¿Toni profecías?

Tein Biblia kijtoua

Moixmati kemej profecía, teisa tein Dios kitematiltia ke mochiuati. Biblia kijtoua ke Dios “ika ichikaualis kinyekanak takamej maj kitematiltikan tein kiniluiaya” (2 Pedro 1:20, 21). Yejua ika se tanauatijkej yejua akin Dios kiluia teisa uan yejua kiniluia oksekin (Hechos 3:18).

¿Keniuj monojnotsaya Dios iniuan tanauatianij?

Dios kikuik miak taman para kiniluis tanauatianij tein kinemiliaya. Maj tikitakan keniuj kichiuaya:

• Kijkuilouaya teisa. Dios ijkon kichiuak keman kimakak Moisés majtakti tanauatilmej (Éxodo 31:18).

• Kintitania ángeles. Dios kikuik se ángel para kiluis Moisés tein monekia kiluis faraón akin tekiuajtia Egipto (Éxodo 3:2-4, 10). Uan no, Dios kinnauatij ángeles maj kiluikan katiyejua tajtolmej monekia kijkuilos. Ijkon kichiuak keman kiluij Moisés nejin: “Xikijkuilo tein nimitsiluijtok, porin ika nejon nimotenkaujtok se taman mouan uan iniuan israelitas” (Éxodo 34:27).a

• Kichiuak maj kiitakan seki taman. Kemansa Dios kichiuak maj tanauatianij kiitakan teisa keman ijsatoyaj (Isaías 1:1; Habacuc 1:1). Keman tanauatijkej kiitstoya nejon kinemiliaya kemej yeskia ompa yetoya (Lucas 9:28-36; Apocalipsis 1:10-17). Kemansa, keman Dios kinnojnotsaya tanauatianij peuaya sepasan tajtachiaj (Hechos 10:10, 11; 22:17-21). Dios no kinojnotsak tanauatianij keman kochtoyaj uan kichiuak maj takochitakan (Daniel 7:1; Hechos 16:9, 10).

• Kinixyekantiaya keman tajkuilouayaj. Dios kinixyekanak tanauatianij para maj kijkuilokan tein kinekia. Ijkon techajsikamatiltia nejin tajtolmej: “Nochi tein ijkuiliujtok itech Tajkuilolamatsin ualeua imako Dios, uan tapaleuia para titamachtiskej” (2 Timoteo 3:16). Dios kikuik ichikaualis para kiniluis itekitikauan tanemililmej tein kinekia maj kijkuilokan. Dios kiniluiaya tanemililmej uan tanauatianij kijkuilouayaj kemej yejuan kinekiaj (2 Samuel 23:1, 2).

¿Nochipa kinextiaj tein panos satepan?

Amo nochi tein kijtoua Biblia kinextia tein panos satepan. Sayoj ke, miak taman tein Dios kijtoj kinextia tein kinpanoskia miakej. Ne uejkauj, itanauatijkauan Dios miakpa kiniluijkej israelitas maj amo kichiuanijok tein amo kuali. Tein tanauatianij kiniluiayaj israelitas, kinpaleuiaya maj kimatikan toni tatiochiualismej kipiaskiaj komo tatakamatiaj uan toni kinpanoskia komo amo takakiaj (Jeremías 25:4-6). Israelitas kiixpejpenaskia tein kinekiskiaj maj kinpano (Deuteronomio 30:19, 20).

Seki profecías tein amo kijtouaj tein panos satepan

• Se tonal israelitas kiluijkej Dios maj kinpaleui. Yejua kititanik se tanauatijkej para maj kiniluij ke amo kinpaleuiskia, porin amo kinekiaj kitakamatiskej (Jueces 6:6-10).

• Keman Jesús iuan tajtoj se siuat akin kayot Samaria, kiluij seki taman tein kichiujka tein Dios kimatiltij. Maski Jesús amo kiluij tein panoskia satepan, nejon siuatsin kimatik ke katka tanauatijkej (Juan 4:17-19).

• Keman akin kitauelitayaj Jesús kikitskijkej, kiixtsakkej, kimagakej uan kiluiayaj: “¡Xiknexti ke titanauatijkej! Xitechilui akoni mitsmagak”. Amo kiluijtoyaj Jesús maj kijto tein panoskia satepan, ta maj kitajtani Dios maj kilui akoni kimagak (Lucas 22:63, 64).