Nimouikas iniuan akin kinextiaj tamatilis nechtelpaleuiani

NIKELNAMIKI tein panok se kualkan keman tel taseseyaya miak xiujmej achto itech xolal Brookings (Dakota del Sur, Estados Unidos). Uelia nikmachiliaya ke ejkotoyaya sesek. Niyetoya kampa kineuayaj tapialmej iniuan seki taltikpakneminij, uan tinochin tiuiuiyokayaj. Tiyetoyaj inakastan se ueyi tapalkat kampa tapialmej tayiaj at, uan tel sesek katka. Xinechonkaua maj nimitsontapoui seki taman tein nikpanouani, uan tikonajsikamatis keyej ompa tiyetoyaj.

NOCHANKAUAN

Niyolik itech tonal 7 metsti marzo xiuit 1936. Nejua nixokoyot uan nikinpia eyi nokniuan. Tinemiaj itech se kaltsin tein moajsia itonalkisayampa xolal Dakota del Sur kampa uelia titatokayaj uan tikiniskaltiayaj tapialmej. Nochankauan kiitayaj ke monekia kichiuaskej nejon tekit, sayoj ke amo yejua kitayekanaltiayaj. Notatuan mochiujkaj itaixpantijkauan Jiova. Moauijkaj itech xiuit 1934. Kemej motemaktijkaj iuan Jiova, kiitayaj ke okachi monekia kichiuaskej itanejnekilis. Nopopaj motokaytiaya Clarence. Timosentiliayaj itech se nechikol tein amo ueyi itech xolal Conde (Dakota del Sur). Nopopaj, uan satepan notío Alfred, tekitikej kemej siervo de compañía (akin axkan kinixyekana tayekananij).

Nochankauan monechikouayaj uan kiteixmatiltiayaj kajkalpan kualtsin nechialis tein ika tajtoua Biblia. Ininneskayo notatuan uan tein techmachtijkej techpaleuij maj tiktasojtakan Jiova. Nokniuj Dorothy uan nejua timochiujkej titanojnotsanij keman tikpiayaj chikuasen xiujmej. Itech xiuit 1943 nimoijkuiloj itech Escuela tein Techmachtia iTekiyo Dios, tein yankuixtok peujka.

Tejuan tiktelpatiuitayaj uejueyi nechikolmej. Nikelnamiki se ueyi nechikol tein mochiuak Sioux Falls (Dakota del Sur) itech xiuit 1949. Ompa, tokniuj Grant Suiter kitemakak tanojnots “¡Okachi amo uejkaua ke tein tejuatsin tikonnemilia!”. Kijtoj ke nochin akin kichiuaj kemej Cristo akin motemaktijkajya monekia kiteixmatiltiskej tatiochiualismej tein kiualkuis iTekiuajyo Dios. Satepan ke panok nejon ueyi nechikol, nimotemaktij iuan Jiova. Nimoauij ompa Brookings itech tonal 12 metsti noviembre xiuit 1949 itech ueyi nechikol tein uejkauak ome tonal tein mochiuak satepan. Yejua ika niyetoya kampa kineuayaj tapialmej kampa tel taseseyaya tein nikijtoj achto iniuan okseki eyi taltikpakneminij. Yaya timoauitij itech se ueyi tapalkat tein chijchiujtoya ika tepos.

Satepan nikixtalij nikchiuas tekit kemej precursor. Nipeuak itech tonal 1 metsti enero xiuit 1952, keman nikpiaya 15 xiujmej. Biblia kijtoua: “Akin nentinemi iniuan akin tamatinij mochiuas tamatkej”, uan miakej nochankauan katkaj tamatinij, akin nechpaleuijkej maj peua nikchiua tekit kemej precursor (Prov. 13:20). Miakpa nitanojnotsaya iuan notío Julius, akin kipiaya 60 xiujmej. Maski miak xiujmej nechyekanaya, tikteluelitayaj tisentanojnotsaskej. Nikajsikamatik miak taman ika tein yejua kipanoka. Tepitsin satepan, Dorothy no peuak kichiua tekit kemej precursor.

TOKNIUAN TAKALPANOUANIJ NECHPALEUIAJ

Keman nikatka ninojnelok, notatuan kinyoleuayaj maj mokauakan tokalijtik tokniuan takalpanouanij uan ininnamik. Seki namikuanij akin nechtelpaleuijkej motokaytiayaj Jesse uan Lynn Cantwell. Noka motekipachouayaj uan nechyolchikauayaj. Keman tokniuan Cantwell takalpanouayaj itech se nechikol tein ompakauin moajsia, kemansa nechyoleuayaj maj iniuan nitanojnotsati. Semi nikuelitaya iniuan niyetos. Niknekia niktekitilijtos Jiova ijkon kemej yejuan uan nitekitis kemej precursor.

Okse tokniuj takalpanojkej motokaytij Bud Miller uan inamik, Joan. Nikpiaya 18 xiujmej keman takalpanojkej itech tonechikol. Itech nejon tonalmej monekia niyas kampa kiixejekouayaj akoni monekia pouis iniuan tateuianij. Kinekiaj maj nikchiua teisa tein nikitaya ke kitapanauiliaya itanauatil Jesús tein kijtoua maj amo se mokalaki itech tekiuajyot (Juan 15:19). Sayoj ke nejua niknekia nikteixmatiltis tatiochiualismej tein kiualkuis iTekiuajyo Dios. Yejua ika nitajtanik maj niixnesi kemej se akin tamachtia iTajtol Dios.

Semi niyolpakik keman tokniuj Miller nechiluij ke nouan yaskia keman nimotajtouiskia. Yejua amo pinauaya, uan amo kinmouiliaya taltikpakneminij. Uan no, kuali kiixmatia iTajtol Dios. Semi nechyolchikauak maj yani nouan. ¿Toni tanankilijkej? Keman tantiyayajya tonalmej keman tel tonaya itech xiuit 1954, nejon tekiuanij kijtojkej ke ueliskia niixnesis kemej se akin tamachtia iTajtol Dios. Nejon nechpaleuij maj niuelini okachi niktekitili Jiova.

Tepitsin satepan, nechyoleujkej maj nitapaleuiti Betel, itech Hacienda Watchtower tein moajsia Staten Island (Nueva York). Niyetoya ompa kemej eyi xiuit. Nikpanok miak taman tein kuali keman nitekitik iniuan “akin tamatinij”.

NITEKITI BETEL

Ompa Staten Island no yetoya radio WBBR. Itaixpantijkauan Jiova tiktekitiltijkej nejin radio itech xiuit 1924 hasta xiuit 1957. Kemej 15 hasta 20 akin titekitiaj Betel titapaleuiayaj ompa kampa tatokayaj uan kiniskaltiayaj tapialmej. Timiakej tikatkaj titelpochmej uan amo semi tikmatiaj miak taman, sayoj ke touan yetoya Eldon Woodworth, se tokniuj taixpejpenal akin xiuejya katka. Yejua katka kemej topopaj uan techmachtij miak taman. Keman timokualantiayaj, tokniuj Woodworth nochipa kijtouaya: “Se kimoujkaita tein Jiova kichiuani maski akin yejuatsin kinkui maj tapaleuikan tajtakolejkej”.

Tokniuj Frederick Franz no yetoya touan uan semi techpaleuij. Katka tamatkej uan kuali kiixmatia Biblia. Toka motekipachouaya tisejsemej. Akin takualchiuaya motokaytiaya Harry Peterson. Tein melauj, iapellido katka Papargyropoulos, sayoj ke okachi amo techouijmakaya tikijtoskej Peterson. Yejua no katka taixpejpenal uan semi kiuelitaya tanojnotsas. Tel kuali kichiuaya tekit tein kipiaya Betel uan nochipa yaya tanojnotsati. Sejse metsti kinkauiliaya taltikpakneminij tel miak amaixmej. No tel kuali kiixmatia Biblia uan kinankiliaya miak netajtanilmej tein tikpiayaj.

ININNESKAYO TOKNIUAN SIUAMEJ TAMATINIJ NECHPALEUIJ

Takilomej uan kilmej tein tiktekiaj kampa titatokayaj tikeuayaj kemej amo uejueliuiskiaj tein satepan kikuaskiaj akin tekitiaj Betel. Xijxiujtika tikeuayaj itech 45,000 tapalkamej. Nejua nitekitia iuan Etta Huth, se tokniuj siuat tel tamatkej. Yejua kiixtalij toni tiktaliliskiaj takilomej uan kilmej. Miakej tokniuan siuamej akin ompakauin monechikouayaj ualayaj tekitikij touan, uan Etta kiniluiaya keniuj kichiuaskej tekit. Maski Etta kuali kimatia keniuj tikchijchiuayaj takilomej uan kilmej, nochipa kinpoujkaitak tokniuan akin taixyekanayaj ompa. Tinochin techkauilij se tel kuali neskayot.

Angela Romano (Angie) katka semej ichpochmej akin ualayaj techpaleuikij. Etta kipaleuijka maj kiixmati Jiova. Angie uan nejua timonamiktijkej itech metsti abril xiuit 1958, uan tiksentekitilianij Jiova 58 xiujmejya. Kemej Angie nochipa kitakamatini Jiova tapaleuiani maj okachi kuali timouikakan kemej namikuanij. Yejua semi tamatkej, uan ueli senkis iuan nitakuaujtamati, itech tein yeski taman tein panos.

TITEKITIJ KEMEJ MISIONEROS UAN TITAKALPANOUAJ ITECH CIRCUITO UAN DISTRITO

Keman itech xiuit 1957 monamakak kampa yetoya radio WBBR ompa Staten Island, nitekitik Betel ompa Brooklyn seki tonalmej. Keman Angie uan nejua timonamiktijkej nikisak Betel. Tikchiujkej tekit kemej precursor ompa Staten Island eyi xiuit. Seki tonalmej hasta nitekitik iniuan akin takoujkaj kampa yetoya radio, tein kitokaytijkej WPOW.

Angie uan nejua amo tikpiayaj miak taman, porin amo tiknekiaj maj nion teyi techtsakuili maj titapaleuitij kampa monekiskia. Yejua ika, itech xiuit 1961, techyoleujkej maj tikchiuakan tekit kemej precursor especial itech xolal Falls City (Nebraska). Tepitsin satepan keman tiajsikej, techyoleujkej maj tiyanij South Lansing (Nueva York) kampa motemakaskia Tamachtilis tein Kiseliaj Tayekananij uan Tapaleuianij tein uejkauak se metsti. Semi techyolpaktij tikseliskej nejon tamachtilis uan tiknemiliayaj ke satepan ke tamiskia timokepaskiaj Nebraska. Yejua ika semi tikmoujkaitakej keman techtitankej Camboya kemej misioneros. Itech nejin kualtsin altepet tein moajsi Asia, uelik tikitakej, tikakkej uan tikyekojkej yankuik taman. Senkis tiknekiaj tikteixmatiltiskej itech nejon altepet tatiochiualismej tein kiualkuis iTekiuajyo Dios.

Sayoj ke mopatak kemej taixyekanayaj tekiuanij ompa Camboya, uan monekik tiyaskej Vietnam del Sur. Ome xiuit satepan, niueyikokolispeuak uan monekik timokepaskej Estados Unidos. Amo niman nipajtik. Sayoj ke keman okachi kuali nimomachilij, oksepa peuak tikchiuaj tekit kemej precursor.

Itech metsti marzo xiuit 1965, peuak nitakalpanoua itech nechikolmej. Angie uan nejua titekitikej kemej takalpanouanij itech circuito uan distrito 33 xiujmej, uan titapaleuijkej itech uejueyi nechikolmej. Semi nikuelitaya nikchiuas nejon tekit, porin nochipa nikpatiuitani uejueyi nechikolmej. Seki xiujmej, titakalpanojkej itech nechikolmej tein moajsiaj Nueva York uan itech xolalmej tein ompakauin moajsiaj, uan miak uejueyi nechikolmej mochiujkej itech Estadio de los Yankees.

NIMOKEPA BETEL UAN NITAPALEUIA ITECH TATAMAN TAMACHTILISMEJ

Angie uan nejua tikselijkej miak tataman tekimej tein ouijkej. Itech xiuit 1995, nechyoleujkej maj nitamachti itech Tamachtilis tein kinpaleuia Tokniuan Takamej itech iTekiyo Dios. Eyi xiuit satepan techyoleujkej maj titapaleuitij Betel. Satepan ke panokej 40 xiujmej, semi nechyolpaktiaya nimokepas Betel, kampa nipeujka niktekitilia Jiova miak tonalmej. Seki xiujmej nitekitik Kampa kiitaj iTekiyo Dios uan nitamachtij itech miak tataman tamachtilismej tein motemakaj itech inechikol Dios. Itech xiuit 2007, Oloch Taojtokaltianij kiixtalijkej Kampa kiitaj tataman Tamachtilis tein motemaka itech iNechikol Dios, kampa kiixtaliskiaj tamachtilismej tein motemakaskiaj Betel. Itech seki xiujmej, nejua nitaixyekanak itech nejon tekit.

Itech xiujmej tein panouanij mopatani miak taman itech tamachtilismej tein motemakaj. Tamachtilis tein kiseliaj Tayekananij itech Nechikol peuak itech xiuit 2008. Itech ome xiujmej tein panokej, panoua 12,000 tayekananij kiselijkej nejin tamachtilis ompa Patterson uan Betel tein moajsia Brooklyn. Nejin tamachtilis kisentoka motemaka miakkan. Itech xiuit 2010, Tamachtilis tein kinpaleuia Tokniuan Takamej itech iTekiyo Dios peuak moixmati kemej Tamachtilis ika Biblia tein kinmakaj Takamej akin Ininselti, uan peuak se yankuik tamachtilis tein moixmatik kemej Tamachtilis ika Biblia tein kiseliaj Tokniuan Namikuanij.

Itech metsti septiembre xiuit 2014, nejin ome tamachtilismej mosentilijkej uan peuak Tamachtilis tein kiseliaj akin kiteixmatiltiaj iTekiuajyo Dios. Axkan, nejon tamachtilis uelis kiseliskej namikuanij uan takamej uan siuamej akin ininselti. Noyampa, miakej tokniuan kinyolpaktij kimatiskej ke nejin tamachtilis no motemakaskia itech altepet kampa nemij. Semi techyolpaktia tikmatiskej ke miakej uelis kiseliskej nejon tamachtilismej. Semi nechyolpaktia nikinixmatis tel miakej tokniuan akin kipatanij seki taman itech ininnemilis uan ijkon uelis kiseliskej nejon tamachtilis.

Keman nitanemilia itech tein nikpanouani keman nimoauij kampa kineuayaj tapialmej uan hasta axkan, niktasojkamatilia Jiova porin nikinixmatik tel miakej taltikpakneminij akin kipiaj tamatilis. Yejuan nechpaleuijkej maj okachi kuali nikixmati Dios uan maj okachi kuali niktekitili. Sekin nikinyekanaya, uan oksekin nechyekanayaj. Miakej katkaj okseko kayomej. Sayoj ke ijkon kemej nemiaj nechnextilij ke yekmelauj kitasojtayaj Dios. Semi nechyolpaktia nikinpias miakej notasojikniuan akin kipiaj tamatilis itech ixolal Jiova, akin nechmachtiaj miak taman.