¿Kipatanij tein kijtoua Biblia?

Sekin motajtaniaj ox Biblia mopatani. Isaías se takat akin kitematiltiaya tein Dios kijtouaya kijtoj ke “itajtol toDios uejkaua nochipaya” (Isaías 40:8). ¿Keniuj uelis tikneltokaskej ke tein Dios kijtoj ke mochiuas amo mopatani ijkon kemej yekinika moijkuiloj?

Dios ueli kichiua maj amo ixpoliui iTajtol uan maj amo akin kipata. Ne uejkauj keman tajkuilouanij kipanoltiayaj tajkuilolmej okseko, kipouayaj sejse letra uan ijkon kiitayaj maj amo teyi kipatilianij, kikixtilianij nion kimajxitilianij. Kemej titajtakouanij sekin tajkuilouanij tepitsin mopolojkej, sayoj ke amo mopata kemej yekinika moijkuiloj Biblia.

¿KEYEJ UELIS TIKNELTOKASKEJ KE TEIN BIBLIA KIJTOUA AJSITOK IJKON KEMEJ TEIN YEKINIKA MOIJKUILOJ?

Ne uejkauj, miakpa kimaijkuilojkej iTajtol Dios uan axkan moajsij miles nejon amatajkuilolmej. Komo itech semej tepitsin mopata, uelis se kinitas okseki amatajkuilolmej uan ijkon se kimatis ox mopolojkej (komo tikonneki tikonmatis okachi, xikonita jw.org uan xikonita tamachtilis “¿Se ha cambiado o manipulado la Biblia?”).

Maj titanemilikan itech amatajkuilolmej tein uejkaujya kayomej tein moixmatij kemej Rollos del mar Muerto, tein kinajsikej itech xiuit 1947 itech seki tekoyokmej ompa mar Muerto. Itech nejin tajkuilolmej no kipia iTajtol Dios tein moijkuilojkej panoua ome mil xiujmejya. Sekin motelmachtianij kiitakej amatatetekuinolmej tein kinajsikej uan Biblia tein axkan tikpiaj. ¿Toni kiajsikamatkej?

Nejon motelmachtianij kiitakej ke iTajtol Dios tein axkan tikpiaj ijkuiliujtok ijkon kemej tein yekinika moijkuiloj.a Yejuan kiitakej ke Biblia tein axkan tikpiaj yejua iTajtol Dios. Yejua ika tikitaj ke Dios kichiuak maj iTajtol kisentoka ajsito hasta axkan.

Yejua ika uelis tikneltokaskej ke iTajtol Dios takuaujtamach. Ne uejkauj, moajsiaj seki takamej tein kitematiltiayaj tein Dios kijtouaya, ¿toni techmachtiaj kemej tanemilia Dios?