¿Toni llaves tein ika tatapoui itech iTaixyekanalis Dios?
Tein kijtoua Biblia
Llaves den itaixyekanalis Dios kiixnextia tanauatil tein aksa kipia para uelis kintatapouilis oksekin para maj kalakikan itech “iTaixyekanalis Dios tein moajsi iluikak” (Mateo 16:19; Hechos 14:22).a Jesús kimakak Pedro “llaves tein ika tatapoui itech iTaixyekanalis Dios tein moajsi iluikak”. Nejon kijtosnekik ke Pedro kimakakej tanauatil para kinextis akonimej kalakiskiaj itech iTaixyekanalis Dios. Akin kalakiskiaj monekia takuaujtamatiskej iuan Dios uan kiseliskiaj ichikaualis.
¿Akoni ueliskia kinpaleuis Pedro keman kikuiskia nejon llaves?
Dios kimakak Pedro tanauatil para kinpaleuis eyi grupos maj kalakikan itech itaixyekanalis Dios:
Akin katkaj judíos uan akin mochiujkaj judíos. Tepitsin satepan ke Cristo momikilij, Pedro kiniluij miakej judíos uan akin mochiujkaj judíos maj kineltokakan katka Tekiuaj akin Dios kiixtalijka para tekiuajtis itech itaixyekanalis Dios. Uan no, kiniluij toni monekia kichiuaskej para momakixtiskej. Ijkon kemej yeskia kintatapouilij para maj uelikan kalakikan itech iTaixyekanalis Dios. Tel miakej kichiujkej tein Pedro kijtoj (Hechos 2:38-41).
Akin katkaj samaritanos. Satepan Pedro kititankej iniuan samaritanos uan oksepa kikuik semej llaves tein ika tatapoui itech iTaixyekanalis Dios.b Kikuik nejon llave keman Juan uan yejua “motataujtijkej para maj Dios kinmakani ichikaualis akin nemiaj Samaria” (Hechos 8:14-17). Nejin kinpaleuij maj kalakikan itech iTaixyekanalis Dios.
Akin amo katkaj judíos. Kemej eyi xiuit satepan ke Jesús momikilij, Dios kinextilij Pedro ke akin amo katkaj judíos no ueliskiaj kalakiskej itech iTaixyekanalis Dios. Yejua ika Pedro kikuik okse llave para kinmachtis iTajtol Dios akin amo katkaj judíos. Ijkon kemej yeskia kintatapouilij para maj kiselikan ichikaualis Dios, para maj mochiuakan itatojtokakauan Jesús uan maj uelikan pouikan itech itaixyekanalis Dios (Hechos 10:30-35, 44, 45).
¿Toni kijtosneki kalakiskej itech iTaixyekanalis Dios?
Akin kalakiskej itech iTaixyekanalis Dios tein moajsi iluikak tekiuajtiskej iuan Jesús. Biblia kijtoj ke “motaliskej itech uejueyi sillas” uan “ualtaixyekanaskej kemej tekiuanij nikan taltikpak” (Lucas 22:29, 30; Apocalipsis 5:9, 10).
Tein miakej kineltokaj den llaves tein ika tatapoui iTaixyekanalis Dios
Tein sekin kinemiliaj: Pedro kiixejekoua akoni kalaki iluikak.
Tein Biblia tamachtia: Biblia kijtoua ke yejua Jesucristo, uan amo Pedro, akin “kiixtalis tein kinnamiki kiseliskej akin yoltokej uan akin momikilijkejya” (2 Timoteo 4:1, 8; Juan 5:22). Pedro kijtoj ke yejua Jesús “akin Dios kiixtalij kemej ininjuez akin yoltokej uan akin momikilijkejya” (Hechos 10:34, 42).
Tein sekin kinemiliaj: Akin nemij ne iluikak kichixtoyaj kemanian Pedro kiixtaliskia kikuis llaves den iTaixyekanalis Dios.
Tein Biblia tamachtia: Keman Jesús kimakak Pedro llaves tein ika tatapoui itech iTaixyekanalis Dios, no kiluij: “Tein yeski taman tein tikilpis nikan taltikpak, no ilpitosya ne iluikak, uan tein yeski taman tein tiktojtomas nikan taltikpak, no tojtontosya ne iluikak” (Mateo 16:19). Keman miakej kilerouaj nejin tajtolmej itech ininBiblia kinemiliaj ke tein Pedro kiixtaliskia no yejua tein mochiuaskia ne iluikak. Sayoj ke, kemej ijkuiliujtok nejin texto itech tajtol griego, kiteajsikamatiltia ke tein Pedro kiixtaliskia ipa ixyetoyaya ne iluikak.
Uan no, itech okseki textos kijtoua ke Pedro kichiuak tein Dios kinauatij para kikuis llaves tein ika tatapoui itaixyekanalis Dios. Ijkon kichiuak keman kikuik expatika llave, kitakamatik tein Dios kiluij maj kichiua (Hechos 10:19, 20).
a Itech Biblia kemansa mokui tajtol llave para kinextis ke aksa kimakaj se tekit uan tanauatil (Isaías 22:20-22; Apocalipsis 3:7, 8).
b Kemej taueyichiuayaj samaritanos semi taman katka ke kemej taueyichiuaj judíos, sayoj ke tamachtiayaj uan kichiuayaj seki taman tein kijtouaya iTanauatil Moisés.