“Xitakuaujtamati iuan Jiova uan xikchiua tein kuali”

1. ¿Keniuj techchijchiuak Jiova?

JIOVA kinchijchiuak taltikpakneminij ika seki taman tein sayoj yejuan ueli kichiuaj. Techchijchiuak kemej uelis titanemiliskej, tein techpaleuia maj tikyektalikan kuejmolmej uan maj tikixtalikan tein tikchiuaskej satepan (Prov. 2:11). No techchijchiuak kemej uelis tikchiuaskej tein tikixtaliaj (Filip. 2:13). Uan techmakak totanemilil, se taman tein totech moajsi tein techmatiltia toni kuali uan toni amo kuali. Totanemilil kichiua maj tikixtopeuakan tajtakol uan maj amo tikchiuakanok tein ika timopolojkej (Rom. 2:15).

2. ¿Keniuj kineki Jiova maj tiktekitiltikan tein ueli tikchiuaj?

² Jiova kineki maj kuali tiktekitiltikan tein ueli tikchiuaj porin techtasojta uan kineki maj tiyolpakikan. Kemej neskayot, itech Escrituras Hebreas yejuatsin techiluia ke komo ika nejmachkayot tikixtaliaj keniuj tikchiuaskej teisa, nochi kuali techkisas. No techiluia: “Tein yeski tein momay kiajsis toni kichiuas, xikchiua” (Ecl. 9:10; Prov. 21:5). Uan itech Escrituras Griegas techyolmajxitia: “Nachipa kuak tiueliske ma tikinpaleuijtiyakan nochi tagayot”. Uan no kijtoua: “Xikinpaleuijtiyakan in taneltokani ika nochi tataman uelilis ten Dios namechtayokolij” (Gál. 6:10; 1 Ped. 4:10). Kemej tikitaj, Jiova kineki maj tikchiuakan nochi tein tiueliskej tein ika tikinpaleuiskej oksekin uan no tejuan.

3. ¿Toni amo ueli kichiuaj taltikpakneminij?

³ Melauak ke Jiova kineki maj tiktekitiltikan tein ueli tikchiuaj, sayoj ke kimati ke seki taman amo ueli tikchiuaj. Kemej neskayot, amo tiuelij tikixpolouaj tonepololuan, tajtakol nion mikilis (1 Rey. 8:46). Amo no ueli tikinchiualtiaj oksekin tein tejuan tiknekij, porin tinochin toselti tiuelij titaixpejpenaj. Uan maski xa tikpanouanijya miak taman oso tikpiaj miak taixmatilis, Jiova nochipa kipias okachi tamatilis ke tejuan (Is. 55:9).

4. ¿Toni tikitaskej itech nejin tamachtilis?

⁴ Nochipa moneki tikauaskej maj Jiova techixyekana. No moneki titakuaujtamatiskej ke techpaleuis uan kichiuas tein tejuan amo ueli tikchiuaj toselti. Sayoj ke Jiova no kineki maj tiknemilikan keniuj uelis tikyektaliskej tokuejmoluan uan tikinpaleuiskej oksekin (xikonixtajtolti Salmo 37:3). Ika okseki tajtolmej, moneki titakuaujtamatiskej iuan, tikchiuaskej tein kuali uan timonejnemiltiskej ika melaujkayot. ¿Keniuj uelis tikchiuaskej nejin? Maj tikitakan ineskayo Noé, David uan okseki itekitikauan Dios akin iuan takuaujtamatkej. Tikitaskej ke yejuan amo uelik kichiujkej seki taman, sayoj ke kitayekanaltijkej tein kemaj ueliaj kichiuayaj.

MAJ TITAKUAUJTAMATIKAN IUAN JIOVA KEMAN MOTELCHIUA TEIN AMO KUALI

5. Xikonmelaua toni panouaya itech itonaluan Noé.

⁵ Biblia kijtoua ke itech itonaluan Noé taltikpakneminij tel tateuiayaj uan auilnemiaj (Gén. 6:4, 9-13). Yejua kimatia ke se tonal Jiova kinixpoloskia nejon taltikpakneminij. Sayoj ke kemej ayamo ejkoya nejon tonal, xa semi kitekipachouaya tein taltikpakneminij kichiuayaj. Ika tein kipanotoya, Noé kiajsikamatik ke onkaya seki taman tein amo uelia kichiuaya, sayoj ke no kiajsikamatik ke onkaya seki taman tein kemaj uelia kichiuaya.

6, 7. 1) ¿Toni amo uelia kichiuaya Noé? 2) ¿Keniuj tejuan no tikpanouaj kemej tein kipanok Noé?

⁶ Tein Noé amo uelia kichiuaya. Noé nochipa tanejmachtij tein Dios yaya kichiuati. Sayoj ke amo uelia kinchikaujkauiaya taltikpakneminij maj kikakinij. Uan amo no uelia kichiuaya maj Tetsaujkakiouit mochiuani okachi achto. Noé monekia takuaujtamatis ke Jiova kiixpoloskia nochi tein amo kuali ijkon kemej motenkaujka uan ke kichiuaskia keman monekiskia (Gén. 6:17).

⁷ Itech nejin tonalmej, taltikpakneminij no kitelchiuaj tein amo kuali uan tikmatij ke Jiova motenkaua kinixpolos (1 Juan 2:17). Sayoj ke amo ueli tikinchikaujkauiaj maj kikakikan tein kuali tein kiualkuis iTekiuajyo Dios. Uan amo no ueli tikchiuaj maj “kachi ueyi tajyouilis” peua okachi achto (Mat. 24:14, 21). Kemej Noé, moneki semi titakuaujtamatiskej ke amo uejkaua Dios kiixpolos nochi tein amo kuali (Sal. 37:10, 11). Senkis tikneltokaj ke Jiova amo kikauas maj tein amo kuali uejkaua se tonal okachiok ke tein yejuatsin kiixtalij (Hab. 2:3).

8. ¿Toni kitayekanaltij Noé? (Xikonita taixkopin ipeujyan tamachtilis.)

⁸ Tein Noé kemaj uelia kichiuaya. Noé amo mosenkauak porin amo uelia kichiuaya seki taman, ta kitayekanaltij tein kemaj uelia kichiuaya. Kemej neskayot, ika takuaujtamatilis kiteixmatiltij tein Jiova yaya kichiuati (2 Ped. 2:5). Tikyekmatij ke nejin kipaleuij maj chikauak moajsini itakuaujtamatilis. Uan amo sayoj tanojnotsak, ta no kitakamatik Jiova keman kinauatij keniuj kichijchiuaskia arca (xikonixtajtolti Hebreos 11:7).

9. ¿Keniuj uelis tikchiuaskej kemej Noé?

⁹ Kemej Noé, tejuan no okachi tikchiuaj “tekitsin ten Totekotsin Cristo technauatilij” (1 Cor. 15:58). Kemej neskayot, sekin titapaleuiaj maj mochijchiua uan maj moyektali Kalmej kampa tiMosentiliaj uan Kalmej kampa mochiuaj Uejueyi Nechikolmej. Oksekin titapaleuiaj keman mochiuaj uejueyi nechikolmej, titapaleuiaj itech sucursales oso itech se Kali kampa Motajtolkepaj Amaixmej. Sayoj ke okachi titanojnotsaj, porin nejin kichiua maj okachi titakuaujtamatikan itech tein tikchiaj tikseliskej. Se tokniuj siuat kijtoj ke keman kintapouia oksekin toni tatiochiualismej kiualkuis iTekiuajyo Dios, kiita ke yejuan amo kichiaj nion teyi tein kuali porin kinemiliaj ke ininkuejmoluan amo moyektaliskej. Sayoj ke tejuan kemaj tikchiaj tein kuali, uan keman titanojnotsaj okachi titakuaujtamatij ke tikseliskej. Tein tikchiaj tikseliskej techpaleuia maj tiksentokakan timochikauakan tikseliskej nemilis nochipaya (1 Cor. 9:24).

MAJ TITAKUAUJTAMATIKAN IUAN JIOVA KEMAN TITAJTAKOSKEJ

10. Xikonijto tein kipanok David.

¹⁰ Tekiuaj David katka se takat akin kinextij ke takuaujtamatia iuan Jiova, uan yejuatsin semi kitasojtaya (Hech. 13:22). Maski ijkon, David auilnemik iuan Bat-seba, se siuat akin kipiaya inamik. Uan tein okachi amo kuali, kitemoj kitatis nejon tajtakol keman kitemoj maj itech neteuilis momikiliani Urías, inamik nejon siuat. David hasta kichiuak maj Urías kitemakani amat kampa motanauatiaya maj kimiktianij (2 Sam. 11:1-21). Satepan, momatik tein David kichiujka (Mar. 4:22). ¿Toni kichiuak David?

11, 12. 1) ¿Toni amo uelia kichiuaya David satepan ke tajtakoj? 2) ¿Toni kichiuas Jiova komo timoyolnonotsaj?

¹¹ Tein David amo uelia kichiuaya. David amo uelia kiixpolouaya tajtakolmej tein kichiujka. Tein melauj, itech nochi inemilis monekia kijyouis tein amo kuali tein kiualkuiliskia itajtakoluan (2 Sam. 12:10-12, 14). Yejua ika monekia takuaujtamatis ke komo yekmelauj moyolnonotsaya, Jiova kitapojpoluiskia uan kipaleuiskia maj kixiko tein amo kuali tein kiualkuiliskia itajtakoluan.

¹² Tinochin timopolouaj porin titajtakouanij. Sayoj ke seki nepololmej okachi uejueyi ke oksekin. Seki nepololmej xa amo uelis tikixpoloskej uan xa monekis tikijyouiskej tein amo kuali tein techualkuilis (Gál. 6:7). Sayoj ke titakuaujtamatij ke Dios techpaleuis itech nejon ouijkayomej komo timoyolnonotsaj. Yejuatsin techpaleuis maski ouijkayomej tein tikpiaskej yejua tein techualkuilij totajtakoluan (xikonixtajtolti Isaías 1:18, 19 uan Hechos 3:19).

13. ¿Keniuj David kitemoj oksepa kuali mouikas iuan Jiova?

¹³ Tein David kemaj uelia kichiuaya. Kemej David kinekia oksepa kuali mouikas iuan Jiova, mokauak maj yejuatsin kipaleuiani. Kemej neskayot, keman Jiova kititanik tanauatijkej Natán maj kimelauati, yejua kikakik (2 Sam. 12:13). David no kiluij Jiova tajtakolmej tein kichiujka. Ijkon kinextij ke kinekia oksepa kiselis itatiochiualis (Sal. 51:1-17). No amo kikauak maj itanemililuan nochipa kikuejmolouanij, ta kiajsikamatik tein monekia. Uan nejon kipaleuij maj amo keman kichiuaniok. Xiujmej satepan momikilij kemej se takat akin kipiaya chikauak itakuaujtamatilis, uan Jiova ijkon kielnamiki (Heb. 11:32-34).

14. ¿Toni techmachtia ineskayo David?

¹⁴ ¿Toni techmachtia ineskayo David? Ke komo tiueyitajtakouaj, moneki yekmelauj timoyolnonotsaskej, tikiluiskej Jiova ke titajtakojkej uan tiktajtaniskej maj techtapojpolui (1 Juan 1:9). No moneki iniuan titajtoskej tayekananij, porin yejuan uelis techpaleuiskej maj oksepa kuali timouikakan iuan Jiova (xikonixtajtolti Santiago 5:14-16, TNM). Komo tikseliaj inepaleuil Jiova, tiknextiskej ke titakuaujtamatij ke yejuatsin techtapojpoluis ijkon kemej motenkauak. Maj amo oksepaok tikchiuakan nejon tajtakolmej uan maj tiksentokakan tiktekitilijtokan ika takuaujtamatilis (Heb. 12:12, 13).

MAJ TITAKUAUJTAMATIKAN IUAN JIOVA KEMAN TIKPANOTOSKEJ OKSEKI TAMAN

15. ¿Toni techmachtia ineskayo Ana?

¹⁵ Xa tikinelnamikij okseki itekitikauan Jiova akin nenkej ne uejkauj akin iuan takuaujtamatkej uan kichiujkej tein uelkej keman kipanokej ouijkayomej. Maj tikitakan ineskayo Ana. Yejua amo uelia kipiaya konemej. Maski amo uelia kipataya tein kipanotoya, takuaujtamatia ke Jiova kiyolseuiskia. Yejua ika kisentokaya yaya kiueyichiuati itech tabernáculo uan kitapouiaya keniuj momachiliaya (1 Sam. 1:9-11). Ana techkauilij se tel kuali neskayot. Tejuan xa timokokouaj oso tikpanotokej okseki ouijkayomej, uan amo ueli tikpataj tein tikpanotokej. ¿Toni uelis tikchiuaskej? Maj tikauakan nochi imako Jiova uan maj titakuaujtamatikan ke yejuatsin toka motekipachoua (1 Ped. 5:6, 7). Maj timochikauakan tikseliskej nepaleuil itech nechikolmej uan ika okseki nepaleuilmej tein techmakaj itech inechikol Jiova (Heb. 10:24, 25).

16. ¿Keniuj kinpaleuia tetatmej ineskayo Samuel?

¹⁶ ¿Toni uelis kichiuaskej tetatmej akin iuan takuaujtamatij Jiova komo kipiaj konemej akin amo kitekitiliajok yejuatsin? Ineskayo tanauatijkej Samuel uelis kinpaleuis. Samuel amo uelia kinchikaujkauiaya ikoneuan akin uejueykejya katkaj maj kitakamatinij Dios (1 Sam. 8:1-3). Yejua ika nejon kikauilij Jiova. Sayoj ke mochikauak amo kikauas iTajtsin uan kiyolpaktis (Prov. 27:11). Miakej tokniuan tetatmej no ijkon kipanotokej. ¿Toni kichiuaj? Takuaujtamatij ke Jiova kineki oksepa kinselis akin moyolnonotsaj, ijkon kemej tepopaj akin ikonetsin kiauilchiuak itomin akin Jesús ika tajtoj (Luc. 15:20). Yejua ika yejuan kisentokaj kitakamatij Jiova uan kichiaj maj ininneskayo kinolini ininkoneuan maj mokepakan itech nechikol.

17. ¿Keyej techyolchikaua ineskayo siuat akin amo nemiaok inamik?

¹⁷ Okse kuali neskayot yejua siuat akin amo nemiaok inamik akin kipanotoya tatasojtilis itech itonaluan Jesús (xikonixtajtolti Lucas 21:1-4). Yejua amo teyi uelia kichiuaya tein ika kipataskia tachtekilis tein mochiuaya itech templo. Uan amo no uelia kichiuaya teisa tein ika motomintiskia (Mat. 21:12, 13). Sayoj ke takuaujtamatia iuan Jiova, uan yejua ika kiueyichiuaya kemej yejuatsin kineki. Kiuelitaya tapaleuis uan kitemakak “ome tomintsin”, nochi tomin tein kipiaya. ¡Semi takuaujtamatia iuan Jiova! Kimatia ke komo kitayekanaltiaya kitekitilis, yejuatsin kimakaskia tein kipoloskia. Ijkon kemej nejon siuat, tejuan titakuaujtamatij ke Jiova techmakas tein techpoloua komo tiktayekanaltiaj iTekiuajyo (Mat. 6:33, TNM).

18. Xikonijto ineskayo se tokniuj akin kipiaya se kuali tanemilil.

¹⁸ Axkan, miakej tokniuan no takuaujtamatij iuan Jiova uan kitayekanaltiaj tein ueli kichiuaj uan amo tein amo ueli kichiuaj. Maj itech titanemilikan Malcolm, se tokniuj akin momikilij itech xiuit 2015 uan amo keman kikauak Jiova. Itech nochi xiujmej tein yejua uan inamik kitekitilijkej Jiova, kipanokej seki taman tein kuali uan tein amo kuali. Yejua kijtoj: “Itech se inemilis amo se kimati toni uelis panos uan teualkuilis kuejmolmej, sayoj ke Jiova kintatiochiuia akin iuan takuaujtamatij”. Uan tayolmajxitij: “Moneki tiktajtaniskej Dios maj techkaua maj tiktekitilijtokan kemej okachi uelis. Maj tiktayekanaltikan tein ueli tikchiuaj, amo tein amo ueli tikchiuaj”.a

19. 1) ¿Keyej semi kinamiki tajkuilol tein mokuis itech xiuit 2017? 2) ¿Keniuj tikonnemilia tikonchiuas tein kijtoua tajkuilol tein mokuis itech xiuit 2017?

¹⁹ Kemej itech nejin taltikpak okachi mochiujtiuj tein amo kuali, satepan tikpiaskej okachi kuejmolmej (2 Tim. 3:1, 13). Axkan okachi moneki maj amo tikauakan maj kuejmolmej techtsakuilikan, ta moneki senkis titakuaujtamatiskej iuan Jiova uan tiktayekanaltiskej tein ueli tikchiuaj. Yejua ika semi kinamiki maj itech xiuit 2017 mokui nejin tajkuilol: “Xitakuaujtamati iuan Jiova uan xikchiua tein kuali” (Sal. 37:3).