Nechikolmej tein mochiuaj achto ke titanojnotsatiuij semi tapaleuiaj
1. ¿Itech toni taman techpaleuiaj nechikolmej tein mochiuaj achto ke titanojnotsatiuij?
1 Se tonal, Jesús mosentilij iniuan 70 imomachtijkauan achto ke kintitaniskia maj tanojnotsatij (Luc. 10:1-11). Kinyolchikauak keman kinelnamiktij ke amo yetoyaj ininselti uan ke akin kinixyekanaya katka ‘Toteko ten niaxka nijin tapixkalis’, Jiova. Uan no, kiniluij toni monekia kichiuaskej tein kinpaleuiskia maj kichiuakan tekit tein kinauatijka uan kiixtalij maj yakan “ojome”. Axkan, nechikolmej tein mochiuaj achto ke titanojnotsatiuij no techyolchikauaj, techmachtiaj uan techpaleuiaj maj tikixtalikan tein moneki.
2. Itech metsti abril, ¿kanachi minutos peuas uejkauas nechikol tein mochiua achto ke titanojnotsatiuij?
2 Hasta axkan nechikolmej tein mochiuaj achto ke titanojnotsatiuij uejkauayaj 10 oso 15 minutos. Itech nejon minutos moixtaliaya keniuj motanojnotsas, moijtouaya itech katiyejua xolalmej titekitiskiaj uan mochiuaya netataujtil. Sayoj ke itech metsti abril, nejin nechikolmej peuas uejkauas 5 oso 7 minutos. Uan komo mochiuaj satepan ke tami se nechikol, moneki okachi amo uejkauas, porin akin moajsiskej itech nejon nechikol ipa achto kiselijkejya se kuali tamachtilis ika Biblia. Maj amo semi uejkaua nechikol tein mochiua achto ke tiyaskej titanojnotsatiuij tapaleuis maj tokniuan okachi tanojnotsakan. Uan no, akin tekitij kemej precursor uan tokniuan akin peujkej tanojnotsaj achto ke mochiuas nechikol niman uelis oksepa kisentokaskej tanojnotsaskej.
3. ¿Keniuj monekiskia kiixtaliskej nechikolmej tein mochiuaj achto ke titanojnotsatiuij?
3 Nechikolmej tein mochiuaj achto ke titanojnotsatiuij moneki moixtaliskej kemej kinpaleuis tanojnotsanij. Miakej nechikolmej kiitanij ke semi tapaleuia maj amo sayoj seko mosentilikan sejse oloch tokniuan tanojnotsanij, ijkon nejin nechikolmej uan xolal kampa tanojnotsaskej xa okachi amo uejka moajsis kampa nemij tokniuan. Ijkon okachi amo ouij kiixtaliskej keniuj tekitiskej tanojnotsanij uan akin kiixyekanaj oloch tanojnotsanij uelis kinpaleuiskej akin ompa pouij. Oloch tayekananij kiitaskej toni moneki itech nechikol uan ijkon kiixtaliskej tein okachi tapaleuis. Achto ke tamis nechikol ika se netataujtil tein amo uejkauas, nochin monekiskia kimatiskej kani tanojnotsatiuij uan iuan akoni.
4. ¿Keyej nechikolmej tein mochiuaj achto ke titanojnotsatiuij motelnekij ijkon kemej oksekin?
4 Semi motelnekij ijkon kemej okseki nechikolmej. Itech nejin nechikolmej sayoj mosentiliaj akin tanojnotsatiuij, amo moneki maj yakan nochin akin pouij itech nechikol. Sayoj ke, nejon amo kijtosneki ke uelis tikauilmatiskej oso ke amo motelnekij ijkon kemej okseki nechikolmej. Ijkon kemej oksekin, Jiova kinixtalia porin ika techyololinia maj timonextilikan netasojtalis se iuan okse uan maj tikchiuakan tein kuali (Heb. 10:24, 25). Yejua ika akin kiixyekanas moneki achto kuali momachtis porin ijkon nechikol kiueyichiuas Jiova uan kinpaleuis tokniuan. Nochipa keman uelis, akin tanojnotsatiuij monekiskia mochikauaskej yetoskej itech nechikol.
Nechikolmej tein mochiuaj achto ke titanojnotsatiuij amo moneki tikauilmatiskej nion tikitaskej ke okachi amo monekij ke okseki nechikolmej
5. 1) ¿Toni tekit kichiua akin kiixyekana tanojnotsalis keman kiixtalia nechikolmej tein mochiuaj achto ke titanojnotsatiuij? 2) ¿Keniuj moneki kiixyekanaskej tokniuan siuamej nechikol tein mochiua achto ke titanojnotsatiuij?
5 Keniuj moneki momachtis akin kiixyekanas. Tein kipaleuis aksa maj kuali kiixtali se tamachtilis tein kipanoltis, moneki maj kiluikan miak tonalmej achto. No ijkon panoua iuan nechikolmej tein mochiuaj achto ke titanojnotsatiuij. Keman oloch tokniuan tanojnotsanij amo sayoj seko mosentiliskej, akin kiixyekanaj tanojnotsalis uan akin kinpaleuiaj kiixyekanaskej nechikolmej. Sayoj ke ijkuak nochin akin pouij itech se nechikol sayoj seko mosentiliskej keman tanojnotsatiuij, akin kiixyekana tanojnotsalis kiixtalis aksa maj kiyekana. Seki tokniuan akin kiixyekanaj tanojnotsalis kinmakaj se programa nochin akin kiixyekanaskej nejon nechikol uan no kitaliaj itech tablero kampa moajsij tanauatilmej. Nechikol tapaleuis komo motemaka se kuali tamachtilis uan kuali moixtalia keniuj motanojnotsas, yejua ika akin kiixyekana tanojnotsalis ika taixejekolis kiixpejpenas akin kiixyekanas nejon nechikol. Komo seki tonalmej amo yetok nion se tayekankej, se tapaleuijkej oso se tokniuj takat akin moauijya uan uelis kiixyekanas nechikol, tokniuj akin kiixyekana tanojnotsalis moneki kiixtalis se tokniuj siuat akin moauijya uan miak xiujmejya kitekitilijtok Jiova. (Xikonita taxelol “Komo se tokniuj siuat moneki kiixyekanas nechikol”.)
6. ¿Keyej moneki maj achto kuali momachti akin kiixyekanas nechikol?
6 Keman techmakaj se tamachtilis tein tikpanoltiskej itech Escuela tein Techmachtia iTekiyo Dios, amo tikauilmatij uan achto kuali timomachtiaj. Amo miakej mochiaskiaj kinemiliskej toni kijtoskej keman yajtoskiaj nechikol. Komo techixtaliaj maj tikyekanakan nechikol tein mochiua achto ke titanojnotsatiuij, no ijkon moneki tikitaskej. Axkan ke nechikol okachi amo uejkauas, moneki maj achto kuali timomachtikan porin ijkon tapaleuis uan tamis itech minutos tein ixyetok. Kuali se kiixtalis se taman no kijtosneki ke tikpiaskejya kani titanojnotsatiuij achto ke mochiuas nechikol.
7. ¿Toni ika uelis titajtoskej itech nechikol tein mochiua achto ke titanojnotsatiuj?
7 Tein uelis tikijtoskej. Kemej tataman tein kipanouaj tokniuan itech nechikolmej, yejua ika takeual takuaujtamach amo kichijchiuani se tanojnots tein mopanoltis itech sejse nechikol. Recuadro “Toni moneki ika motajtos itech nechikolmej tein mochiuaj achto ke tanojnotsatiuij”, kiualkui miak taman kemej uelis tikchiuaskej. Itech nejin nechikolmej, okachi motajtani maj tokniuan tanankilikan. Kemansa, no uelis motemakas se ixneskayot oso se video tein moajsi itech jw.org tein tapaleuis itech tanojnotsalis. Keman momachtijtos akin kiixyekanas nejon nechikol, moneki kinemilis toni uelis kinyolchikauas uan kinpaleuis tokniuan akin tanojnotsatiuij nejon tonal.
Keman momachtijtos akin kiixyekanas nechikol tein mochiua achto ke titanojnotsatiuij, moneki kinemilis toni kinyolchikauas uan kinpaleuis tokniuan tein tanojnotsatiuij nejon tonal
8. ¿Toni okachi uelis tapaleuis itech nechikolmej tein mochiua achto ke titanojnotsatiuij itamian semana?
8 Tonal sábado miakej tanojnotsanij kitemakaj amaix Tanejmachtijkej uan ¡Despertad! Komo amaixmej amo moajsij itech motajtol, kuali yeskia maj motemakakan komo kampa titanojnotsaj moajsi taltikpakneminij tein tajtouaj español uan amo moajsi se nechikol ompakauin ika nejon tajtol. Tein okachi kuali, yejua maj motemaka amaixmej ika tajtol tein ixyetok nechikol. Miakej akin tanojnotsatij sábado amo uelij kisaj itajkotian semana, yejua ika xa kinouijmaka kielnamikiskej ixneskayot tein momamachtijkej itech Youak keman Taueyichiuaj kemej Kalyetouanij. Yejua ika, uelis tapaleuis maj tokniuj akin kiixyekana nechikol kiita seki ixneskayomej tein ixnesij itech amaix ITekiyo Dios tein Tikchiuaj itech itamian página. Okse taman tein uelis mochiuas yejua maj moita keniuj no ika titajtoskej se tanauatil tein tikitakej itech televisión, se taman tein panok oso se iluit tein mochiua itech toxolal keman monextijtos keniuj tiktemakaskej revistas. No uelis ika motajtos toni tikijtoskej tein tapaleuis maj oksepa iuan titajtokan akin kiselij amaixmej. Uan no, komo ompa moajsi se tokniuj akin kitemakatokya amaixmej itech nejon metsti, uelis kiluiskej maj kijtoj keniuj kichiua oso maj kijto se taman tein kuali kipanok. Tonal domingo no ijkon uelis mochiuas ika amaixmej tein motemakatoskej itech nejon metsti. Itech nejon nechikolmej no uelis ika motajtos keniuj motemakaskej seki amaixmej, kemej neskayot amaix Kuali tanauatilmej uan Maj tikakikan Dios oso amaix Tamachtia Biblia, tein tiktemakaj itech tein yeski tonal uan tikuij keman tiktemakaj nemachtilmej ika Biblia.
9. Keman nechikol kichiuas se ueyi tekit, ¿toni ika uelis motajtos itamian semana itech nechikol tein mochiua achto ke titanojnotsatiuij?
9 Keman nechikol kichiujtos se ueyi tekit itech tanojnotsalis, itamian semana uelis moitas keniuj motemakaskej revistas iuan tayoleualis oso tratado, oso toni kichiuaskej komo aksa kinextia ke kineki kimatis okachi. Okse taman tein uelis mochiuas yejua maj moijto tein kuali kipanouanij tokniuan itech tanojnotsalis tein kinextis ke ueyi tekit tein kichiua nechikol semi tapaleuia.
10, 11. ¿Keyej moneki maj tanojnotsanij kichiuakan tein monekis achto ke mochiuas nechikol?
10 Keniuj uelis kuali kiixtaliskej tein monekis tanojnotsanij. Tanojnotsanij no tapaleuiskej maj nechikol kuali kisa. Komo kuali momachtiaj achto toni kijtoskej itech tanojnotsalis, xa keman taueyichiuaskej kemej kalyetouanij, ijkon uelis kijtoskej tein tapaleuis itech nechikol. Kuali kisas totanojnotsalis, komo achto ke mochiuas nechikol tikpiajya amaixmej tein tikuiskej. Nejon techpaleuis maj niman tiajsikan kampa ixyetok titanojnotsaskej.
11 No semi moneki maj timochikauakan tiajsiskej seki minutos achto ke peuas nechikol, ijkon kemej tikchiuaj ika okseki nechikolmej. Komo timotajkajtiliaj, amo sayoj tikintapololtiskej tokniuan, ta no uelis tikchiuaskej maj mopata tein moixtalijya. ¿Keniuj? Tokniuj akin kiixyekana nechikol kiita miak taman achto ke kiixtalis keniuj tekitiskej oloch tokniuan tanojnotsanij. Kemej neskayot, komo amo miakej moajsij itech nechikol xa uelis kintitanis nochin itech se xolal tein ayamo motamitanojnotsani. Komo nejin xolal uejka moajsi, xa kintitanis akin amo kipiaj tepos iniuan akin kemaj kipiaj. Uan komo tanojnotsatij kampa tamouililpan, xa kiniluis seki tokniuan takamej maj tanojnotsakan iniuan oso ompakauin kampa tanojnotstokej se oloch tokniuan siuamej. Komo se tokniuj mokokoua, xa kititanis kampa amo taouijkan. Oso uelis kiniluis tokniuan akin kiuikajya miak xiujmej kemej tanojnotsanij maj kisakan iniuan akin yankuixtok peujkej tanojnotsaj. Sayoj ke komo timotajkajtiliaj, tokniuj akin kiixyekana tanojnotsalis monekis oksepa kiixtalis keniuj motanojnotsas uan kipatas tein ixyetoyaya. Tein melauj, kemansa tinochin uelis timotajkajtiliskej porin panoua se taman tein amo tikchiayaj. Sayoj ke, komo nochipa ijkon techpanoua, xa monekis tikitaskej ox yeski porin amo tikpatiuitaj nechikolmej tein mochiuaj achto ke titanojnotsatiuij oso porin moneki okachi kuali tikixtaliskej seki taman.
12. Komo nochipa titanojnotsaj iniuan sayoj seki tokniuan, ¿toni uelis tikixtaliskej tikchiuaskej?
12 Tokniuan uelis kiixtaliskej achto akoni iuan tanojnotsaskej oso uelis mochiaskej maj tokniuj akin kiixyekana nechikol kiixtali akoni iuan kisaskej. Sayoj ke komo nochipa tikisaj iniuan sayoj seki tokniuan, ¿ueliskia tiktemoskej titanojnotsaskej iniuan nochin tokniuan akin pouij itech nechikol? (2 Cor. 6:11-13.) ¿Ueliskia kemansa tikisaskej iuan se tokniuj akin yankuixtok peuak tanojnotsa uan ijkon tikpaleuiskej maj okachi kuali tamachti? (1 Cor. 10:24; 1 Tim. 4:13, 15.) Keman mochiujtos nechikol maj kuali tikakikan tein technauatiskej maj tikchiuakan, kemej kani moneki tipeuaskej titanojnotsaskej. Keman tamis nechikol, maj amo tiktemokan tikpataskej tein moixtalijya uan maj niman tiyakan kampa titanojnotsaskej.
13. Komo tinochin tikchiuaj tein moneki, ¿keniuj techpaleuiskej nechikolmej tein mochiuaj achto ke titanojnotsatiuij?
13 Imomachtijkauan Jesús tein katkaj 70 akin kinixtalij keniuj tanojnotsaskej “mokuepke ya de nintanojnotsalis ika ueyi pakilis” (Luc. 10:17). Tikyekmatij, maj Jesús mosentiliani iniuan achto tapaleuij maj kuali kisani inintanojnotsalis. Tonechikoluan tein mochiuaj achto ke titanojnotsatiuij no ijkon techpaleuiaj. Komo tikchiuaj tein moneki, nejon nechikolmej techyolchikauaskej, techmachtiskej uan techpaleuiskej maj tikixtalikan tein moneki uan ijkon “tekiuajyot motetapouis semanauak taltikpak” (Mat. 24:14, TNM).