¿Taixejekol maj se kichia se monamiktis iuan se “taneltokakke”?

Seki tokniuan akin ininselti kijtouanij seki taman kemej nejon. Sayoj ke yejuan kimatij ke Jiova kineki maj itekitikauan monamiktikan sayoj iuan se “taneltokakke”. Nejin kijtosneki ke sayoj moneki iuan timonamiktiskej se itaixpantijkauj Jiova akin moauijya (1 Cor. 7:39). Komo ijkon, ¿keyej ijkon tanemiliaj nejon tokniuan?

KEYEJ IJKON TANEMILIAJ

Sekin ijkon kijtouaj porin kinemiliaj ke moajsij okachi tokniuan siuamej akin ininselti ke tokniuan takamej akin ininselti. Uan itech miak altepemej melauak nejon. Kemej neskayot, ompa Corea, itech 100 itaixpantijkauan Jiova, moajsij 57 siuamej uan 43 takamej. Uan ompa Colombia, itech 100 itaixpantijkauan Jiova, moajsij 66 siuamej uan 34 takamej.

Itech seki altepemej momattokej kichiuaskej maj takat kinmaka tomin oso netetayokolilmej itatuan siuat uan ijkon uelis iuan monamiktis. Keman tetatmej amo itaixpantijkauan Jiova, uelis tajtaniskej miak tomin oso netetayokolilmej tein tel patiyoj. Sayoj ke miakej tokniuan takamej akin ininselti amo ueli kikouaj nejon netetayokolilmej. Yejua ika seki tokniuan siuamej itech nejon altepemej kinemiliaj ke amo keman uelis monamiktiskej iuan se itaixpantijkauj Jiova.a

XITAKUAUJTAMATI IUAN JIOVA

Komo kemansa tiknemiliani nejon, xikelnamiki ke Jiova kimati uan kiajsikamati keniuj timomachilia (2 Crón. 6:29, 30).

Maski ijkon, Jiova kijtoua ke sayoj moneki timonamiktiskej iuan aksa akin no kitekitilia yejuatsin. ¿Keyej? Porin kimati toni okachi uelis techpaleuis uan kineki techyekpias. Yejuatsin amo kineki maj tikixpejpenakan tein satepan uelis techtajyouiltis. Itech itonaluan tanauatijkej Nehemías, miakej judíos monamiktijkej iniuan siuamej akin amo kitekitiliayaj Jiova. Yejua ika Nehemías kinelnamiktij toni kipanok tekiuaj Salomón. Kiniluij ke Dios kitasojtaya Salomón uan kiixtalij kemej tekiuaj itech xolal Israel. Sayoj ke Salomón monamiktij iniuan siuamej akin amo kitekitiliayaj Jiova uan yejuan kichiujkej maj tajtakouani (Neh. 13:23-26). Jiova sayoj kineki maj tikpiakan tein okachi kuali. Yejua ika kiniluiani itekitikauan maj monamiktikan sayoj iniuan akin no kitekitiliaj yejuatsin (Sal. 19:7-10; Is. 48:17, 18). Tikmatij ke Jiova kinamiki techiluis toni uelis tikchiuaskej oso toni amo. Uan no, tiktasojkamatiliaj maj techyolmajxiti porin nejon nochipa techpaleuia maj kuali tiyetokan uan ijkon kinextia ke techtasojta (Prov. 1:5).

Komo timonamiktia iuan aksa akin amo kitasojta Jiova, uelis kichiuas amo xiktekitiliok. Tikyekmatij ke amo tikneki maj pano nejon (2 Cor. 6:14). Xikelnamiki ke tein Jiova techyolmajxitia nochipa techpaleuia. Tein melauj, miakej itekitikauan itech totonaluan kuali taixpejpenanij uan kitakamatinij nejin tayolmajxitilis, sayoj ke miakej amo kichiuanij nejon.

KEMAJ TAIXEJEKOL

Se tokniuj siuat kayot Australia akin monotsa Maggy peuak iuan moixmati se takat akin amo itaixpantijkauj Jiova.b Yejua kijtoua ke miakpa amo yaya nechikolmej porin kinekia iuan yetos. Uan nejon kijtakoj ikuali uikalis iuan Jiova. Okse ichpoch kayot India akin monotsa Ratana peuak iuan moixmati se akin iuan momachtiaya. Telpoch peuak momachtia Biblia sayoj porin kinekia iuan yetos Ratana. Satepan, ichpoch amo kitekitiliayaok Jiova uan kipatak itaneltokalis uan ijkon ueliskia iuan monamiktis.

Se tokniuj siuat kayot Camerún akin monotsa Ndenguè monamiktij keman kipiaya 19 xiujmej iuan se takat akin amo katka itaixpantijkauj Jiova. Yejua kiluijka ke ueliskia kisentokaskia kitekitilis Jiova. Sayoj ke ome semana satepan ke monamiktijkej amo kikauakok maj youi nechikolmej. Ndenguè kijtoua ke momachiliaya itelselti uan tel chokaya. Kiajsikamatik ke amo yejuaok kiyekanaya inemilis. Uan no, itanemilil nochipa kikuejmolouaya.

Xa tiknemilis: “Moajsij tokniuan akin monamiktijkej iniuan akin amo itaixpantijkauan Jiova uan kipiaj se kuali ininyolo”. Nejon melauak. Sayoj ke komo timonamiktia iuan aksa akin amo itaixpantijkauj Jiova, ¿keniuj nejon kijtakos mokuali uikalis iuan Jiova? ¿Keniuj timomachilis porin amo tiktakamatik tein Jiova mitsyolmajxitij porin kinekia kuali xiyeto? Uan tein okachi moneki, ¿keniuj momachilis Jiova? (Prov. 1:33.)

Miakej tokniuan kitakamatij tein Jiova techyolmajxitia uan monamiktiaj iuan aksa akin itaixpantijkauj Jiova. Yejuan kiyekmatij ke yejua nejon tein okachi kuali uelis kiixpejpenaskej. Uan no, kichiuaj porin kinekij kiyolpaktiskej Jiova. Kemej neskayot, se tokniuj siuat kayot Japón akin monotsa Michiko kinekia kitakamatis Dios, sayoj ke ichankauan kinekiaj maj monamikti iuan aksa akin amo katka itaixpantijkauj Jiova. Uan no, kiitak keniuj itasojikniuan monamiktiayaj iniuan itaixpantijkauan Jiova, sayoj ke yejua kisentokaya iselti. Nejon semi kiyolkokouaya. Sayoj ke kijtoua ke kipaleuiaya kielnamikis ke yolpakilis amo se kiajsi komo se monamiktia oso amo, ta keman se kitekitilia Jiova, Dios akin yolpaki (1 Tim. 1:11, TNM). Yejua no kiyekmati ke Jiova techmaka tein tikyolnejnekij. Yejua ika kijtoua ke komo se kineki se monamiktis, sayoj ke amo se kiixmati aksa akin no kitekitilia Jiova, okachi kuali maj se kisentokaok se iselti. Satepan, Michiko monamiktij iuan se itaixpantijkauj Jiova akin kitekitiliaya yejuatsin ika nochi iyolo. Uan yolpaki porin kitakamatik Jiova.

No moajsij tokniuan takamej akin monamiktianij hasta keman kiixmatij akin okachi kuali yeski ininnamik. Kemej neskayot, se tokniuj takat kayot Australia akin monotsa Bill kijtoua ke kemansa kiyolnejnekia moixmatis iniuan siuamej akin amo katkaj itaixpantijkauan Jiova. Sayoj ke yejua amo keman kinteltakachiuak porin amo kinekia peuas moixmatis iuan aksa akin amo kitekitiliaya Jiova. Satepan, Bill kiniluij seki tokniuan siuamej ke kinekia peuas iniuan moixmatis. Sayoj ke yejuan amo kinekiaj. Bill mochiak 30 xiujmej hasta keman kiixmatik se tokniuj siuat akin no kinejnekia kichiuas tein Bill no kiixtalijka. Yejua kijtoua ke amo moyolnonotsa. Semi yolpaki porin yejua uan inamik ueli sentanojnotsaj, mosenmachtiaj uan kisentekitiliaj Jiova. No kiyolpaktia mosentilis iniuan itasojikniuan inamik porin no kitekitiliaj Jiova. Kijtoua ke kitakamatis tein Biblia techyolmajxitia kichiua maj okachi kuali mouikakan kemej namikuanij.

TONI UELIS TIKCHIUJTOS

Komo ayamo timonamiktia porin tikneki tiktakamatis Jiova, ¿toni uelis mitspaleuis xiksentoka ximochia? Uelis tiknemilis keniuj Jiova semi yolpaki keman kiita ke tikneki tiktakamatis (1 Sam. 15:22; Prov. 27:11). No mitspaleuis nochipa ximotataujti iuan uan xiktapoui keniuj timomachilia (Sal. 62:8). Uan komo timochikaua nochipa tikixnamikis tayejyekolis uan amo kuali tanejnekilis, mokuali uikalis iuan Jiova okachi mochikauas mojmostaj. Xikelnamiki ke yejuatsin mitstasojta. Uelis tikyekmatis ke yejuatsin kiita toni mitspoloua. Jiova amo motenkaua iuan nion akin ke kimakas se inamik, sayoj ke kimati toni kichiuas tein mitspaleuis xiyolpaki (Sal. 145:16; Mat. 6:32).

Xa kemansa timomachilis kemej David. Se tonal moteltayokoltijtoya uan yejua ika kitajtanij Jiova maj niman kipaleuiani porin amo kipiayaok chikaualis (Sal. 143:5-7, 10). Sayoj ke amo ximosenkaua. Xikchia maj Jiova kinankili monetataujtiluan. Xikixtajtolti Biblia uan xiknemili tein tikixtajtoltia. Ijkon tikmatis toni kichia Jiova xikchiua uan keniuj kinpaleuij itekitikauan ne uejkauj. Nejin mitspaleuis iuan xitakuaujtamati uan xiktakamati.

¿Toni no uelis tikchiujtos? Uelis tiktemos okachi tikchikauas mokuali uikalis iuan Jiova uan kuali ximoteixmatilti. No uelis timochikauas kuali timouikas iniuan oksekin uan tikinpaleuis, titeltekitis uan amo keman tikauas Jiova. Nejin kualneskayomej tapaleuiaj maj se yolpaki iuan se inamik (Gén. 24:16-21; Rut 1:16, 17; 2:6, 7, 11; Prov. 31:10-27). Nochipa xiteltekitito itech tanojnotsalis uan itech nechikol. Nejin mitspaleuis kuali xitaixpejpena. Bill kijtoua ke xiujmej keman iselti yetoya ijsiujka panokej porin kichiujtoya tekit kemej precursor.

Se kitakamatis Jiova uan se kichias se monamiktis sayoj iuan se “taneltokakke” kemaj taixejekol. Komo tikixpejpenaj timonamiktiskej iuan aksa akin itaixpantijkauj Jiova, tikueyitaliskej yejuatsin uan tiyolpakiskej. Biblia kijtoua ke akin kitakamati Jiova ika nochi iyolo nochipaya kipias yolpakilis (Sal. 112:1, 3). Yejua ika, amo keman xikelkaua ke Jiova technauatia maj timonamiktikan sayoj iuan se “taneltokakke”.