¿Uelis tiontapaleuis itech monechikol?

ACHTO ke mokepaskia iluikak, Jesús kiniluij imomachtijkauan ke yejuan tanojnotsaskiaj “nonouiyampa de nochi senmanauak” (Hech. 1:8). ¿Keniuj ueliskiaj tanojnotsaskej semanauak taltikpak?

Se takat akin tamachtia itech se ueyi kaltamachtiloyan tein motelixmati kijtoj ke itatojtokakauan Cristo akin nenkej itech tonalmej keman taixyekantoyaj romanos amo katkaj kemej akin pouiaj itech okseki taneltokalismej, hasta inintaneltokalis judíos. ¿Keyej amo katkaj kemej yejuan? Porin akin kichiuayaj kemej Cristo noyampa yayaj kintapouitij taltikpakneminij tein iTajtol Dios tamachtia. Yejua nejon kichiuak Jesús. Uan akin yekmelauj katkaj imomachtijkauan kichiujkej kemej yejua. Yejuan noyampa kiteixmatiltijkej “kuali tanauatilmej ika itekiuajyo Dios”. Kintemouayaj taltikpakneminij akin kinekiaj momachtiskej tein melauak (Luc. 4:43, TNM). Yejua ika itech Biblia moijtoua ke itech nejon tonalmej seki taltikpakneminij kintitankej maj tanojnotsatij, uan yejuan moixmatkej kemej “itatitaniluan” Jesús (Mar. 3:14). Yejua kinnauatij: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan” (Mat. 28:18-20).

Semi melauak ke 12 itatitaniluan Jesús amo yetokejok nikan taltikpak, sayoj ke miakej itekitikauan Jiova kichiuaj kemej yejuan. ¿Keniuj? Keman youij tapaleuitij kampa monekij okachi tanojnotsanij. Yejuan kijtouaj: “¡Nikan niyetok nejua! Xinechtitani nejua” (Is. 6:8). Sekin uejuejka yanij tapaleuitij. Yejua nejon kichiuanij miakej tokniuan akin yanij momachtitij Galaad. Oksekin yanij tapaleuitij itech okse xolal tein poui itech altepet kampa nemij. Uan miakej oksekin momachtianij se yankuik tajtol uan ijkon uelis tapaleuiskej itech se nechikol oso se tein ayamo nechikol. Melauak ke sekin kinouijmakani kichiuaskej nejon. Sayoj ke nochi nejin tokniuan motemakakej kikauaskej seki taman porin kitasojtaj Jiova uan taltikpakneminij. Ika nejmachkayot kiixtalijkej toni kichiuaskej uan kikuikej inintonaluan, inintomin uan ininchikaualis uan ijkon uelik yajkej tapaleuitoj kampa monekij okachi tanojnotsanij (Luc. 14:28-30). Nochin yejuan kichiuaj se tekit tein kitelpia ipatiuj.

Semi melauak ke amo tinochin tiuelij timomachtiaj se yankuik tajtol oso titapaleuitij kampa monekij okachi tanojnotsanij. Sayoj ke tinochin uelis titekitiskej kemej misioneros itech tonechikol. ¿Keniuj? Maj tikitakan.

MAJ TITEKITIKAN KEMEJ MISIONEROS ITECH TONECHIKOL

Itech yekinika siglo, tel miakej akin kichiuayaj kemej Cristo amo katkaj misioneros, ta tanojnotsayaj itech ininxolal. Sayoj ke nochin yejuan tanojnotsayaj ika yolpakilis. Kitakamatiaj nejin tayolmajxitilis tein Pablo kimakak Timoteo: “Ximotekitiltijtiu para xitanojnotstinemi ika in Tajtoltsin de Dios ten kualkui ne nemakixtilis. Uan nochi nijin motekiu xikyekchiuati ijkon keme Totajtsin Dios mitstekimaktij ya” (2 Tim. 4:5). Tejuan no moneki tikchiuaskej tein Pablo tayolmajxitij. Tinochin moneki tiktakamatiskej tanauatil tein kijtoua maj se kiteixmatilti kuali tanauatilmej ika iTekiuajyo Dios uan maj se kinpaleui oksekin maj mochiuakan imomachtijkauan Cristo. Tein melauj, uelis tikchiuaskej miak taman uan ijkon uelis tiyeskij kemej misioneros hasta itech tonechikol.

Keman se tokniuj tapaleuiti kemej misionero itech okse ueyi altepet, moneki kichiuas tein kipaleuis maj momati nemis kemej ompa nemij. Tejuan xa amo uelis titapaleuitiuij okseko. Sayoj ke ¿uelis tikpataskej seki taman uan tiktemoskej yankuik taman kemej titanojnotsaskej? Kemej neskayot, itech xiuit 1940 peuak kinyolchikauaj tokniuan maj tanojnotsakan itech ojmej se tonal itech semana. ¿Uan tejuan? ¿Tikintapouianij tein Biblia tamachtia akin tikinajsij itech ojti? ¿Tikchiuanij okseki taman kemej ixyetok motanojnotsas, kemej tanojnotsalis kampa se kitalia amaixmej kampa miakej panouaj?

Komo tikpiaj se kuali tanemilil, techtelyolpaktis titanojnotsaskej. Tokniuan akin momachtiaj okse tajtol oso youij tapaleuitij okseko, miakpa semi tapaleuiaj itech nechikol kampa moajsij. Kemej neskayot, yejuan akin okachi tapaleuiaj itech tanojnotsalis. Uan miakej misioneros taixyekanaj itech nechikol hasta keman tokniuan akin ompa kayomej uelij kichiuaj. Komo tejuatsin se tokniuj takat uan tionmoauijya, ¿uelis tiontapaleuis itech monechikol kemej tapaleuijkej oso tayekankej? (1 Tim. 3:1.)

XIKONPALEUI UAN XIKONYOLCHIKAUA TOKNIUAN

Sayoj ke onkak okseki taman kemej uelis titapaleuiskej itech nechikol. Tiyeskij titakamej oso tisiuamej, titelpochmej oso tixiuejkejya, tinochin uelis tikinpaleuiskej uan tikinyolchikauaskej tokniuan (Col. 4:11).

Moneki kuali tikinixmatiskej tokniuan uan ijkon uelis tikinpaleuiskej. Biblia kijtoua ke keman timonechikouaj, moneki tiknemiliskej toni kinpoloua tokniuan (Heb. 10:24). Nejin amo kijtosneki ke moneki tikmatiskej nochi tein kinpanoua. Kijtosneki ke moneki tiktemoskej tikajsikamatiskej tein kimachiliaj uan tein kinpoloua. Xa moneki maj tikinpaleuikan itech seki taman tein mojmostaj kichiuaj oso maj tikinyolseuikan uan maj tikinyolchikauakan ika Biblia. Melauak ke itech seki taman sayoj tayekananij oso tapaleuianij uelis kinpaleuiskej (Gál. 6:1). Sayoj ke tinochin uelis tikinpaleuiskej tokniuan akin xiuejkejya oso kalyetouanij akin kipanotokej ouijkayomej.

Maj tiknemilikan tein kipanok se tokniuj akin monotsa Salvatore. Yejua kipiaya uejueyi kuejmolmej ika tomin, yejua ika monekik kinamakas ichan, itanamakaloyan uan okseki miak taman. Yejua semi ininka motekipachouaya ichankauan. Itech nechikol, okseki kalyetouanij kimatkej tein kipanotoyaj. Yejua ika kimakakej Salvatore tepitsin tomin, uan kipaleuijkej yejua uan inamik maj kiajsinij tekit. Miakpa, nejin kalyetouanij mosentilijkej tiotakpa iniuan Salvatore uan ichankauan, uan kinkakiaj uan kinyolchikauayaj. Nochin yejuan mochiujkej tel kuali tasojiknimej. Axkan kielnamikij ika netasojtalis nejon tonalmej keman kipanokej nejon ouijkayomej.

Akin yekmelauj tikchiuaj kemej Cristo nochipa tiktemouaj tikintapouiskej oksekin tein Biblia tamachtia. Moneki tikchiuaskej kemej Jesús uan tikintapouiskej nochin tein Dios motenkaua kichiuas tein semi kualtsin. Yeski tiueliskej titapaleuitiuij kampa monekij okachi tanojnotsanij oso amo, tinochin uelis timochikauaskej tikinpaleuiskej tokniuan itech tonechikol (Gál. 6:10). Komo ijkon tikchiuaj, okachi tiyolpakiskej uan tiksentokaskej tikchiujtoskej ‘kuajkuali chiualisme kampa yeski titekititinemiskej’ (Col. 1:10; Hech. 20:35).