Nochipa nimomachtiani teisa

Niyolik itech xiuit 1927 itech se xolaltsin tein amo uejka yetok de Chicago (Illinois, Estados Unidos). Notatuan kinpiakej makuil ininkoneuan: Jetha, Don, uan nejua, satepan yolik Karl uan Joy. Tinochin semi tiknekiaj tiktekitiliskej Jehová. Itech xiuit 1943 nokniuj siuapil Jetha kiselij ojpatika Tamachtilis tein motemaka Galaad. Don, Karl uan Joy kinyoleujkej maj tapaleuitij Betel ompa Brooklyn (Nueva York) itech xiuit 1944, 1947 uan 1951, ijkon kinyoleujtiajkej. Tein kichiujkej notatuan uan nokniuan, semi nechyolchikauak maj okachi niktekitili Jehová.

¿KENIUJ NOCHANKAUAN KIIXMATKEJ JEHOVÁ?

Notatuan momattoyaj kiixtajtoltiskej Biblia uan kitasojtayaj Dios, yejua ika desde tikonemej techmachtijkej maj tiktasojtakan. Sayoj ke keman nopaj yajka moteuito itech Yekinika Ueyi Neteuilis itech nochi taltikpak peuak amo takuaujtamatiok itech nion se taneltokalis. Nomaj semi kitasojkamatiliaya Dios porin amo kimiktijkej nopaj keman yajka moteuito. Yejua ika kiluij: “Karl, tiouij tiopan kemej ipa tikchiuayaj achto”. Nopaj kinankilij: “Mouan nias, sayoj ke amo nikalakis”. Nomaj kitajtanij: “¿Keyej amo?”. Nopaj kinankilij: “Itech ueyi neteuilis nikitak ke taixyekananij itech taneltokalis kintiochiuayaj soldados para maj momijmiktikan maski pouiaj sayoj itech se taneltokalis. ¿Keniuj Dios ueliskia kinpaleuis nochin?”.

Okse tonal keman nomaj yajka tiopan, ome itaixpantijkauan Jehová yajkej tochan. Kimakakej nopaj ome amaixmej tein motokaytia Luz. Uan nejin ika tajtouaya amatajkuilol Apocalipsis. Nopaj kinekik kinixtajtoltis amaixmej uan yejua ika kinselij. Keman nomaj kinitak peuak kinixtajtoltia, satepan nomaj kiitak se periódico kampa tayoleujtoyaj maj momachtikan Biblia ika amaixmej Luz, yejua ika kinekik yas. Keman ajsik, se siuatsin akin xiuejya kiselij. Nomaj kinextilij semej amaixmej uan kitajtanij: “¿Nikan tamachtiaj nejin?”. Yejua kinankilij: “Kemaj nokonetsin, xipano”. Se semana satepan nomaj nechuikak iniuan nokniuan. Uan hasta axkan tiksentokaj timonechikouaj.

Se tonal, tokniuj akin kiixyekantoya nechikol nechiluij maj nikixtajtolti Salmo 144:​15, kampa kijtoua ke akin kitekitiliaj Jehová yolpakij. ¡Semi nikuelitak nejon texto! No semi nikuelitak 1 Timoteo 1:​11, kampa kijtoua ke Jehová yolpaki. Uan Efesios 5:​1, kampa kijtoua ke moneki maj tikchiuakan kemej Dios, yejua ika nikitak ke monekia niyolpakis niktekitilis akin techchijchiuak uan maj niktasojkamatili porin nechkaua maj niktekitili. Yejua nejin ome taman tein nochipa nikchiuani.

Nechikol tein okachi amo uejka katka, yetoya ompa Chicago, 32 kilómetros de kampa tinemiaj. Maski ijkon, nochipa tiayaj uan nejon nechpaleuij maj okachi nimomachtiani Biblia. Nikelnamiki ke se tonal nokniuj Jetha tanankilij itech nechikol. Keman nikakik tein kijtoj, niknemilij: “Nejua no nikmatiaya nejon. ¿Keyej amo nimomaajokuik?”. Desde ijkuak, peuak nimomachtia tein tikitaskiaj itech nechikolmej uan nitanankiliaya. Uan ijkon kemej nokniuan, nejua no peuak okachi nimotokia iuan Jehová. Uan nimoauij itech xiuit 1941.

JEHOVÁ NECHMACHTIA ITECH UEJUEYI NECHIKOLMEJ

Semi nikelnamiki ueyi nechikol tein tikpiakej ompa Cleveland (Ohio) itech xiuit 1942. Nochankauan uan okseki tokniuan mokaujkej itech seki takenkaltsitsin amo uejka de kampa mochiuaskia ueyi nechikol. Uan itech panoua 50 xolalmej de Estados Unidos, tokniuan no kikakkej ueyi nechikol ika teléfono. Ojpatika Ueyi Neteuilis tein mochiuak itech nochi taltikpak ayamo tamia, uan itaixpantijkauan Jehová okachi kinixnamikiaj. Yejua ika tokniuan kinkejketsayaj inincarros kemej tauiskiaj kalampakopa den kaltsitsin, kinixtaliayaj seki tokniuan maj yetokan itech sejse carro para maj tajpiakan de youak. Keman kiitayaj ke yaya panoti teisa, tokniuan niman kixoltaltiayaj carro para kintauiliskej akin motokiayaj uan peuayaj kitapitsaltiayaj. Oksekin yayaj ijsiujka kinpaleuitij. Uan nejua niknemilij: “Itekitikauan Jehová nochipa kimatij toni kichiuaskej keman onkak ouijkayomej”. Kemej amo teyi techpanok, amo nimouikok uan yejua ika uelik nikochik.

Seki xiujmej satepan, keman niknemiliaya tein panok itech nejon ueyi nechikol, nikelnamik ke nomaj amo motekipachoj nion momoujtij. Yejua senkis iuan takuaujtamatia Jehová uan inechikol. Amo keman nikelkauas tein kichiuak.

Tepitsin achto ke mochiuaskia nejon ueyi nechikol, nomaj mochiujka precursora regular. Yejua ika kuali kikakik tanojnotsmej tein ika tajtouayaj se kitekitilis Jehová miak tonalmej. Keman timokepayajya tochan, kijtoj: “Nikuelitaskia niksentokas nitekitis kemej precursora. Sayoj ke amo nihorajtiok nikchiuas tekimej tein nikpia kalijtik”. Techtajtanij ox ueliskia tikpaleuiskej uan tikiluijkej ke kemaj. Yejua ika technauatij maj tikchipauakan sejse oso ojome cuartos achto ke titakuaskej kualkan. Satepan ke tiayaj escuela, yejua kiitaya maj tachipaujkan nochi kalijtik uan satepan yaya tanojnotsati. Maski kipiaya miak tekit, amo keman techsenkauak. Nomaj nochipa touan yetoya keman timokepayaj den escuela para titakuaskej. Kemansa iuan tiayaj titanojnotsatij satepan ke tikisayaj, nejon techpaleuij maj okachi tikajsikamatikan toni kichiuaj precursores.

NIMOCHIUAK PRECURSOR

Nimochiuak precursor keman nikpiaya 16 xiujmej. Maski nopaj ayamo mochiuaya itaixpantijkauj Jehová, kinekia kimatis toni nechpanouaya keman nitanojnotsaya. Se youak niktapouij ke maski semi nimochikauaya nikajsis aksa akin kinekiskia momachtis Biblia, amo uelia nikajsia. Amo teyi kijtoj, uan niktajtanij: “¿Tikuelitaskia maj nimitsmachti?”. Kinemilij tepitsin uan nechnankilij: “Kemaj nikuelitaskia”. Yejua nopaj akin yekinika peuak nikmachtia. Se tatiochiualis katka maj nikmachtiani.

Timomachtijkej amaix “La verdad os hará libres”. Ijkon kemej nikmachtiaya nikitaya ke nopaj nechpaleuiaya maj okachi kuali nimomachti Biblia uan maj nitamachti. Se youak, satepan ke tikixtajtoltijkej se párrafo, nechiluij: “Yejua nejon tein kijtoua amaix. Sayoj ke, ¿keniuj tikmati ke yekmelauj tein nikan moijtoua?”. Kemej amo nikmatia toni niknankilis, nikiluij: “Yekintsin ayamo uelis nimitsnankilis. Sayoj ke keman oksepa timomachtiskej uelisya nimitsnankilis”. Uan ijkon nikchiuak. Nikajsik seki versículos tein no ika tajtouaya tein timomachtijkaj. Keman nechpanok nejon, peuak okachi nimomachtia para ueliskia niknankilis keman timomachtiayaj. Nejon nechpaleuij maj okachi kuali nimomachti Biblia uan nopaj no kipaleuij. Yejua kichiuak nochi tein momachtij uan itech xiuit 1952 moauij.

JEHOVÁ KISENTOKA NECHMACHTIA BETEL

Niaj ninemito okseko keman nikpiaya 17 xiujmej. Jethaa mochiuak misionera uan Don kiyoleujkej Betel. Nochin omen semi kiuelitayaj tekit tein kichiujtoyaj, uan nejon nechpaleuij maj no ijkon nikchiua. Yejua ika nikpexontij amat para nitapaleuitiuj Betel uan para nikselis Tamachtilis tein motemaka Galaad, uan nikchiak maj Jehová kiita kani okachi ueliskia nitapaleuis. Uan itech xiuit 1946 nechyoleujkej maj nitapaleuiti Betel.

Nietoni Betel 75 xiujmejya uan nikpiani tataman tekimej. Yejua ika nimomachtiani miak taman. Nimomachtiani keniuj nikinamakixtis amaixmej, contabilidad, no nimomachtij nikouas seki taman tein monekia ompa Betel uan tein motitania okseko. Sayoj ke okachi nechyolpaktiani tamachtilismej tein tikseliaj kualkampa uan okseki tamachtilismej.

Nokniuj Karl, akin okachi nojnel no nechmachtiani miak taman, yejua ajsik Betel itech xiuit 1947. Karl semi kuali momachtiaya Biblia uan tel kuali tamachtiaya. Se tonal nikiluij maj nechpaleui porin yaya nikpanoltiti se tanojnots. Nikmelauilij ke niktemojkaya tel miak tamachtilis, sayoj ke amo nikmatia keniuj nikmelauas. Yejua sayoj nechtajtanij se taman, uan ika nejon nechpaleuij maj nikmati keniuj nikchiuas, nechtajtanij: “Joel, ¿toni ika titajtoti?”. Niman nikajsikamatik tein kinekia nechiluis, ke sayoj maj nikuini tamachtilis tein motelnekia uan okseki nikauas. Amo keman nikelkaua tein nechmachtij.

Para se yolpakis keman se yetok Betel moneki se mochikauas se tanojnotsas. Komo ijkon se kichiua, tepanoua miak taman tein kualtsin. Kuali nikelnamiki tein techpanok se tonal keman titanojnotstoyaj de youak ompa Bronx, Nueva York. Achto ke tipeuaskiaj, se tokniuj takat uan nejua tiajkaj tikitatoj se siuatsin akin ipa tikmakakajya amaix Tanejmachtijkej uan ¡Taijxitilis! Tiajsikej uan tikiluijkej: “Nejin youak titamachtijtokej tein kijtoua Biblia uan teyolchikaua”. Yejua tanankilij: “Komo nanechnojnotsatij de Biblia, xipanokan”. Tikixtajtoltijkej uan timomachtijkej seki textos tein ika tajtoua iTaixyekanalis Dios uan xochital tein amo uejkaua mochiuas. Tikitakej ke nejon semi kiuelitak porin se semana satepan kinyoleuak miakej itasojikniuan uan no ompa yetoya. Satepan, yejua uan itakatsin mochiujkej itaixpantijkauan Jehová.

NOSIUATSIN NECHMACHTIJ MIAK TAMAN

Maski niknekia nimonamiktis, akin mochiuak nosiuatsin nikixmatik majtakti xiuit satepan. ¿Toni nechpaleuij maj nikixmati se tokniuj siuat akin nechpaleuiskia? Niktataujtij Jehová uan peuak niknemilia toni niknekia nikchiuas iuan nosiuatsin satepan ke timonamiktiskiaj.

Satepan ke panok ueyi nechikol itech xiuit 1953 itech Estadio de los Yankees, nikixmatik se tokniuj siuat akin monotsaya Mary Aniol. Yejua uan nokniuj Jetha kisenpiakej tamachtilis tein motemaka Galaad uan sentapaleuijtoyaj kemej misioneras. Mary semi yolpakia keman nechtapouiaya tekit tein kichiuaya kemej misionera ompa Caribe uan nochin akin kinmachtijka ika Biblia. Keman okachi timoixmatkej, timomakakej cuenta ke tiomen tiknekiaj tiksentokaskej tiktekitiliskej Jehová miak tonalmej. Okachi timoueuelitakej uan timonamiktijkej itech xiuit 1955 itech metsti abril. Miak taman nechnextilij ke Jehová kemej yeskia nechtayokolij Mary, uan nosiuatsin nechmachtij miak taman. Yejua nochipa yolpakia keman kiseliaya tein yeski tekit. Semi tekitia, motekipachouaya ininka oksekin uan nochipa kitayekanaltiaya Jehová uan iTaixyekanalis (Mat. 6:33). Titakalpanojkej itech circuito eyi xiuit, uan itech 1958 techyoleujkej maj titapaleuitij Betel.

Mary nechmachtij miak taman. Desde ke timonamiktijkej tikixtalijkej tiksenixtajtoltiskej Biblia uan mojmostaj tikixtajtoltiayaj 15 versículos. Satepan ke semej de tejuan kiixtajtoltiaya, ika timonojnotsayaj uan tikitayaj keniuj uelis tikchiuaskej ijkon kemej timomachtijkaj. Mary miakpa nechtapouiaya toni kimachtijkaj Galaad oso keman tapaleuiaya kemej misionera. Nejon nechpaleuij maj okachi kuali nitaixejeko uan maj kuali nitamachti itech nechikol, no nechpaleuij maj nikmati keniuj nikinyolchikauas tokniuan siuamej (Prov. 25:11).

Nosiuatsin Mary momikilij itech xiuit 2013. ¡Semi niknektok nikitas itech xochital! Sayoj ke kemej ayamo mochiua tein nikchia, niksentoka nimomachtia miak taman uan senkis nitakuaujtamati iuan Jehová (Prov. 3:​5, 6). Semi nechyolchikaua uan niyolpaki keman niknemilia toni kichiuaskej itekitikauan Jehová itech xochital. Ijkuak, toUeyi Tamachtijkauj techmachtis miak taman tein yankuik uan uelis okachi tikixmatiskej. Jehová nechmachtiani miak taman uan nechnextiliani ke nechtasojta maski amo nechnamiki, yejua ika amo keman uelis senkis niktasojkamatilis porin kichiuani miak taman.