Semi tiyolpakij keman tikinpaleuiaj oksekin

1, 2. ¿Keyej Jehová techchijchiuak kemej tiyolpakiskej keman tikinpaleuiaj oksekin?

KEMAN tikinpaleuiaj oksekin okachi tiyolpakij porin Jehová ijkon techchijchiuak (Hech. 20:35). Keman aksa techtayokolia teisa, kualtsin timomachiliaj. Sayoj ke okachi tiyolpakij keman tejuan tikinpaleuiaj oksekin. Uan semi techpaleuia maj Jehová ijkon techchijchiuani. ¿Keyej?

² Kemej Jehová ijkon techchijchiuak, tejuan uelis tikchiuaskej tein techpaleuis maj okachi tiyolpakikan. Komo tiktemouaj keniuj tikinpaleuiskej oksekin, okachi tiyolpakiskej. ¡Semi kualtsin kemej Jehová techchijchiuak! (Sal. 139:14).

3. ¿Keyej Biblia kijtoua ke Jehová yejua “Dios akin yolpaki”?

³ Kemej Biblia tamachtia ke akin kiuelitaj tepaleuiskej okachi yolpakij, amo ouij techkisa tikajsikamatiskej keyej Jehová yejua “Dios akin yolpaki” (1 Tim. 1:11). Jehová yejua akin yekinika kinpaleuij oksekin, uan amo akin okachi kitemaka ke yejuatsin. Kemej kijtoj tatitanil Pablo, “yejua kichiua maj tiyoltokan, maj timoolinikan uan maj tinemikan” (Hech. 17:28). Uan no, Jehová techmaka “nochi tatiochiualismej tein kuali uan tein amo teyi kinpoloua” (Sant. 1:17).

4. ¿Toni techpaleuis maj okachi tiyolpakikan?

⁴ ¿Toni uelis tikchiuaskej komo tiknekij okachi tiyolpakiskej keman tikinpaleuiskej oksekin? Kemej tikitaskej itech nejin tamachtilis, uelis tikchiuaskej kemej Jehová (Efes. 5:1). No tikitaskej toni uelis tikchiuaskej komo tiknemiliaj ke sekin amo motasojkamatij keman tikinpaleuiaj. Nochi nejin techpaleuis maj tiksentokakan tikinpaleuikan oksekin uan ijkon maj okachi tiyolpakikan.

MAJ TIKINPALEUIKAN OKSEKIN IJKON KEMEJ JEHOVÁ KICHIUA

5. ¿Toni taman tein techpoloua techmaka Jehová?

⁵ ¿Keniuj Jehová kinextiani ke kiuelita techpaleuis? Yejuatsin techmaka tein techpoloua. Xa amo nochipa tikpiaj tein tikuelitaskiaj tikpiaskej, sayoj ke Jehová nochipa techmaka tein techpoloua, kemej tein tikuaskej, tein timotaliliskej uan kani tinemiskej (Sal. 4:8; Mat. 6:​31-33; 1 Tim. 6:​6-8). Jehová amo techmaka nejin porin kimachilia ke ijkon moneki kichiuas. Komo ijkon, ¿keyej techpaleuia?

6. ¿Toni techmachtia Mateo 6:​25, 26?

⁶ Jehová techmaka tein techpoloua porin techtasojta. Maj tikitakan tein Jesús kijtoj itech Mateo 6:​25, 26 (xikonixtajtolti). Itech nejin versículos, Jesús ininka tajtoj totomej uan kijtoj: “Amo tatokaj nion kitekij tatok nion kisentiliaj”. Uan no kijtoj: “Sayoj ke namoTajtsin akin yetok ne iluikak kintamaka”. Satepan tajtanik: “¿Xe namejuan amo okachi nantayekantokej ke totomej?”. Ika nejin, Jesús kinekia tamachtis ke Jehová kiita ke itekitikauan okachi tayekantokej ke tapialmej. Komo yejuatsin kinyekpia tapialmej, tikyekmatij ke tejuan no techyekpias. Kemej Jehová yejua toTajtsin uan techtasojta, techmaka nochi tein techpoloua (Sal. 145:16; Mat. 6:32).

7. ¿Keniuj uelis tikchiuaskej kemej Jehová? (No xikonita taixkopimej).

⁷ Tejuan no tikintasojtaj oksekin ijkon kemej Jehová kichiua, yejua ika tikinmakaj tein tiuelij keman kinpoloua. ¿Tikonixmati se tokniuj akin amo kipia toni kikuas oso toni motalilis? Jehová uelis kichiuas xikonmaka nejon tokniuj tein kipoloua. Tiitekitikauan Jehová techixmatij porin titapaleuiaj keman panoua teisa tein amo kuali. Kemej tein panok keman mochiujtoya ueyi kokolis COVID-19. Miakej tokniuan kinpaleuijkej uan kinmakakej okseki tokniuan toni kikuaskej, toni motaliliskej uan okseki taman. Uan no, miakej tapaleuijkej uan kitemakakej inintomin para kinpaleuiskej tokniuan akin nemij kampa mochiuak se tetsauit. Nochin yejuan kichiujkej tein kijtoua Hebreos 13:16: “Amo xikelkauakan nankichiuaskej tein kuali uan nankinpaleuiskej oksekin ika tein nankipiaj, porin nejin semi kiyolpaktia Dios”.

8. Kemej Jehová techpaleuia maj tichikaujkej, ¿toni ueli tikchiuaj? (Filipenses 2:13).

⁸ Jehová techpaleuia maj tichikaujkej. Yejuatsin semi chikauak uan kiuelita kinpaleuis itekitikauan maj no chikaujkej (xikonixtajtolti Filipenses 2:13). ¿Kemansa tikontajtaniani Jehová maj mitsonpaleui xiontaxiko para amo tiontajtakolchiuas, oso maj mitsonpaleui keman tikonpia se ouijkayot? ¿Oso tikontajtaniani maj mitsonpaleui xikonchiua tein mojmostaj moneki tikonchiuas? Keman Jehová mitsonnankilij uan mitsonchikauak xa tionmomachilij kemej tatitanil Pablo, akin kijkuiloj: “Nikpia chikaualis para nikixnamikis nochi porin Dios nechmaka chikaualis” (Filip. 4:13).

9. ¿Keniuj no uelis tikchiuaskej kemej Jehová? (No xikonita taixkopin).

⁹ Tejuan amo ueli tikinpaleuiaj oksekin maj chikaujkej ijkon kemej Jehová kichiua. Maski ijkon, uelis tikchiuaskej kemej yejuatsin komo tikuij tochikaualis para tikinpaleuiskej oksekin. Komo se tokniuj xiuejya oso semi mokokoua uelis tiktakouitiuij oso titachipauaskej ichan. Uan no, komo tiuelij, maj titapaleuikan keman motachipauas uan motayektalis itech Kali kampa tiMosentiliaj. Komo tikuij tochikaualis para tikchiuaskej nejin, uelis semi tikinpaleuiskej tokniuan.

10. ¿Keniuj uelis tikinyolchikauaskej oksekin ika tein tikijtoskej?

¹⁰ Maj tikelnamikikan ke uelis tikinyolchikauaskej oksekin ika tein tikijtoskej. ¿Tikonixmati aksa akin uelis tikonyolchikauas komo tikoniluia ke tikonpatiuita tein kichiua? Komo kemaj, xikonilui ke ika tionmotekipachoua. Xa uelis tikonkalpanos, tikonnotsas, tikonmakas se amatsin oso tikontajkuilouilis. Amo moneki tikonijtos miak taman, ta okachi kuali xikonilui tein yekmelauj tikonmachilia. Tein tikoniluis xa yejua tein kiyolchikauas tokniuj maj kisentoka kitekitili Jehová (Prov. 12:25; Efes. 4:29).

11. ¿Keniuj Jehová techpaleuia maj timochiuakan titamatinij?

¹¹ Jehová techpaleuia maj timochiuakan titamatinij. Santiago imomachtijkauj Jesús, kijkuiloj: “Komo aksa kinemilia ke amo semi tamatkej, maj kisentoka kitajtani Dios”. Uan no kijtoj: “Porin yejua kintelpaleuia nochin ika nochi iyolo uan amo kualani iniuan akin kitajtaniaj” (Sant. 1:5). Kemej kijtoua nejin versículo, Jehová kinpaleuia oksekin maj no mochiuakan tamatinij. Uan no, “amo kualani iniuan akin kitajtaniaj”, yejuatsin amo kineki maj timopinaujmatikan porin tiktajtaniaj maj techpaleui. Ta yejua kineki maj tiktajtanikan (Prov. 2:​1-6).

12. ¿Keniuj uelis tikinnextiliskej oksekin tein tikmatij tikchiuaskej?

¹² ¿Tejuan no uelis tikchiuaskej kemej Jehová uan tikinnextiliskej oksekin tein tikmatij? (Sal. 32:8). ¡Kemaj! Uelis tikinmachtiskej oksekin miak taman. Akin yekin peua tanojnotsaj uelis tikinmachtiskej keniuj kichiuaskej. Tayekananij no kinmachtiaj tokniuan tapaleuianij uan okseki tokniuan akin moauijkejya maj kichiuakan tekimej tein kipiaj itech nechikol. Uan no, miakej tokniuan takamej uan siuamej akin miak xiujmejya tapaleuianij maj mochijchiuakan uan maj moyekchijchiuakan kalmej kampa titaueyichiuaj, kinmachtiaj oksekin maj no kichiuakan seki tekimej uan ijkon uelis tapaleuiskej keman kalchijchiuaskej.

13. ¿Keniuj uelis tikchiuaskej kemej Jehová keman tikinmachtiskej oksekin?

¹³ Keman tikinmachtiaj oksekin, moneki tikchiuaskej kemej Jehová. Kemej tikitakejya, Jehová techpaleuia maj timochiuakan titamatinij. Tejuan no tikinmachtiaj oksekin tein tikmatij tikchiuaskej. Amo timouij tikinnextiliskej oksekin tein tejuan tikmatij uan maj satepan okachi kuali kichiuakan se tekit oso maj techkuilikan totekiuj, uan amo no tiknemiliaj: “Maj momachti iselti, ¡nejua amo akin nechmachtij!”. Tiitekitikauan Jehová amo moneki ijkon tiknemiliskej. Amo sayoj tikinnextiliaj tein tikmatij, ta no tikinmachtiaj keniuj uelis kichiuaskej se tekit (1 Tes. 2:8). Komo ijkon tikchiuaj yejuan no “kuali kimatiskej keniuj kinmachtiskej oksekin” (2 Tim. 2:​1, 2). Komo tinochin tikinmachtiaj oksekin, okachi tiyolpakiskej.

KEMAN TIKITAJ KE AMO KIPATIUITAJ TEIN TIKCHIUAJ

14. ¿Toni kichiuaj miakej keman tikinpaleuiaj?

¹⁴ Nochipa keman tikinpaleuiaj oksekin, technextiliaj ke kipatiuitaj keman techtasojkamatiliaj uan okachiok tokniuan. Xa techijkuilouiliskej se amatsin para techtasojkamatiliskej oso kichiuaskej okse taman (Col. 3:15). Keman ijkon kichiuaj, okachi tiyolpakij porin tikinpaleuijkej.

15. ¿Toni moneki tikelnamikiskej keman oksekin amo techtasojkamatiliskej?

¹⁵ Sayoj ke moneki tikelnamikiskej ke xa amo nochin techtasojkamatiliskej. Xa tikuiskej totiempo, tochikaualis oso tein tikpiaj para tikpaleuiskej aksa, uan satepan tikitaskej ke akin tikpaleuijkej amo motasojkamati. Komo ijkon panoua, ¿toni techpaleuis maj tiksentokakan tiyolpakikan uan maj amo tikualanikan? Maj tikelnamikikan tein kijtoua Hechos 20:35. Amo tiyolpakij porin oksekin techtasojkamatiliaj tein tikchiuaj, ta tiyolpakij porin tikinpaleuiaj oksekin. Uelis tiksentokaskej tikinpaleuiskej oksekin uan tiyolpakiskej maski tikitaskej ke amo techtasojkamatiliaj. Maj tikitakan seki taman tein uelis techpaleuis.

16. ¿Toni moneki tikelnamikiskej?

¹⁶ Xikonelnamiki ke keman tiontapaleuia, tikonchiujtok kemej Jehová. Yejuatsin kitemaka tein kipia maski sekin kitasojkamatiliaj uan sekin amo (Mat. 5:​43-48). Jehová motenkaua iniuan itekitikauan ke komo tapaleuiaj uan amo kichiaj maj ‘kinkepilikan nion teyi’, “inintaxtauil yeski ueyi” (Luc. 6:35). Yejua ika, amo xionmoyolkoko keman oksekin amo mitsontasojkamatiliskej. Xikonelnamiki ke Jehová nochipa mitsontatiochiuis porin tikonpaleuia oksekin uan porin ‘tikontemaka ika miak pakilis’ (2 Cor. 9:7; Prov. 19:17).

17. ¿Toni techpaleuis maj tikchiuakan kemej Jehová? (Lucas 14:​12-14).

¹⁷ Okse taman tein mitsonpaleuis xikonchiua kemej Jehová yejua tein kijtoua Lucas 14:​12-14 (xikonixtajtolti). Ueliskia tikinpaleuiskej oso tikinyoleuaskej maj touan takuatij akin satepan no uelis ijkon kichiuaskej. Sayoj ke komo tikitaj ke nochipa ijkon tikchiuaj porin tiknekij maj yejuan no ijkon kichiuakan, ¿toni uelis tikchiuaskej? Maj tikchiuakan tein Jesús tayolmajxitij: maj tikpaleuikan aksa akin amo uelis techkepilis tein tikchiuaj uan ijkon tiyolpakiskej porin tikchiuaj kemej Jehová. Uan no, komo amo tikchiaj maj techkepilikan, nochipa tikinpaleuiskej oksekin maski amo techtasojkamatiliskej.

18. ¿Toni techpaleuis maj amo tiknemilikan ke oksekin amo motasojkamatij?

¹⁸ Amo xikonnemili ke amo motasojkamatij (1 Cor. 13:7). Komo tikpaleuiaj aksa uan amo techtasojkamatilia, uelis timotajtaniskej: “¿Yekmelauj amo kipatiuita tein nikchiuak oso sayoj kielkauak uan amo nechtasojkamatilij?”. Oso xa kipanotok okse taman uan yejua ika amo kichiuak. Xa kemaj motasojkamati, sayoj ke amo kimati keniuj kichiuas. Xa pinaua maj kipaleuikan porin xa achto yejua kinpaleuiaya oksekin uan axkan amo ueliok. Sayoj ke komo yekmelauj tikintasojtaj tokniuan amo tiknemiliskej tein amo kuali de yejuan uan tiksentokaskej tikinpaleuiskej (Efes. 4:2).

19, 20. ¿Keyej moneki maj amo tiyolijsiuikan? (No xikonita taixkopimej).

¹⁹ Amo xionyolijsiui. Se tonal tekiuaj Salomón kijtoj: “Xiktamota mopantsin itech at, porin satepan ke panoskej miak tonalmej oksepa tikajsis” (Ecl. 11:1). Nejin tajtolmej techmachtiaj ke sekin xa techtasojkamatiliskej satepan ke “panoskej miak tonalmej”. Maj tikitakan tein kipanok se tokniuj.

²⁰ Se tonal, isiuatsin se tokniuj takalpanojkej kijkuilouilij se carta se tokniuj siuat akin monotsa Sandra akin yekin moauijka. Itech carta kiyolchikauaya maj kisentoka kitekitiliani Jehová. Kemej chikueyi xiujmej satepan, Sandra kititanilij se carta kampa kiluiaya: “Nimitstajkuilouilia porin nikneki nimitstapouis keniuj tinechpaleuiani nejin xiujmej maski amo tikmatini”. Uan no kijtouaya: “Semi kualtsin tein tinechiluij, sayoj ke tein okachi nechpaleuij yejua texto tein tikijkuiloj, uan amo keman nikelkaua”.a Satepan ke kitapouij seki ouijkayomej tein kipanoka, kiluij: “Kemansa niknekia nimosenkauas uan amo niktekitilisok Jehová. Sayoj ke nochipa nikelnamikia texto tein tikijkuilojka uan nejon nechpaleuiaya maj amo nimosenkaua. Nejin chikueyi xiujmej tein panouanij, tein okachi nechpaleuiani yejua carta uan texto tein tinechijkuilouilij”. ¡Xikonnemili keniuj semi yolpakik isiuatsin takalpanojkej keman kiselij nejin carta! Komo tejuan no tikpaleuijkej aksa, xa no techtasojkamatilis satepan ke ‘panos miak tonalmej’.

21. ¿Keyej tikonixtalijtok tikonsentokas tikonchiuas kemej toTajtsin?

²¹ Kemej tikitakejya, okachi tiyolpakij keman tikinpaleuiaj oksekin porin Jehová ijkon techchijchiuak. Kuali timomachiliaj keman tikinpaleuiaj tokniuan, uan tikuelitaj maj techtasojkamatilikan. Sayoj ke maski techtasojkamatiliskej oso amo, uelis tiyolpakiskej porin tikchiujkej tein kuali. Uan maski amo uelis tikchiuaskej miak taman maj nochipa tikelnamikikan tein kijtoua 2 Crónicas 25:9: “Jehová uelis mitsmakas okachi”. ¡Jehová yejua akin okachi techpaleuia! Uan semi tiyolpakij porin yejua techtatiochiuia. Yejua ika, maj tiksentokakan tikinpaleuikan oksekin ijkon kemej kichiua toTajtsin.