¿Toni kijtosneki se moauis?
Tein kijtoua Biblia
Akin moauia moneki maj kipankalakikan nochi itech at.a Biblia ika tajtoua miakej akin moauijkej (Hechos 2:41). Semej yejua Jesús akin moauij ueyiat Jordán (Mateo 3:13, 16). Seki xiujmej satepan, se takat akin katka etíope kiauijkej kampa onkaya at keman yaya okseko (Hechos 8:36-40).
Jesús tamachtij ke komo aksa kinekia yeski imomachtijkauj, monekia moauis (Mateo 28:19, 20). Tatitanil Pedro no kijtoj nejon (1 Pedro 3:21).
Itech nejin tamachtilis tikitaskej nejin:
¿Toni kijtosneki se moauis?
Keman aksa mouia kinextia senteixtenoj ke moyolkepakya de nochi itajtakoluan. Uan no motenkaua iuan Dios ke kichiuas tein kineki maski tein yeski taman kiixnamikis. Nejin kijtosneki ke kitakamatis Dios uan Jesús itech nochi inemilis. Se taman tein kipaleuis aksa maj nemi nochipaya yejua komo moauia.
Keman aksa kipankalakiaj itech at para kiauiskej kiyeknextia ke kipatak inemilis. Biblia kijtoua ke keman timoauiaj kemej yeskia techtokaj (Romanos 6:4; Colosenses 2:12). Keman aksa kipankalakiaj itech at, kemej yeskia momikilia porin kipata kemej achto nemia. Uan keman kisa de at peua nemi kemej uelis kiyolpaktis Dios.
¿Kijtoua Biblia ke moneki se kinauis pilimej?
Biblia amo tamachtia ke moneki se kinauis pilimej.b Sayoj ke kemaj tamachtia ke achto ke se moauis, moneki se kichiuas seki taman.
Yekinika moneki tikajsikamatiskej toni tamachtia itajtol Dios uan tikchiuaskej tein timomachtiskej. No moneki timoyolnojnotsaskej de totajtakoluan uan amo tikchiuaskejok tein amo kuali. Tiktataujtiskej Dios uan timotenkauaskej ke tikchiuaskej tein kineki (Hechos 2:38, 41; 8:12). Uan akin pilimej uan konemejok amo ueli kichiuaj nejon.
¿Toni kijtosneki maj se moaui itokaykopa toTajtsin, iKoneuj uan ichikaualis Dios?
Jesús kinauatij akin kitojtokayaj: “Xikinmachtikan [...] para maj nechtojtokakan. Xikinauikan itokaykopa toTajtsin, iKoneuj uan ichikaualis Dios” (Mateo 28:19, 20). Keman kijtoua timoauiskej itokaykopa kijtosneki ke akin moauia kiita ke totajtsin uan ikoneuj semi kipiaj tanauatil uan ueyichiuanimej uan no kimati toni tekit kichiua ichikaualis Dios. Keman tatitanil Pedro yaya kipajtiti se takat akin amo uelia yeknejnemia desde keman yolik kijtoj itokaykopa. Pedro kijtoj: “¡Itokaykopa Jesucristo akin kayot Nazaret, nimitsiluia xinejnemi!” (Hechos 3:6). ¿Keyej kikuik nejon tajtol? Porin kimatia ke Cristo kipia tanauatil uan ke yejua kichiuaskia milagro.
“ToTajtsin” yejua Jehová.c Yejua akin techchijchiuak, akin kichiua maj tiyoltokan uan akin kipia nochi chikaualis. Yejua ika Jehová kinamiki maj kiixyekana nochi (Génesis 17:1; Apocalipsis 4:11).
“Ikoneuj” yejua Jesucristo akin toka motemaktij (Romanos 6:23). Uelis timomakixtiskej komo tikajsikamatij toni kichiuak Jesús uan itech titakuaujtamatij. Dios kitemaktij Jesús para techpaleuis (Juan 14:6; 20:31; Hechos 4:8-12).
“Ichikaualis Dios” yejua chikaualis tein Dios kikui para kichiuas teisa.d Dios kikuik ichikaualis para tachijchiuas, para kichiuas maj tiyoltokan, para kinojnotsas itanauatijkauan uan okseki itekitikauan. No kikuik para maj kichiuakan tein yejua kinekia (Génesis 1:2; Job 33:4; Romanos 15:18, 19). Dios no kikuik ichikaualis para kiniluis itanemililuan seki takamej uan maj kijkuilokan itech Biblia (2 Pedro 1:21).
¿Se tajtakol komo oksepa se moauia?
Miakej kipataj inintaneltokalis. Sayoj ke komo aksa moauijya, ¿tajtakochiuaskia komo oksepa moauia itech okse religión? Miakej kijtoskia ke kemaj porin taman kemej kiajsikamatij Efesios 4:5. Ompa kijtoua: “Onkak sayoj se toTekotsin, sayoj se tamachtilis tein tinochin tikneltokaj uan sayoj se taman kemej timoauiaj”. Sayoj ke, nejin texto amo kijtosneki ke amo uelis oksepa moauis. ¿Keyej tikmatij nejon?
Toni ika tajtojtoya Pablo. Achto de Efesios 4:5, Pablo ika tajtojtoya ke moneki kuali se mouikas. Akin yekmelauj kichiuaj kemej Cristo moneki sayoj se taman kineltokaskej (Efesios 4:1-3, 16). Nochin uelis kuali mouikaskej komo kitakamatij toTekotsin Cristo Jesús uan komo sayoj se taman kineltokaj. Nejin kijtosneki ke sayoj se taman kemej kiajsikamatij tein tamachtia Biblia. Uan no uelis kuali mouikaskej komo nochi kichiuaj tein Biblia kijtoua maj kichiuakan akin kinekij moauiskej.
Tatitanil Pablo no kiniluij sekin akin moauijkajya maj oksepa moauianij, porin yejuan moauijkajya sayoj ke ayamo kiyekajsikamatiaj tein tamachtiaya Cristo (Hechos 19:1-5).
Kemej Dios kineki maj timoauikan. Para maj aksa moaui moneki kuali kiixmatis tein tamachtia Biblia, sayoj ijkon Dios kiyolpaktis tein kichiuak (1 Timoteo 2:3, 4). Komo aksa moauij sayoj ke amo kichiuak kemej tamachtia Biblia, Dios kiita ke amo kualtia tein kichiuak (Juan 4:23, 24). Xa akin moauij kinejnekia kichiuas, sayoj ke kichiuak keman ayamo yekmelauj kiajsikamatia tein Dios kineki (Romanos 10:2). Komo kineki kiyolpaktis Dios moneki kimatis tein yekmelauj tamachtia Biblia, kichiuas tein ompa kijtoua, kimaktilis Dios inemilis uan oksepa moauis. Komo ijkon kichiua amo tajtakolchiujtoskia, ta kichiujtoskia tein kuali.
Biblia ika tajtoua okseki taman kemej sekin moauiaj
Biblia ika tajtoua okseki taman kemej moauijkej sekin. Nejon semi taman katka kemej tein kichiuayaj itatojtokakauan Jesús keman kinpankalakiayaj itech at. Maj ika titajtokan sekin:
Kemej teauiaya Juan Bautista.e Sekin judíos uan akin mochiujka judíos yayaj kiitatij Juan para maj kinaui. Yejuan moauiayaj porin moyolpatakajya uan kinyolkokouaya maj amo kitakamatinij iTanauatil Moisés. Dios kinmakaka israelitas nejin Tanauatil itechkopa Moisés. Juan kinauiaya para maj nochin kimatikan akoni katka Mesías, Jesús akin kayot Nazaret uan para maj kiselikan tein tamachtiskia (Lucas 1:13-17; 3:2, 3; Hechos 19:4).
Keman Jesús moauij. Juan Bautista kiauij Jesús, sayoj ke keman yejua moauij kiixnextij okse taman. ¿Keyej? Porin Jesús amo katka tajtakolej uan amo tajtakolchiujtoya (1 Pedro 2:21, 22). Yejua ika, yejua amo moauij para maj Dios kitapojpolui nion para kitajtanis Dios maj amo teyi kiyolkuejmolo (1 Pedro 3:21). Ta keman yejua moauij kinextij ke kichiuaskia tein Dios kineki, mochiuaskia Mesías oso Cristo uan motemakaskia maj kimiktikan por tejuan (Hebreos 10:7-10).
Keman kinauiayaj ika ichikaualis Dios. Juan Bautista uan Jesucristo ika tajtojkej akin kinauiskiaj ika ichikaualis Dios (Mateo 3:11; Lucas 3:16; Hechos 1:1-5). Akin kinauiayaj ijkon, amo katka kemej akin kinauiayaj itokaykopa ichikaualis Dios (Mateo 28:19). ¿Keyej?
Sayoj sekin itatojtokakauan Jesucristo kinauiaj ika ichikaualis Dios. Akin ijkon kinauiaj, kinixpejpenkej ika ichikaualis Dios para maj yakan iluikak uan maj tekitikan iuan Cristo kemej tekiuanij uan tiopixkamejf (1 Pedro 1:3, 4; Apocalipsis 5:9, 10). Yejuan kinixyekanaskej miakej itatojtokakauan Jesús akin nemiskej nochipaya nikan taltikpak keman mochiuas se xochital (Mateo 5:5; Lucas 23:43).
Akin moauijkej iuan Cristo Jesús uan itech imikilis. Akin kinauiaj ika ichikaualis Dios no kinauiaj iuan Cristo Jesús (Romanos 6:3). Yejua ika sayoj ijkon kinauiaj itatojtokakauan Jesús akin Dios kinixpejpenak, akin iuan tekiuajtiskej ne iluikak. Keman ijkon kinauiaj pouij iuan Cristo Jesús. Yejua Jesús akin taixyekana itech inechikol kampa sayoj pouij taixpejpenalmej uan kemej yeskia itsontekon nejon nechikol. Uan akin Dios kinixpejpenak no pouij ompa uan kemej yeskia inakayo (1 Corintios 12:12, 13, 27; Colosenses 1:18).
Akin Dios kinixpejpenak no ‘moauiaj itech imikilis’ Jesús (Romanos 6:3, 4). Yejuan mochikauaj kichiuaskej ijkon kemej Jesús, kikauaj miak taman para kitekitiliskej Dios uan kitakamatiskej. Uan amo kichiaj nemiskej nochipaya nikan taltikpak. Yejuan kemej yeskia motamiauiaj keman momikiliaj uan oksepa nemij ne iluikak, uan mochiuaj kemej akin nemij ompa (Romanos 6:5; 1 Corintios 15:42-44).
Akin kinauiaj ika tit. Juan Bautista kijtoj: “Yejua [Jesús] namechauis ika ichikaualis Dios uan ika tit. Maaktok tein ika kiajkotamota tatok uan kitamichipauas trigo. Kiololos itrigo uan kitalis kampa kisentilia tatok, sayoj ke itajsolyo kitatis ika se tit tein amo ueli seui” (Mateo 3:11, 12). Nejin kinextia ke semi taman akin kinauiaj ika tit uan akin kinauiaj ika ichikaualis Dios. ¿Toni kijtosneki tein kijtoj Juan?
Trigo kinixnextia akin kikakij Jesús uan kitakamatij. Yejuan uelis kinauiskej ika ichikaualis Dios. Itajsolyo trigo kinixnextia akin amo kikakij Jesús. Yejuan kinauiskej ika tit, nejon kijtosneki ke kinixpoloskej (Mateo 3:7-12; Lucas 3:16, 17).
a Diccionario W. E. Vine (tein kitajtolkepak Guillermo Cook uan Santiago Escuain) kijtoua ke tajtol griego tein motajtolkepa kemej “se moauis” kijtosneki ke aksa, “mokalakia, kipankalakiaj uan kisa” den at. Kinextia ke aksa kisenkalakiaj itech at uan kikixtiaj.
b Seki taneltokalismej kinauiaj pilimej uan konemej keman kinkuatekiliaj at oso kinpijpisuiliaj. Kemansa no ompa kintokaytiaj.
c Jehová yejua itokay Dios (Salmo 83:18). Xikonita tamachtilis “¿Akoni Jehová?”.
d Xikonita tamachtilis “¿Toni ichikaualis Dios?”.
e Xikonita tamachtilis “¿Akoni katka Juan akin teauiaya?”.
f Xikonita tamachtilis “¿Akoni youij iluikak?”.
g Biblia no kikui tajtol itech español bautismo uan bautismos keman ika tajtoua teisa tein moneki kiakalakiskej para mochipauas. Miakpa kipankalakiayaj seki taman para maj Dios kinita ke chipaujkej (Marcos 7:4; Hebreos 9:10). Nejin semi taman ke tein kichiuak Jesús uan itatojtokakauan keman moauijkej.