¿Se tonal amo kintajyouiltiskejok siuamej? | ¿Toni kijtoua Biblia?

“Keman katka nisiuapil, nokniuj nechteuiaya uan nechiluiaya tein nechyolkokouaya. Satepan ke nimonamiktij, nosiuamon no nechyolxokoliaya. Yejua uan nomontat nechitayaj kemej se takeual. Niknemilij nimomiktis” (Madhu,a India).

Organización Mundial de la Salud kijtoua ke “kampa yeski, siuamej kintajyouiltiaj”. Uan no, kinextia ke se de eyi siuamej, kinteuiaj oso kitemouaj kinchiualtiskej maj auilnemikan.

Komo tikonpanouani nejon, xa tikonmouilia maj oksepa mitsonyolxokolikan, maj mitsonteuikan oso maj mitsonchiualtikan tein amo kinamiki kampa tionyas. Kemej semi kintajyouiltiaj siuamej, xa tikonnemilia ke amo semi akin kiita maj kuali yetokan siuamej. Sayoj ke Dios ¿keniuj kinita siuamej?

¿Keniuj Dios kinita siuamej?

Tajkuilol: “[Dios] kinchijchiuak takat uan siuat” (Génesis 1:27).

Tein kijtosneki: Dios kichijchiuak takat uan siuat uan kitakachiua takat ijkon kemej siuat. Uan no, Dios kineki maj takat ‘kitasojta isiuatsin ijkon kemej yejua motasojta’, maj amo kilui tein kiyolkokos nion maj kiteui (Efesios 5:33; Colosenses 3:19). Nejin kiyeknextia ke Dios kineki maj kuali yetokan siuamej.

“Keman katka nisiuapil, seki nochankauan nechchiualtijkej maj niauilnemi iniuan. Keman nikpiaya 17 xiujmej, noteko nechiluij ke amo nechmakaskiaok tekit komo amo iuan nimoteka. Uan axkan, notakauj, nochankauan uan oksekin nechixtopeuaj. Sayoj ke satepan nikixmatik Jehová,b akin techchijchiuak. Nimomachtij ke yejua kintakachiua siuamej. Nejon nechyekmatiltij ke nechtasojta uan nechita ke nivaleroua” (María, Argentina).

¿Toni mitsonpaleuis maj kaxani nejon tajyouilis?

Tajkuilol: “Moajsi se tetasojikniuj akin okachi tetasojta ke se teikniuj” (Proverbios 18:24).

Tein kijtosneki: Uelis mitsonpaleuis aksa akin kuali iuan tionmouika. Komo tikonmachilia ke mitsonpaleuis, xikontapoui keniuj tionmomachilia aksa akin iuan tiontakuaujtamati.

“Kemej 20 xiujmej amo teyi nikijtoj ke sekin nechchiualtiayaj maj iniuan niauilnemi. Nejin kichiuak maj amo niyolpaki, maj nimotekipacho uan maj nikpia depresión. Sayoj ke keman niktapouij aksa akin kuali nechkakiskia, tel kuali nimomachilij” (Elif, Turquía).

Tajkuilol: “Xikauilikan nochi tein namechtekipachoua porin yejua kiyolmachilia tein namechpanotok” (1 Pedro 5:7).

Tein kijtosneki: Keman tikontataujtis Dios, nochipa mitsonkakis (Salmo 55:22; 65:2). Semi kitekipachoua tein mitsonpanoua, uan yejua ika uelis mitsonpaleuis xikonita ke yekmelauj mitsontasojta.

“Keman peuak nikixmati Jehová, nechpaleuij maj amo semiok niyoltajyouijto. Axkan ueli niktapouia Dios keniuj nimomachilia. Nikmachilia ke yejua kemej se akin kuali iuan nimouika akin kimati keniuj nimomachilia” (Ana, Belice).

¿Kichiuas Dios maj amo kintajyouiltikanok siuamej?

Tajkuilol: “Tikintajtouis huérfanos uan akin tajyouiaj para maj taltikpaktakat amo kinmojmoujtiok” (Salmo 10:18).

Tein kijtosneki: Amo uejkaua, Dios kichiuas maj amo mochiuaok tein amo kuali, maj amo akinok kinteui siuamej nion maj kintajyouilti.

“Nikyekmatik keman nimomachtij ke Jehová amo uejkaua kichiuas maj amo kintajyouiltikanok siuamej uan siuapipil. Nejon semi nechyolseuij” (Roberta, México).

Para tikonsentokas tionmomachtis tein kijtoua Biblia keniuj mochiuas tein kuali satepan, keyej uelis tikneltokaskej ke melauj mochiuas, uan keniuj tiitaixpantijkauan Jehová titamachtiaj ika Biblia, xiontajtani maj mitsonkalpanokan.