¿Keniuj techyekpia Jiova?

1. ¿Keyej Jesús kitajtanij Jiova maj kinyekpiani itatojtokakauan?

YOUAK achto ke kimiktiskiaj, Jesús itech tanemilij ouijkayomej tein itatojtokakauan kipanoskiaj. Yejua ika, kemej kintasojtaya kitajtanij iTajtsin: “Xikinyekpixtinemi nomomachtijkauan para ke in amokuali Satanás ma amo kinkajkayaua” (Juan 17:14, 15). Jesús kimatia ke keman mokepaskia iluikak, Satanás kisentokaskia kinixnamikiskia nochin akin kinekiskiaj kitekitiliskej Jiova. Yejua ika monekia maj Jiova kinyekpiani itekitikauan.

2. ¿Keyej tikmatij ke Jiova technankilis keman tiktataujtiskej?

² Keman Jesús kitataujtij Jiova, yejuatsin kinankilij porin semi kitasojta. Komo tejuan timochikauaj tikyolpaktiskej Jiova, no techtasojtas uan no technankilis keman tiktajtaniskej maj techpaleui uan maj techyekpia. Kemej yejuatsin se tePopaj tetasojtakej, nochipa kinyekpias ikoneuan. Tein melauj, komo amo kichiuaskia mopitsotiliskia itokay.

3. ¿Keyej moneki maj Jiova techyekpia?

³ Axkan okachi moneki maj Jiova techyekpia. Satanás kikixtijkej iluikak uan semi “mokualantijtinemi” (Apoc. 12:12). Kichiuani maj seki taltikpakneminij kinemilikan ke keman techchiuiliaj tein amo kuali “kiyolpaktiaj in Totajtsin Dios ika ne ten yejuan kichiutokke” (Juan 16:2). Oksekin akin amo kineltokaj Dios, techchiuiliaj tein amo kuali porin amo tikchiuaj tein yejuan kichiuaj. Maski ijkon, amo timouij porin Biblia kijtoua: “Yejuatsin Yolmelauaktsin, uan Yejuatsin namechyolchikautiyas uan namechyekpixtiyas para ma amo xiuetsikan imako in amokuali Satanás” (2 Tes. 3:3). Maj tikitakan ome taman kemej techyekpia Jiova.

JIOVA TECHMAKA SE TAKEN UAN MANAMIKMEJ

4. Kemej kijtoua Efesios 6:11, 13-17, ¿toni techmaka Jiova?

⁴ Jiova techmaka se taken uan manamikmej tein ueli ika timopaleuiaj keman Satanás techixnamiki (xikonixtajtolti Efesios 6:11, 13-17). Nejin taken uan manamikmej kipiaj chikaualis uan semi tapaleuiaj, sayoj ke uelis ika timopaleuiskej komo nochipa timotaliliaj uan tikuij. Maj tikitakan toni kiixnextia taken uan manamikmej.

5. ¿Toni kiixnextia kuetax tein ika se motajkoilpia, uan keyej moneki timotaliliskej?

⁵ Kuetax tein ika se motajkoilpia kiixnextia tamachtilis tein melauak tein moajsi itech iTajtol Dios, Biblia. ¿Keyej moneki timotaliliskej? Porin Satanás “tetat den nochi nekes ten xolopijtijtinemij” (Juan 8:44). Miak xiujmejya takajkayauani uan uelini kinkajkayauani “nochi in taltikpakuani” (Apoc. 12:9). Sayoj ke tein Biblia tamachtia techpaleuia maj amo techkajkayaua. ¿Keniuj timotaliliaj? Moneki tikixmatiskej Jiova, tikueyichiuaskej “ika espíritu uan ika tein melauak”, uan “tichipaukanentinemiske” (Juan 4:24, TNM; Efes. 4:25; Heb. 13:18).

6. ¿Toni kiixnextia coraza, uan keyej moneki timotaliliskej?

⁶ Coraza kiixnextia itanauatiluan Jiova tein melaujkej. ¿Keyej moneki timotaliliskej? Porin ijkon kemej se coraza kiyekpia iyolo se tateuijkej, itanauatiluan Jiova kiyekpiaj toyolo, porin techpaleuiaj maj amo techpata tanemilil tein onkak nikan taltikpak (Prov. 4:23). Jiova technauatia maj tiktasojtakan uan maj tiktekitilikan ika nochi toyolo (Mat. 22:36, 37). Yejua ika, Satanás kitemoua maj tikpatiuitakan tein onkak nikan taltikpak tein Jiova kitauelita, porin ijkon amo tiktekitiliskejok ika nochi toyolo (Sant. 4:4; 1 Juan 2:15, 16). Uan komo tejuan tiksentokaj tiktakamatij Jiova maski kichiuakya nochi nejin, kichiuas okseki taman tein ika kitemos techchikaujkauis maj amo tiktakamatikan Jiova.

7. ¿Keniuj timotaliliaj coraza?

⁷ Timotaliliaj coraza keman tikchiuaj tein Jiova kijtoua ke kuali yetok uan keman tikixtopeuaj tein kijtoua ke amo kuali yetok (Sal. 97:10). Xa seki taltikpakneminij kinemiliaj ke komo se kitakamati itanauatiluan Jiova amo uelis se kichiuas tein se kinekis. Sayoj ke komo amo tiktakamatijok itanauatiluan Jiova, tiyeskij kemej se tateuijkej akin mokixtilia coraza itech neteuilis porin kinemilia ke semi etik. ¿Melauj ke amo tiknextiskiaj tamatilis komo tikchiuaskiaj nejon? Akin kitasojtaj Jiova amo kiitaj ke itanauatiluan “semi oui para se kintakamatinemis”, ta kiitaj ke semi tepaleuiaj (1 Juan 5:3).

8. ¿Toni kijtosneki timotaliliskej tekakmej uan nochipa tikteixmatiltiskej “kuali Tajtoltsin de Dios”?

⁸ Pablo no kijtoj ke moneki timotaliliskej tekakmej uan nochipa tikteixmatiltiskej “kuali Tajtoltsin de Dios ten kualkui ne yolseuilis”. Nejin kijtosneki ke moneki nochipa tikteixmatiltiskej tein kichiuas iTekiuajyo Dios. Keman tikintapouiaj oksekin tein Biblia tamachtia, totakuaujtamatilis mochikaua. Semi techyolchikaua tikmatiskej ke itekitikauan Jiova itech nochi taltikpak nochipa kiteixmatiltiaj tein kichiuas iTekiuajyo Dios. Kemej neskayot, tanojnotsaj kampa tekitij, kampa momachtiaj, kampa taltikpakneminij tanamakaj, kajkalpan, keman takouatij, keman kinkalpanotij ininchankauan akin amo itaixpantijkauan Jiova, keman tajtouaj iniuan akin kinixmatij uan hasta keman amo ueli kisaj. Komo timouiskiaj uan amo titanojnotsaskiajok tiyeskiaj kemej se tateuijkej akin mokixtilia itekakuan itech neteuilis. Yejua niman mokokoskia, ouij kikisaskia mopaleuis uan amo ueliskiaok kitakamatis itaixyekankauj.

9. ¿Keyej moneki tikuiskej escudo tein kiixnextia totakuaujtamatilis?

⁹ Escudo kiixnextia totakuaujtamatilis iuan Jiova. Titakuaujtamatij ke yejuatsin kichiuas nochi tein kijtoua. Ika nejon takuaujtamatilis “uelis tikxijxikojtiyaske nochi tataman kuejmololis tenika in Satanás kineki techyolxokolis”. Moneki tikuiskej nejon escudo porin techpaleuia maj amo tikneltokakan tein kiteixmatiltiaj akin kikaujkej uan kiixnamikij tamachtilis tein melauak, uan maj amo tiknekikan timosenkauaskej keman techpijpinaujtiaj uan techijijtouaj. Komo amo titakuaujtamatij, amo uelis tiktakamatiskej Jiova keman oksekin kitemoskej maj amo tiktakamatikan itanauatiluan. Sayoj ke nochipa keman amo tikchiuaj teisa tein Jiova amo kiyolpaktia kampa titekitij oso kampa timomachtiaj, totakuaujtamatilis techpaleuijtok (1 Ped. 3:15). No moita ke techpaleuijtok keman amo tikseliaj se tekit kampa kuali titataniskiaj sayoj ke amo techkauaskia maj kuali tiktekitilikan Jiova (Heb. 13:5, 6). Uan keman tiksentokaj tiktekitiliaj Jiova maski techixnamikij, totakuaujtamatilis no techpaleuijtok (1 Tes. 2:2).

10. ¿Toni kiixnextia casco, uan keyej moneki timotaliliskej?

¹⁰ Casco kiixnextia nechialis tein Jiova techmaka. Yejuatsin kijtoua ke kintatiochiuis nochin akin kichiuaj tein kiyolpaktia, uan ke komo timomikiliaj, oksepa techmakas tonemilis (1 Tes. 5:8; 1 Tim. 4:10; Tito 1:1, 2). Casco kiyekpia itsontekon se tateuijkej. No ijkon, nechialis tein Jiova techmaka kiyekpia totanemilil. ¿Keniuj kiyekpia? Techpaleuia maj amo tikelkauakan tein Dios kijtoua ke kichiuas satepan, uan maj amo semi timotekipachokan keman tikpiaj ouijkayomej. ¿Keniuj timotaliliaj nejon casco? Keman timochikauaj titanemiliskej kemej Jiova. Kemej neskayot, iuan titakuaujtamatij uan amo itech tomin oso okseki taman tein kipia ipatiuj tein amo uejkauas” (Sal. 26:2; 104:34; 1 Tim. 6:17).

11. ¿Toni kiixnextia espada, uan keyej moneki tikuiskej?

¹¹ Espada kiixnextia iTajtol Dios, Biblia. Nejin espada kiteixmatiltia toni melauak uan toni amo melauak, uan kinpaleuia taltikpakneminij maj amo kineltokakanok tamachtilismej tein amo melaujkej uan maj amo kichiuakanok tein amo kuali (2 Cor. 10:4, 5; 2 Tim. 3:16, 17; Heb. 4:12). Tikmatij keniuj tiktekitiltiskej keman timomachtiaj uan no techpaleuia tamachtilis tein tikseliaj itech inechikol Dios (2 Tim. 2:15). Sayoj ke Jiova amo sayoj techmaka se taken uan manamikmej tein uelis ika timopaleuiskej. Maj tikitakan okse taman tein techmaka.

JIOVA TECHMAKA OKACHI NEPALEUIL

12. ¿Toni nepaleuil no moneki tikseliskej, uan keyej?

¹² Se takat akin uejkaujya tateuijkej kimati ke iselti amo uelis kintanis miakej tateuianij, ta moneki maj kipaleuikan oksekin akin iuan tateuiaj. No ijkon, toselti amo uelis tiktaniskej Satanás uan akin kipaleuiaj, ta moneki maj techpaleuikan tokniuan. Yejua ika Jiova techpaleuia inintechkopa miakej tokniuan akin moajsij itech nochi taltikpak (1 Ped. 2:17).

13. Kemej kijtoua Hebreos 10:24, 25, ¿keniuj techpaleuiaj nechikolmej?

¹³ Uelis tikseliskej ininnepaleuil tokniuan komo tiouij nechikolmej (xikonixtajtolti Hebreos 10:24, 25). Tinochin kemansa timotayokoltiaj. Sayoj ke ¿melauj ke okachi kuali timomachiliaj keman tiouij nechikolmej? Inintanankililuan tokniuan techyolchikauaj, uan tamachtilismej uan tanojnotsmej tein kipanoltiaj techpaleuiaj maj tiknekikan tiksentokaskej tiktekitiliskej Jiova. Uan no, timoyolchikauaj keman iniuan titajtouaj achto ke peuas nechikol uan keman tami (1 Tes. 5:14). Itech nechikolmej no ueli tikinpaleuiaj oksekin, uan nejon kichiua maj tiyolpakikan (Hech. 20:35; Rom. 1:11, 12). Nechikolmej no techpaleuiaj maj okachi kuali titanojnotsakan uan maj okachi kuali titamachtikan. Kemej neskayot, techmachtiaj keniuj kuali tiktekitiltiskej amaixmej uan videos tein moajsij itech nepaleuilmej tein ika titamachtiaj. Yejua ika, maj kuali timomachtikan tein moitas itech nechikolmej, maj kuali tikakikan tein ompa moijtoua uan satepan maj tikchiuakan. Komo tikchiuaj nochi nejin, uelis tikixnamikiskej Satanás uan tiyeskij kuali itateuijkauan Cristo Jesús (2 Tim. 2:3).

14. ¿Toni okse nepaleuil tikseliaj?

¹⁴ No techpaleuiaj miakej ángeles akin kipiaj miak chikaualis. Tikmatijya toni ueli kichiua sayoj se ángel. Yejua ika, ¿ueli tiknemiliaj toni ueliskia kichiuaskej millones ángeles? (Is. 37:36). Nion se takat uan nion se amokuali ejekat uelis kintanis nejin itateuijkauan Jiova. Yejuatsin semi chikauak. Yejua ika, komo touan yetok nochipa tikpiaskej okachi chikaualis ke akin techixnamikij, maski semi miakej yeskij (Juec. 6:16). ¡Nejin semi melauak! Yejua ika, maj nochipa tikelnamikikan keman tikmachiliskej ke amo tikpiajok chikaualis porin se akin iuan titekitij, se akin iuan timomachtiaj oso se tochankauj akin amo itaixpantijkauj Jiova techiluia oso techchiuilia teisa tein amo kuali. Maj tikelnamikikan ke amo toselti timoixnamikij iuan Satanás, ta kemej tikaujtokej maj Jiova techixyekana, yejuatsin techpaleuia.

JIOVA KISENTOKAS TECHYEKPIAS

15. Kemej kijtoua Isaías 54:15, 17, ¿keyej amo akin ueli kichiua maj itekitikauan Dios amo tanojnotsakanok?

¹⁵ Onkak miak taman tein kichiua maj taltikpakneminij akin Satanás kinixyekana techtauelitakan. Amo keman tikinpaleuiaj nion tikinixnamikij tekiuanij, uan amo titapaleuiaj itech neteuilis. Tikteixmatiltiaj itokay Dios, ke sayoj iTekiuajyo kichiuas maj onka yolseuilis uan tiktakamatij itanauatiluan. No tikinmatiltiaj taltikpakneminij ke akin taixyekana nikan taltikpak takajkayaua uan temiktia (Juan 8:44). Uan no tikteixmatiltiaj ke amo uejkaua, Dios kiixpolos tein amo kuali. Satanás uan akin kipaleuiaj amo keman uelis techtsakuiliskej maj amo titanojnotsakanok, ta tiksentokaskej tiktemoskej tikueyichiuaskej Jiova. Maski Satanás kipia miak chikaualis, amo uelini kichiuani maj amo moteixmatilti itech nochi taltikpak tein kichiuas iTekiuajyo Dios. Nejin sayoj ueli mochiua porin Jiova techyekpia (xikonixtajtolti Isaías 54:15, 17).

16. ¿Keniuj kinmakixtis Jiova itekitikauan itech okachi ueyi tajyouilis?

¹⁶ ¿Toni panos satepan? Itech okachi ueyi tajyouilis, Jiova kichiuas ome taman tein ika techmakixtis. Yekinika, kinmakixtis itekitikauan akin amo kikauaj keman kichiuas maj “reyes de nochi in taltikpak” kiixpolokan Ueyi Babilonia, tein kijtosneki, nochi taneltokalismej tein amo melaujkej (Apoc. 17:16-18; 18:2, 4). Uan ojpatika, kinmakixtis itekitikauan keman kiixpolos itech Armagedón nochi okseki taman tein Satanás kiixyekana (Apoc. 7:9, 10; 16:14, 16).

17. ¿Keyej moneki tiksentokaskej kuali timouikaskej iuan Jiova?

¹⁷ Komo tiksentokaj kuali timouikaj iuan Jiova, Satanás amo uelis techchiuilis nion teyi tein uejkauas. Tein melauj, yejua akin senkis kiixpoloskej (Rom. 16:20). Yejua ika, maj nochipa timotalilikan taken uan maj nochipa tikuikan manamikmej tein Dios techmaka. Maj amo tiktemokan toselti tikixnamikiskej Satanás, maj tikinpaleuikan tokniuan uan maj tiksentokakan tiktakamatikan Jiova. Komo tikchiuaj nochi nejin, uelis titakuaujtamatiskej ke toTajtsin tetasojtakej techyolchikauas uan techyekpias (Is. 41:10).