¿Toni moneki tikchiuaskej para tinemiskej nochipaya?

Tein Biblia kijtoua

Biblia kijtoua ke: “Akin kichiua tein Dios kineki, nemis nochipaya” (1 Juan 2:17). Sayoj ke ¿toni kineki Dios maj tikchiuakan?

• Dios kineki maj tikixmatikan yejuatsin uan no iKonetsin, Jesucristo. Itech se netataujtil Jesús kijtoj: “Para nemiskej nochipaya moneki mitsixmatiskej tejua, akin yekmelauj tiDios, uan no moneki kiixmatiskej akin tikualtitanik, Jesucristo” (Juan 17:3). ¿Toni kijtosneki se kiixmatis Dios uan Jesús? Uelis tikinixmatiskej komo timomachtiaj Biblia uan komo timochikauaj tikchiuaskej tein ompa timomachtiaj.a Itech Biblia uelis tikmatiskej keniuj tanemilia Jehová, toTachijchiujkauj, uan akin kichiua maj tiyoltokan (Hechos 17:24, 25). Itech Biblia no ika tajtoua Jesús iKonetsin Dios, tein tamachtij “kichiua maj se nemi nochipaya” (Juan 6:67-69).

• Dios kineki maj titakuaujtamatikan ke Jesús toka momikilij. Jesús ualaj nikan taltikpak para kinpaleuis oksekin uan kitemakas inemilis uan ijkon techmakixtis (Mateo 20:28). Tein Jesús toka kichiuak techpaleuia tinochin para uelis tikchiaskej tinemiskej itech se kualtsin xochital nikan taltikpakb (Salmo 37:29). Jesús kijtoj: “Porin Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya” (Juan 3:16). Amo sayoj moneki tikneltokaskej Jesús, ta moneki tikchiuaskej tein yejua tamachtij uan tein iTajtsin kineki, ijkon tiknextiskej ke titakuaujtamatij iniuan (Mateo 7:21; Santiago 2:17).

• Dios kineki maj kuali timouikakan iuan. Kineki maj iuan timotokikan uan maj kuali iuan timouikakan (Santiago 2:23; 4:8). Dios nochipa nemini uan amo keman momikilis. Yejua ika kineki maj akin kuali iuan mouikaj nemikan nochipaya. Itech itajtol, Dios techiluia ke kineki maj nochin akin iuan motokiaj kichiakan nemiskej nochipaya (Salmo 22:26).

Tein sekin kineltokaj de nemilis nochipaya uan amo melauj

Tein sekin kinemiliaj: Se nemis nochipaya amo teyolpaktis.

Tein melauj: Kemej Dios semi techtasojta uan kineki maj tiyolpakikan motenkaua ke uelis tinemiskej nochipaya (Santiago 1:17; 1 Juan 4:8). Yejuatsin kimati toni uelis tikchiuaskej tein techpaleuis maj tiyolpakikan uan tein kichiuas maj kuali timomachilikan (Eclesiastés 3:12). Dios motenkaua ke akin nemiskej nochipaya nikan taltikpak kipiaskej se tekit tein semi kiuelitaskej porin kinpaleuis maj kuali yetokan yejuan uan no akin kintasojtaj (Isaías 65:22, 23).

Uan no, akin nemiskej nochipaya kisentokaskej kiixmatiskej miak taman de toTachijchiujkauj uan nochi tein kichijchiuani. Dios techchijchiuak maj tiknejnekikan tinemiskej nochipaya uan no maj tikixmatikan. Maski ijkon amo keman uelis senkis tikajsikamatiskej nochi tein kichijchiuani “Dios akin melauak” (Eclesiastés 3:10, 11). Yejua ika, akin nemiskej nochipaya kipiaskej tein kichiuaskej uan momachtiskej miak taman tein kualtsin.