Semi tiktasojtaj toTajtsin, Jiova

1, 2. ¿Keyej Jiova kineki maj timoajsikan iniuan itekitikauan, uan keniuj kichiuak?

JIOVA kineki maj timoajsikan iniuan itekitikauan akin kemej yeskiaj kalyetouanij. ¡Nejin se kualtsin tayoleualis! Itekitikauan motemaktijkej iuan, uan takuaujtamatij itech inemilis iKonetsin tein kitemakak. Uan tiyolpakij kemej kalyetouanij. Kemej axkan tinemij techyolpaktia uan no tiyolpakij porin tikchiaj tinemiskej nochipaya, ompa iluikak oso itech xochital nikan taltikpak.

² Jiova semi techtasojta, yejua ika kichiuak se taman tein semi kiyolkokoj uan ijkon ueliskia timochiuaskej tiichankauan (Juan 3:16). Biblia kijtoua ke techkouak “ika ueyi patiyot” (1 Cor. 6:20). Ika inemilis Jesús tein kitemakak, Dios tapaleuij maj kuali iuan timouikakan. Tikpiaj tatiochiualis tiknotsaskej kemej toTajtsin akin okachi ueyichiujkej itech nochi semanauak. Uan kemej tikitakej itech achto tamachtilis, yejua akin okachi kuali toPopaj tein uelis tikpiaskej.

3. ¿Toni netajtanilmej xa timochiuiliskej? (No xikonita recuadro “¿Nechita Jiova?”.)

³ Xa no timotajtaniskej tein motajtanij se akin kijkuiloj Biblia. Yejua kijtoj: “¿Keniuj nikixtauilis Jiova nochi tein kuali tein noka kichiuani?” (Sal. 116:12). Tein melauj, amo keman uelis tikixtauiliskej toTajtsin tein toka kichiuani. Sayoj ke, kemej techtasojta nejon techolinia maj tiktasojtakan. Tatitanil Juan kijkuiloj: “Tiktasojtaj Dios porin Yejuatsin achto techtasojtak” (1 Juan 4:19). Yejua ika, ¿keniuj uelis tiknextiliskej toTajtsin ke tiktasojtaj?

MAJ AMO TIKAUAKAN JIOVA

4. Kemej kijtoua Santiago 4:8, ¿keyej moneki tiktemoskej timotokiskej iuan Jiova?

⁴ Jiova kineki maj iuan timotokikan uan maj iuan titajtokan (xikonixtajtolti Santiago 4:8). Techiluia maj nochipa tiktataujtikan uan yejuatsin nochipa kineki techkakis (Rom. 12:12). Amo keman kijtos ke amo kemanti oso ke semi sioujtok. ¿Uan keniuj tikakij tejuan? Keman tikixtajtoltiaj iTajtol, Biblia, uan amaixmej tein techpaleuiaj maj tikajsikamatikan. No keman kuali tikakij tein techmachtiaj itech nechikolmej. Ijkon kemej konemej kuali mouikaj iniuan inintatuan porin nochipa iniuan tajtouaj, nochipa titajtoskej iuan Jiova techpaleuia maj iuan timotokikan.

5. ¿Keniuj uelis okachi kuali tiktataujtiskej Jiova?

⁵ ¿Keniuj tiktataujtiaj Jiova? Yejuatsin kineki maj tikiluikan tein tikmachiliaj uan tein tiknemiliaj (Sal. 62:8). Yejua ika, maj timotajtanikan: “Keman niktataujtia, ¿nochipa nikiluia sayoj se taman? ¿Oso nikiluia tein yekmelauj nikmachilia uan niknemilia?”. Semi tiktasojtaj Jiova uan tiknekij nochipa iuan timouikaskej. Yejua ika, moneki maj nochipa iuan titajtokan. Maj nochi tikiluikan, tein techyolpaktia uan tein techtekipachoua. Uelis senkis tikmatiskej ke uelis tiktemoskej keman tiknekiskej maj techpaleui.

6. ¿Toni moneki tikchiuaskej tein techpaleuis maj tiksentokakan kuali timouikakan iuan Jiova?

⁶ Komo iuan timotasojkamatij Jiova uelis tiksentokaskej kuali timouikaskej iuan. Titanemiliaj kemej salmista, akin kijtoj: “¡Miak taman tikchijchiuani, Jiova noDios! Semi miak tein tikchijchiuani tein semi kualtsin uan tein toka tiknemilia, amo akin kemej tejua. Komo niknekiskia ika nitajtos, semi miakej yeskiaj, okachi ke tein ueli nikinpoua” (Sal. 40:5). Amo sayoj tikijtouaj ke timotasojkamatij, ta tiknextiliaj Jiova ika tein tikijtouaj uan tikchiuaj. Axkan miakej amo ijkon kichiuaj. Taltikpakneminij amo kitasojkamatiliaj Dios tein kinmaka. Nejon tein kichiuaj kinextia ke tinemij itech itamian tonalmej (2 Tim. 3:1, 2). Maj amo keman tikchiuakan kemej yejuan.

7. ¿Toni kineki Jiova maj tikchiuakan, uan keyej?

⁷ Tetatmej amo kinekij maj ininkoneuan moteuikan, ta maj kuali mouikakan. Jiova no kineki maj ijkon mouikakan ikoneuan. Netasojtalis tein timopialiaj se iuan okse techixnextia kemej akin yekmelauj kichiuaj kemej Cristo (Juan 13:35). Se itekitikauj Dios kijkuiloj: “¡Semi kuali uan semi teyolpaktij maj tokniuan kualtsin sennemikan!” (Sal. 133:1). Keman tikintasojtaj tokniuan, tiknextiliaj Jiova ke no tiktasojtaj (1 Juan 4:20). Semi kualtsin maj timoajsikan kemej kalyetouanij iniuan tokniuan akin ‘mopaleuiaj ika tetasojtalis se uan okse’ uan moikneliaj (Efes. 4:32).

MAJ TIKTAKAMATIKAN JIOVA PORIN TIKTASOJTAJ

8. Kemej kijtoua 1 Juan 5:3, ¿toni okachi techolinia maj tiktakamatikan Jiova?

⁸ Jiova kineki maj konemej kintakamatikan inintatuan uan no kineki maj tejuan tiktakamatikan tein technauatia (Efes. 6:1). Yejuatsin techchijchiuak, techmaka tein techpaleuia maj tiyoltokan uan yejua tePopaj akin okachi tamatkej, yejua ika kinamiki maj tiktakamatikan. Sayoj ke tein okachi techolinia maj tiktakamatikan yejua netasojtalis tein tikpialiaj (xikonixtajtolti 1 Juan 5:3). Maski onkak miak taman keyej moneki tiktakamatiskej, yejuatsin amo techchikaujkauia. Techkaua maj tejuan tikixpejpenakan, yejua ika yolpaki keman tikixpejpenaj tiktakamatiskej porin tiktasojtaj.

9, 10. ¿Keyej moneki tikixmatiskej itanauatiluan Jiova uan tikintakamatiskej?

⁹ Tetatmej kinekij maj ininkoneuan kuali yetokan. Yejua ika, kiniluiaj toni uelis kichiuaskej uan toni amo. Konemej akin kintakamatij inintatuan kinextiaj ke takuaujtamatij iniuan uan ke kinpoujkaitaj. Komo konemej moneki kichiuaskej nejon, okachiok tejuan moneki tikixmatiskej itanauatiluan toTajtsin uan tikintakamatiskej. Komo ijkon tikchiuaj, tiknextiliskej Jiova ke tiktasojtaj uan ke tikpoujkaitaj. Uan nejon techpaleuis maj kuali tiyetokan (Is. 48:17, 18). Sayoj ke, akin amo kinekij motokiskej iuan Dios nion kitakamatiskej itanauatiluan, tajyouiaj (Gál. 6:7, 8).

¹⁰ Tinemiskej kemej Jiova technauatia techpaleuia maj kuali tiyetokan, maj kuali timomachilikan uan maj kuali iuan timouikakan. Yejuatsin kimati toni okachi techpaleuia. Aurora, se tokniuj siuat akin nemi Estados Unidos, kijtoua: “Nikmati ke komo tiktakamatij Jiova, nochipa kuali tinemiskej”. Uan nejon melauak. Maj timotajtanikan: “¿Keniuj nechpaleuiani niktakamatis itanauatiluan Jiova?”.

11. ¿Keniuj techpaleuia netataujtil?

¹¹ Netataujtil techpaleuia maj titatakamatikan hasta keman ouij techkisas. Kemej tinochin titajtakolejkej, kemansa techouijmaka tiktakamatiskej Jiova. Sayoj ke moneki timochikauaskej tiktakamatiskej. Se akin kijkuiloj salmo kitataujtij Dios: “Xikchiua maj nikneki nimitstakamatis” (Sal. 51:12). Denise, akin precursora regular, kijtoua: “Komo nechouijmaka niktakamatis se itanauatil Jiova, niktataujtia maj nechpaleui maj nikchiua tein kuali”. Uelis senkis tikmatiskej ke Dios nochipa technankilis keman tiktajtaniskej nejon (Luc. 11:9-13).

MAJ TIKINPALEUIKAN OKSEKIN MAJ NO KITASOJTAKAN TOTAJTSIN

12. ¿Toni kijtoua Efesios 5:1 maj tikchiuakan?

¹² (Xikonixtajtolti Efesios 5:1.) Kemej ‘Dios semi techyoltasojta porin tiikoneuan’, timochikauaj tikchiuaskej kemej yejuatsin. Tikchiuaj kemej yejuatsin keman tikinnextiliaj oksekin ke tikintasojtaj, tikualtakamej iniuan uan tikintapojpoluiaj. Akin amo kiixmatij Dios xa kinekiskej okachi kiixmatiskej komo kiitaj ke tikchiuaj tein kuali (1 Ped. 2:12). Tetatmej akin kichiuaj kemej Cristo moneki kintasojtaskej ininkoneuan ijkon kemej Jiova techtasojta. Komo kichiuaj, ininkoneuan xa no kinekiskej kuali mouikaskej iuan toTajtsin akin semi techtasojta.

13. ¿Toni techpaleuis maj amo tipinauakan tikteixmatiltiskej Jiova?

¹³ Miakpa, konemej kinekij maj oksekin kimatikan akoni ininpopaj uan yolpakij ika tajtoskej. No ijkon, tejuan tiyolpakij ika titajtoskej Totajtsin, Jiova, uan tiknekij maj oksekin kiixmatikan. Timomachiliaj kemej tekiuaj David, akin kijkuiloj: “Ika miak pakilis nikteixmatiltis Jiova” (Sal. 34:2). Sayoj ke tisekimej xa tipinauaj uan yejua ika amo tikteixmatiltiaj toTajtsin. ¿Toni techpaleuis? Komo tikelnamikij ke semi tikyolpaktiskej Jiova komo tikteixmatiltiaj uan ke oksekin semi kinpaleuis komo kiixmatij. Yejuatsin techpaleuis maj tiknextikan yolchikaualis. Ijkon kemej kinpaleuij tokniuan itech yekinika siglo, tejuan no techpaleuis (1 Tes. 2:2).

14. ¿Keyej moneki maj tikintapouikan oksekin tein Biblia tamachtia?

¹⁴ Jiova amo akin kichikotasojta uan yolpaki keman kiita ke tikintasojtaj oksekin, maski seseko kayomej (Hech. 10:34, 35). Se taman kemej uelis tikinnextiliskej oksekin ke tikintasojtaj yejua keman tikintapouiaj tein Biblia tamachtia (Mat. 28:19, 20). ¿Keniuj tapaleuia nejon? Akin techkakiskej kuali nemiskej axkan uan satepan uelis nemiskej nochipaya (1 Tim. 4:16).

MAJ TIKTASOJTAKAN TOTAJTSIN UAN TIYOLPAKISKEJ

15, 16. ¿Toni kichiua maj tiyolpakikan?

¹⁵ Jiova toTajtsin akin semi techtasojta uan kineki maj ikalyetouanij yolpakikan (Is. 65:14). Maski tikpanoskej ouijkayomej, tikpiaj miak taman tein kichiua maj axkan tiyolpakikan. Kemej neskayot, senkis tikneltokaj ke toTajtsin semi techtasojta. Tikmatij tein yekmelauj tamachtia iTajtol, Biblia (Jer. 15:16). Uan tikinpiaj kemej tochankauan akin kitasojtaj Jiova, kitakamatij itanauatiluan uan motasojtaj se iuan okse (Sal. 106:4, 5).

¹⁶ No tiyolpakij porin tikmatij ke satepan okachi kuali tinemiskej. Tikmatij ke amo uejkaua Jiova kinixpolos akin amo yolkualmej uan ika iTekiuajyo kichiuas se xochital nikan taltikpak. Uan no, tikmatij ke mikemej oksepa nemiskej uan mosentiliskej iniuan akin kintasojtaj (Juan 5:28, 29). ¡Nejon semi kualtsin yeski! Uan tein okachi tayekantok yejua ke senkis tikmatij ke amo uejkaua nochin ompa iluikak uan nikan taltikpak kiueyichiuaskej uan kiueyitaliskej toTajtsin, ijkon kemej kinamiki.