Cien xiujmej tikteixmatiltijtokej iTekiuajyo Dios
1. ¿Toni kinyolchikaujkej maj kichiuakan itekitikauan Jiova ajsitokya cien xiujmej?
1 “¡Xikitakan, Tekiuaj taixyekantok! Namejuan nankiteixmatiltiaj. Yejua ika, xikteixmatiltikan, xikteixmatiltikan, xikteixmatiltikan Tekiuaj uan itekiuajyo.” Ika nejon kualtsitsin tajtolmej, ajsitokya cien xiujmej tokniuj Rutherford kinyolchikauak itekitikauan Jiova maj kiteixmatiltikan iTekiuajyo Dios noyampa taltikpak. ¡Uan ijkon tikchiuanij! Kemej itatojtokakauan Cristo itech yekinika siglo, tikteixmatiltianij kuali tanauatilmej ika iTekiuajyo Dios “tech nochi in senmanauak” (Col. 1:23). ¿Toni tikchiuanij itech siglo veinte tein tapaleuiani maj moteixmatilti iTekiuajyo Dios? ¿Keniuj uelis tiksentokaskej tikteixmatiltiskej ijkon kemej ajsitiuj cien xiujmej keman peuak taixyekana?
2. ¿Keniuj moteixmatiltiani iTekiuajyo Dios itech toamaixuan?
2 Tein mochiuak achto. Toamaixuan miak xiujmejya kiteixmatiltijtokej iTekiuajyo Dios. Itech xiuit 1939 hasta axkan, revista tein okachi tikuij motokaytia Tanejmachtijkej. Kiteixmatiltijtok iTekiuajyo Jiova. Nejin amaix miakpa ika tajtoua iTekiuajyo Dios uan tein kichiuati. ¡Despertad! no kiyeknextia ke sayoj iTekiuajyo Dios kinualkuilis taltikpakneminij tein kuali. ¡Semi techyolpaktia maj nejin ome amaixmej moajsikan itech miak tataman tajtolmej uan maj okachi momoyauakan semanauak taltikpak! (Apoc. 14:6.)
3. Xikonijto seki taman tanojnotsalis tein ika moteixmatiltiani iTekiuajyo Dios.
3 Itekitikauan Jiova kikuinij tataman tanojnotsalis tein ika kiteixmatiltianij iTekiuajyo Dios. Keman peujkej, kikuikej carros kampa kitaliayaj tanojnotsmej itech se tepostatsotson, kikuiaj radio uan gramófonos tein kiuikatinemiaj. Nejon kintelpaleuij maj kinixmatiltikan kuali tanauatilmej tel miakej taltikpakneminij keman ayamo semi miakej tanojnotsanij onkayaj (Sal. 19:4). Itech nejin xiujmej tiktalianij miak tataman tamachtilis itech jw.org, uan ijkon tel miakej taltikpakneminij kimatinij tein kichiuas iTekiuajyo Dios, hasta itech altepemej kampa tekiuanij amo kinkauaj tokniuan maj tanojnotsakan.
4. ¿Toni okseki taman tanojnotsalis moixtaliani?
4 Itekitikauan Jiova no kiixtalianij okseki taman tanojnotsalis tein ika kiteixmatiltiaj iTekiuajyo Dios. Kemej neskayot, ipeujyan xiuit 1996, peuak amo sayoj titanojnotsaj kajkalpan, ta no itech parques, kampa kinketsaj teposmej uan itech tanamakaloyamej. Ayamo uejkaua moixtalij se taman tanojnotsalis senteixtenoj itech seki uejueyi altepemej noyampa taltikpak. Uan no, itech miak nechikolmej tapaleuiaj itech tanojnotsalis senteixtenoj kampa ixyetok tanojnotsaskej uan kitaliaj amaixmej itech mesas uan itech okseki taman kampa tel miakej panouaj. Maski ijkon, tiksentokaj okachi tikteixmatiltiaj iTekiuajyo Dios kajkalpan (Hech. 20:20).
5. ¿Toni uelis tikchiuaskej keman peuas yankuik xiujtekit?
5 Tein mochiuas satepan. Keman peuas xiujtekit itech metsti septiembre, miakej peuas kichiuaskej tekit kemej precursor regular. ¿No tikonchiuas nejon tekit? Komo amo, ¿tikonnemiliani tikonchiuas kemansa tekit kemej precursor auxiliar? Tikonchiuas tekit kemej precursor oso amo, Jiova mitsontatiochiuis porin tionmochikaua tikonteixmatiltis iTekiuajyo (Mal. 3:10).
6. ¿Keyej octubre xiuit 2014 yeski se metsti tein motelneki?
6 Itech metsti octubre xiuit 2014 ajsis cien xiujmej keman peuak taixyekana iTekiuajyo Dios. Yejua ika itech nejon metsti, amaix Tanejmachtijkej tein motemaka itech tanojnotsalis okachi ika tajtos iTekiuajyo Dios. Maj timochikauakan tikinkauiliskej nejin amaix nochin taltikpakneminij tein uelis. Ijkon kemej tikchiaj tein ualas satepan, maj tinochin “[tikinixmatiltikan] kuali tanauatilmej ika itekiuajyo Dios” akin kinekiskej techkakiskej (Hech. 8:12, TNM).