Komo tiknekij maj Dios techkaki, ¿keniuj moneki tiktataujtiskej?
Jiova Dios, yejua ‘akin kikaki netataujtilmej’ (Salmo 65:2). Uelis iuan titajtoskej kampa yeski tiyetoskej uan tein yeski hora, ichtaka oso chikauak titajtoskej. Jiova kineki maj tikiluikan toTajtsin. Uan yejua akin okachi kuali toPaj (Mateo 6:9, TNM). Ika netasojtalis Jiova techmachtia keniuj uelis tiktataujtiskej komo tiknekij maj techkaki.
MAJ TIKTATAUJTIKAN JIOVA ITOKAYKOPA JESÚS
“Notajtsin Dios namechmaktilis nochi ten nankitajtaniliske ika in chikaualis de notokaytsin” (Juan 16:23).
Tein Jesús kijtoj techmachtia ke Jiova kineki maj sayoj yejuatsin tiktataujtikan, uan amo inintechkopa tiotsitsin, santos, ángeles oso tochankauan akin momikilijkejya ta itokaykopa Jesucristo. Komo ijkon tikchiuaj, tiknextiaj ke tikmatij tein Jesús toka kichiuak uan yejua ika Dios ueli techkaki. Jesús kijtoj: “Amo aken uelis kajsis Notajtsin Dios komo amo Nejuatsin nikyekantiyas” (Juan 14:6).
MAJ TIKIJTOKAN TEIN TIKMACHILIAJ
“Iixpan yejuatsin xiktapokan nanmoyolo” (Salmo 62:8).
Keman tiktataujtiskej Jiova moneki tiknojnotsaskej kemej ijkuak tiknojnotsaj topaj akin techtasojta. Keman tikchiuaskej moneki maj tikpoujkaitakan uan maj tikiluikan tein tikmachiliaj, uan maj amo tikixtajtoltikan se amaix kampa ijkuiliujtok netataujtilmej oso maj tikijtokan miakpa sayoj se taman.
MAJ TIKTAJTANIKAN DIOS TEIN KIUELITA
“Komo tiktajtaniliaj Dios tensa ijkon keme yejua in itanejnekilis [...], ijkuakon Totajtsin Dios techkakilia” (1 Juan 5:14).
Itech Biblia techiluia tein Dios toka kichiuas uan tein kichia maj tikchiuakan. Komo tiknekij maj yejuatsin techkaki keman tiktataujtiaj, moneki tiktataujtiskej “ijkon keme yejua in itanejnekilis”. Yejua ika moneki timomachtiskej Biblia porin ijkon okachi kuali tikixmatiskej. Uan no, yejuatsin kualtsin techkakis.
¿TONI MONEKI TIKIJTOSKEJ KEMAN TIMOTATAUJTISKEJ?
Maj titajtanikan tein techpoloua. Uelis tiktajtaniskej Dios maj techpaleui maj tikpiakan sayoj tein moneki, kemej tein tikuaskej, tein timotaliliskej oso kani tinemiskej. No uelis tiktajtaniskej maj techpaleui maj kuali titaixpejpenakan uan maj techmaka chikaualis maj tikxikokan ouijkayomej. Uan no, uelis tiktataujtiskej Dios maj techtapojpolui, maj techpaleui maj okachi titakuaujtamatikan uan maj techyekpia (Lucas 11:3, 4, 13; Santiago 1:5, 17).
Maj ininka timotataujtikan oksekin. Tetatmej akin yolkualmej kiuelitaj maj ininkoneuan motasojtakan. Kemej Jiova yejua toTajtsin, kineki maj timosenpaleuikan uan maj timoyekpiakan. Maj ininka timotataujtikan tokoneuan, tonamik, tochankauan uan akin kuali iniuan timouikaj. Santiago, se imomachtijkauj Jesús, kijtoj: “Ximotatatautilikan se uan okse” (Santiago 5:16).
Maj timotasojkamatikan. Biblia kijtoua ke toTachijchiujkauj kichiuak miak taman tein kuali ininka oksekin: “Yejuatsin kinualtitaniliaya in kioutsin uan kinmaktiliaya kuajkuali takilome. Uan [...] miak in takualis para [...] nanmoyolpaktijtoske” (Hechos 14:17). Komo ika titanemiliaj tein Dios toka kichiuani tiknekiskej tiktasojkamatiliskej. No tiknextiskej ke timotasojkamatij komo tiktakamatij itanauatiluan (Colosenses 3:15).
MAJ AMO TIYOLIJSIUIKAN UAN MAJ TIKSENTOKAKAN TIMOTATAUJTIKAN
Kemansa xa amo tiknekiskejok timotataujtiskej porin tikitaskej ke Dios amo niman technankilia. Sayoj ke, ¿kijtosneki ke amo toka motekipachoua? ¡Amo! Maj tikitakan tein kinextia ke sayoj moneki tiksentokaskej timotataujtiskej ijkon kemej sekin kinpanouani.
Itech yekinika tamachtilis ika titajtojkej Steve. Yejua no techiluia: “Komo amo nimotataujtiskia, uejkaujya amo nikchiaskia maj oksepa niyolpaki”. ¿Toni kipaleuij? Peuak momachtia Biblia uan kiitak ke monekia motataujtis miakpa. Steve kijtoua: “Niktasojkamatilia Dios porin akin kuali iniuan nimouika nechtasojtaj uan nechpaleuiaj. Axkan okachi niyolpaki ke achto”.
¿Toni axkan kinemilia Jenny akin kinemiliaya ke amo kinamikia maj Dios kikaki? Yejua kijtoua: “Keman nikpanotoya tein amo kuali, niktataujtij Dios maj nechpaleui maj nikajsikamati keyej tel amo kuali nimomachiliaya”. ¿Keniuj kipaleuij motataujtis? “Nitajtos iuan Dios kichiuak maj nimoita kemej yejuatsin nechita. Nikitak ke yejuatsin nechtasojta maski nikmachiliaya ke amo kinamiki maj kichiua. No nechpaleuij maj amo nimosenkaua”. ¿Toni axkan kinemilia? “Nimotataujtis nechpaleuiani maj kuali iuan nimouika Jiova akin amo tekaua, maj nikita kemej noTajtsin akin nechtasojta uan kemej se Dios akin yekmelauj nemi. Yejuatsin amo keman nechkauas uan nochipa nechpaleuis komo nikchiua tein kiyolpaktia”.
Isabel kijtoua: “Dios nechnankilij porin nikita ke nokonetsin yolpaki maski mokokoua”.
Axkan maj tikitakan tein kipanok Isabel. Keman yaya kipiati se konetsin, tapajtianij kiluijkej ke yoliskia ika se ueyi kokolis. Semi moyolkokoj uan sekin hasta kiluiayaj maj amo kipiani, ta maj kimiktiani. Isabel kijtoua: “Nikmachiliaya ke yaya nimomikiliti porin semi nimoyolkokouaya”. ¿Toni kichiuak? “Miakpa niktataujtij Dios maj nechpaleui”. Seki metsti satepan yolik ikonetsin Gerard, uan yolik ika se ueyi kokolis. ¿Kimachilia Isabel ke Dios kinankilij keman kitataujtij? ¡Kemaj! ¿Uan keniuj kichiuak? Yejua kijtoua: “Panokejya 14 xiujmej, uan nokonetsin Gerard nikita kemej se ueyi tatiochiualis. Dios nechnankilij porin nikita ke nokonetsin yolpaki maski mokokoua”.
Tein kijtoua Isabel techelnamiktia tein kijtoua se salmista: “Tejua tikakis keman motataujtiskej akin yolnejmachmej, Jiova. Tikinyolchikauas uan nochipa tikinitstos” (Salmo 10:17). Tikpiaj miak taman tein kichiua maj tiksentokakan timotataujtikan.
Itech Biblia uelis tikitaskej tein Jesús kijtoj keman motataujtij. Tein okachi moixmati yejua tein kinmachtij imomachtijkauan. ¿Toni techmachtia?