Tein tajtanij akin taixtajtoltiaj

¿Keyej 2 Samuel 21:7-9 kijtoua ke David “kiiknelij Mefibóset” uan satepan kijtoua ke kitemaktij Mefibóset maj kimiktikan?

Aksa akin ijsiujka kiixtajtoltia nejin tajkuilol xa uelis motajtanis nejin. Sayoj ke tein melauj, moajsiaj omen akin monotsayaj Mefibóset, uan komo tikitaj tein panok uelis techmachtis se taman.

Saúl, akin tekiuajtik Israel kinpiak chikome okichpipil uan ome siuapipil. Yekinika yolik Jonatán. Satepan, Rizpá, okse inamik Saúl, kipiak se konetsin akin kitokaytijkej Mefibóset. Uan Jonatán kipiak se konetsin akin no kitokaytij Mefibóset. Yejua ika, se iokichpil uan se iixuiuj Saúl monotsayaj Mefibóset.

Sayoj ke, ¿keyej David kintemaktij seki takamej maj kinmiktikan? Tekiuaj Saúl peuak kintauelita gabaonitas akin nemiaj iniuan israelitas uan kitemoj kinmiktis. Nesi ke kinmiktij miakej gabaonitas. Nejon semi amo kuali katka, porin itech itonaluan Josué, takamej akin kinixyekanayaj israelitas kijtojkaj ke amo teyi kinchiuiliskiaj gabaonitas (Jos. 9:3-27).

Keman Saúl katka tekiuaj monekiaok kichiuaskej tein kiniluijkaj gabaonitas, sayoj ke Saúl amo kichiuak nejon, ta kitemoj kinmiktis. Yejua ika, Saúl uan akin nemiaj ichan motajtakolmakakej porin temiktijkej (2 Sam. 21:1). Keman David mochiuak tekiuaj, gabaonitas akin amo kinmiktijkaj kiluijkej tein panoka. David kintajtanij toni ueliskia kichiuas porin Saúl kichiujka nejon tein semi amo kuali uan ijkon Jiova ueliskia kitiochiuas tal kampa nemiaj. Yejuan amo tajtankej tomin, ta kitajtanijkej maj kintemakani chikome ikoneuan takat akin kiixtalijka maj kinmiktikan gabaonitas (Núm. 35:30, 31). David kichiuak tein kitajtanijkej (2 Sam. 21:2-6).

Ijkuak, Saúl uan Jonatán momikilijkajya itech se neteuilis. Sayoj ke Mefibóset, ikoneuj Jonatán yoltoya. Keman Mefibóset okichpilok katka, kipanok se taman tein amo kuali tein kichiuak maj amo uelini nejnemi, ika nejin kinextia ke yejua amo tapaleuij keman iueyitat kinmiktij gabaonitas. David uan Jonatán moiluijkaj ke nochipa kuali mouikaskiaj uan nejin no kinpaleuiskia ikoneuan Jonatán, kemej Mefibóset (1 Sam. 18:1; 20:42). Biblia kijtoua nejin ika tein kichiuak David: “Tekiuaj kiiknelij Mefibóset ikoneuj Jonatán, ikoneuj Saúl, porin ijkon motenkaujkaj iixpan Jiova David uan Jonatán” (2 Sam. 21:7).

Maski ijkon, David kichiuak tein gabaonitas kitajtanijkej. Kintemaktij ome ikoneuan Saúl, semej katka Mefibóset uan makuil iixuiuan (2 Sam. 21:8, 9). Ika tein David kichiuak tapaleuij maj Jiova oksepa kitiochiuani tal kampa nemiaj.

Nejin tein panok techmachtia se taman. Komo nejon ome ikoneuan uan makuil iixuiuan Saúl amo tapaleuiskiaj keman kinmiktijkej gabaonitas, Jiova amo kikauaskia maj kinmiktianij, porin tanauatil tein Dios kinmakaka kijtouaya ke konemej amo monekia mikiskej ika tein kichiuayaj inintatuan. Nejon tanauatil no kijtouaya: “Sejse taltikpaknenkej moneki mikis ika tein yejua kichiua” (Deut. 24:16). Nejin kinextia ke chikome ichankauan Saúl akin momikilijkej no tapaleuijkaj keman kinmiktijkej gabaonitas. Yejua ika, yejuan momikilijkej porin kichiujkaj tein amo kuali.

Yejua ika, ¿toni techmachtia tein panok? Ke akin kichiua teisa tein amo kuali amo uelis motenpaleuis uan kinemilis oso kijtos ke kichiuak porin ijkon kinauatijkej, ta moneki kielnamikis ke kiselis tein kuali oso tein amo kuali ika tein yejua kichiua. Se tajkuilol itech Biblia kijtoua: “Kuali xikita keniuj timonejnemiltijtok uan ijkon kuali mitsyas itech moojuan. Amo oksekopa xiyouj, nion moopochmakopa nion moyekmakopa. Amo xikchiua tein amo kuali” (Prov. 4:24-27; Efes. 5:15).