Maj titaxikokan ijkon kemej Jiova taxikoua

1, 2. ¿Keyej tein kijtoua Isaías 65:16, 17 techpaleuia maj tiksentokakan titaxikokan?

“¡AMO XIONMOSENKAUA!”. Ijkon motokaytij ueyi nechikol tein uejkauak eyi tonal itech xiuit 2017. Nejon ueyi nechikol techmachtij keniuj uelis tikxikoskej ouijkayomej tein tikpiaj. Panokejya naui xiujmej, uan tiksentokaj titaxikojtokej.

² ¿Toni ouijkayomej tikpianij itech nejin tonalmej? Xa momikilij se tochankauj oso se akin kuali iuan timouikayaj, xa timokokouaj, xa tixiuejkejya, xa mochiuak se tetsauit kampa tinemij, xa techtajyouiltiaj, xa techixnamikij, oso kokolis COVID-19 xa kichiuani maj tikpanokan uejueyi ouijkayomej. ¿Melauj ke tiknekij maj ejkoya tonal keman amo tikpiaskejok nejin ouijkayomej? Amo kemanok itech titanemiliskej uan amo kemanok mochiuas (xikonixtajtolti Isaías 65:16, 17).

3. ¿Toni moneki tikchiuaskej axkan, uan keyej?

³ Tein tikpanouaj itech nejin tonalmej semi ouij uan satepan xa tikpanoskej okachi uejueyi ouijkayomej (Mat. 24:21). Yejua ika moneki tiksentokaskej titaxikoskej. Jesús kijtoj keyej: “Komo namejuan nankixikojtiyoue nochi nijin tajyouilis, ijkuakon Dios namechmaktilis [...] ne nemilis nachipa” (Luc. 21:19). Uelis titaxikoskej komo tiknemiliaj keniuj taxikouaj oksekin keman kipanouaj ouijkayomej kemej tein tejuan tikpanotokej.

4. ¿Keyej Jiova techkauilia se kuali neskayot?

⁴ Jiova techkauilia okachi kuali neskayot porin semi taxikojtok. Komo ouij techkisa tikneltokaskej, maj tiknemilikan nejin: itech nejin taltikpak onkak miak kuejmolmej porin taixyekana Satanás. Maski Jiova ueliskiaya kiixpolos nejon kuejmolmej kichixtok maj ejko tonal tein kiixtalijtok (Rom. 9:22). Hasta maj ejko nejon tonal, Jiova kisentokas taxikojtos. Maj tikitakan chiknaui taman tein Jiova kixikojtok.

¿TONI KIXIKOJTOK JIOVA?

5. ¿Keniuj kipitsotilianij itokay Dios, uan keniuj tikonita tejuatsin nejon tein panouani?

⁵ Kipitsotilianij itokay. Jiova kitasojta itokay uan kineki maj nochin kipoujkaitakan (Is. 42:8). Sayoj ke itokay kipitsotilianij kemej 6,000 xiujmejya (Sal. 74:10, 18, 23). Nejin peuak itech xochital tein moajsia Edén, keman Amokuali kitakajkayauilij Jiova uan kijtoj ke amo kinekia kinmakas Adán uan Eva se taman tein kichiuaskia maj yolpakikan (Gén. 3:1-5). Yejuatsin kisentokanij kipantianij ke amo kinkaua taltikpakneminij maj kipiakan tein yekmelauj kichiuas maj yolpakikan. Kemej Jesús kitekipachouaya maj okachi kipitsotilianij itokay iTajtsin, kinmachtij itatojtokakauan maj tajtanikan itech netataujtil: “ToTajtsin akin tietok iluikak, maj mochipaua motokay” (Mat. 6:9, TNM).

6. ¿Keyej Jiova ayamo kinextia ke yejuatsin kinamiki taixyekanas uan ke okachi kuali taixyekankej?

⁶ Miakej kiixnamikij yejuatsin uan itaixyekanalis. Sayoj Jiova kinamiki taixyekanas iluikak uan taltikpak, uan sayoj yejuatsin okachi kuali taixyekankej (Apoc. 4:11). Sayoj ke Amokuali kitemouani maj ángeles uan taltikpakneminij kinemilikan ke Dios amo kinamiki taixyekanas. Yejua ika, yejuatsin kikauani maj panokan xiujmej uan maj taltikpakneminij ininselti moixyekanakan. Ijkon monextis ke komo amo mokauaj maj kinixyekana amo kuali kinyas (Jer. 10:23). Kemej Dios amo yolijsiui, senkis monextis ke yejuatsin okachi kuali taixyekankej uan ke sayoj iTekiuajyo uelis kichiuas maj onka yolseuilis uan maj kuali tinemikan nikan taltikpak.

7. ¿Akonimej kiixnamikinij Jiova, uan toni kinchiuilis yejuatsin?

⁷ Seki ikoneuan kiixnamikinij. Keman Jiova kinchijchiuak ángeles uan taltikpakneminij amo tajtakolejkej katkaj. Sayoj ke Satanás, se ángel akin kiixnamikik Jiova, kichiuak maj Adán uan Eva, akin amo tajtakolejkej katkaj, no kiixnamikinij. Okseki ángeles uan okseki taltikpakneminij no kiixnamikkej Jiova (Jud. 6). Satepan, hasta seki israelitas, xolal tein Dios kiixpejpenka, kiixnamikkej uan peuak kinueyichiuaj tiotsitsin (Is. 63:8, 10). Yejua ika Jiova kimachilij ke kiixtopeujkej. Sayoj ke yejuatsin taxikouani uan kisentokas taxikos hasta maj ejko tonal keman kinixpolos nochin akin kiixnamikij. Itekitikauan Jiova semi yolseuiskej, porin ijkon kemej yejuatsin, kisentokaj kixikojtokej tein amo kuali tein mochiua nikan taltikpak.

8, 9. ¿Toni kitakajkayauiliaj Jiova, uan toni uelis tikchiuaskej tejuan?

⁸ Amokuali kitakajkayauilia. Satanás kijtoj ke Job uan nochin okseki itekitikauan Jiova akin amo kikauaj kitekitiliaj sayoj porin kinekij kiseliskej teisa (Job 1:8-11; 2:3-5). Itech nejin tonalmej, Amokuali kisentoka kijtoua nejon (Apoc. 12:10). Uelis tiknextiskej ke Satanás takajkayaua komo titaxikouaj keman tikpiaj ouijkayomej uan komo tiksentokaj tiktekitiliaj Jiova porin tiktasojtaj. Uan Jiova techtatiochiuis komo titaxikouaj ijkon kemej kitatiochiuij Job (Sant. 5:11).

⁹ Satanás kichiua maj akin taixyekanaj itech taneltokalismej tein amo melaujkej kijtokan ke Jiova amo yolkuali uan ke yejuatsin itajtakol maj onka tajyouilis. Uan keman se konetsin momikilia, sekin hasta kijtouaj ke Dios kiuikak iluikak porin kinekia okse angelito. ¡Semi amo kipoujkaitaj Jiova! Sayoj ke tejuan tikmatij tein melauj. Yejua ika, keman timokokouaj oso keman momikilia se akin tiktasojtayaj amo keman tiktajtakoltiaj Dios, ta titakuaujtamatij ke yejuatsin kichiuas maj satepan amo titajyouikanok. Uelis tikiniluiskej nochin akin techkakiskej ke Jiova se Dios tetasojtakej. Ijkon Jiova uelis kinankilis akin kiixnamiki (Prov. 27:11).

10. ¿Toni techmachtia tein kijtoua Salmo 22:23, 24?

¹⁰ Itekitikauan akin semi kintasojta tajyouiaj. Jiova se Dios teiknelijkej. Yejua ika tayokoya keman kiita ke titajyouiaj, xa porin techtajyouiltiaj, porin timokokouaj oso porin titajtakolejkej (xikonixtajtolti Salmo 22:23, 24). Yejuatsin techajsikamati. Yejua ika kineki kiixpolos tein techtajyouiltia uan ijkon kichiuas (no xikonita Éxodo 3:7, 8; Isaías 63:9). Ejkos tonal keman kichiuas nejin: “Kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apoc. 21:4).

11. ¿Keniuj momachilia Jiova keman kinelnamiki itekitikauan akin momikilijkejya uan amo keman kikaujkej?

¹¹ Momikilianij akin kuali iniuan mouikaya. ¿Keniuj momachilia Jiova keman kinelnamiki takamej uan siuamej akin momikilijkejya uan amo keman kikaujkej? Kineki oksepa kinitas (Job 14:15). Yejuatsin xa semi kitemoua itasojikniuj Abrahán (Sant. 2:23). Oso xa semi kitemoua Moisés, akin semi kuali iuan mouikak (Éx. 33:11). ¡Uan xa semi kiuelitaskia oksepa kikakis ininnekuikatiluan David uan okseki salmistas tein ika kiueyichiuayaj! (Sal. 104:33). Maski nejin takamej akin kuali iuan mouikayaj momikilijkejya, yejuatsin amo kinelkaua (Is. 49:15). Jiova kielnamiki keniuj katkaj, “porin yejuatsin kiita ke nochin yejuan yoltokej” (Luc. 20:38, TNM, nota). Se tonal, yejuatsin kichiuas maj oksepa nemikan uan oksepa kinkakis keman kitataujtiskej ika nochi ininyolo uan kiselis inintaueyichiualis. Nejin semi techyolseuia komo momikilij se tochankauj oso se akin kuali iuan timouikayaj.

12. ¿Toni okachi kitayokoltia Jiova itech nejin itamian tonalmej?

¹² Akin amo yolkualmej kintajyouiltiaj oksekin. Keman kiixnamikkej Jiova itech xochital tein moajsia Edén, yejuatsin kimatia ke satepan okachi mochiuaskia tein amo kuali. Jiova amo kiyolpaktia maj taltikpakneminij kichiuakan tein amo kuali, tein amo melauak uan maj kintajyouiltikan oksekin. Okachi ininka motekipachoua akin amo kipiaj chikaualis uan amo ueli mopaleuiaj, kemej akin amo kipiaj inintatuan uan siuamej akin ininnamik amo nemiok (Zac. 7:9, 10). Uan okachi kitayokoltia kiitas ke itekitikauan akin amo kikauaj kintajyouiltiaj uan kintsakuaj. Akin taxikojtokej ijkon kemej Jiova uelis takuaujtamatiskej ke yejuatsin kintasojta.

13. ¿Toni tein amo kuali kichiuaj taltikpakneminij, uan toni kichiuas Jiova?

¹³ Taltikpakneminij okachiok auilnemij. Dios techchijchiuak kemej uelis tikchiuaskej kemej yejuatsin, sayoj ke Satanás kiuelita techchiualtis tein amo kuali. Itech itonaluan Noé, keman “Jiova kiitak ke taltikpakneminij okachi kichiuayaj tein amo kuali [...] motayokoltij porin kichijchiuak taltikpaknenkej; semi motayokoltij” (Gén. 6:5, 6, nota, 11). Taltikpakneminij kisentokaj kichiuaj tein amo kuali hasta axkan. Satanás kiyolpaktia kiitas ke onkak okachi tataman auilnemilis, kemej tein kichiuaj takamej iniuan siuamej oso takamej iniuan takamej uan siuamej iniuan siuamej (Efes. 4:18, 19). Uan okachiok kiyolpaktia maj se itekitikauj Jiova tajtakolchiua. Keman taltikpakneminij akin auilnemij uan amo kinekij mopataskej kiyolajxitiskej Jiova, yejuatsin kinextis ke semi kitauelita auilnemilis keman kinixpolos.

14. ¿Toni kichiuilijtokej taltikpakneminij taltikpak uan tapialmej?

¹⁴ Taltikpakneminij kiuejuelojtokej taltikpak tein yejuatsin kichijchiuak. Ika inintaixyekanalis amo sayoj kinualkuilianij tein amo kuali okseki taltikpakneminij, ta no amo kiyekpiaj taltikpak nion tapialmej ijkon kemej Jiova kinekia maj kichiuanij (Ecl. 8:9; Gén. 1:28). Seki tamatinij kijtouaj ke itech seki xiujmej, taltikpaknenkej uelis kichiuas maj ixpoliuikan kemej se millón tataman tapialmej uan tatokmej. ¡Yejua ika semi motekipachojtokej! Sayoj ke tejuan semi timotasojkamatij porin Jiova kijtoj ke ‘kintajtamis nekes ten taijtakojtinenke nikan taltikpak’ uan ke kichiuas maj nejin taltikpak mochiua se xochital (Apoc. 11:18; Is. 35:1).

TEIN TECHMACHTIA JIOVA PORIN TAXIKOJTOK

15, 16. ¿Toni monekiskia kichiuas maj tiksentokakan titaxikokan kemej Jiova? Xikonijto se neskayot.

¹⁵ Maj itech titanemilikan nochi tein toTajtsin Jiova kixikouani miak xiujmejya (xikonita recuadro “Tein Jiova kixikojtok”). Komo Jiova kinekiskia, ueliskiaya kiixpolos tein amo kuali. Sayoj ke semi techpaleuiani maj ayamo kichiua. Kemej neskayot, maj tiknemilikan ke se takat uan inamik kipiatij se konetsin, sayoj ke tapajtijkej kiniluia ke ininkonetsin kipias miak kokolismej, ke semi tajyouis uan ke niman momikilis. Maski tetatmej kimatij ke semi ouij kinkisas kiyekpiaskej, semi yolpakij keman yoli. Kemej kitasojtaj ininkonetsin, kixikouaj tein yeski ouijkayot porin kinekij maj kuali yeto.

¹⁶ No ijkon, nochin ikoneuan Adán uan Eva tiyolij titajtakolejkej. Maski ijkon, Jiova techtasojta uan techyekpia (1 Juan 4:19). Tetatmej akin ininka titajtojkej itech neskayot amo ueli kijkuaniliaj ininkonetsin tajyouilis tein kipia, sayoj ke Jiova kemaj uelis techpaleuis. Kiixtalijya tonal keman kiixpolos nochi tein kintajyouiltia ikoneuan (Mat. 24:36). Netasojtalis tein Jiova techpialia monekiskia kichiuas maj no tiksentokakan titaxikokan.

17. ¿Keyej techpaleuia maj titaxikokan tein kijtoua Hebreos 12:2, 3 kampa ika tajtoua Jesús?

¹⁷ Jiova techkauilia se kuali neskayot porin semi taxikouani. Uan Jesús no kichiuak kemej yejuatsin. Keman yetoya nikan taltikpak toka kixikoj miak taman, kiuijuikaltijkej, kipijpinaujtijkej uan kipilojkej itech se kouit (xikonixtajtolti Hebreos 12:2, 3). Kemej iTajtsin kixikouani miak taman, nejon kipaleuij maj no taxiko. Uan tejuan no uelis techpaleuis.

18. ¿Keniuj techpaleuia 2 Pedro 3:9 maj tikajsikamatikan ke semi kuali maj Jiova taxikojto?

¹⁸ (Xikonixtajtolti 2 Pedro 3:9). Jiova kimati kemanian uelisya kiixpolos tein amo kuali. Kemej ayamo kichiua, axkan moajsij millones taltikpakneminij akin kitekitiliaj uan kiueyichiuaj. Yejuan kitasojkamatij maj Jiova taxikojto, porin ijkon uelikok yolkej, uelik kiixmatkej uan peuak kitasojtaj uan uelik motemaktijkej iuan. Senkis moitas ke semi kuali maj Jiova taxikouani keman techmakasya netetayokolil tein tikchixtokej porin titaxikojkej.

19. ¿Toni moneki tikixtaliskej tikchiuaskej, uan toni netetayokolil tikseliskej?

¹⁹ Jiova techmachtia ke moneki titaxikoskej ika yolpakilis, porin maski Satanás kichiuani maj onka tayokol uan tajyouilis, yejuatsin kisentoka yolpaki (1 Tim. 1:11, TNM). Tejuan no uelis tiksentokaskej titaxikoskej ika yolpakilis hasta maj ejko tonal keman Jiova kichipauas itokay, keman kinextis ke sayoj yejuatsin kinamiki taixyekanas uan ke okachi kuali taixyekankej, uan keman kiixpolos tein amo kuali uan kuejmolmej tein tikpiaj. Techyolseuia tikmatiskej ke toTajtsin Jiova taxikojtok. Yejua ika maj tikixtalikan no tiksentokaskej titaxikoskej. Komo ijkon tikchiuaj, totech mochiuas nejin tajtolmej: “Miak pakilis kipia ne tokniu taneltokke keman kixikos ya in tajyouilis [...]. Uan kuak yejua kitamixikos ya ne tajyouilis, ijkuakon yejua ne kiselis [...] in yeknemilis ten Totajtsin Dios moyektenkauak ya de kintayokolis nochi nekes ten kitasojtaj” (Sant. 1:12).