¿Keyej momikilij Jesús?
Tein Biblia kijtoua
Jesús momikilij para maj Dios ueli techtapojpolui totajtakoluan uan para uelis tinemiskej nochipaya (Romanos 6:23; Efesios 1:7). Uan no kemej Jesús amo keman kikauak Dios, kinextij ke tinochin uelis amo no tikauaskej Dios maski titajyouiskej uan tikpanoskej miak ouijkayomej (Hebreos 4:15).
¿Keniuj imikilis Jesús ueli kichiua nochi nejin? Maj tikitakan.
Jesús momikilij para maj ueli “techtapojpoluilikan totajtakoluan” (Colosenses 1:14).
Dios kichijchiuak Adán —yekinika takat— akin amo kipiaya tajtakol. Sayoj ke yejua amo kitakamatik Dios, uan tajtakolchiuak. Ika nejin kinijtakoj nochin ikoneuan. Biblia kijtoua ke timotajtakolmakakej porin Adán amo tatakamatik (Romanos 5:19).
Jesús amo no kipiaya tajtakol, sayoj ke yejua nochipa tatakamatik. Yejua ika uelik kitemakak inemilis “para techkixtilis totajtakoluan” (1 Juan 2:2). Ueliskia tikijtoskej ke kemej Adán amo tatakamatik techpanoltilij se taman tein tel amo kuali: tajtakol. Sayoj ke, kemej Jesús toka momikilij ueli techkixtilia totajtakoluan komo iuan titakuaujtamatij.
Kemej Adán techtemakak itech tajtakol, Jesús motemakak maj kimiktikan para ijkon ueliskia techmakixtis. Yejua ika, “komo aksa kichiua se tajtakol, tikpiaj se akin techpaleuia akin yetok iuan toTajtsin: Jesucristo, se akin yolmelauak iixpan Dios” (1 Juan 2:1).
Jesús momikilij para maj “akin itech takuaujtamatis amo ixpoliuis, ta nemis nochipaya” (Juan 3:16).
Adán kichijchiujkaj kemej ueliskia nemis nochipaya, sayoj ke kemej tajtakoj momikilij. Ika tein Adán kichiuak “tajtakol kalakik nikan taltikpak [...] uan tajtakol kichiuak maj se miki, uan ijkon nochin momikilijtiajkej, porin nochin motajtakolmakakej” (Romanos 5:12).
Sayoj ke, kemej Jesús toka momikilij techmakixtia den tajtakol uan mikilis komo iuan titakuaujtamatij. Biblia kijtoua ke maski “tajtakol uan mikilis taixyekanaj kemej tekiuanij. No ijkon, itatiochiualis Dios tein amo technamiki” taixyekanas “para maj Dios kinita miakej ke yolmelaujkej para maj uelikan nemikan nochipaya itechkopa toTekotsin Jesucristo” (Romanos 5:21).
Maski axkan ayamo akin nemi nochipaya, Dios motenkauani ke akin kichiuaj tein kuali nemiskej nochipaya. Uan no ke, mikemej oksepa nemiskej porin inemilis Jesús tein kitemakak no kinpaleuia (Salmo 37:29; 1 Corintios 15:22).
Kemej Jesús nochipa “tatakamatik hasta keman momikilij”, kinextij ke tinochin uelis amo tikauaskej Dios maski tikpanoskej ouijkayomej (Filipenses 2:8).
Inakayo uan itanemilil Adán chipaujkej katkaj. Sayoj ke, Adán kinejnekik tein amo kinamikia yejua ika amo kitakamatikok uan kiixnamikik Dios (Génesis 2:16, 17; 3:6). Satepan, Satanás akin no kiixnamikik Dios kijto ke akin kitakamatiskiaj Dios kichiuaskiaj sayoj porin kiseliskiaj teisa tein kuali uan amo porin kitasojtaj. Uan okachi amo kitakamatiskiaj komo ueliskia kipoloskej ininnemilis (Job 2:4). Sayoj ke, Jesús, akin amo tajtakolej, nochipa kitakamatik Dios uan amo keman kikauak maski tel tajyouij uan momikilij (Hebreos 7:26). Ika tein kichiuak kinextij ke se aksa kemaj uelis kitakamatis Dios uan amo kikauas maski tajyouis uan kipanos ouijkayomej.
Tein timotajtaniaj de imikilis Jesús
¿Keyej monekia tajyouis uan momikilis Jesús para techmakixtis? ¿Amo ueliskia maj sayoj Dios techkixtiliani mikilis?
Biblia kijtoua ke “tajtakol [tikixtauaj] ika mikilis” (Romanos 6:23). Uan Adán kuali kimatia nejin porin Dios kiluijka (Génesis 3:3). Keman Adán tajtakoj, Dios akin —“amo ueli takajkayaua”— kichiuak tein kijtojka (Tito 1:2). Ijkon, Adán kinpanoltilij nochin ikoneuan tajtakol uan no mikilis.
Kemej tinochin titajtakolejkej technamikia maj timomikilikan, sayoj ke Dios technextilia itatiochiualis tein amo technamiki (Efesios 1:7). Dios kiixtalij techmakixtis —yejua ika kiualtitanik iKonetsin para maj toka momikili— ika nejin kinextij ke semi techtasojta uan techiknelia.
¿Kemanian momikilij Jesús?
Biblia kijtoua ke Jesús momikilij kemej eyi hora tiotak itech tonal keman judíos kichiuayaj Pascua (Marcos 15:33-37, nota). Komo tiktemouaj itech calendario tein axkan tikuij para tikmatiskej kemanian panok, tiajsij itech 1 de abril den xiuit 33 itech totonaluan.
¿Kani momikilij Jesús?
Jesús kimiktijkej “kampa motanotsa Miketsontekomatan, tein itech tajtol hebreo monotsa Gólgota” (Juan 19:17, 18). Gólgota moajsia kalampa de Jerusalén keman Jesús nemia (Hebreos 13:12). Xa moajsia itech se loma, porin Biblia kijtoua ke keman Jesús kimiktijkej miakej uelik kiuejkaitakej (Marcos 15:40). Sayoj ke axkan amo moyekmati kani moajsia Gólgota.
¿Keniuj momikilij Jesús?
Miakej kinemiliaj ke Jesús momikilij itech se cruz, sayoj ke Biblia kijtoua ke Jesús “kiuikak totajtakoluan itech inakayo keman kikoujpampilojkej” (1 Pedro 2:24). Akin kijkuilojkej Biblia kikuikej nejin ome tajtolmej itech griego: staurós uan xýlon para kijtoskej toni ika kipilojkej Jesús keman kimiktijkej. Miakej motelmachtianij kiitanij ke nejin ome tajtolmej kijtosnekij se poste de kouit, uan amo se cruz.
¿Keniuj moneki tikelnamikiskej imikilis Jesús?
Xijxiujtika judíos kichiuayaj se iluit tein monotsaya Pascua, nejon youak Jesús kinsentilij itatitaniluan uan kinnextilij keniuj monekiskia kielnamikiskej imikilis. Kinmakak nejin tanauatil: “Xiksentokakan xikchiujtokan nejin uan ika xinechelnamikikan” (1 Corintios 11:24). Uan sayoj seki horas satepan , kimiktijkej Jesús.
Akin kijkuilojkej Biblia kijtojkej ke Jesús tamatia kemej ichkatsin tein kitemaktiayaj itech Pascua (1 Corintios 5:7). Pascua kinelnamiktiaya israelitas keman katkaj takeualmej uan kinmakixtijkej. No ijkon keman akin kichiuaj kemej Cristo kielnamikij imikilis Jesús, kinelnamiktia ke kinmakixtij den tajtakol uan mikilis. Judíos kichiuayaj Pascua xijxiujtika itech tonal 14 de nisán (nejin metsti pouia itech calendario lunar tein kikuiaj judíos), uan yekinika imomachtijkauan Jesús xijxiujtika no kielnamikiaj imikilis.
Uan hasta axkan itech nochi taltikpak tel miakej kielnamikij imikilis Jesús tonal 14 de nisán sayoj ke itech calendario tein axkan tikuij .