Maj niman tikinpaleuikan akin kinekij kiixmatiskej Dios

1. ¿Keniuj kiseliaj sekin keman kikakij kuali tanauatilmej? (Hechos 13:​47, 48; 16:​14, 15).

ITECH yekinika siglo, miakej kiuelkakkej keman ika kinnojnotskej Jesús uan niman peujkej taneltokaj (xikonlero Hechos 13:​47, 48; 16:​14, 15). Axkan sekin no niman kiuelkakij keman tikintapouiaj kuali tanauatilmej. Sayoj ke oksekin maski amo kinekij kiixmatiskej Dios uan kiueyichiuaskej, satepan kemaj momachtiaj. ¿Toni moneki tikchiuaskej keman tikinajsiskej akin kinekij momachtiskej Biblia uan kiixmatiskej Dios?

2. ¿Keyej keman titanojnotsaj tamati kemej aksa akin tatoka?

² Uelis tikijtoskej ke keman titanojnotsaj tikchiuaj kemej aksa keman tatoka. Seki taman tatok achto chikauaya ke okseki yejua ika moneki niman kisentiliskej, sayoj ke okseki tatok moneki kisentokaskej kiatekiskej uan kiyekpiaskej. No ijkon, keman tikajsij aksa akin kineki kikakis tein Biblia kijtoua, niman tiknekij tikpaleuiskej maj kitekitili Jehová. Sayoj ke no tiksentokaj tikinpaleuiaj oksekin maj kiitakan keyej semi moneki maj momachtikan Biblia (Juan 4:​35, 36). Uelis tikmatiskej keniuj tikinpaleuiskej komo tikmatij akonimej niman kinekij momachtiskej uan akonimej ayamo. Itech nejin tamachtilis tikitaskej toni uelis tikchiuaskej komo tikitaj ke aksa niman kineki techkakis keman yekinika iuan titajtouaj. No tikitaskej keniuj uelis tiksentokaskej tikpaleuiskej maj okachi motoki iuan Jehová uan maj kitekitili.

¿KENIUJ UELIS TIKPALEUISKEJ AKIN KIUELKAKI KUALI TANAUATILMEJ?

3. ¿Toni uelis tikchiuaskej komo tikajsij aksa akin kineki kikakis kuali tanauatilmej? (1 Corintios 9:26).

³ Komo tikajsij aksa akin kineki kikakis kuali tanauatilmej, maj niman tikpaleuikan maj kiixmati Jehová uan maj okachi iuan motoki. Keman yekinika iuan titajtoskej, uelis niman tikiluiskej ox kineki momachtis Biblia uan tikyoleuaskej maj touan monechiko (xikonlero 1 Corintios 9:26).

4. ¿Keniuj tein kipanok se siuapil kinextia ke sekin niman kinekij momachtiskej Biblia?

⁴ Xikonilui ox kineki momachtis Biblia. Sekin akin tikinnojnotsaj niman kinekij momachtiskej Biblia. Yejua nejon tein panok iuan se siuapil de Canadá. Se jueves, motokij itech carrito tein ika titanojnotsaj uan kikuik folleto Tiyolpakiskej nochipaya. Tokniuj siuat kiluij ke komo kinekia, no ueliskia momachtis Biblia ika nejon folleto. Siuapil kiuelkakik uan kipanoltilij inúmero, nejon tonal siuapil kitajkuilouilij tokniuj uan kitajtanij kemanian ueliskia momachtiskej. Tokniuj siuat kiluij ox ueliskia momachtiskej itamian semana, sayoj ke siuapil kiluij: “¿Tiuelis mosta?”. Mostika niman peuak momachtiaj uan nejon itamian semana yajki yekinika nechikol, uan siuapil niman peuak kuali mouika iuan Jehová.

5. ¿Toni moneki tikelnamikiskej keman tikiluiskej aksa ox kineki momachtis Biblia? (No xikonita taixkopimej).

⁵ Amo nochin niman kinekij momachtiskej kemej nejon siuapil. Kemansa sekin kinekiskej techkakiskej komo achto ika tikinnojnotsaj teisa tein kinyolnotsas. Xa niman peuas tikmachtiskej aksa komo tiksentokaj tikpaleuiaj uan tiknemiliaj ke ipa kinekis momachtis. ¿Keniuj uelis tikiniluiskej ox kinekij momachtiskej? Yejua nejin tein kintajtanijkej seki tokniuan akin kimatiliaj keniuj niman peuas kimachtiskej aksa ika Biblia.

6. ¿Toni uelis tikiluiskej akin tiknojnotsaj para kinekis maj oksepa timokepakan?

⁶ Seki tanojnotsanij uan precursores kijtojkej ke itech seki xolalmej okachi kuali maj amo se kilui akin tiknojnotsaj ke tikmachtitij. Kijtouaj ke okachi tekakij komo sayoj tikiniluiaj ke tiknekij iniuan timonojnotsaskej oso ke tiknekij tikinnextiliskej tein kijtoua Biblia. Para tikiniluiskej ke tikuelitaskiaj oksepa timokepaskej, nejon tokniuan kijtouaj ke uelis tikijtoskej nejin “Se kimojkaita maj Biblia kinankili tein timotajtanianij” oso “Biblia amo sayoj mokui para ika se tajtos taneltokalis, ta tein techyolmajxitia no techpaleuia maj tiyolpakikan”. Uan xa no uelis tikijtoskej: “Itech sayoj 10 oso 15 minutos uelis tionmomachtis seki taman tein semi mitsonpaleuis”. Amo moneki tikiluiskej ke tiaskej nochi semanas, porin kinemilis ke nochipa moneki momachtis maski amo uelis.

7. ¿Keniuj kimatij sekin ke tein timomachtiaj yejua tein melauj? (1 Corintios 14:​23-25).

⁷ Xikonyoleua maj youi nechikol. Nesi ke keman tatitanil Pablo nemia, sekin akin yekinika monechikouayaj niman taneltokayaj porin kiitayaj ke tamachtiayaj tein melauj (xikonlero 1 Corintios 14:​23-25). Axkan no ijkon panoua. Miakej okachi niman kitekitiliaj Jehová keman peua touan mosentiliaj. Sayoj ke, ¿kemanian uelis tikyoleuaskej aksa maj touan mosentili? Amaix Tiyolpakiskej nochipaya itech tamachtilis 10 kiyoleua akin momachtijtok maj touan mosentili, sayoj ke amo moneki timochiaskej hasta maj tiajsikan itech nejon tamachtilis. Keman yekinika iuan titajtoskej uelis niman tikyoleuaskej maj youi nechikol tein mochiua itamian semana, xa uelis tikiluiskej keniuj motokaytia tanojnots tein mopanoltis oso teisa tein moitas itech amaix Tanejmachtijkej de nejon semana.

8. ¿Toni uelis tikmelauiliskej akin tikyoleuaskej maj touan mosentili? (Isaías 54:13).

⁸ Keman tikyoleuaskej aksa maj touan monechiko, maj tikiluikan keniuj taman tein tejuan tikchiuaj uan tein kichiuaj okseki taneltokalismej tein xa kiixmati. Keman se siuat akin momachtijtok Biblia yekinika yajki se nechikol keman timomachtiaj amaix Tanejmachtijkej, kitajtanij tokniuj akin kimachtia: “Akin kiixyekana tamachtilis, ¿kimati keniuj monotsaj nochin akin mosentiliaj?”. Tokniuj siuat kinankilij ke nochin itech nechikol titamatij kemej se kalyetonij, yejua ika timochikauaj tikmatiskej keniuj monotsaj nochin. Nejon siuat kijtoj ke miakej akin youij tiopan amo kimatij keniuj monotsaj oksekin. Miakej xa amo no kimatij keyej timosentiliaj, yejua ika uelis tikinmelauiliskej (xikonlero Isaías 54:13). Timosentiliaj para tikueyichiuaskej Jehová, timomachtiskej de yejua uan timosenyolchikauaskej (Heb. 2:12; 10:​24, 25). Yejua ika tonechikoluan ixyetok kemej amo ouij timomachtiskej Biblia, uan amo tikchiuaj tein miakej momattokej kichiuaskej keman taueyichiuaj (1 Cor. 14:40). Itech Kali kampa tiMosentiliaj kuali tatanestok porin ompa timomachtiaj. Uan kemej amo tikpaleuiaj nion se taixyekanalis amo keman ika titajtouaj política. Uan amo keman ika timotajtolteuiaj tein tiknemiliaj oso okse taman. Xa kinpaleuis maj kimatikan toni mochiua itech nechikol komo tikinnextiliaj video ¿Keniuj tikchiuaj tonechikoluan?

9, 10. Komo aksa tikyoleuaj maj youi nechikol, ¿toni uelis tikiluiskej para maj amo yolmoui? (No xikonita taixkopimej).

⁹ Miakej amo kinekij yaskej nechikolmej porin mouij maj kiniluikan ke moneki mochiuaskej itaixpantijkauan Jehová. Yejua ika komo tikyoleuaj aksa, maj tikiluikan ke no tikuelitaj tikinseliskej akin amo itaixpantijkauan Jehová, uan komo kineki yas takakitiuj, amo akin kichikaujkauis maj tanankili uan maj kipata itaneltokalis. Konemej amo okseko kinmachtiaj, yejua ika keman touan mosentiliskej uelis motaliskej iniuan inintatuan. Ijkon tetatmej uelis kimatiskej kani yetokej uan toni kinmachtiaj (Deut. 31:12). Amo no titajtanij tomin, porin tikchiuaj tein Jesús kijtoj: “Amo nantaxtaujkej keman namechmakakej, amo no xitetaxtaualtikan keman nantemakaskej” (Mat. 10:8). Uan no uelis tikiluiskej ke amo moneki motalilis tasal tein patioj porin Dios amo techita kemej timoitaj, ta tein tikpiaj toyolijtik (1 Sam. 16:7).

¹⁰ Komo youi nechikol akin tikyoleujkej, maj tikpaleuikan maj kuali momachili. Xa uelis tikchiuaskej maj kinixmati tayekananij uan okseki tokniuan. Xa kinekis oksepa yas komo kiita ke tokniuan kualtsin kiseliaj uan ika motekipachouaj. Komo amo kipia Biblia, maj tiknextilijtiakan textos tein moijtos uan maj tikpaleuikan maj kiajsikamati tein motamachtijtos.

¿KENIUJ UELIS TIKPALEUISKEJ AKIN PEUA TIKMACHTIAJ?

11. ¿Keniuj tiknextiaj ke tikajsikamatij ke akin tikmachtiaj amo kipia miak tiempo?

¹¹ ¿Toni moneki tikelnamikiskej keman peua tikmachtiaj aksa? Xikonnexti ke tikonajsikamati ke kipia miak tekit uan amo ueli uejkaua. Yejua ika, komo tikoniluij toni hora tionyas, ompa xionyeto nejon hora maski kampa tionnemi amo momattokej ajsiskej kemej ixyetok. No kuali yeskia amo xionuejkaua keman yekinika namomachtiskej. Seki tokniuan akin kinmachtianij miakej ika Biblia kijtouaj ke okachi kuali komo amo tiuejkauaj maski akin tikmachtijtokej kinekis kisentokas, uan maj amo titeltajtokan para maj kijto tein kinemilia uan kimachilia (Prov. 10:19).

12. ¿Toni moneki tikchiuaskej keman peuas tikmachtiskej aksa?

¹² Keman peua tikmachtiaj aksa, tiknekij tikpaleuiskej maj kinixmati Jehová uan Jesús uan maj kintasojta. Yejua ika nochi tein tikmachtiskej moneki tikixtiskej itech Biblia uan amo tikiluiskej tein tejuan tikmatij (Hech. 10:​25, 26). Keman tatitanil Pablo tamachtiaya nochipa ika tajtouaya Jesús, yejua akin Jehová kiualtitanka para techpaleuis maj tikixmatikan uan maj tiktasojtakan (1 Cor. 2:​1, 2). Pablo no kijtoj ke semi moneki maj tikinpaleuikan akin yankuikej maj kinextikan seki taman tein kuali uan tein kipia ipatiuj kemej oro, plata uan tetsitsin tein kualtsitsin (1 Cor. 3:​11-15). Uan uelis kinextiskej tein kuali komo tikinpaleuiaj maj takuaujtamatikan iuan Dios, maj mochiuakan tamatinij, maj kuali taixejekokan uan maj kimojkatokakan Jehová (Sal. 19:​9, 10; Prov. 3:​13-15; 1 Ped. 1:7). Maj tikchiuakan kemej Pablo uan maj tikinpaleuikan akin tikinmachtiaj maj semi takuaujtamatikan uan maj kuali mouikakan iuan toTajtsin Jehová (2 Cor. 1:24).

13. ¿Keniuj uelis tiknextiskej ke amo tiyolijsiuij uan ke tikajsikamatij akin tikmachtiaj? (2 Corintios 10:​4, 5; no xikonita taixkopin).

¹³ Maj amo tiyolijsiuikan uan maj titeajsikamatikan keman titamachtiskej ijkon kemej kichiuak Jesús. Maj amo tiktajtanikan akin tikmachtiaj seki taman tein ika mopinaujmatis. Komo tikitaj ke teisa amo kiyekajsikamati, maj timomachtikan tein kisentoka, uan satepan uelis oksepa ika titajtoskej nejon. Oso maj amo tikchikaujkauikan maj kineltoka se tamachtilis komo kiouijmaka kiselis, ta maj tikauakan maj itech tanemili uan maj iselti kipata kemej tanemilia (Juan 16:12; Col. 2:​6, 7). Biblia kijtoua ke tamachtilis tein amo melauak tamati kemej se ueyi tepamit tein moneki xitinis (xikonlero 2 Corintios 10:​4, 5). Xa akin tikmachtiaj amo niman kikauas seki taman tein miak xiujmej kineltokaya. Yejua ika para amo kineltokasok, moneki maj achto tikpaleuikan maj tel kuali mouika iuan Jehová (Sal. 91:9).

¿KENIUJ UELIS TIKINPALEUISKEJ AKIN YEKINIKA MONECHIKOUAJ?

14. ¿Keniuj moneki tikinseliskej akin touan mosentiliskej?

¹⁴ Jehová kineki maj amo tikinchichikouikan uan maj kuali tikinselikan nochin akin touan mosentiliaj, maski kipiaskej tomin oso amo, taman tein momattokej kichiuaskej oso okseko kayomej (Sant. 2:​1-4, 9). Maj tikitakan seki taman tein uelis tikchiuaskej.

15, 16. ¿Toni uelis tikchiuaskej para maj kuali momachilikan akin peua monechikouaj?

¹⁵ Sekin touan mosentiliaj porin kinekij kimatiskej toni mochiua ompa oso porin kinyoleuak aksa akin kiixmatij uan okseko kayot. Yejua ika komo tikitaj ke aksa ajsi nechikol, maj tiknojnotsakan. Maj kuali tikselikan, sayoj ke maj amo tikyolajxitikan porin semi timouelitaj. Uelis tikiluiskej maj touan motali. Maj tiktemolikan se Biblia uan toamaixuan oso maj tiktaneujtikan tein de tejuan. Maj tikchiuakan okseki taman tein kipaleuis maj kuali momachili. Se takat akin yajka se nechikol kielnamiki ke pinauaya porin amo motakentijka kemej tokniuan. Se tokniuj kiluij maj amo mopinaujmati, porin maski kuali timotakentiaj keman tiouij nechikolmej, amo kampa yeski ijkon timochijchiuaj. Nejon takat moauij uan amo keman kielkauak tein tokniuj kiluij. Maski kuali tikinseliaj akin touan monechikouaj, amo tikintajtaniaj tein kinpinaujtis oso tein amo totekiuj (1 Ped. 4:15).

¹⁶ ¿Toni no uelis tikchiuaskej para maj kuali momachilikan akin yaskej nechikol? Keman titanankiliskej, keman tipanoskej taixpan oso keman timonojnotsaskej, maj tiknextikan ke tikinpoujkaitaj akin amo itaixpantijkauan Jehová oso tein kineltokaj. Maj amo tikijtokan nion teyi tein uelis kinyolkokos akin touan mosentiliaj oso tein kichiuas maj amo mokepakanok (Tito 2:8; 3:2). Amo tikijijtoskiaj tein kineltokaj oksekin (2 Cor. 6:3). Yejua ika, tokniuan takamej akin kipanoltiaj se tanojnots itech nechikol moneki kipiaskej cuidado keman tajtoskej. No moneki kielnamikiskej ke seki tajtolmej tein tikuij amo kiajsikamatij akin yekin peua monechikouaj, yejua ika moneki kimelauaskej.

17. ¿Toni moneki tikchiuaskej keman tikajsiskej aksa akin kuali techkaki?

¹⁷ Axkan okachiok moneki titetapouiskej kuali tanauatilmej. Uan tiksentokaskej tikinajsiskej ‘akin kipiaj tanemilil tein moneki para nemiskej nochipaya’ (Hech. 13:48). Yejua ika komo tikajsij aksa akin kuali techkaki, maj niman tikiluikan ke uelis tikmachtiskej ika Biblia uan maj tikyoleuakan nechikolmej. Ijkon tikpaleuiskej maj peua youi itech ‘ojti tein teajxitia kampa se nemis nochipaya’ (Mat. 7:14).