Xikpaleui akin tikmachtia maj kitekitili Jehová

1, 2. 1) ¿Keyej sekin akin momachtijtokej Biblia kimouiliaj mochiuaskej itaixpantijkauan Jehová? 2) ¿Toni tikitaskej itech nejin tamachtilis?

¿TIKMOUILIAYA tein ueliskia panos komo timochiuaya tiitaixpantijkauj Jehová? Xa timouia maj mitsixnamikikan akin iniuan titekitia, akin iniuan timouikaya oso mochankauan. Oso xa tiknemiliaya ke amo ueliskia tikchiuas tein Dios tanauatia. Komo ijkon mitspanok kuali tikmati keniuj momachiliaj akin momachtijtokej Biblia uan keyej uelis kinouijmakas mochiuaskej itaixpantijkauan Jehová.

² Jesús kimatia ke komo aksa mouia ueliskia kichiuas maj amo kitekitili Jehová (Mat. 13:20-22). Maski ijkon, kisentokak kinpaleuij akin ayamo kiixtaliayaj ox kitojtokaskej oso amo. Komo tikchiuaj kemej Jesús no uelis tikinpaleuiskej akin tikinmachtiaj maj 1) kimatikan toni kintsakuilia maj kitekitilikan Jehová, 2) maj okachi kitasojtakan, 3) maj kitayekanaltikan kitekitiliskej uan 4) maj kimatikan toni uelis kichiuaskej komo kinixnamikij. ¿Keniuj uelis titamachtiskej kemej Jesús ika amaix Tiyolpakiskej nochipaya para maj mochiuakan itaixpantijkauan Jehová akin tikinmachtiaj?

XIKPALEUI MAJ KIMATI TONI KITSAKUILIA MAJ KITEKITILI JEHOVÁ

3. ¿Toni kitsakuiliaya Nicodemo maj mochiua imomachtijkauj Jesús?

³ Nicodemo katka se inintaixyekankauj judíos. Nejin takat teisa kitsakuilijtoya maj kitojtoka Jesús. Yejua kimatik ke Jesús katka Mesías niman keman panoka chikuasen metsti ke tanojnotstinemia (Juan 3:1, 2). Maski Nicodemo kimatia nejon, kiixtalij tajtos iuan Jesús de youak ‘porin kinmouiliaya judíos’ (Juan 7:13; 12:42). Xa kinemiliaya ke kiixtopeuaskiaj uan kipoloskia nochi tein kipiaya komo kitojtokaya Jesús.a

4. ¿Keniuj Jesús kipaleuij Nicodemo maj kiajsikamati toni kinekia Dios maj kichiua?

⁴ Nicodemo kuali kiixmatia tanauatil tein Dios kinmakaka israelitas, sayoj ke monekia maj aksa kimachti para kiajsikamatis toni kinekia Dios maj kichiua. ¿Keniuj kipaleuij Jesús? Kixeloj tiempo para iuan tajtos Nicodemo maski youakya katka. Uan no kimelauilij toni monekia kichiuas para kitojtokas. Kiluij ke monekia moyolpatas uan amo tajtakolchiuasok, ke monekia moauis uan takuaujtamatis iuan iKonetsin Dios (Juan 3:5, 14-21).

5. ¿Keniuj uelis tikpaleuiskej akin tikmachtiaj maj kiita toni kitsakuilia maj kitekitili Jehová?

⁵ Xa akin tikmachtia kuali kiixmati Biblia sayoj ke moneki xikpaleui maj kiita toni kitsakuilia maj kitekitili Jehová. Xa semi tekiti oso ichankauan amo kinekij maj mochiua itaixpantijkauj Jehová. ¿Keniuj uelis tikchiuas kemej Jesús? Komo tikxeloua tiempo para iuan tietos uan tikpaleuis. Xa uelis tikyoleuas mochan maj tayiti se kafen oso maj mouan takuati, keman ijkon nankichiuaskej xa tapaleuis maj mitsilui toni ouijkayomej kipia. Satepan uelis tikpaleuis maj kiita toni uelis kipatas, uan xikelnamikti ke moneki kichiuas nochi nejon para kiyolpaktis Jehová uan amo para tejua mitsyolpaktis.

6. ¿Keniuj uelis tikpaleuis akin tikmachtia maj takuaujtamati ke uelis kichiuas tein momachtijtok? (1 Corintios 16:13).

⁶ Komo akin tikmachtia takuaujtamati ke Jehová kipaleuis maj kitakamati, nejon kiyolchikauas maj kichiua tein momachtia (xiklero 1 Corintios 16:13). ¿Keniuj uelis tikpaleuis? Se akin kuali tamachtia itech escuela, amo sayoj kinmachtia oksekin keniuj kichiuaskej teisa, ta no kinpaleuia maj kimachilikan ke uelis kichiuaskej tein kinmachtia. No ijkon, akin kuali tamachtia Biblia amo sayoj kinextilia akin kimachtia tein Dios kineki maj kichiua, ta no kipaleuia maj kimati ke uelis kichiuas porin Jehová kipaleuijtok. ¿Keniuj uelis ijkon titamachtis?

XIKPALEUI MAJ OKACHI KITASOJTA JEHOVÁ

7. ¿Keniuj Jesús kinpaleuij akin kikakiaj maj okachi kitasojtakan Jehová?

⁷ Jesús kimatia ke komo imomachtijkauan kitasojtayaj Jehová, okachi amo ouij yeskia kichiuaskej tein momachtiayaj. Yejua ika kinnextiliaya tein kinpaleuiskia maj okachi kitasojtakan Jehová. Nejin kichiuak keman ika tajtoj se tetat akin kinmaka tein kuali ikoneuan (Mat. 7:9-11). Sekin akin kikakiaj Jesús, xa amo kipiayaj se inintat akin semi kintasojtaya. Yejua ika xa semi kualtsin momachilijkej keman Jesús kintapouij keniuj se tetat kualtsin kiselij iokichpil keman mokepak maski kichiujka tein amo kuali. Jesús kinpaleuij maj kiajsikamatikan ke Jehová semi kintasojta uan kineki kinpaleuis (Luc. 15:20-24).

8. ¿Keniuj uelis tikpaleuis akin tikmachtia maj okachi kitasojta Jehová?

⁸ Tejua no uelis tikpaleuis akin tikmachtia maj okachi kitasojta Jehová komo tikpaleuia maj kiixmati. Nochipa keman namomachtiskej xikpaleui maj kiajsikamati keniuj tein momachtij kinextia ke Jehová semi kitasojta. Uan keman ika nantajtoskej ke Jehová kitemakak iKonetsin para techmakixtis, xikpaleui maj kiajsikamati ke Jehová kichiuak nejin porin semi kitasojta (Rom. 5:8; 1 Juan 4:10). Keman aksa akin momachtijtok kiajsikamati ke Jehová semi kitasojta, uelis kipaleuis maj yejua no ijkon kichiua (Gál. 2:20).

9. ¿Toni kipaleuij Michael maj peua kitekitili Jehová?

⁹ Maj tikitakan tein kipanok Michael, de Indonesia. Yejua momachtiaya Biblia keman katka okichpilok, sayoj ke amo keman moauij. Keman kipiaya 18 xiujmej yajki tekitito itech okse altepet, ompa kinejnemiltiaya tráiler. Satepan mokepak Indonesia, monamiktij uan kipiak se siuapil. Sayoj ke amo yetoya iniuan ichankauan porin oksepa yajki tekitito. Satepan, isiuatsin uan isiuapil peuak momachtiaj Biblia uan peuak kichiuaj tein momachtiaj. Keman imomaj Michael momikilij, yejua mokepak ichan para kiyekpias itat uan peuak momachtia Biblia. Keman momachtijtoya tamachtilis 27 den amaix Tiyolpakiskej nochipaya kampa kijtoua “Maj okachi timomachtikan”, semi kiuelitak uan peuak choka keman kinemilij keniuj Jehová semi kiyolkokoj kiitas ke iKonetsin kitajyouiltijkej. Yejua semi motasojkamatik keman kiajsikamatik tein Jehová uan Jesús kichiujkej para techmakixtiskej, uan yejua ika kipatak kemej nemia uan moauij.

XIKPALEUI MAJ KITAYEKANALTI KITEKITILIS JEHOVÁ

10. ¿Keniuj kinpaleuij Jesús yekinika imomachtijkauan para maj okachi kitekitilikan Jehová? (Lucas 5:5-11; no xikita taixkopin).

¹⁰ Sekin akin Jesús kinnojnotsak niman kimatkej ke yejua katka Mesías. Sayoj ke monekia maj kinpaleuikan maj kiajsikamatikan ke para kitekitiliskej Jehová monekia kitayekanaltiskej tanojnotsaskej. Pedro uan Andrés ipa katkajya imomachtijkauan Jesús keman yejua kinyoleuak maj nochipa iuan yetonij (Mat. 4:18, 19). Uan iuan Santiago uan Juan, kinkitskiayaj pescados uan kuali tanamakayaj (Mar. 1:16-20). Keman Pedro uan Andrés “kikaujkej ininatarrayas”, xa kiitakej keniuj ueliskia kinixpanoltiskej ininchankauan uan no kitojtokaskej Jesús. ¿Toni kinpaleuij maj kiitakan ke okachi monekia maj tanojnotsakan ke kitaniskej miak tomin? Amatajkuilol Lucas kijtoua ke Jesús kichiuak se milagro para kinnextilis ke Jehová ueliskia kinmakas tein kinpoloskia, nejin kinpaleuij maj takuaujtamatikan ke Jehová amo keman kinsenkauaskia komo kitayekanaltiayaj kitekitiliskej (xiklero Lucas 5:5-11).

11. ¿Keniuj uelis tikpaleuiskej akin tikmachtiaj maj okachi takuaujtamati iuan Jehová?

¹¹ Tejuan amo ueli tikchiuaj milagros kemej Jesús, sayoj ke uelis tikpaleuiskej akin tikmachtiaj maj kiajsikamati ke Jehová kinpaleuia akin kitayekanaltiaj kitekitiliskej. ¿Tikelnamiki keniuj Jehová mitspaleuij keman peuak tiouj nechikolmej? Xa timotekitiliaya oso tikinpiaya motapialuan uan amo tikpiaya tiempo para tias nechikolmej, yejua ika monekik tikxelos tiempo para ueliskia tias. Xikilui akin tikmachtia keniuj peuak okachi titakuaujtamati keman tikitak ke Jehová mitspaleuij porin tikixtalij tiktekitilis.

12. 1) ¿Keyej kipaleuis akin tikmachtiaj komo tikinyoleuaj oksekin tokniuan maj touan tamachtikan? 2) Xikmelaua keniuj no uelis tikinpaleuiskej maj kitekitilikan Jehová.

¹² Akin tikmachtia no semi kipaleuis komo okseki tokniuan kiluiaj toni kichiujkej para uelis kitekitiliskej Jehová. Yejua ika, keman tikmachtis xa uelis tikinyoleuas okseki tokniuan akin tataman tein kinpanouani. Xikinilui maj kitapouikan keniuj kiixmatkej Jehová uan toni monekik kichiuaskej para kitekitiliskej. No semi namechpaleuis komo nankisenitaj videos tein yetok itech taxelol “Maj okachi timomachtikan” oso kampa kijtoua “No xikonita nejin”, tein yetok itech amaix Tiyolpakiskej nochipaya. Keman namomachtiskej tamachtilis 37, xikitakan uan ika xitajtokan video Jehová techmakas tein techpoloua, uan xikpaleui maj kiita ke Jehová kipaleuis komo kitayekanaltia.

XIKPALEUI MAJ KIMATI TONI UELIS KICHIUAS KOMO KIIXNAMIKIJ

13. ¿Keniuj Jesús kinpaleuij imomachtijkauan maj kimatinij toni kichiuaskej keman kinixnamikiskiaj?

¹³ Jesús miakpa kiniluij imomachtijkauan ke kinixnamikiskiaj, uan ke hasta ininchankauan ijkon kichiuaskiaj (Mat. 5:11; 10:22, 36). Tepitsin achto ke momikiliskia no kinnejmachtij ke ueliskia kinmiktiskej porin kiueyichiuayaj Jehová (Mat. 24:9; Juan 15:20; 16:2). Kiniluij ke monekia motachiliskej kampa tanojnotsayaj. Yejua ika amo monekia mokualantiskej iniuan akin kinixnamikiaj, uan monekia kuali kinemiliskej tein kijtouayaj uan tein kichiuayaj para ueliskia kisentokaskej tanojnotsaskej.

14. ¿Keniuj uelis tikpaleuiskej akin tikmachtiaj maj kimati toni kichiuas keman kiixnamikiskej? (2 Timoteo 3:12).

¹⁴ Ijkon kemej Jesús, uelis tikiluiskej akin tikmachtiaj ke sekin akin iniuan tekiti, akin iniuan mouika oso ichankauan uelis kijtoskej oso kichiuiliskej teisa porin momachtijtok Biblia (xiklero 2 Timoteo 3:12). Xa akin iniuan tekiti kikejkeloskej porin axkan mochikaua kichiuas tein momachtijtok itech Biblia. Oksekin, uan xa hasta ichankauan amo kiuelitaskej tein yejua momachtijtok. Semi kipaleuis komo niman tikiluia ke uelis kiixnamikiskej, ijkon amo momoujtis keman kipanos uan uelis kimatis toni kijtos oso toni kichiuas keman kiixnamikiskej.

15. ¿Keniuj uelis tikpaleuis akin tikmachtia komo kiixnamikij ichankauan?

¹⁵ Komo akin tikmachtia kiixnamikij ichankauan, xikpaleui maj kiita keyej ijkon kichiuaj. Xa kinemiliaj ke kikajkayaujtokej oso ke itaixpantijkauan Jehová amo yolkualmej. Jesús no ijkon kipanok uan hasta ichankauan kinemiliayaj ke kuatapolojka (Mar. 3:21; Juan 7:5). Xiknextili akin tikmachtia maj amo yolijsiui uan maj kuali kinnojnotsa ichankauan uan oksekin.

16. ¿Keniuj uelis tikpaleuiskej akin tikmachtiaj maj kuali kinmelauili oksekin tein momachtijtok?

¹⁶ ¿Toni uelis kichiuas akin tikmachtia komo se ichankauj kineki okachi kimatis tein momachtijtok? Semi tapaleuis komo amo sepasan kiluia nochi, porin ueliskia kiyolajxitis uan amo kinekisok kikakis. Sayoj ke komo kuali kimelauilia uan amo semi uejkaua, xa ichankauj kinekis kimatis okachi (Col. 4:6). Akin tikmachtia no uelis kinextilis jw.org para maj kitemo okachi tamachtilis komo kineki kimatis toni kichiuaj itaixpantijkauan Jehová.

17. ¿Keniuj uelis tikpaleuis akin tikmachtia maj ueli tanankili keman kitajtaniskej teisa de itaixpantijkauan Jehová? (No xikita taixkopin).

¹⁷ Uelis tiknextilis akin tikmachtia kampa kijtoua “Netajtanilmej tein mochiuaj ika itaixpantijkauan Jehová” itech jw.org, para maj kimati keniuj tanankilis komo ichankauan oso akin iniuan tekiti kitajtaniaj teisa (2 Tim. 2:24, 25). No uelis tikuis recuadro “Tein sekin kijtouaj” tein yetok kampa tami sejse tamachtilis den amaix Tiyolpakiskej nochipaya. Uelis tikiluis maj momamachti keniuj ueliskia kinmelauilis oksekin tein kineltoka. Komo moneki, xikpaleui maj kiita keniuj uelis okachi kuali tanankilis. Komo iuan timomamachtia, yejua uelis kimatis keniuj kinmelauilis oksekin keyej kineltoka oso amo kineltoka seki taman.

18. ¿Keniuj uelis tikyolchikauas akin tikmachtia maj peua tanojnotsa? (Mateo 10:27).

¹⁸ Jesús kinnauatij imomachtijkauan maj kinixmatiltikan nochin kuali tanauatilmej (xiklero Mateo 10:27). Komo akin tikmachtia niman peua tanojnotsa iniuan tokniuan, kiitas keniuj kipaleuia Jehová uan okachi iuan takuaujtamatis. ¿Keniuj uelis tikyolchikauas maj peua tanojnotsa? Keman motanauatis ke peuasya titayoleuaskej para tonal keman tikelnamikiskej imikilis Cristo oso para maj oksekin momachtikan Biblia, xikpaleui maj kiita toni moneki kichiuas para peuasya tanojnotsas. Xikilui ke keman titayoleuaj okachi amo ouij se tanojnotsa. No semi kipaleuis komo peua panoua sentaixpan para tamachtis itech nechikolmej de itajkotian semana. Ijkon okachi momachtijtias keniuj uelis kimelauas tein kineltoka.

XIKNEXTILI KE TIKMATI KE KINEKI KIYOLPAKTIS JEHOVÁ

19. ¿Keniuj kinextij Jesús ke kimatia ke imomachtijkauan kinekiaj kiyolpaktiskej Jehová, uan keniuj uelis tikchiuaskej kemej yejua?

¹⁹ Achto ke Jesús yaskia iluikak kiniluij imomachtijkauan ke oksepa iuan yetoskiaj. Keman kiniluij nejon, yejuan amo kiajsikamatkej ke kiniluijtoya ke yaskiaj iluikak. Maski imomachtijkauan amo nochi kiajsikamatiaj, yejua kimatia ke kinekiaj kiyolpaktiskej Jehová (Juan 14:1-5, 8). Jesús kimatia ke seki taman amo niman kiajsikamatiskiaj, porin amo kiajsikamatkej keman kiniluij ke ueliskiaj kichiaskej yaskej iluikak (Juan 16:12). Ijkon kemej Jesús, tejuan no uelis tiknextiliskej akin tikmachtiaj ke tikmatij ke kineki kitekitilis Jehová.

20. ¿Keniuj se tokniuj siuat de Malaui kinextilij akin kimachtiaya ke kineltokaya ke kinekia kichiuas tein kuali?

²⁰ Maj titakuaujtamatikan ke akin tikmachtiaj kineki kichiuas tein kuali. Maj tikitakan tein kipanok Sarab de Malaui, yejua peuak kimachtia se siuapil akin katka católica uan monotsa Ana. Keman momachtijtoyaj tamachtilis 14 den amaix Tiyolpakiskej nochipaya, Sara kitajtani ox kuali yetok maj se kinkui tatadiosmej para se kiueyichiuas Dios. Ana kualanik uan kijtoj: “¡Nejon nejua nikmati ox nikchiuas oso amo!”. Sara kinemilij ke nejon siuapil amo momachtiskiaok. Sayoj ke amo yolijsiuik uan kisentokak kimachtij porin kimatia ke xa satepan kiajsikamatiskia ke amo kuali yetok maj se kinueyichiua tatadiosmej. Seki metsti satepan, Sara kitajtanij tein nesi itech tamachtilis 34: “¿Keniuj mitsonpaleuiani hasta axkan tionmomachtis Biblia uan tikonixmatis Jehová, Dios akin yekmelauj nemi?”. Sara kijtoua keniuj tanankilij Ana: “Kijtoj miak taman tein kualtsin, se taman yejua ke itaixpantijkauan Jehová amo kichiuaj tein Biblia kijtoua ke amo kuali yetok”. Tepitsin satepan, Ana amo kinueyichiuakok tatadiosmej uan uelik moauij.

21. ¿Keniuj uelis tikpaleuiskej akin tikmachtiaj maj kitekitili Jehová?

²¹ Maski tikmatij ke sayoj Dios ‘kichiua maj aksa moskalti’, tejuan no uelis titapaleuiskej maj akin tikmachtiaj kitekitili Jehová (1 Cor. 3:7). Amo sayoj tikmachtiaj tein Jehová kineki maj kichiua, ta no tikpaleuiaj maj semi kitasojta. No tikyolchikauaj maj kitayekanalti kitekitilis Jehová para kinextilis ke semi kitasojta. Uan tikpaleuiaj maj takuaujtamati ke Jehová kipaleuis keman kiixnamikiskej. Akin tikmachtiaj kinekis kitekitilis Jehová komo tiknextiliaj ke tikneltokaj ke kineki kiyolpaktis.