Tinochin tikpiaj se tekit itech inechikol Jiova

1. ¿Toni tatiochiualis tikpiaj?

SE UEYI tatiochiualis maj timoajsikan itech inechikol Jiova. Tinochin kuali timomachiliaj uan tiyolpakij keman tikueyichiuaj Jiova iniuan tokniuan. Sayoj ke, ¿toni tekit tikpiaj itech nechikol?

2. ¿Toni neskayot ika tajtoj tatitanil Pablo itech miak amamej tein kijkuiloj?

² Itech miak amamej tein tatitanil Pablo kijkuiloj, ika tajtoj se neskayot tein techmachtia miak taman. Kijtoj ke nechikol kemej yeskia se taltikpaknenkej uan akin ompa moajsij kemej yeskia kemej chijchiujtok nejon taltikpaknenkej (Rom. 12:4-8; 1 Cor. 12:12-27; Efes. 4:16).

3. ¿Toni eyi taman tikitaskej itech nejin tamachtilis?

³ Itech nejin tamachtilis, tikitaskej eyi taman tein techmachtia neskayot tein Pablo ika tajtoj. Yekinika, tikitaskej ke tisejsemej tikpiaj se tekit itech inechikol Jiova.b Ojpatika, tikitaskej toni uelis tikchiuaskej komo ouij techkisa tikmatiskej katiyejua tekit tikpiaj itech nechikol. Uan expatika, tikitaskej keyej moneki tikchiuaskej tekit tein Jiova techmakatok.

TINOCHIN TIKPIAJ SE TEKIT ITECH INECHIKOL JIOVA

4. ¿Toni techmachtia tein kijtoua Romanos 12:4, 5?

⁴ Yekinika taman tein techmachtia neskayot tein Pablo ika tajtoj, yejua ke tisejsemej tikpiaj se tekit itech inechikol Jiova. Pablo yekinika kijtoj: “Se inakayo kipia miak tataman omime uan nochi nojon omitsitsin amo tekititinemij sanse san. Uan no ijkon mochiutok topan [...]. Maski tejuan semi timiakke, pero timochiuakoj sanse porin nochi tejuan tisenpoutinemij iuan Cristo uan no tisenpoutinemij se uan okse” (Rom. 12:4, 5). Pablo kijtosnekia ke maski tikpiaj tataman tekit itech nechikol, Jiova techpatiuita tinochin.

5. ¿Toni kitemakak Jiova itech nechikol?

⁵ Keman ika titajtouaj akin kipiaj se tekit itech nechikol xa inintech titanemiliaj akin taixyekanaj ompa (1 Tes. 5:12; Heb. 13:17). Melauak ke itechkopa Cristo, Jiova kintemakak “takamej kemej netetayokolilmej” itech nechikol (Efes. 4:8, TNM). Nejin takamej yejuan tokniuan Oloch Taojtokaltianij uan akin kinpaleuiaj, Taixyekananij itech Sucursal, tokniuan takalpanouanij, akin kinmachtiaj tokniuan akin kinyoleuaj maj kiselikan se tamachtilis, tokniuan tayekananij uan tapaleuianij. Ika iyektikatsin espíritu, Jiova kinixpejpenak nejin tokniuan maj kinyekpiakan iichkauan akin semi kinpatiuita, uan maj kinyolchikauakan (1 Ped. 5:2, 3).

6. Kemej kijtoua 1 Tesalonicenses 2:6-8, ¿toni mochikauaj kichiuaskej tokniuan takamej akin Jiova kinixtalij ika iyektikatsin espíritu?

⁶ Ika iyektikatsin espíritu, Jiova kinixtalia tokniuan takamej maj kichiuakan tataman tekimej. Ijkon kemej tomauan, tometsuan uan okseki taman tein tikpiaj kichiuaj tataman tekimej tein techpaleuiaj, tokniuan takamej kichiuaj tataman tekimej itech nechikol tein techpaleuia tinochin. Amo kitemouaj maj kinueyitalikan, ta mochikauaj kinpaleuiskej uan kinyolchikauaskej tokniuan (xikonixtajtolti 1 Tesalonicenses 2:6-8). Tiktasojkamatiliaj Jiova porin kinixtalij nejin tokniuan takamej akin okachi kitayekanaltiaj kinpaleuiskej oksekin.

7. ¿Toni tatiochiualismej kiseliaj precursores uan misioneros?

⁷ Xa itech tonechikol moajsij misioneros, precursores especiales oso precursores regulares. Tein melauj, itech nochi taltikpak moajsij tokniuan takamej uan siuamej akin miak tonalmej tanojnotsaj uan kinmachtiaj oksekin. Ijkon kinpaleuianij miakej maj mochiuakan itatojtokakauan Cristo. Maski miakej nejin tokniuan amo kipiaj miak tomin oso miak taman, Jiova semi kintatiochiuiani (Mar. 10:29, 30). ¿Melauj ke semi tiktasojkamatij maj nejin tokniuan moajsikan itech tonechikol?

8. ¿Keyej Jiova kipatiuita sejse tokniuj tanojnotskej?

⁸ ¿Sayoj tokniuan takamej akin taixyekanaj, misioneros uan precursores kipiaj se tekit itech nechikol? Amo. Jiova semi kipatiuita sejse tokniuj tanojnotskej uan yejuan semi tapaleuiaj itech nechikol (Rom. 10:15; 1 Cor. 3:6-9). Ijkon tikijtouaj porin se taman tein okachi moneki tikchiuaskej itech nechikol, yejua tikinpaleuiskej oksekin maj mochiuakan itatojtokakauan Cristo (Mat. 28:19, 20; 1 Tim. 2:4). Nochin tokniuan tanojnotsanij, akin moauijkejya uan akin ayamo, mochikauaj kitayekanaltiskej nejin tekit (Mat. 24:14).

9. ¿Keyej tikinpatiuitaj tokniuan siuamej?

⁹ ¿Uan tokniuan siuamej? Jiova kinmaka se tekit tein semi moneki itech nechikol. Yejuatsin semi kinpatiuita nochin tokniuan siuamej akin nochipa kitekitiliaj, kemej tokniuan siuamej akin kipiaj ininnamik uan akin amo, akin kipiaj ininkoneuan uan akin ininnamik amo nemiok. Biblia ininka tajtoua miakej siuamej akin kiyolpaktijkej Dios porin kinextijkej tamatilis, takuaujtamatilis, yolchikaualis, kitekitilijkej ika yolpakilis uan kinpaleuijkej oksekin ika tein kipiayaj (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Itech nechikolmej moajsij tokniuan siuamej akin kinextiaj nejin kualtsitsin kualneskayomej. Semi tiktasojkamatiliaj Jiova porin touan moajsij.

10. ¿Keyej tikinpatiuitaj tokniuan akin xiuejkejya?

¹⁰ No techyolpaktia maj moajsikan itech nechikol miakej tokniuan akin xiuejkejya. Sekin miak xiujmejya kitekitilijtokej Jiova. Oksekin xa yankuixtok kiixmatkej tamachtilis tein melauak. Miakej nejin tokniuan xa mokokouaj uan amo semi uelijok kitekitiliaj Jiova itech nechikol nion itech tanojnotsalis. Maski ijkon, mochikauaj tanojnotsaskej uan kinyolchikauaj uan kinmachtiaj oksekin. ¡Uan semi techpaleuia nochi tein kimatij! Jiova semi kinpatiuita tokniuan akin xiuejkejya, uan tejuan no (Prov. 16:31).

11, 12. ¿Keniuj mitsonyolchikaua ininneskayo telpochmej uan ichpochmej akin moajsij itech monechikol?

¹¹ Maj no ininka titajtokan tokniuan telpochmej uan ichpochmej. Yejuan kipanouaj miak kuejmolmej porin itech nejin taltikpak taixyekana Satanás uan miakkan moita itanemililuan (1 Juan 5:19). Sayoj ke semi techyolchikaua tikinitaskej itech tanojnotsalis uan tikakiskej inintanankililuan itech nechikolmej, uan no techyolchikaua tikmatiskej ke ika tajtouaj tein kineltokaj keman kinchiuiliaj netajtanilmej. Telpochmej uan ichpochmej, namejuan nankipiaj se tekit tein semi moneki itech inechikol Jiova (Sal. 8:2).

¹² Sayoj ke, seki tokniuan takamej uan siuamej kinemiliaj ke amo tapaleuiaj itech nechikol. ¿Toni uelis techpaleuis maj tikitakan ke tisejsemej tikpiaj se tekit itech nechikol? Maj tikitakan.

KENIUJ TIKMATISKEJ KE TIKPIAJ SE TEKIT ITECH NECHIKOL

13, 14. ¿Keyej sekin uelis kinemiliskej ke amo tapaleuiaj itech nechikol?

¹³ Ojpatika taman tein techmachtia neskayot tein Pablo ika tajtoj kinextia se taman tein miakej kinpanoua: kinemiliaj ke amo tapaleuiaj itech nechikol. Pablo kijkuiloj: “Amo uelis tomets mosekokauas den totakayo komo yejua kijtoskia ijkuin: ‘Komo nejua amo nimayit, ika ya nojon amo nipoui iuan nijin takayotʼ. Uan amo no ueli tonakayo kijtoskia ijkuin: ‘Komo nejua amo niixtololo, ika ya nojon amo nipoui iuan nijin takayot’” (1 Cor. 12:15, 16). ¿Toni techmachtiaj nejin tajtolmej?

¹⁴ Komo tikitaj tein kichiuaj okseki tokniuan itech nechikol uan tein tejuan tikchiuaj, xa tiknemiliskej ke amo titapaleuiaj. Seki tokniuan kuali tamachtiaj, kuali taixyekanaj oso kimatij keniuj kinyolchikauaskej uan kinyolseuiskej oksekin, uan xa tiknemiliskej ke tejuan amo ueli tikchiuaj nejon. Nejin kinextia ke tiyolyemankej uan ke tikajsikamatij ke amo nochi ueli tikchiuaj (Filip. 2:3). Sayoj ke moneki timoyekpiaskej. Komo nochipa tiknemiliaj ke tejuan amo ueli tikchiuaj tein oksekin kichiuaj, amo kuali timomachiliskej. Kemej kijtoj Pablo, xa hasta tiknemiliskej ke nion tepitsin titapaleuiaj itech nechikol. ¿Toni techpaleuis maj amo ijkon titanemilikan?

15. ¿Toni techajsikamatiltia 1 Corintios 12:4-11 ika tein tiuelij tikchiuaj?

¹⁵ Maj itech titanemilikan nejin: itech yekinika siglo Jiova kinmakak seki tokniuan “tataman uelilisme” ika iyektikatsin espíritu (xikonixtajtolti 1 Corintios 12:4-11). Maski sejse tokniuj kimakak se taman “uelilis”, yejuatsin nochin kinpatiuitaya. Axkan amo tikpiaj “uelilisme” tein kitemaka Jiova ika iyektikatsin espíritu. Sayoj ke maski tataman tein tiuelij tikchiuaj, yejuatsin no techpatiuita tinochin.

16. ¿Toni tein tayolmajxitij tatitanil Pablo moneki tikchiuaskej?

¹⁶ Maj amo tiknemilikan ke oksekin okachi kuali kichiuaj teisa, ta okachi kuali maj tikchiuakan tein tayolmajxitij tatitanil Pablo: “Cada se tokniu moneki ma moixejekoltijtiu de inemilispan [...], ijkuakon uelis moyolpaktijtiyas ya. Porin yejua kimaktok ya ke kichiutinemi sayo ten kuali. Uan [...] amo [...] porin monejneuilia iuan okse tokniu” (Gál. 6:4).

17. ¿Keniuj techpaleuia tikchiuaskej tein Pablo tayolmajxitij?

¹⁷ Komo tikchiuaj tein tayolmajxitij Pablo xa tikitaskej ke tejuan tiuelij tikchiuaj seki taman tein oksekin amo uelij. Kemej neskayot, xa se tokniuj tayekankej amo semi kuali tamachtia itech nechikol, sayoj ke kemaj kuali tamachtia keman kinpaleuia oksekin maj mochiuakan itatojtokakauan Cristo. Oso xa amo semi kuali taixyekana kemej oksekin tayekananij, sayoj ke tokniuan kiuelitaj kitajtaniskej maj kinyolmajxiti ika Biblia porin semi kualtakat uan tetasojtakej. Oso xa kiuelita kinselis oksekin ichan (Heb. 13:2, 16). Keman tikmatiskejya toni ueli tikchiuaj, tiyolpakiskej porin titapaleuiaj itech nechikol. Uan no, amo tikinnexikoluiskej tokniuan akin uelij kichiuaj okseki taman.

18. ¿Keniuj uelis okachi kuali titamachtiskej?

¹⁸ Tein yeski tekit tein tikpiaskej itech nechikol, tinochin moneki timochikauaskej okachi kuali tiktekitiliskej Jiova uan okachi kuali titamachtiskej. Yejua ika Jiova techmaka tataman tamachtilis. Kemej neskayot, itech nechikol tein mochiua itajkotian semana, techmachtiaj keniuj okachi kuali titanojnotsaskej. ¿Tikchiujtokej ijkon kemej ompa techmachtiaj?

19. ¿Toni uelis techpaleuis maj tikselikan Tamachtilis tein kiseliaj akin kiteixmatiltiaj iTekiuajyo Dios?

¹⁹ Okse tamachtilis tein semi tapaleuia yejua Tamachtilis tein kiseliaj akin kiteixmatiltiaj iTekiuajyo Dios, kampa youij tokniuan takamej uan siuamej akin precursores uan kipiaj 23 hasta 65 xiujmej. ¿Tiknemiliaj ke amo uelis tikseliskej nejon tamachtilis? Maj amo tikijkuilokan keyej tiknemiliaj ke amo uelis tikseliskej, ta okachi kuali maj tikijkuilokan keyej tiknekij tikseliskej. Ompa maj tikixtalikan toni uelis tikchiuaskej tein techpaleuis maj tikselikan nejon tamachtilis. Ika inepaleuil Jiova uan komo timochikauaj, uelis tikchiuaskej tein tiknemiliayaj ke amo tiueliskiaj.

MAJ TIKINYOLCHIKAUAKAN TOKNIUAN IKA TEIN TIUELIJ TIKCHIUAJ

20. ¿Toni techmachtia Romanos 12:6-8?

²⁰ Expatika taman tein techmachtia neskayot tein Pablo ika tajtoj moajsi itech Romanos 12:6-8 (xikonixtajtolti). Itech nejin tajkuilolmej, Pablo oksepa kijtoua ke tinochin itech nechikol tataman tein tiuelij tikchiuaj. Sayoj ke axkan kijtoua ke tisejsemej moneki tikinpaleuiskej uan tikinyolchikauaskej tokniuan ika tein tiuelij tikchiuaj.

21, 22. ¿Toni techmachtia tein kinpanok Robert uan Felice?

²¹ Maj tikitakan tein kipanok se tokniuj tayekankej akin tiktokaytiskej Robert. Satepan ke uejkauak tapaleuijkaya itech okse altepet, kititankej maj tapaleuiti Betel tein moajsi itech ialtepeuj. Maski kiluijkej ke amo kipatayaj porin amo kiyekchiujka teisa, kijtoj: “Miak metsti amo niyolpakik porin niknemiliaya ke amo kuali nikchiujka tekit tein achto nikpiaya. Miakpa niknemilij ke amo niknekiaok niyetos Betel”. ¿Toni kipaleuij maj oksepa yolpaki? Se tayekankej kielnamiktij ke tein Jiova techmachtiani itech okseki tekimej, techpaleuia maj okachi titapaleuikan itech tekit tein tikpiaj axkan. Robert kiajsikamatik ke amo monekiaok itech tanemilijtos tekit tein achto kipiaya, ta monekia tanemilis itech tein axkan ueliskia kichiuas.

²² No ijkon kipanok tokniuj takat Felice Epíscopo. Yejua uan inamik kiselijkej tamachtilis tein motemaka Galaad itech xiuit 1956 uan tapaleuijkej kemej takalpanouanij ompa Bolivia. Itech xiuit 1964 kipiakej se konetsin. Felice kijtoj: “Ouij techkisak tikauaskej tekit tein tikpiayaj. Moneki nikijtos ke itech se xiuit sayoj itech nitanemilijtoya tekit tein achto nikpiaya. Sayoj ke, ika inepaleuil Jiova nikpatak notanemilil uan peuak nikchiua tekit tein axkan nikpiaya kemej tepopaj”. ¿Timomachiliaj kemej Robert oso Felice? ¿Amo tiyolpakij porin amo tikpiajok tekit tein achto tikpiayaj? Komo ijkon timomachiliaj, okachi tiyolpakiskej komo itech titanemiliaj tein axkan uelis tikchiuaskej uan ijkon tiktekitiliskej Jiova uan tikinpaleuiskej tokniuan. Maj nochipa titekititokan uan maj tikinpaleuikan oksekin ika tein tiuelij tikchiuaj. Uan tiyolpakiskej keman tikinyolchikauaskej tokniuan.

23. 1) ¿Itech toni moneki titanemiliskej? 2) ¿Toni tikitaskej itech okse tamachtilis?

²³ Jiova semi kinpatiuita sejsemej itekitikauan. Yejuatsin kineki maj tikmachilikan ke tiichankauan. Komo tiknemiliaj keniuj uelis tikinyolchikauaskej tokniuan uan timochikauaj ijkon tikchiuaskej, okachi amo ouij techkisas tikitaskej toni tekit tikpiaj itech nechikol. Sayoj ke, ¿keniuj tikinitaj oksekin? ¿Keniuj uelis tiknextiskej ke tikinpatiuitaj? Itech okse tamachtilis ika titajtoskej nejin ome netajtanilmej.