Nepaleuilmej tein ika titamachtiaj
1. ¿Keniuj akin kichiuaj kemej Cristo tamatij kemej se tamachijchiujkej?
1 Tamachijchiuanij kipiaj miak nepaleuilmej tein ika tekitij. Seki sayoj kikuij itech seki taman, uan okseki nochipa kitekitiltijtokej. Akin miak xiujmejya kichiujtokej nejin tekit nochipa kiuikaj nepaleuilmej tein okachi kikuij, tein okachi kuali kitekitiltiaj. ITajtol Dios techyolchikaua maj kuali tikchiuakan tekit itech tanojnotsalis. Tein melauj, sejse itaixpantijkauj Jiova moneki yeski se kuali tekitikej, ‘uan ijkon amo teyi onkas tenika para mopinautis’ (2 Tim. 2:15). ¿Katiyejua nepaleuil tein okachi tikuij? Yejua Biblia, tein ika tikinpaleuiaj oksekin maj mochiuakan imomachtijkauan Jesús (Mat. 28:19, 20). Yejua ika, moneki timochikauaskej kuali ‘tiktekitiltiskej in Tajtoltsin de Dios’. Sayoj ke, tinochin akin tikchiuaj kemej Cristo moneki tikmatiskej kuali tiktekitiltiskej okseki nepaleuilmej tein okachi tikuij uan tein ika tikinmachtiaj oksekin iTajtol Dios (Prov. 22:29).
2. ¿Katiyejua nepaleuilmej tein okachi tikuij keman titamachtiaj?
2 Nepaleuilmej tein okachi tikuij keman titamachtiaj. ¿Toni okseki nepaleuilmej tikpiaj? Amaix ¿Toni yekmelauj tamachtia Biblia? yejua tein okachi tikuij keman tiktemakaj nemachtilmej ika Biblia. Keman timotamimachtiaj nejin amaix iuan momachtijkej, satepan tikuij amaix “Xiksentokakan itech inetasojtalis Dios” uan ijkon uelis kimatis keniuj monejnemiltis kemej tamachtia Biblia. Yejua ika, moneki tikixmatiskej uan tikmatiskej kuali tiktekitiltiskej nejin ome amaixmej. No tikpiaj seki folletos kemej nepaleuilmej. Kemej neskayot, amaix Kuali tanauatilmej tein Dios kitemaka techpaleuia maj tikpeualtikan nemachtilmej ika Biblia. Komo kampa titanojnotsaj tikinajsij akin kinouijmaka taixtajtoltiskej oso tajtouaj okse tajtol uan amo onkak amaixmej itech nejon tajtol oso sayoj seki, uelis tikuiskej folletos Maj tikakikan Dios oso Maj tikakikan Dios uan tinemiskej nochipaya. Okse nepaleuil tein moneki tikpiaskej yejua amaix ¿Akonimej kichiujtokej itanejnekilis Jiova itech nejin tonalmej?, tein kipaleuia momachtijkej maj kiixmati inechikol Jiova. Videos ¿Keyej moneki timomachtiskej Biblia?, ¿Keniuj mochiua se nemachtil ika Biblia? uan ¿Keniuj tikchiuaj tonechikoluan?, no techpaleuiaj maj tikchiuakan imomachtijkauan Cristo uan monekiskia tikmatiskej kuali tikintekitiltiskej.
3. ¿Toni timomachtiskej itech amaix ITekiyo Dios tein Tikchiuaj tein satepan kisaskej?
3 Itech amaix ITekiyo Dios tein Tikchiuaj tein satepan kisaskej timomachtiskej keniuj uelis kuali tiktekitiltiskej amaixmej tein tikpiaj kemej nepaleuilmej tein ika titamachtiaj. Komo timochikauaj kuali tiktekitiltiskej, tikchiujtoskej nejin tayolmajxitilis tein kitemaka Biblia: “Xiktakamati de motanextililisuan tenika tejua titamachtijtinemi [...]. Uan xiksentoka xikchiutiu nochi ten nimitsilia. Porin komo tikchiuati nijin ten nimitsnajnauatijtok, ijkon timomakixtis tejua uan no tikinmakixtis nochi naken mitskakilijtinemiske” (1 Tim. 4:16).