“Xikchiuakan tein kijtoua itajtol Dios”

1, 2. ¿Keyej tiyolpakij akin tiktekitiliaj Jehová? (Santiago 1:​22-25).

JEHOVÁ uan Jesús kinekij maj tiyolpakikan. Akin kijkuiloj Salmo 119:2 kijtoj: “Yolpakij akin kitakamatij tein tanauatia, akin kitemouaj ika nochi ininyolo”. Uan Jesús no kijtoj: “¡Yolpakij akin kikakij itajtol Dios uan kichiuaj!” (Luc. 11:28).

² Tiitekitikauan Jehová tiyolpakij. Miak taman kichiua maj tiyolpakikan, se taman yejua porin nochipa tikixtajtoltiaj Biblia uan timochikauaj tikchiuaskej tein ompa timomachtiaj (xikonixtajtolti Santiago 1:​22-25).

3. ¿Keniuj techpaleuia komo tikchiuaj tein kijtoua iTajtol Dios?

³ ¿Keniuj techpaleuia komo tikchiuaj “tein kijtoua itajtol Dios”? Keman tikchiuaj tein timomachtiaj tikyolpaktiaj Jehová uan yejua ika no tiyolpakij (Ecl. 12:13). Uan no, keman tikchiuaj tein Biblia tayolmajxitia techpaleuia maj okachi kuali timouikakan iniuan tochankauan uan iniuan tokniuan. Xa tejuatsin tikonitania nejon. Uan no, amo tikpiaj ouijkayomej kemej tein kipiaj akin amo kitakamatij Jehová. Keman tekiuaj David mokuikatij satepan ke ika tajtoj itanauatiluan Jehová uan tein kichiua keman tetatsakuiltia, kijtoj: “Se kitakamatis teualkuilia se ueyi taxtauil” (Sal. 19:​7-11).

4. ¿Keyej kemansa techouijmaka tikchiuaskej tein kijtoua Biblia?

⁴ Kemansa techouijmaka tikixtajtoltiskej iTajtol Dios uan tikchiuaskej tein timomachtiaj. Tinochin tikpiaj miak tekit, maski ijkon moneki maj tikixtajtoltikan uan maj timomachtikan Biblia, yejua ika moneki maj tikxelokan tiempo, porin sayoj ijkon uelis tikajsikamatiskej tein Jehová kineki maj tikchiuakan. Yejua ika, itech nejin tamachtilis tikitaskej seki taman tein techpaleuis maj tikixtajtoltikan Biblia mojmostaj. No tikitaskej toni techpaleuis maj itech titanemilikan tein tikixtajtoltiaj uan maj tikitakan keniuj uelis tikchiuaskej tein timomachtiaj.

XIKONXELO TIEMPO PARA TIKONIXTAJTOLTIS ITAJTOL DIOS

5. ¿Toni tekimej moneki tikchiuaskej?

⁵ Tiitekitikauan Jehová tikpiaj miak tekit. Tikchiuaj miak taman tein Biblia kijtoua ke moneki tikchiuaskej. Moneki titekitiskej para timotekipanoskej uan tikintekipanoskej tochankauan (1 Tim. 5:8). Miakej tokniuan kinyekpiaj ininchankauan akin mokokouaj oso akin xiuejkejya. Uan tinochin moneki timoyekpiaskej para maj tipaktokan. Uan no, moneki tikchiuaskej seki taman tein semi moneki, kemej tikteixmatiltiskej kuali tanauatilmej. Kemej moneki tikchiuaskej miak taman, xa timotajtaniskej: “¿Toni nechpaleuis maj nikxelo tiempo para maj mojmostaj nikixtajtolti Biblia, maj itech nitanemili uan maj nikchiua tein nimomachtia?”.

6. ¿Toni uelis mitsonpaleuis xikonixtajtolti Biblia mojmostaj? (No xikonita taixkopin).

⁶ Tiitekitikauan Jehová tikitaj ke semi “tayekantok” maj tikixtajtoltikan Biblia, yejua ika moneki timochikauaskej ijkon tikchiuaskej (Filip. 1:10). Amatajkuilol Salmos kijtoua ke yolpaki takat akin “kitakamati itanauatil Jehová, tonayan uan youak kiixtajtoltia itanauatil uan itech tanemilia” (Sal. 1:​1, 2). Nejon kijtosneki ke semi moneki maj tikxelokan tiempo para tikixtajtoltiskej Biblia. Sayoj ke, ¿toni hora kuali yeskia maj tikixtajtoltikan? Tejuan tikmatij toni hora okachi tiuelij. Sayoj ke semi moneki maj tikixtalikan se hora keman yekmelauj tiueliskej. Se tokniuj takat akin monotsa Víctor kijtoua: “Maski amo semi nikuelita nimeuas kualkan, nikixtajtoltia Biblia itech nejon hora porin ijkuak amo semi takakisti. Amo teyi itech nitanemilijtok uan ijkon okachi kuali nimomachtia”. ¿No mitsonpanoua kemej Víctor? Xionmotajtani: “¿Toni hora okachi ueli nikixtajtoltia Biblia?”.

ITECH XIONTANEMILI TEIN TIKONIXTAJTOLTIA

7, 8. Xikonmelaua toni amo moneki tikchiuaskej keman tikixtajtoltiaj Biblia.

⁷ Keman tikixtaliskejya kemanian tikixtajtoltiskej Biblia, no moneki timochikauaskej tikelnamikiskej tein tikixtajtoltiaj. ¿Kemansa tikonixtajtoltiani teisa uan tepitsin satepan amo tikonelnamikiok toni tikonixtajtoltij? Nejin no uelis techpanos keman tikixtajtoltiaj Biblia. Xa tikixtalijkejya kanachi capítulos tikixtajtoltiskej sejse tonal. Kuali yetok maj tikixtalikan nejon uan maj timochikauakan ijkon tikchiuaskej (1 Cor. 9:26). Sayoj ke, komo tiknekij maj techpaleui tein tikixtajtoltiaj moneki tikchiuaskej okseki taman.

⁸ Maj itech titanemilikan nejin. Kiouit semi kinpaleuia xiujtsitsin, sayoj ke komo tel kioui niman taapexoni uan nejin amo kinpaleuiaok xiujtsitsin, yejua ika okachi kuali keman mixkioui porin at kalaki itech tal uan tapaleuia maj xiujtsitsin moskaltikan. No ijkon amo moneki ijsiujka tikixtajtoltiskej Biblia porin xa niman tikelkauaskej, amo teyi tikelnamikiskej uan amo tikchiuaskej tein timomachtiaj (Sant. 1:24).

9. ¿Toni uelis tikchiuaskej komo tikitaj ke ijsiujka titaixtajtoltiaj?

⁹ Xikonnemili ke keman tikonixtajtoltijtok Biblia tikonita ke ijsiujka tikonchiujtok. ¿Toni uelis tikonchiuas? Okachi yolik xiontaixtajtolti para uelis itech tiontanemilis, oso satepan ke tionmatamisya xikonxelo tiempo para itech tiontanemilis. Amo xionmotekipacho komo mitsonouijmaka itech tiontanemilis tein tikonixtajtoltij. Uelis 1) tikonixtalis okachi tiempo para tionmomachtis uan itech tiontanemilis. Oso 2) uelis tikonixtalis amo tikonixtajtoltis miak versículos uan ijkon tikonpias tiempo para itech tiontanemilis. Víctor, akin ika titajtojkej itech párrafo 6, kijtoua: “Amo nikixtajtoltia miak versículos, ta kemansa sayoj se capítulo. Kemej kualkan nitaixtajtoltia, nochi tonal ueli itech nitanemilia”. Xa tikonixtalis kanachi capítulos tikonixtajtoltis, sayoj ke moneki yolik tikonchiuas para uelis itech tiontanemilis (Sal. 119:97; xikonita recuadro “Netajtanilmej tein mitsonpaleuiskej itech xiontanemili tein tikonixtajtoltij”).

10. Xikonmelaua keniuj uelis tikonchiuas tein tikonixtajtoltij itech se versículo den Biblia (1 Tesalonicenses 5:​17, 18).

¹⁰ Tein yeski hora tikonixtajtoltis Biblia uan tein yeski tiempo tionuejkauas, nochipa moneki tikonnemilis keniuj uelis tikonchiuas tein tionmomachtia. Keman tikonixtajtoltis seki versículos, xionmotajtani: “¿Keniuj uelis nikchiuas tein nimomachtia axkan uan satepan?”. Maj tiknemilikan ke tikonixtajtoltij 1 Tesalonicenses 5:​17, 18 (xikonixtajtolti). Satepan xikonnemili keniuj tionmotataujtia. ¿Miakpa tikontataujtia Jehová uan tikoniluia nochi tein tikonmachilia? ¿Toni tikonneki tikontasojkamatilis? Xa uelis tikontasojkamatilis eyi taman. Komo tikonchiua nejin maski amo uejkauak, amo sayoj tikonkaktos tein kijtoua iTajtol Dios, ta no peuas tikonchiuas. Uan komo mojmostaj ijkon tikonchiua keman tikonixtajtoltia Biblia, satepan okachi kuali tikontekitilis Jehová. ¿Uan toni uelis tikonchiuas komo tikonita ke miak taman moneki tikonpatas?

XIKONIXTALI TIKONCHIUAS TEIN TIONUELIS

11. ¿Keyej keman tikixtajtoltiaj Biblia kemansa tiknekiskej timosenkauaskej? Xikonijto se taman.

¹¹ Keman tikonixtajtoltis Biblia, xa kemansa tikonnekis tionmosenkauas porin tikonitas ke miak tamanok moneki tikonchiuas. Maj tiknemilikan nejin. Se tonal tikonixtajtoltia seki versículos tein kijtoua ke amo kuali yetok maj titechikoitakan (Sant. 2:​1-8). Uan tikonixtalia ijkon tikonchiuas porin tikonita ke uelis tikonpatas seki taman uan okachi kuali tionmouikas iniuan oksekin. ¡Nejon semi kuali! Mostika tikonixtajtoltia seki versículos kampa kijtoua ke moneki achto kuali tiknemiliskej tein tikijtouaj (Sant. 3:​1-12). Uan tikonelnamiki ke tikonijtouani seki taman tein teyolkokoj, yejua ika tikonixtalia okachi tikonyolchikauas oksekin keman iniuan tiontajtos. Uiptika tikonixtajtoltia ke amo moneki timouikaskej iniuan akin amo kitekitiliaj Jehová (Sant. 4:​4-12). Tikonajsikamati ke amo moneki tikonixtajtoltis, tikonitas nion tikonkakis tein amo mitsonpaleuia. Naujpatika tonal xa tikonnekis tionmosenkauas porin tikonita ke miak taman moneki tikonpatas.

12. ¿Keyej amo moneki tionmosenkauas komo keman tikonixtajtoltia Biblia tikonita ke moneki tikonpatas seki taman? (No xikonita nota).

¹² Amo xionmosenkaua komo tikonita ke moneki tikonpatasok seki taman. Nejon kinextia ke tionyolyemanik keman tikonixtajtoltia Biblia uan ke tionmokaua maj mitsonpaleui xikonpata tein moneki. Keman kiixtajtoltia Biblia aksa akin yolyemanik niman kiita keniuj uelis kipaleuis uan kipata tein moneki.a No xikonelnamiki ke nochipa moneki “tinemiskej kemej Dios kineki” (Col. 3:10). ¿Toni mitsonpaleuis nochipa xikonchiua tein kijtoua iTajtol Dios?

13. ¿Keniuj uelis tikonchiuas tein tionmomachtia? (No xikonita taixkopimej).

¹³ Amo xikonixtali tikonchiuas sepasan nochi tein tikonixtajtoltia, ta yekinika uelis tikonchiuas sayoj se oso ome taman (Prov. 11:2). Xikonchiua nejin: xikonijkuilo seki taman tein moneki okachi kuali tikonchiuas, xikonixpejpena se oso ome taman tein tikonuelitaskia ika tionpeuas uan satepan xikonchiua okseki taman tein poliuis. ¿Toni yekinika uelis tikonchiuas?

14. ¿Toni yekinika uelis tikonixtalis tikonchiuas?

¹⁴ Xa yekinika ueliskia tikonixtalis tikonchiuas tein okachi amo ouij oso tein tikonitas ke okachi mitsonpoloua xikonpata. Keman tikonixtalisya toni yekinika tikonneki tikonchiuas, xikontemo tamachtilis itech toamaixuan, xa uelis tikonkuis amaix Nepaleuil tein ika momachtiaj itaixpantijkauan Jiova oso BIBLIOTECA ITECH TEPOS Watchtower. Xikontataujti Jehová uan xikonilui maj mitsonpaleui ‘xikonnejneki tikonchiuas nochi tein kiuelita’ (Filip. 2:13). Satepan xikonchiua tein tionmomachtij. Keman tikonitas ke uelik tikonchiuak, tikonnekis tikonchiuasya okseki taman. Nejon mitsonpaleuis maj satepan okachi ijsiujka ueli xikonpata okseki taman tein no tikonixtalij tikonchiuas.

XIKONKAUA MAJ MITSONPALEUI ITAJTOL DIOS

15. ¿Toni tikchiuaj akin tiktekitiliaj Jehová uan toni kichiuaj miakej? (1 Tesalonicenses 2:13).

¹⁵ Sekin kijtouaj ke miakpa kiixtajtoltianij Biblia. Sayoj ke, ¿yekmelauj kineltokaj tein Biblia tamachtia uan nemij kemej tanauatia? Amo, tel miakej amo kitakamatij. Sayoj ke tejuan, akin tiktekitiliaj Jehová tikchiuaj tein kijtoua Biblia. Tikchiuaj ijkon kemej tokniuan akin nenkej itech yekinika siglo, tikseliaj tein kijtoua Biblia “kemej yekmelauj itajtol Dios”. Yejua ika timochikauaj tikchiuaskej tein tayolmajxitia (xikonixtajtolti 1 Tesalonicenses 2:13).

16. ¿Toni techpaleuis maj tikchiuakan tein kijtoua iTajtol Dios?

¹⁶ Kemansa techouijmaka tikixtajtoltiskej tein kijtoua iTajtol Dios uan tikchiuaskej. Xa amo techajsi tiempo para tikixtajtoltiskej. Xa ijsiujka tikixtajtoltiaj uan amo itech titanemiliaj. Oso xa tiknekij timosenkauaskej porin tikitaj ke miak tamanok moneki tikpataskej. Sayoj ke komo ijkon mitsonpanoua, Jehová ipa mitsonpaleuis. Xikonkaua maj mitsonpaleui tein kijtoua iTajtol Dios, amo sayoj xikonkaki uan xikonelkaua ta xikonchiua. Keman okachi tikonixtajtoltis Biblia uan tikonchiuas tein kijtoua okachi tionyolpakis (Sant. 1:25).