¿Kipaleuia akin yolkuali maj kichia kuali nemis?

Miak xiujmejya miakej kinemilianij ke komo yolkualmej kinpaleuis maj kichiakan kuali nemiskej. Kemej Confucio, se tamachtijkej uan tamatkej akin nemik itech xiujmej 551 hasta 479 a.i.t, kijtoj: “Amo xikinchiuili oksekin tein amo tikuelitaskia maj mitschiuilikan”.a Miakej akin nemij Asia no ijkon tanemiliaj.

TEIN MIAKEJ KICHIUAJ

Miakej no kinemiliaj ke para kichiaskej kuali nemiskej moneki kichiuaskej tein kuali, yejua ika tapoujkaitaj, kichiuaj tein moneki kampa nemij uan mochikauaj maj amo kinkuejmolo inintanemilil. Linh, se siuatsin akin nemi Vietnam, kijtoua: “Nochipa niknemiliaya ke kuali nietoskia komo amo nitakajkayaua uan nikijtoua tein nikmachilia”.

Nejon siuatsin kintakualtekia akin amo teyi kipia nion ininchan.

Sekin kichiuaj tein kuali porin yejua nejon tein kinmachtiaj itech inintaneltokalis. Hsu-Yun, se takat akin nemi Taiwán, techiluia: “Nechmachtijkej ke keman aksa momikilia yolpaki oso tajyouia nochipaya ika tein kichiuak keman yoltoya”.

TEIN PANOUA

Tiotakpa nejon siuat akin sioujtok uan tayokoxtok kinapaloua ikonetsin.

Nochipa keman tikinpaleuiaj oksekin tikseliaj tein kuali. Sayoj ke, miakej akin kinpaleuiaj oksekin kiitanij ke amo mochiua tein kinemiliayaj. Shiu Ping, se siuatsin akin nemi Hong Kong, kijtoua: “Ika tein nechpanok, nikitak ke amo nochin tein kinpaleuiaj oksekin kiseliaj tein kuali. Semi nimochikauak nikinyekpias nochankauan uan nikchiuas tein kuali, sayoj ke notakauj nechkaujteuak nejua uan nokonetsin”.

Miakej kiitanij ke taneltokalis amo kichiua maj okachi tiyolkualmej. Etsuko, se siuatsin akin nemi Japón, kijtoua: “Nipouia itech se taneltokalis uan nikixyekanaya seki taman tein kichiuayaj telpochmej. Semi nechyolkokoj keman nikitak ke itech notaneltokalis amo chipaujkanemiaj, nochin kinekiaj kipiaskej tanauatil uan amo kuali kikuiaj tomin itech tiopan”.

“Semi nimochikauak nikinyekpias nochankauan uan nikchiuas tein kuali, sayoj ke notakauj nechkaujteuak nejua uan nokonetsin” (SHIU PING, HONG KONG)

Miakej akin semi taneltokaj moyolkokouaj keman kiitaj ke amo tapaleuij nochi tein kuali tein kichiujkej. Ijkon momachilij Van, se siuatsin kayot Vietnam, yejua kijtoj: “Mojmostaj niktaliaya xochit, takual uan takilomej itech ininaltar nouejkaujtatuan porin nikchiaya kuali ninemis. ¡Miak xiujmej nikchiuak tein kuali uan kemej momattokej taueyichiuaskej itech taneltokalis! Ika tamik notakauj semi kokolispeuak. Uan noichpoch akin momachtijtoya itech okse altepet momikilij keman kipiaya 20 xiujmej”.

KEYEJ AMO SAYOJ MONEKI MAJ SE YOLKUALI

Maski semi moneki maj se kinpaleui oksekin amo sayoj nejon tapaleuia maj se kichia kuali se nemis. ¿Keyej? Xikonita tein kijtoua iTajtol Dios.

AMO NOCHIN KINEKIJ KICHIUASKEJ TEIN KUALI.

“Se tajtakojkej uelis kiuejuelos miak taman tein kuali” (ECLESIASTÉS 9:18).

Maski sekin mochikauaskej yeskij yolkualmej, tein kichiuaj oksekin uelis kichiuas maj amo kichiakan kuali nemiskej. Kemej itech se ueyi kokolis, xa tejuatsin tikontakamati tein tanauatiaj tekiuanij uan amo tionmosentilia iniuan oksekin. Sayoj ke, komo oksekin amo tatakamatij uelis kinmauaskej akin mochikauaj tatakamatiskej.

MIAKEJ AMO KIMATIJ TONI KUALI UAN TONI AMO.

“Moajsi se ojti tein nesi ke melauak iixpan takat, sayoj ke tamiti itech mikilis” (PROVERBIOS 14:12).

Tein panouani kinextia ke miakej kinemiliayaj ke kichiujtoyaj tein kuali, uan ompa kiitakej ke mopolojtoyaj. Maski tiknekiskej tikchiuaskej tein kuali, titajyouiskej komo amo kuali titaixpejpenaj.

AMO TIKMATIJ TEIN TECHPANOS.

“Namejuan amo nankimatij toni mochiuas mosta” (SANTIAGO 4:14).

Hasta akin semi yolkuali uelis momikilis keman amo akin kimattos. Kemej itech ueyi kokolis COVID-19, miakej momikilijkej keman kinpaleuiayaj oksekin. No maj tikitakan tein kipanok Liting, se siuatsin kayot China, akin ipopaj momikilij keman motelojkej carros. Yejua kijtoua: “Amo nikmatia keyej momikilij aksa akin semi yolkuali porin sayoj nopaj momikilij. Yejua semi tekitia, katka yolyemanik uan amo takajkayauaya”.

Komo maski tiyolkualmej amo kichiua maj tikchiakan kuali tinemiskej, ¿toni tapaleuia? Para tikmatiskej, moneki teisa tein takuaujtamach, maj kinankili tein timotajtaniaj uan maj techilui keniuj uelis tikchiaskej kuali tinemiskej. ¿Kani uelis tikajsiskej tein techpaleuis?

a Komo tikonneki tikonmatis okachi tein tamachtij Confucio, xikonlero amaix El hombre en busca de Dios, itech capítulo 7 párrafos 31 hasta 35, tein kichijchiujkej itaixpantijkauan Jiova uan tikonajsis itech www.jw.org.