¿Toni kijtosneki tajtakol?

Tein Biblia kijtoua

Moixmati kemej tajtakol nochi tein se kichiua, tein se kimachilia uan tein se kinemilia tein kitapanauilia itanauatiluan Dios (1 Juan 3:4; 5:17). Biblia kijtoua ke aksa tajtakolchiua keman kichiua tein amo kuali oso tein amo kiyolpaktia Dios oso keman kimati kichiuas tein kuali sayoj ke amo kichiua (Santiago 4:17).

Tajtol hebreo tein motajtolkepa kemej “tajtakol” kijtosneki teisa tein amo kiajsik tein yaya kimagati oso amo kikuiltij. Biblia ininka tajtoua seki israelitas akin semi kuali kikuiaj honda oso ateuitats. Yejuan uelia kitamotayaj se tet uan kiajsiaj oso kikuiltiayaj tein kinekiaj. Komo tiktajtolkepaskiaj ijkon kemej yetok, kijtoskia: “amo tajtakolchiuayaj” (Jueces 20:16). Yejua ika, se tajtakolchiuas kijtosneki amo se kichiuas nochi tein kijtoua itanauatiluan Dios.

Kemej Dios techchijchiuak, kinamiki maj kiixtali tanauatilmej tein moneki tiktakamatiskej (Apocalipsis 4:11). Uan tejuan moneki titanankiliskej iixpan por nochi tein tikchiuaskej (Romanos 14:12).

¿Uelis amo keman titajtakolchiuaskejok?

Amo porin Biblia kijtoua ke “nochin tajtakolejkej uan amo uelis yeskij yektikej kemej Dios” (Romanos 3:23; 1 Reyes 8:46; Eclesiastés 7:20; 1 Juan 1:8). ¿Keyej ijkon techpanoua?

Yekinika Adán uan Eva amo kipiayaj tajtakol porin Dios kinchijchiujka kemej yejua tamati (Génesis 1:27). Sayoj ke peuak tajtakolchiuaj keman amo kitakamatkej Dios (Génesis 3:5, 6, 17-19). Keman kinpiakej ininkoneuan kinpanoltilijkej tajtakol kemej yeskia se kokolis (Romanos 5:12). Tekiuaj David kijtoj: “Keman niyolik ipa katka nitajtakolejya” (Salmo 51:5).

¿Onkakej seki tajtakolmej tein okachi fiero ke oksekin?

Kemaj. Biblia kijtoua ke takamej akin nemiaj Sodoma “semi amo yolkualmej katkaj uan fiero tajtakolchiuayaj” (Génesis 13:13; 18:20). Maj tikitakan eyi taman tein kichiua maj se tajtakol okachi fiero ke okse.

1. Uejueyi tajtakolmej. Biblia kijtoua ke se ueyi tajtakol komo aksa auilnemi, kinueyichiua tatadiosmej, tachteki, tauana, takajkayaua para tachtekis, temiktia uan tenaualuia. Nejin amo moneki tikchiuaskej (1 Corintios 6:9-11; Apocalipsis 21:8). Biblia kijtoua ke nejin tajtakolmej amo kemej ijkuak se mopoloua oso se kichiua teisa tein amo se kinemiliaya se kichiuas, kemej ijkuak tikijtouaj oso tikchiuaj teisa tein kiyolkokoua aksa (Proverbios 12:18; Efesios 4:31, 32). Sayoj ke, Biblia techiluia ke moneki amo tiknemiliskej ke amo teyi techpanos komo tikchiuaj nejon porin uelis kichiuas maj tikchiuakan okachi uejueyi tajtakolmej (Mateo 5:27, 28).

2. Tataman kemej titajtakolchiuaj. Sekin tajtakolchiuaj porin amo kiixmatij itanauatiluan Dios (Hechos 17:30; 1 Timoteo 1:13). Biblia kijtoua ke nejin tajtakolmej amo kuali yetok, sayoj ke kinextia ke okachi fiero keman aksa tajtakolchiua maski kiixmati itanauatiluan Dios (Números 15:30, 31). Biblia kijtoua ke aksa semi amo yolkuali komo tajtakolchiua maski kimattok tein kichiujtok (Jeremías 16:12).

3. Kanachpa se tajtakolchiua. Biblia kinextia ke se tajtakolchiuas sayoj sepa semi taman ke se kichiuas miakpa nejon tajtakol (1 Juan 3:4-8). Dios kijtoua ke kintatsakuiltis akin kisentokaj tajtakolchiuaj maski kiixmatijya tein kuali yetok (Hebreos 10:26, 27).

Akin fiero tajtakolchiujkej xa kinyolkokoua tein kichiujkej. Ijkon momachilij tekiuaj David, keman kijkuiloj: “Nonepololuan nechkuasioujtijkejya, kemej se tamamal tel etik tein amo nikxikouaok” (Salmo 38:4). Sayoj ke, Biblia techyolseuia: “Akin amo yolkuali maj amo kichiuaok tein amo kuali, uan akin kinchiuilia tein amo kuali oksekin maj amo kinemiliok tein amo kuali, uan maj mokepa iuan Jehová akin kiiknelis, maj mokepa iuan toDios porin kitapojpoluis” (Isaías 55:7).