¿Toni kijtosneki se moyekanas ika ichikaualis Dios? ¿Moneki nipouis itech se taneltokalis para nimoyekanas ika ichikaualis Dios?

Tein Biblia kijtoua

Biblia kikui tajtolmej akin moyekanaj ika ichikaualis Dios keman ika tajtoua aksa akin kitelneki kiyolpaktis Dios uan tanemilis kemej yejua. Akin kichiua nejin mochikaua kitakamatis itanauatiluan Dios uan kikaua maj kiixyekana ichikaualisa (Romanos 8:5; Efesios 5:1).

Biblia miakpa kinextia keniuj monejnemiltia akin moyekana ika ichikaualis Dios uan akin amo. Kemej neskayot, “akin moyekana ika tein kinejneki inakayo amo kiselia tein Dios kiteixmatiltia ika ichikaualis”, tein kijtosneki, tein Dios tamachtia (1 Corintios 2:14-16). Akin moyekanaj ika tein kinejneki ininnakayo amo kualtakamej uan amo kitemouaj kuali mouikaskej iniuan oksekin, ta ‘monenexikoluiaj uan moteuiaj’ (1 Corintios 3:1-3). Uan Biblia kijtoua ke akin tetakajkayauiliaj uan akin kinxexelouaj akin kuali mouikaj “tamatij kemej tapialmej, akin amo moyekanaj ika ichikaualis Dios” (Judas 19; Proverbios 16:28).b

Itech nejin tamachtilis tikitaskej nejin:

• ¿Keyej tiktemouaj timoyekanaskej ika ichikaualis Dios?

• ¿Keyej moneki tiktemoskej timoyekanaskej ika ichikaualis Dios?

• ¿Keniuj uelis niktemos nimoyekanas ika ichikaualis Dios?

• ¿Moneki nipouis itech se taneltokalis para nimoyekanas ika ichikaualis Dios?

• Kemej sekin kinemiliaj ke moyekanaj ika ichikaualis Dios, sayoj ke amo melauj

• Seki tajkuilolmej itech Biblia tein ika tajtouaj keman se moyekana ika ichikaualis Dios

¿Keyej tiktemouaj timoyekanaskej ika ichikaualis Dios?

Tiktemouaj timoyekanaskej ika ichikaualis Dios porin tichijchiujtokej kemej yejuatsin (Génesis 1:27). Yejua ika miakej kinekij okachi kiixmatiskej tein amo ueli kiitaj oso kimatokaj.

Tinochin ueli tiknextiaj kualneskayomej kemej tein kipia Jehová.c Kemej neskayot, ueli tiyolseujkanemij, titeikneliaj uan amo titechichikotasojtaj (Santiago 3:17). Uan no, Dios kinpaleuia akin mochikauaj kitakamatiskej para okachi moyekanaskej ika ichikaualis (Hechos 5:32).

¿Keyej moneki tiktemoskej timoyekanaskej ika ichikaualis Dios?

Komo timoyekanaj ika ichikaualis Dios techpaleuis “maj tinemikan uan maj tiyolseujtokan” (Romanos 8:6). Nejin netetayokolilmej tein Dios techmaka semi kipiaj ipatiuj.

• Maj tinemikan: Dios motenkaua ke akin moyekanaj ika ichikaualis nemiskej nochipaya (Juan 17:3; Gálatas 6:8).

• Maj tiyolseujtokan: Kijtosneki kuali timouikaskej iuan Dios. Akin kitayekanaltiaj tein yejuan kinejnekij kiixnamikij (Romanos 8:7). Sayoj ke akin mochikauaj okachi moyekanaskej ika ichikaualis, Dios ‘kinyolseuis kemej amo akin ueli kiajsikamati’ (Filipenses 4:6, 7). Kemej yolseujtokej ueli yolpakij (Mateo 5:3).

¿Keniuj uelis niktemos nimoyekanas ika ichikaualis Dios?

• Xionmomachti uan xikontakamati tein Dios kijtoua. Uelis tikonchiuas komo tikonleroua Biblia, kampa moajsij itanemililuan Dios tein takamej kijkuilojkej “ika ichikaualis” (2 Pedro 1:21). Tein tionmomachtis mitsonpaleuis xikonueyichiua Dios ‘ika ichikaualis uan porin tikonixmati tein melauak’. Nejin kijtosneki ke moneki tikonkauas maj mitsonixyekana ika ichikaualis uan tikonchiuas tein yejuatsin kineki (Juan 4:24).

• Xikontataujti Dios uan xikontajtani maj mitsonpaleui (Lucas 11:13). Dios mitsonpaleuis xikonpia kualneskayomej tein kipiaj akin moyekanaj ika ichikaualis (Gálatas 5:22, 23). Yejuatsin uelis mitsonmakas tamatilis para tikonxikos kuejmolmej tein tikonpias (Santiago 1:5).

• Xionmouika iniuan akin moyekanaj ika ichikaualis Dios. Yejuan mitsonyolchikauaskej xikontemo maj okachi mitsonyekana ichikaualis Dios (Romanos 1:11, 12). Sayoj ke komo tionmouika iniuan akin amo tanemiliaj kemej Dios, amo mitsonpaleuis xionmoyekana ika ichikaualis (Santiago 4:4).

¿Moneki nipouis itech se taneltokalis para nimoyekanas ika ichikaualis Dios?

Komo aksa poui itech se taneltokalis amo kijtosneki ke moyekana ika ichikaualis Dios. Biblia kijtoua: “Komo aksa kinemilia ke taneltoka sayoj ke amo kitsakuilia inenepil, moyolkajkayaujtok uan nenkajsan taueyichiua” (Santiago 1:26; nota).

Maski ijkon, Biblia tamachtia ke akin moyekanaj ika ichikaualis Dios kiueyichiuaj kemej yejuatsin kineki. Kimatij ke “ichikaualis Dios sayoj se”, uan ke nejon chikaualis kichiua maj kiueyichiuakan Dios kemej “sayoj se nechikol”, kampa nochin sentekitij uan tapaleuiaj maj kuali mouikakan para amo xexeliujtoskej (Efesios 4:1-4).

Kemej sekin kinemiliaj ke moyekanaj ika ichikaualis Dios, sayoj ke amo melauj

Tein sekin kinemiliaj: Nochi tein Dios kichijchiuak moyekana ika ichikaualis.

Tein melauj: Nochi tein Dios kichijchiuak kiueyitalia yejuatsin (Salmo 145:10; Romanos 1:20). Sayoj ke, Dios kinchijchiuak maj ueli moyekanakan ika ichikaualis sayoj akin kipiaj tamatilis. Tapialmej amo tanemiliaj uan amo ueli mouikaj iuan Dios. Yejuan sayoj kichiuaj tein kimachiliaj ke kinpoloua (2 Pedro 2:12). Yejua ika, Biblia kinextia ke akin moyekanaj ika ichikaualis Dios amo kichiuaj kemej akin tamatij kemej tapialmej (Santiago 3:15; Judas 19).