Maj titamachtikan kemej yekmelauj tapaleuis
1. ¿Toni ueyi tekit tikpiaj ijkuak tiktemakaj nemachtilmej ika Biblia?
1 Amo akin uelis kitekitilis Jiova komo amo yejuatsin kinotsa (Juan 6:44). Maski ijkon, moneki tiktemoskej tikinpaleuiskej taltikpakneminij maj motokikan iuan Dios (Sant. 4:8). Yejua ika moneki achto kuali timomachtiskej. Komo tiknekij maj momachtijkej kiajsikamati tamachtilis uan maj kisentoka kichikaua ikuali uikalis iuan Dios, amo sayoj moneki maj kiixtajtolti párrafo uan maj kinankili netajtanilmej tein kipia amaix.
2. ¿Toni techpaleuis maj kuali titamachtikan ika Biblia?
2 Komo tiknekij kuali titamachtiskej, moneki tikpaleuiskej momachtijkej maj 1) kiajsikamati tein Biblia tamachtia, 2) kiseli tamachtilis uan 3) maj kichiua tein momachtia (Juan 3:16; 17:3; Sant. 2:26). Kichiuas nejin uelis kiuikilis miak tonalmej, sayoj ke moneki kichiuas porin nejon kipaleuis akin tikmachtiaj maj kichikaua ikuali uikalis iuan Jiova uan maj kiixtali motemaktis iuan.
3. ¿Toni taman netajtanilmej moneki tikchiuaskej komo tiknekij kuali titamachtiskej, uan keyej?
3 ¿Toni kinemilia momachtijkej? Tein techpaleuis maj tikmatikan ox momachtijkej kiajsikamati uan kiselia tein Biblia tamachtia, moneki amo sayoj tejuan titajtoskej, ta tikyoleuaskej maj kijto toni kinemilia (Sant. 1:19). ¿Kiajsikamati tein tikmachtijtokej ika Biblia? ¿Uelis kimelauas tein kiajsikamati? ¿Toni kinemilia yejua? ¿Kiita ke taixejekol tein Biblia tamachtia? (1 Tes. 2:13.) ¿Kiajsikamati ke tein momachtijtok moneki kiolinis maj kipata inemilis? (Col. 3:10.) Komo tiknekij tikmatiskej toni yekmelauj kinemilia, moneki tikchiuiliskej kuali netajtanilmej, uan satepan maj tikakikan ika nejmachkayot (Mat. 16:13-16).
4. ¿Toni moneki tikchiuaskej komo se momachtijkej kiouijmaka kiajsikamatis oso kichiuas tein tamachtia Biblia?
4 Kemej tanemilia aksa uan kemej momattok kichiuas teisa, uelis yeski semi chikauak uan xa kiuikilis miak tonalmej kipatas nejon (2 Cor. 10:5). ¿Toni tikchiuaskej komo akin tikmachtijtokej amo niman kiselia oso kichiua tein momachtia? Moneki amo tiyolijsiuiskej uan tikauaskej maj pano seki tonalmej uan ijkon iTajtol Dios uan iyektikatsin espíritu kipaleuis momachtijkej maj ajsi itech iyolo tein momachtia (1 Cor. 3:6, 7; Heb. 4:12). Komo kiouijmaka kiajsikamatis oso kichiuas se taman tein tamachtia Biblia, xa okachi kuali maj tipanokan itech okse tamachtilis. Komo tiksentokaj tiknextiliaj tein Biblia tamachtia ika netasojtalis uan amo tiyolijsiuij, xa satepan kiolinis maj kipata tein monekis.