¿Kemaj nemi Amokuali?
Tein Biblia kijtoua
Amokuali kemaj nemi. Yejua se akin amo tikitaj. Yekinika katka se ángel. Satepan kiixnamikik Dios. Yejua “akin taixyekana nikan taltikpak” (Juan 14:30; Efesios 6:11, 12). Nikan ixnesi seki taman kemej Biblia kitokaytia Amokuali:
Satanás, tein kijtosneki “Taixnamikkej” (Job 1:6).
Amokuali, tein kijtosneki akin “takajkayaua” (Apocalipsis 12:9).
Kouat, tein itech Biblia kijtosneki se akin takajkayaua (2 Corintios 11:3).
Akin kitemoua maj se motajtakolmaka (Mateo 4:3).
Xolopij (Juan 8:44).
Amo sayoj kiixnextia tein amo kuali
Sekin kinemiliaj ke Amokuali sayoj kiixnextia tein amo kuali tein nochin kipiaj itech ininyolo, hasta toTajtsin kipia. Biblia kijtoua ke toTajtsin tajtoj iuan Amokuali. Uan toTajtsin yektik uan senkis amo kipia tajtakol. Komo ijkon, ¿keniuj ueliskia kipias teisa tein amo kuali iyolijtik? (Deuteronomio 32:4; Job 2:1-6). Uan no, Biblia kijtoua ke Satanás kitemoj kichiuas maj motajtakolmakani Jesús akin amo tajtakolej (Mateo 4:8-10; 1 Juan 3:5). Nejin kinextia ke Satanás se aksa akin yekmelauj nemi uan amo sayoj kiixnextia tein amo kuali.
Miakej kinemiliaj ke amo nemi Amokuali. Amo tikmojkaitaj maj ijkon kinemilikan porin Biblia kijtoua ke Satanás kitemoua kichiuas maj kineltokakan ke amo nemi (2 Tesalonicenses 2:9, 10). Uan kichiuani maj miakej kineltokakan ke amo nemi (2 Corintios 4:4).
Tein kineltokaj de Amokuali tein amo melauj
Tein amo melauj: Amokuali no kitokaytiaj Lucifer.
Tein melauj: Tajtol hebreo tein itech seki Biblias motajtolkepa kemej “Lucifer” kijtosneki “tein petani” (Isaías 14:12). Nejin tajtol mokuik keman motematiltij keniuj kiixpoloskiaj tekiuaj de Babilonia, porin semi moueyinekia (Isaías 14:4, 13-20). Uan keman tekiuaj de Babilonia ixpoliuik, kikuikej tajtol “tein petani” sayoj para kipinaujtiskej.
Tein amo melauj: Amokuali tekiti iuan Dios.
Tein melauj: Amokuali kiixnamiki Dios, amo se itekitikauj. Satanás no kintauelita itekitikauan Dios, yejua ika kintajyouiltia uan kintakajkayauilia (1 Pedro 5:8; Apocalipsis 12:10).