¿Keniuj uelis tiksentokaskej semi timotasojtaskej?

1, 2. 1) ¿Keyej tatitanil Pablo kijtoj ke “okachi tayekantok” maj se tetasojta? 2) ¿Katiyejua netajtanilmej tiknankilitij?

KEMAN tatitanil Pablo kijtoj ke moneki tiknextiskej seki taman kemej titakuaujtamatiskej, tikchiaskej tein kuali uan titetasojtaskej, kijtoj ke ‘tein okachi tayekantok yejua maj timotasojtakan’ (1 Cor. 13:13). ¿Keyej kijtoj nejon? Porin satepan amo monekisok maj titakuaujtamatikan ke Dios kichiuas tein motenkaua, porin ijkuak nochi kitamichiuasya. Sayoj ke nochipa monekis tiktasojtaskej Jehová uan oksekin. Uan ijkon kemej panos tiempo okachi tikintasojtaskej.

² Maj tikitakan eyi netajtanilmej tein techpaleuis maj nochipa titetasojtakan. Yekinika, ¿keyej moneki timotasojtaskej se iuan okse? Ojpatika, ¿keniuj uelis tiknextiskej ke timotasojtaj? Uan expatika, ¿keniuj uelis tiksentokaskej semi timotasojtaskej?

¿KEYEJ MONEKI TIMOTASOJTASKEJ SE IUAN OKSE?

3. ¿Keyej moneki timotasojtaskej se iuan okse?

³ ¿Keyej semi moneki maj timotasojtakan se iuan okse? Keman tikintasojtaj tokniuan tiknextiaj ke yekmelauj tikchiuaj kemej Cristo. Jesús kiniluij itatitaniluan: “Ijkon nochin kimatiskej ke namejuan nannomomachtijkauan: komo namotasojtaj se iuan okse” (Juan 13:35). Uan no, keman timotasojtaj, kualtsin timouikaj. Yejua ika tatitanil Pablo kijtoj ke “keman titetasojtaj yekmelauj kualtsin timouikaj se iuan okse” (Col. 3:14). Uan no, komo titetasojtaj ueli tikchiuaj okse taman. Tatitanil Juan kinijkuilouilij tokniuan: “Akin kitasojta Dios maj no kitasojta iiknitsin” (1 Juan 4:21). Yejua ika, keman tikintasojtaj tokniuan no tiknextiaj ke tiktasojtaj Jehová.

4, 5. Xikonijto se neskayot tein kinextia ke komo tiktasojtaj Dios no tikintasojtaj tokniuan.

⁴ ¿Keyej komo tiktasojtaj Jehová no uelis tikintasojtaskej tokniuan? Uelis tikajsikamatiskej komo tiknemiliaj keniuj sentekitij toyolo uan tonakayo. Se tapajtijkej ueli kimati ox kuali tekititok toyolo komo kimachilia tomakechtan oso tomay. ¿Toni techmachtia nejin?

⁵ Se tapajtijkej uelis kimatis ox kuali tekititok toyolo komo kimachilia tomakechtan. No ijkon, uelis tikmatiskej ox semi tiktasojtaj Jehová komo tikitaj ox no semi tikintasojtaj tokniuan. Komo tikitaj ke amo semi tikintasojtajok kemej achto, nejon kinextia ke amo no semi tiktasojtajok Jehová. Sayoj ke komo nochipa tikintasojtaj tokniuan, kinextis ke semi tiktasojtaj Jehová.

6. ¿Keyej moneki techtekipachos komo amo semi tikintasojtajok tokniuan? (1 Juan 4:​7-9, 11).

⁶ ¿Keyej moneki maj techtekipacho komo amo semi tikintasojtajok tokniuan? Porin nejon kinextijtoskia ke amo semi kuali timouikajok iuan Jehová uan hasta ueliskia tikauaskej. Ijkon kinextia tein kijtoj tatitanil Juan: “Akin amo kitasojta iiknitsin akin kiitstok, amo uelis kitasojtas Dios, akin amo ueli kiita” (1 Juan 4:20). ¿Toni techmachtia? Ke sayoj uelis tikyolpaktiskej Jehová komo timotasojtaj se iuan okse (xikonixtajtolti 1 Juan 4:​7-9, 11).

¿KENIUJ UELIS TIKNEXTISKEJ KE TIMOTASOJTAJ?

7, 8. ¿Keniuj uelis tiknextiskej ke timotasojtaj?

⁷ Itech Biblia miakpa tikajsij nejin tanauatil: “Ximotasojtakan se iuan okse” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Keman titetasojtaj amo akin ueli kiita porin sayoj tikmachiliaj itech toyolo. Komo ijkon, ¿keniuj tokniuan uelis kimatiskej ke tikintasojtaj? Ika tein tikijtouaj uan tein tikchiuaj.

⁸ Uelis tikchiuaskej miak taman para tikinnextiliskej tokniuan ke tikintasojtaj. Biblia kijtoua seki taman kemej nejin: “Amo xikajkayauakan namokniuj” (Zac. 8:16). “Kuali ximouikakan iniuan oksekin” (Mar. 9:50). “Namejuan achto xiknextikan ke nantetakachiuaj” (Rom. 12:10). “Kuali ximoselikan” (Rom. 15:7). “Xiksentokakan […] ximotapojpoluijtokan” (Col. 3:13). “Xiksentokakan ximosenpaleuijtokan keman nankipiaskej ouijkayomej” (Gál. 6:2). “Xiksentokakan ximoyolseuijtokan” (1 Tes. 4:18). “Xiksentokakan […] ximopaleuijtiakan” (1 Tes. 5:11). “Ininka ximotataujtikan oksekin” (Sant. 5:16).

9. ¿Keyej keman tikinyolseuiaj oksekin tiknextiaj ke tikintasojtaj? (No xikonita taixkopimej).

⁹ Maj tikitakan se taman kemej uelis tiknextiskej ke tikintasojtaj tokniuan, uan nejin yejua semej tein ijkuiliujtok itech párrafo 8. Pablo kijtoj: “Xiksentokakan ximoyolseuijtokan”. ¿Keyej keman tikinyolseuiaj oksekin tikinnextiliaj ke tikintasojtaj? Se amatajkuilol tein ika tajtoua Biblia, kijtoua ke tajtol griego tein Pablo kikuik para kijtos ‘ximoyolseuijtiakan’ kijtosneki “se ijkatos inakastan aksa para se kiyolchikauas keman kipia ouijkayomej”. Yejua ika keman tikyolseuiaj se tokniuj akin tajyouijtok, tikpaleuiaj maj kisentoka kitekitili Jehová uan maj amo kikaua. Nochipa keman tikyolseuiaj se tokniuj tiknextiaj ke tiktasojtaj (2 Cor. 7:​6, 7, 13).

10. ¿Keyej tikijtouaj ke komo titeikneliaj no tiknekij titeyolseuiskej?

¹⁰ Keman tikikneliaj aksa no tiknekij tikyolseuiskej. ¿Keyej? Porin keman aksa kiiknelia akin tajyouijtok, kineki kiyolseuis uan kitemoua keniuj kipaleuis. Yejua ika, achto tikikneliaj aksa uan nejon techpaleuia maj tiknekikan tikyolseuiskej. Pablo kijtoj ke Jehová techyolseuia porin techiknelia. Kijtoj ke Jehová yejua “toTajtsin akin semi teiknelia uan Dios akin nochipa teyolseuia” (2 Cor. 1:3). Pablo kikuik tajtolmej “semi teiknelia” para kijtos tein se kimachilia keman se kiiknelia aksa. Biblia kijtoua ke Jehová yejua “toTajtsin akin semi teiknelia” porin nochipa kiniknelijtok oksekin. Uan kemej kimachilia nejon, techyolseuia “itech nochi tataman ouijkayomej tein tikpiaj” (2 Cor. 1:4). Ijkon kemej teamikseuia at tein kisa itech ameyal, Jehová no kinyolseuia uan kinyolchikaua akin tajyouijtokej. ¿Toni techpaleuis maj tikiniknelikan uan maj tikinyolseuikan oksekin ijkon kemej Jehová kichiua? Komo peua tiknextiaj seki taman tein techpaleuis maj titeiknelikan uan maj titeyolseuikan. Maj tikitakan toni uelis techpaleuis.

11. Kemej kijtoua Colosenses 3:12 uan 1 Pedro 3:​8, ¿toni techpaleuis maj tikintasojtakan uan maj tikinyolseuikan oksekin?

¹¹ ¿Toni techpaleuis maj tiksentokakan timotasojtakan uan maj nochipa timoyolseuikan? Maj peua tiknextikan ke titeajsikamatij, maj timotasojtakan kemej yeskia tiiknimej uan maj tiyolkualmej (xikonixtajtolti Colosenses 3:12; 1 Pedro 3:8). Keman tikinikneliaj tokniuan uan yekmelauj ininka timotekipachouaj, amo ouij techkisa tikinyolseuiskej keman tajyouijtokej. Jesús kimelauak ijkon: “Tein semi se kinemilijtok yejua tein se kijtoua. Akin yolkuali kijtoua tein kuali porin kinemilijtok tein kuali” (Mat. 12:​34, 35). Yejua ika, keman tikinyolseuiaj tokniuan tikinnextiliaj ke yekmelauj tikintasojtaj.

¿KENIUJ UELIS TIKSENTOKASKEJ SEMI TIMOTASOJTASKEJ?

12. 1) ¿De toni moneki timoyekpiaskej? 2) ¿Katiyejua netajtanil tiknankilitij?

¹² Tinochin tiknekij tiktakamatiskej nejin tanauatil: “Maj tiksentokakan timotasojtakan se iuan okse” (1 Juan 4:7). Sayoj ke amo moneki tikelkauaskej tein tanejmachtij Jesús: “Okachi miakej amo tetasojtaskejok” (Mat. 24:12). Jesús amo kinekia kijtos ke miakej imomachtijkauan amo motasojtaskiajok, sayoj ke kemej tinemij kampa miakej amo motasojtaj, moneki timoyekpiaskej para maj amo no ijkon tikchiuakan. Yejua ika semi moneki maj tiknankilikan nejin netajtanil: ¿keniuj uelis tikmatiskej ox tiksentokaj semi tikintasojtaj tokniuan?

13. ¿Keniuj uelis tikmatiskej ox semi tikintasojtaj tokniuan?

¹³ Tein tikchiuaj keman tikpiaj kuejmolmej, kinextis ox semi tikintasojtaj tokniuan oso amo (2 Cor. 8:8). Se taman yejua tein kijtoj tatitanil Pedro: “Okachi tayekantok semi ximotasojtakan se iuan okse, porin akin tetasojta nochipa tetapojpoluia” (1 Ped. 4:8). Yejua ika, tein tikchiuaj keman tokniuan mopolouaj oso techyolkokouaj kinextis ox yekmelauj tikintasojtaj.

14. Kemej kijtoua 1 Pedro 4:​8, ¿keniuj moneki titetasojtaskej? Xikonijto se neskayot.

¹⁴ Maj okachi kuali timomachtikan tein kijtoj tatitanil Pedro. Ipeujyan versículo 8 kijtoua keniuj moneki timotasojtaskej: “semi ximotasojtakan”. Tajtol “semi” tein Pedro kikuik kijtosneki “mopataua”. Tein kisentoka kijtoua versículo techiluia ke komo semi tikintasojtaj tokniuan nochipa tikintapojpoluiskej. Itech xiontanemili se mesa tein semi ixtetextik. Para maj amo moita nochi tein amo kualtsin uelis tikixsouiliskej se tasal. No ijkon, komo semi tikintasojtaj tokniuan, tikintapojpoluiskej oso kemej yeskia tikixtsakuaskej tein techchiuilijkej uan amo sayoj sepa tikchiuaskej, ta nochipa tikintapojpoluiskej.

15. ¿Toni tikchiuaj keman semi titetasojtaj? (Colosenses 3:13).

¹⁵ Moneki semi tikintasojtaskej tokniuan para tikintapojpoluiskej keman mopolouaj hasta keman semi ouij techkisas (xikonixtajtolti Colosenses 3:13). Keman tikintapojpoluiaj oksekin, tiknextiaj ke tikintasojtaj uan ke tiknekij tikyolpaktiskej Jehová. ¿Toni no techpaleuis maj tikintapojpoluikan oksekin uan maj amo techkualanti tein kichiuaskej?

16, 17. ¿Toni no techpaleuis maj tikintapojpoluikan oksekin keman techchiuiliaj teisa? Xikonijto se neskayot. (No xikonita taixkopimej).

¹⁶ Xikonita sayoj tein kuali tein kichiuaj oksekin uan amo tein amo kuali. Xikonnemili nejin: tejuatsin tionyetok iniuan seki tokniuan uan nankinekij namokixtiliskej se taixkopin nannochin. Tikonkixtia eyi taixkopimej para tionmokauilis tein okachi kualtsin kisak. Sayoj ke tikonita ke itech semej taixkopimej, se tokniuj amo kuali kisak. ¿Toni tikonchiuaskia? Tikonixpoloskia nejon taixkopin uan tionmokauiliskia omen kampa nochin ixuetskatokej.

¹⁷ Keman tikinitaj taixkopimej tein tikinpiaj, tikelnamikij nejon tonal uan keniuj kualtsin timoixpetanijkej iniuan tokniuan. Sayoj ke, xikonnemili ke se tonal se tokniuj kijtoj oso kichiuak teisa tein amo kuali yetok. ¿Toni tikonchiuaskia? ¿Keyej amo tikonelkaua ijkon kemej tikonixpoloskia se taixkopin tein amo kuali kisak? (Prov. 19:11; Efes. 4:32). Uelis tikelkauaskej tein kichiuak nejon tokniuj porin okachi tikelnamikij keman miakpa kualtsin iuan tietoyaj. Okachi kuali, maj sayoj timokauilikan “taixkopimej tein kualtsitsin”.

¿KEYEJ SEMI MONEKI MAJ TIMOTASOJTAKAN AXKAN?

18. ¿Toni tikitakej itech nejin tamachtilis?

¹⁸ ¿Keyej tiknekij tiksentokaskej semi timotasojtaskej? Porin kemej tikitakejya, keman tiknextiaj ke tikintasojtaj tokniuan no tiknextiaj ke tiktasojtaj Jehová. ¿Keniuj uelis tiknextiskej ke tikintasojtaj tokniuan? Keman tikinyolseuiaj. Uan para tiksentokaskej ijkon tikchiuaskej, moneki maj tikiniknelikan. ¿Keniuj uelis tiksentokaskej semi timotasojtaskej? Komo tikintapojpoluiaj keman mopolouaj maski ouij techkisas.

19. ¿Keyej semi moneki maj timotasojtakan?

¹⁹ ¿Keyej semi moneki maj timotasojtakan axkan? Maj tikitakan tein kijtoj Pedro: “Amo uejkaua nochi tatamis. Yejua ika, […] semi ximotasojtakan se iuan okse” (1 Ped. 4:​7, 8). ¿Toni techpanos achto ke tatamis? Jesús kijtoj tein kinpanoskia imomachtijkauan: “Namechtauelitaskej porin nantakuaujtamatij itech notokay” (Mat. 24:9). Para uelis tiksentokaskej tiktekitiliskej Jehová maski techtauelitaskej, semi moneki maj kuali timouikakan. Satanás amo uelis kichiuas maj amo kuali timouikakanok komo timotasojtaj se iuan okse, porin keman titetasojtaj “yekmelauj kualtsin timouikaj” (Col. 3:14; Filip. 2:​1, 2).