ke Jiova kitatiochiuis komo kisentoka mochikaua uan xikonyoleua maj kitataujti Dios maj kipaleui (Prov. 16:3; 1 Juan 5:14, 15). Seki tokniuan ompa Gran Bretaña kiyoleuaj momachtijkej maj kiixtali kichiuas seki taman tein yekmelauj uelis uan tein kisentokas kichiujtos, kemej neskayot, kiixmatis nochi letras, kiajsis uan kiixtajtoltis tajkuilolmej itech Biblia uan satepan kiixtajtoltis amaixmej tein kiualkui tajtolmej tein amo ouijkej. Miakpa, keman se kimachtia aksa maj taixtajtolti, no moneki se kiyolchikauas maj kineki kichiuas.

7. ¿Keyej moneki tikinmachtiskej tein melauak akin amo yekuelij taixtajtoltiaj?

⁷ Jiova amo kinixtopeua akin amo kipiaj se ueyi nemachtil (Job 34:19). Yejuatsin kiita tein kipiaj itech ininyolo (1 Crón. 28:9). Yejua ika maj tikinmachtikan tein melauak akin amo yekuelij taixtajtoltiaj. Tikpiaj miak tel kuali nepaleuilmej tein ika uelis tipeuaskej. Satepan, uelis tiktekitiltiskej amaix Tamachtia Biblia tein kipaleuis momachtijkej maj okachi kuali kiajsikamati tein tamachtia iTajtol Dios.