Niktekitilis Jiova kichiuani maj semi niyolpaki

Se xiuit satepan techmatiltijkej ke ompa Betel tein moajsi Sudáfrica kitaliskiaj se yankuik tepos tein ika kikixtiskiaj amaixmej uan ke sekin ompa ueliskia titapaleuitiuij. Nitajtanik nias ompa nitapaleuitiuj uan semi niyolpakik keman nechiluijkej ke nechixpejpenkaj maj niouj. No kinixpejpenkej okseki eyi betelitas akin no nemiaj Canadá: Dennis Leech, Bill McLellan uan Ken Nordin. Techiluijkej ke uejkauak tietoskiaj ompa Sudáfrica.

Niknotsak nomomaj ika teléfono uan nikiluij: “Maj, nikneki nimitsiluis teisa. Niouj Sudáfrica”. Nomomaj amo semi tajtouaya, sayoj ke semi takuaujtamatia iuan Jiova uan semi kuali mouikaya iuan. Amo semi teyi nechiluij, sayoj ke nikmatia ke amo nechiluiskia maj amo niouj. Nomomaj uan nopopaj amo keman nechiluijkej maj amo niouj, maski tayokoyakej porin semi uejka niaskia.

NIOUJ SUDÁFRICA

Yekinika tiajkej Betel ompa Brooklyn, kampa eyi metsti techmachtijkej keniuj tiktekitiltiskej se tepos tein ika tikixtiskiaj amaixmej. Satepan tiajkej Ciudad del Cabo (Sudáfrica) itech se barco. Yekin nikajxitijka 20 xiujmej. Keman tietoyajya Ciudad del Cabo, tikuikej se tren keman tayouak tein yaya Johannesburgo. Tren yekinika moketsak kualkampa itech se xolalkonet tein moajsi Karroo, kampa semi tauaki. Semi talnextaj katka uan semi tonaya. Keman tinauin tinaltachiakej itech ventana, timotajtanijkej kani tietoyaj. Techtekipachouaya keniuj yeskia kampa axkan tinemiskiaj. Seki xiujmej satepan oksepa tiajkej ompa uan tikitakej ke nejon xolalkonemej semi kualtsitsin katkaj uan taltikpakneminij amo takuejmolchiuayaj.

Seki xiujmej niktekitiltij linotipia, se tepos tein semi kualtsin katka uan tein semi ouij tekisaya se kiajsikamatis. Nikchijchiuaya letras tein mokuiskia keman kikixtiskiaj amaixmej Tanejmachtijkej uan ¡Taijxitilis! Ompa Betel mochijchiuayaj revistas itech miak tajtolmej tein motajtouaj itech miak altepemej ompa África, amo sayoj Sudáfrica. Semi techyolpaktij maj semi motekitiltiani yankuik tepos tein kichiuak maj tianij Sudáfrica, tein semi uejka katka.

Satepan nitekitik kampa kiixyekanayaj tekit tein mochiuaya kampa motajtolkepayaj amaixmej, kampa moamakixtiayaj uan kampa kititaniaj. Nikpiaya miak tekit uan semi niyolpakia.

NIMONAMIKTIA UAN NIKSELIA SE YANKUIK TEKIT

Itech xiuit 1968, nimonamiktij iuan Laura Bowen, akin nemia kampa ika moajsia Betel. Katka precursora uan no tekitia Betel kampa motajtolkepayaj amaixmej. Kijkuilouaya tein motajtolkepaya. Ijkuak, akin monamiktiayaj amo uelia mokauayaj Betel, yejua ika techtitankej kemej precursores especiales. Tepitsin nimotekipachoj porin majtakti xiujmejya nietoya Betel, kampa nikpiaya tein nikuas uan kani ninemis. ¿Keniuj ueliskia timoixpanoltiskej ika tomin tein ika kinpaleuiayaj precursores especiales? Sejsemej techmakaskiaj 25 rands mejmetstika (tein ijkuak katka 35 dólares) sayoj komo titemakayaj amaixmej, horas uan revisitas tein ixyetoya tiktemakaskej. Ika nejon tomin monekia tikixtauaskej kali kampa tinemiskiaj, tein tikuaskiaj, pajti uan no ika titaxtauaskiaj keman tiajtinemiskiaj okseko uan okseki taman.

Techtitankej maj titapaleuitij kampa ika xolal Durban, itech océano Índico, kampa ayamo nechikol katka. Miakej akin ompa nemiaj ininchankauan ualeujkaj India, porin kinuikakaj maj tekititij Sudáfrica kemej itech xiuit 1875 kampa kichijchiuayaj azúcar. Axkan kipiayaj okseki tekimej, sayoj ke nemiaj kemej momattoyaj nemiskej kampa ualeujkaj uan kisentokayaj takualchiuayaj kemej ompa kichiuayaj. Hasta takualchiuayaj ika curry. Uan kemej tajtouayaj inglés, amo ouij techkisak tikinnojnotsaskej.

Precursores especiales monekia tanojnotsaskej 150 horas mejmetstika. Yejua ika Laura uan nejua tikixtalijkej titanojnotsaskej chikuasen horas yekinika tonal. Kemej amo tikpiayaj revisitas nion tikmachtiayaj ika Biblia nion akin, titanojnotsaskiaj kajkalpan chikuasen horas, uan semi tonaya. Satepan ke uejkauakya titanojnotskaj, nikitak noreloj... ¡uan sayoj panokaj 40 minutos! Nimotajtanij ox ueliskia tiyeskij precursores especiales.

Niman tikixtalijkej keniuj titanojnotsaskiaj. Mojmostaj tikuikayaj kafen uan tein tikuaskiaj. Keman tiknekiaj timoseuiskej tepitsin, tiketsayaj tocarro itampa se kouit. Kemansa techyoualouayaj miakej konemej akin techsenitayaj. Seki tonalmej satepan tikitakej ke keman titanojnotskajya ome oso eyi hora, satepan amo tikmachiliayajok keniuj panouaya tonal.

Semi techyolpaktij tikinmachtiskej ika Biblia akin ompa nemiaj. Tikitakej ke akin ualeuaj India semi tapoujkaitaj, kualtakamej, kuali teseliaj uan kitasojtaj Dios. Miakej akin inintaneltokalis katka hinduismo kuali techkakkej. Semi kiuelitayaj kiixmatiskej Jiova, Jesús, tein Biblia tamachtia, uan kimatiskej ke satepan tinemiskej itech se xochital uan ke mikemej oksepa nemiskej. Se xiuit satepan tikpiayajya 20 nemachtilmej ika Biblia. Tajkotonal titakualchiuayaj ininchan semej kalyetouanij akin iniuan timomachtiayaj. ¡Semi tiyolpakiaj!

Sayoj ke techmakakej se yankuik tekit. Peuak titakalpanouaj itech nechikolmej tein moajsiaj océano Índico kampa semi takualtsinkan. Keman titakalpanouayaj itech se nechikol, timokauayaj ichan semej tokniuan uan titanojnotsayaj iniuan nochin tokniuan porin tiknekiaj tikinyolchikauaskej. Techitayaj kemej ininchankauan uan semi tikuelitayaj iniuan tietoskej yejuan, ininkoneuan uan iniuan inintapialuan. Titakalpanojkej ome xiujmej, hasta ke se tonal technotskej tokniuan akin tekitij Betel uan techiluijkej ke kinekiaj maj timokepanij ompa. Nikiniluij: “Semi tikuelitaj nikan tietoskej”. Maski ijkon, tikixtalijkej titapaleuitiuij kampa techtitaniskiaj.

TIMOKEPAJ BETEL

Ompa Betel nitekitik itech Departamento de Servicio, kampa nikpiak tatiochiualis nitekitis iniuan miakej tokniuan akin kimatiaj miak taman. Ijkuak, satepan ke tokniuj takalpanojkej panouaya itech se nechikol, kintajkuilouiliaya tokniuan akin tekitiaj Betel uan kinmatiltiaya keniuj moajsia nechikol. Ompa, Departamento de Servicio kititania se amat tein ika kinyolchikauaya tokniuan uan kiniluiaya teisa tein monekia kichiuaskej. Secretarios kipiayaj miak tekit porin monekia kitajtolkepaskej itech tajtol inglés amamej tein kititaniaj tokniuan akin takalpanouayaj itech nechikolmej kampa motajtouaya tajtolmej kemej xhosa uan zulú. Ompa kitajtolkepayaj itech nejon tajtolmej tein tokniuan ompa Betel tanankiliayaj. Semi niktasojkamatik tekit tein kichiuayaj nejon tokniuan porin nechpaleuij maj nikajsikamatini ouijkayomej tein kipanouayaj tokniuan akin tiltik ininnakayo.

Itech nejon tonalmej, ompa Sudáfrica ixyetoya kani monekia nemiskej akin ixchijchipaujkej uan akin tiltik ininnakayo, yejua ika amo semi monojnotsayaj. Tokniuan akin tiltik ininnakayo tajtouayaj inintajtoluan uan tanojnotsayaj uan monechikouayaj kampa motajtouaya inintajtoluan.

Kemej nochipa nitapaleuijka itech nechikolmej kampa motajtoua inglés, amo nikinixmatia miakej tokniuan akin tiltik ininnakayo. Sayoj ke axkan ueliskia nikmatis keniuj nemiaj uan tein momattoyaj kichiuaskej. Nikmatik ke tokniuan kipanouayaj ouijkayomej porin amo kichiuayaj tein momattoyaj kichiuaskej akin ompa nemiaj. Semi yolchikaujkej katkaj, porin maski ininchankauan uan akin ompa nemiaj semi kinixnamikkej, amo kinekkej kichiuaskej tein Biblia amo tamachtia nion tein taltikpakneminij kichiuayaj tein ika kitemouayaj kinyolseuiskej espíritus. Itech xolalkonemej taltikpakneminij semi kipanouayaj tatasojtilis. Miakej tepitsin momachtijkaj uan miakej senkis amo, sayoj ke semi kipoujkaitayaj Biblia.

Nikpiak tatiochiualis nitapaleuis keman seki tokniuan yajkej ininixpan tekiuanij porin amo kinkauayaj maj taueyichiuanij kemej yejuan kinekiaj uan kinchikaujkauiayaj maj kichiuanij seki taman. Notakuaujtamatilis mochikauak keman nikitak ke tokniuan telpochmej uan ichpochmej kitakamatkej Jiova uan katkaj yolchikaujkej. Yejuan kinkixtijkaj itech kaltamachtiloyamej porin amo kinekkej kijtoskej netataujtilmej nion nekuikatilmej tein oksekin ika taueyichiuayaj.

Tokniuan akin nemiaj itech altepet tein achto monotsaya Suazilandia (axkan Esuatini) kipanokej okse ouijkayot. Keman tekiuaj Sobhuza II momikilij, kinnauatijkej nochin akin ompa nemiaj maj kichiuanij seki taman tein ipa kichiuaj keman se taltikpaknenkej momikilia. Takamej monekia kitamitekiskej inintson uan siuamej no monekia motekiliskej uan kikauaskej semi tsikitsin. Kemej nejin ika kinueyichiuayaj ininuejkaujtatuan, miakej tokniuan takamej uan siuamej semi kintajyouiltijkej porin amo kinekkej kichiuaskej. Semi techyolpaktij maj tokniuan kiixtalianij kitakamatiskej Jiova. Tokniuan kayomej África techmachtijkej ke moneki nochipa tiktakamatiskej Jiova uan amo tiyolijsiuiskej, uan nejon kichikauak totakuaujtamatilis.

OKSEPA NITEKITI KAMPA KIKIXTIAJ AMAIXMEJ

Itech xiuit 1981 peuaskia motekitiltiskia computadoras kampa kikixtiayaj amaixmej uan yejua ika oksepa ompa nechtitankej maj nitapaleuiti. Semi kualtsin katkaj nejon tonalmej. Kemej mokixtiayaj amaixmej mopatatoya. Se tanamakakej techtaneujtijka se yankuik tepos porin kinekia maj tikitanij ox okachi techpaleuiskia kampa titaamakixtiayaj. Kemej tikitakej ke tapaleuiskia, tikoujkej makuil nejon teposmej uan tikixpatakej chiknaui linotipias tein tikpiayaj. No tiktalijkej se yankuik tepos tein ika titaamakixtiskiaj. Axkan okachi tikchijchiuayaj amaixmej.

Itech computadoras tiktekitiltiayaj MEPS, tein techpaleuij maj tikixtalianij yankuik taman kemej chijchiujtoskiaj amaixmej.a Keman naui betelitas tiajsikaj Sudáfrica tiktekitiltiayaj okseki teposmej uan axkan senkis mopatakaya (Is. 60:17). Tinauin timonamiktijkaya iniuan seki precursoras akin semi kitasojtayaj Jiova. Bill uan nejua tiksentokayaj Betel. Ken uan Dennis ompakauin nemiaj iniuan ininchankauan.

Motajtolkepayaj uan mokixtiayaj amaixmej itech okachi tajtolmej. Uan no, tikintitaniaj amaixmej itech okseki kalmej Betel. Yejua ika monekia okse yankuik kali Betel, uan tokniuan kichijchiujkej kampa ika pankalaki tonaltsin ompa Johannesburgo kampa semi takualtsinkan, uan itech xiuit 1987 uelikya tikuikej. Semi nechyolpaktij nikitas nochi nejon, uan no semi nechyolpaktij miak xiujmej nietos itech Comité de Sucursal ompa Sudáfrica.

TIKSELIAJ OKSE YANKUIK TEKIT

Itech xiuit 2001 panok se taman tein amo tikchiayaj: nechyoleujkej maj nitapaleuiti Betel ompa Estados Unidos itech Comité de Sucursal tein yankuixtok kiixtalijkaj. Maski techtayokoltiaya tikaujteuaskej tekit tein tikpiayaj ompa Sudáfrica uan tikinkaujteuaskej akin kuali iniuan timouikayaj, techyolpaktiaya peuas titekitiskej iniuan tokniuan akin tekitiaj Betel ompa Estados Unidos.

Sayoj ke techtekipachouaya tikaujteuaskej imomaj Laura, akin xiuejya katka. Kemej tietoskiaj Nueva York, amo semi ueliskia tikpaleuiskej, sayoj ke eyi iikniuan siuamej Laura kijtojkej ke yejuan kiyekpiaskiaj, kipaleuiskiaj uan kiixpanoltiskiaj. Techiluijkej ke maski amo uelia kitekitiliayaj Jiova miak tonalmej, kiyekpiaskej ininmomaj techpaleuiskia tejuan maj tiksentokanij tikchiuanij tekit tein tikpiayaj. Semi tikintasojkamatilijkej.

Nokniuj takat uan inamik akin nemiaj Toronto (Canadá), no techpaleuiayaj porin kiyekpiayaj nomomaj, akin iseltia katka. Panouayaya 20 xiujmej iniuan nemia. Semi tiktasojkamatij maj kiyekpianij ika netasojtalis hasta keman momikilij, tepitsin satepan ke tiajsikej Nueva York. Se ueyi tatiochiualis maj se ichankauan kiixtalikan tepaleuiskej itech seki taman maski kemansa ouij.

Betel ompa Estados Unidos nitekitik seki xiujmej kampa Producción de Publicaciones, kampa semi mopataka kemej motekitia. Satepan no nitekitik itech Departamento de Compras. Semi nechyolpaktiani nitekitis 20 xiujmejya itech nejin ueyi kali Betel kampa axkan timoajsij kemej 5,000 betelitas uan kemej 2,000 tokniuan akin tapaleuikij seki tonalmej.

Sesenta xiujmej achto amo niknemiliaya ke nikan nietoskia. Laura semi nechpaleuiani nochi nejin xiujmej. ¡Semi kualtsin tein tikpanouanij! Semi tikpatiuitaj tataman tekimej tein tikpianij uan no semi tikinpatiuitaj tokniuan akin tikpianij tatiochiualis iniuan titekitiskej, kemej tokniuan akin tekitij itech tataman kalmej Betel kampa titakalpanouanij. Kemej nikpia panouaya 80 xiujmej amo nikchiuaok miak tekit, uan no kinmachtianij miakej tokniuan telpochmej maj kichiuakan tein nikchiuaya.

Se salmista kijkuiloj: “Yolpaki xolal akin iDios yejua Jiova” (Sal. 33:12). ¡Melauj tein kijkuiloj! Semi nimotasojkamati porin uelik niktekitilij Jiova iniuan itekitikauan akin semi yolpakij.