Maj tikelnamikikan ke Jehová yejua “Dios akin nochipa yoltok”

1. ¿Toni uelis techpaleuis maj tiksentokakan tikueyichiuakan Jehová maski tikixnamikij miak ouijkayomej?

BIBLIA kijtoj ke tein mochiuaskia axkan ‘semi ouij yeskia uan tamouilil’ (2 Tim. 3:1). Kampa yeski kipiaj ouijkayomej, sayoj ke okachiok itekitikauan Dios porin kinixnamikij uan kintajyouiltiaj. ¿Toni techpaleuis maj tiksentokakan tikueyichiuakan Jehová? Se taman yejua komo tikelnamikij ke Jehová yejua “Dios akin nochipa yoltok” (Jer. 10:10; 2 Tim. 1:12).

2. ¿Keniuj kinextia Jehová ke yejua Dios akin nochipa yoltok?

² Jehová kiita nochi ouijkayomej tein tikpiaj uan kitemoua nochipa techpaleuis (2 Crón. 16:9; Sal. 23:4). Komo tikitaj ke Jehová yejua Dios akin nochipa yoltok techpaleuis maj tikxikokan tein yeski ouijkayot. Maj tikitakan keniuj ijkon kipanok tekiuaj David.

3. ¿Toni kijtosnekik David keman kijtoj: “¡Jehová yoltok!”?

³ David kiixmatia Jehová uan iuan takuaujtamatia. Kitataujtij Jehová maj kipaleui keman tekiuaj Saúl uan oksekin kinekiaj kimiktiskej (Sal. 18:6). Keman David kiitak ke Jehová kinankilij uan kipaleuij, kijtoj: “¡Jehová yoltok!” (Sal. 18:46). ¿Toni kijtosnekik David? Yejua kijtosnekia ke Jehová yejua Dios akin nochipa yoltok uan nochipa kinpaleuia itekitikauan. David kimatia ke Jehová kiitaya tein kipanouaya uan ke nochipa kipaleuiskia, nejon kiyolchikauak maj kisentoka kitekitili uan maj kiueyichiua (Sal. 18:​28, 29, 49).

4. ¿Keniuj techpaleuis komo tikneltokaj ke Jehová yoltok?

⁴ Komo tikneltokaj ke Jehová yoltok uelis tiyolpakiskej keman tiktekitiliskej. Nejon no techyolchikauas maj tikxikokan tein yeski ouijkayot uan maj tiksentokakan tiktekitilikan. Uan no, techpaleuis maj amo keman tikauakan.

DIOS AKIN NOCHIPA YOLTOK MITSONYOLCHIKAUAS

5. ¿Toni techpaleuis keman tikpiaskej ouijkayomej? (Filipenses 4:13).

⁵ Uelis tikxikoskej tein yeski ouijkayot komo tikelnamikij ke Jehová yoltok uan ke nochipa techpaleuis. Yejuatsin amo teyi kitsakuilia porin kipia nochi chikaualis uan uelis techpaleuis maj tikxikokan tein yeski taman (xikonixtajtolti Filipenses 4:13). Yejua ika, ueli tikneltokaj ke nochipa techpaleuis keman monekis. Keman tikitaj keniuj Jehová techpaleuia keman techpanoua teisa, okachi tikneltokaj ke no techpaleuis keman tikpiaskej okseki ouijkayomej.

6. ¿Toni kipanok David tein kipaleuij maj okachi takuaujtamati iuan Jehová?

⁶ Maj tikitakan ome taman tein kipanok David tein kipaleuij maj okachi takuaujtamati iuan Jehová. Keman katka telpoch uan kinyepiaya ichkamej, se tekuani kiuikak se ichkat tein katka de itat, uan okse tonal se oso no ijkon kichiuak. Keman ijkon panok, David moyolchikauak uan kinpaleuij ichkamej. Yejua kimatia ke Jehová kipaleuijka uan amo kijtoj ke kichiuak iselti (1 Sam. 17:​34-37). David amo keman kielkauak tein kipanok. Yejua nochipa kielnamikia uan nejon kipaleuij maj okachi kineltoka ke Dios akin nochipa yoltok no kiyolchikauaskia satepan.

7. ¿Itech toni tanemilij David, uan keyej nejon kipaleuij maj moteui iuan Goliat?

⁷ Satepan, keman David xa katkaok telpoch, kinkalpanoto soldados israelitas. Kiitak ke soldados moujtoyaj porin se ueyi takat filisteo akin monotsaya Goliat kiniluijtoya: “¡Xinechualtitanilikan se takat para maj timoteuikan!” (1 Sam. 17:​10, 11). Soldados semi kimouiliayaj Goliat porin kiitayaj ke tel ueyi katka uan kinmojmoujtiaya tein kijtouaya (1 Sam. 17:​24, 25). Sayoj ke David amo mouik porin kimatia ke keman Goliat kinkejkelojtoya soldados de Israel, tein melauj kiixnamiktoya “Dios akin nochipa yoltok” (1 Sam. 17:26). David nochipa kielnamikia Jehová, takuaujtamatia ke yejuatsin kipaleuiskia ijkon kemej achto kipaleuijka keman kinyekpiaka ichkamej. Uan ijkon panok, Jehová kipaleuij maj kiixnamiki Goliat uan maj kitani (1 Sam. 17:​45-51).

8. ¿Toni techpaleuis maj okachi titakuaujtamatikan iuan Jehová keman tikpiaskej ouijkayomej? (No xikonita taixkopin).

⁸ Ijkon kemej David, tejuan no uelis titaxikoskej komo tikelnamikij ke Dios akin yoltok nochipa techpaleuis (Sal. 118:6). Komo titanemiliaj itech tein Dios kichiuani techpaleuis maj okachi iuan titakuaujtamatikan. Xa uelis tikonixtajtoltis tein mitsonelnamiktis keniuj ne uejkauj Jehová kinmakixtijka itekitikauan (Is. 37:​17, 33-37). Uan no, xikonita tamachtilis tein moajsi itech jw.org tein kinextia keniuj Jehová kinpaleuiani itekitikauan itech nejin tonalmej. No xikonelnamiki keniuj Jehová mitsonpaleuiani. Xa tikonnemilis ke Jehová amo mitsonpaleuiani xikonmikti se tekuani oso xikonmikti se oso. Sayoj ke Jehová ipa miakpa mitsonpaleuiani. Tikmatij nejin porin no mitsonyoleuak kuali iuan xionmouika (Juan 6:44). Uan ueli tikonsentoka tikontekitilia porin yejuatsin mitsonpaleuiani. Yejua ika, xikonilui Jehová maj mitsonpaleui xikonelnamiki keniuj mitsonnankiliani, keniuj mitsonpaleuij keman okachi monekia oso keniuj mitsonyekpiak itech se ouijkayot. Keman itech tiontanemilis nejin, okachi tikonneltokas ke kisentokas ijkon kichiuas.

9. ¿Toni moneki tikelnamikiskej keman tikpiaj ouijkayomej? (Proverbios 27:11).

⁹ Tikmatij ke Jehová yejua Dios akin nochipa yoltok uan nejon techpaleuis maj tiknemilikan tein okachi moneki keman tikpiaskej ouijkayomej. Satanás kijtoua ke keman titajyouiskej, tikauaskej Jehová (Job 1:​10, 11; xikonixtajtolti Proverbios 27:11). Yejua ika komo amo tikauaj, tiknextiliskej Jehová ke tiktasojtaj uan ke Satanás se xolopij. Xa kampa tionnemi tekiuanij amo kikauaj xikueyichiuakan Jehová, xa amo mitsonajsi tomin, xa kampa tiontanojnotsa amo kinekij kikakiskej kuali tanauatilmej oso xa tikonpanotok okse taman tein mitsontajyouiltia. Sayoj ke xikonelnamiki ke ijkon no uelis tikonnextis ke tikonyolpaktia Jehová. Amo xikonelkaua ke yejua nochipa mitsonpaleuis xikonxiko tein yeski ouijkayot (1 Cor. 10:13). Yejuatsin mitsonpaleuis xionmoyolchikaua para uelis tiontaxikos.

DIOS AKIN NOCHIPA YOLTOK MITSONTATIOCHIUIS

10. ¿Keniuj Dios kintatiochiuis akin kiueyichiuaj?

¹⁰ Jehová kintatiochiuia akin kiueyichiuaj (Heb. 11:6). Axkan kichiua maj tiyolseujtokan uan maj tiyolpakikan, uan satepan kichiuas maj tinemikan nochipaya. Tikmatij ke yejuatsin kineki uan uelis techtatiochiuis. Uan kemej tikneltokaj nejin techpaleuia maj tiknekikan tiktekitilikan, ijkon kemej kichiujkej itekitikauan ne uejkauj. Maj tikitakan tein kipanok Timoteo (Heb. 6:​10-12).

11. ¿Toni kipaleuij Timoteo maj kuali kitekitili Jehová? (1 Timoteo 4:10).

¹¹ (Xikonixtajtolti 1 Timoteo 4:10). Timoteo takuaujtamatia iuan Dios akin nochipa yoltok. Kiyekmatia ke yejuatsin kitatiochiuiskia. Yejua ika semi kitekitilij Jehová uan kinpaleuij oksekin. ¿Toni kichiuak? Tatitanil Pablo kiyolchikauak maj kuali tanojnotsa uan maj kuali tamachti itech nechikol. Ijkon telpochmej uan akin xiuejkejya kiitaskiaj tein Timoteo kichiuaya uan no ijkon kichiuaskiaj. No kimakakej seki tekimej tein ouijkej katkaj kemej tayolmajxitis, sayoj ke no kinextis ke tetasojtaya (1 Tim. 4:​11-16; 2 Tim. 4:​1-5). Timoteo kimatia ke maski amo kiitayaj tein kichiuaya, Jehová kitatiochiuiskia (Rom. 2:​6, 7).

12. ¿Toni uelis kichiuas maj tayekananij chikauak tekitikan? (No xikonita taixkopin).

¹² Ijkon kemej Timoteo, tayekananij no uelis kimatiskej ke Jehová kiita uan kipatiuita tein kichiuaj. Tayekananij kinixyekanaj tokniuan, tamachtiaj uan tanojnotsaj, uan miakej no tapaleuiaj keman mochijchiuaj kalmej kampa titaueyichiuaj uan keman mochiuaj tetsaujmej. Sekin kinpaleuiaj Oloch Tokniuan tein Kinkalpanouaj akin Mokokouaj oso Tayekananij akin Tetajtouiaj itech Tapajtiloyamej. Tayekananij kimatij ke yejua Jehová akin kinixyekana tokniuan. Yejua ika semi tekitij uan kiyekmatij ke Dios kintatiochiuis (Col. 3:​23, 24).

13. ¿Keniuj momachilia Jehová keman kiita ke timochikauaj tiktekitiliskej?

¹³ Maski amo tinochin uelis tiyeskij titayekananij, tinochin uelis tikchiuaskej teisa para tiktekitiliskej Jehová. Yejuatsin semi kipatiuita nochi tein tikchiuaj para tiktekitiliskej. Kitasojkamati keman tikontemaka maski amo miak tomin para tekit tein mochiujtok itech nochi taltikpak. No semi yolpaki keman mitsonita ke tionmomaajokui para tiontanankilis itech nechikol maski tionpinaua. Uan yolpaki keman tikontapojpoluia akin mitsonyolkokoj. Yejuatsin semi kipatiuita nochi tein tikonchiua maski tikonnemilia ke amo semi ueli tikontekitilia. Jehová mitsontasojta uan mitsontatiochiuis (Luc. 21:​1-4).

MAJ AMO KEMAN TIKAUAKAN DIOS AKIN NOCHIPA YOLTOK

14. ¿Keyej komo kuali timouikaj iuan Jehová techpaleuis maj amo keman tikauakan? (No xikonita taixkopin).

¹⁴ Komo tikneltokaj ke Jehová yekmelauj nemi, techpaleuis maj amo tikchiuakan tein amo kiyolpaktia. Ijkon kipanok José, akin amo kinekik auilnemis, porin kiitaya ke Dios yekmelauj nemi uan kinekia kitakamatis (Gén. 39:9). Komo tejuan no tiknekij ijkon tikitaskej Jehová, moneki tikxeloskej tiempo para timotataujtiskej uan timomachtiskej Biblia. Ijkon okachi kuali iuan timouikaskej. Komo kuali timouikaj iuan Jehová ijkon kemej José, amo keman tikchiuaskej tein amo kiyolpaktia (Sant. 4:8).

15. ¿Toni techmachtia tein kichiujkej israelitas keman yetoyaj taluakyan? (Hebreos 3:12).

¹⁵ Akin amo kichiuaj cuenta ke Jehová yekmelauj nemi uelis niman kikauaskej. Maj tikitakan toni kinpanok israelitas keman yetoyaj taluakyan. Kimatiaj ke Jehová nemia, sayoj ke peuak amo kineltokaj ke yejua kinmakaskia tein kinpolouaya. Uan hasta tajtankej: “¿Touan yetok Jehová oso amo?” (Éx. 17:​2, 7). Satepan kikaujkej Dios. Tejuan amo tiknekij tikchiuaskej ijkon kemej israelitas (xikonixtajtolti Hebreos 3:12).

16. ¿Toni uelis kichiuas maj amo titakuaujtamatikanok?

¹⁶ Tein axkan panoua kichiua maj techouijkisa tiktekitiliskej Jehová. Miakej kijtouaj ke Dios amo yekmelauj nemi, uan moita ke okachi kuali yetokej porin amo kitakamatij. Nochi nejin uelis kichiuas maj amo titakuaujtamatikanok. Maski tiksentokaskej tikneltokaskej ke Dios nemi, xa tiknemiliskej ke amo techpaleuis. Ijkon kipanok akin kijkuiloj Salmo 73. Kiitak ke miakej akin amo kitakamatiaj Dios, kisentokayaj yolpakiaj uan amo teyi kintekipachouaya. Yejua ika motajtanij ox nenkaj katka komo kisentokaya kitekitiliaya Jehová (Sal. 73:​11-13).

17. ¿Toni techpaleuis maj amo tikauakan Jehová?

¹⁷ ¿Toni kipaleuij salmista? Yejua itech tanemilij toni kinpanoskia akin amo takuaujtamatiskiajok iuan Jehová (Sal. 73:​18, 19, 27). No kinemilij keniuj kipaleuiskia komo kitekitiliaya (Sal. 73:24). Tejuan no uelis titanemiliskej itech nochi tein Jehová techmakani uan keniuj tinemiskiaj komo amo tiktekitiliskiaj. Komo ijkon tikchiuaj amo keman tikauaskej Jehová uan no tikijtoskej kemej salmista: “Nejua, semi kuali maj nimotoki iuan Dios” (Sal. 73:28).

18. ¿Keyej amo moneki tikmouiliskej tein amo uejkaua mochiuas?

¹⁸ Uelis tikixnamikiskej tein yeski ouijkayot porin ‘tiktekitiliaj Dios akin melauak uan nochipa yoltokʼ (1 Tes. 1:9). Yejua yekmelauj toka motekipachoua uan nochipa techpaleuis. Ijkon kichiuak iniuan itekitikauan ne uejkauj uan ijkon kisentokas kichiuas. Amo uejkaua mochiuati tetsaujkatajyouilis, sayoj ke ijkuak Jehová amo techsenkauas (Is. 41:10). “Yejua ika, maj amo timouikan, ta maj tikijtokan: ‘Jehová nechpaleuia. Amo nimouis’” (Heb. 13:​5, 6).