Motajtolkepa ueyi nechikol tein uejkaua eyi tonal xiuit 2020 “¡Maj nochipa tiyolpakikan!”

Itech xiuit 2020, metsti julio uan agosto, itaixpantijkauan Jehová itech nochi taltikpak kisenitaskej ueyi nechikol tein uejkaua eyi tonal, nejin amo keman ijkon mochiujtoya. Yejua ika, monekia maj uejueyi nechikolmej motajtolkepakan itech panoua 500 tataman tajtolmej. Para mochiuas se tekit kemej nejin moneki uejkauas se xiuit oso okachi. Sayoj ke, kemej onkatok kokolis coronavirus, akin kitajtolkepkej ueyi nechikol 2020 tein motokaytia “¡Maj nochipa tiyolpakikan!” uejkaujkej kitajtolkepaskej sayoj naui metsti.

Tokniuan akin tekitij itech Departamento Mundial de Compras, uan Tokniuan akin kinpaleuiaj akin kitajtolkepaj amaixmej itech kali kampa techixyekanaj, mosenpaleuijkej para maj mochiua nejin ueyi tekit. Akin kinpaleuiaj tajtolkepanij kiitakej ke miakej tokniuan akin tajtolkepaj kinpolouaya seki taman para kichiuaskej nejin tekit, uan okachiok micrófonos tein okachi kuajkuali. Tokniuan akin tekitij itech Departamento Mundial de Compras kinkoujkej 1,000 micrófonos uan kintitankej kemej itech 200 tataman xolalmej.

Kemej sepasaj kinkoujkej miakej micrófonos okachi amo patiojkej kiskej, kintitankej itech se xolal, uan ompa kinxejxelojkej itech tataman altepemej. Kemej ijkon kinkoujkej, sejse micrófono kisak itech 170 dólares, uan amo okachiok taxtaujkej para kintitaniskej. Nejin tapaleuij para maj amo mosenkui tomin uan maj mokaua panoua 20%.

Tokniuan akin tekitij itech Departamento Mundial de Compras kinkoujkej micrófonos uan kintitankej itech metsti abril uan mayo xiuit 2020, itech nejon tonalmej miakej akin tanamakayaj amo tekititoyaj kemej ipa, porin semi mochiujtoya kokolis COVID-19. Sayoj ke, itamian metsti mayo, itech kalmej kampa motajtolkepaj amaixmej, sucursales uan okseko kampa no tajtolkepaj kipiayajya tein monekia.

Jay Swinney, akin kiixyekana Departamento Mundial de Compras, kijtoua: “Tokniuan akin tekitij Betel uan tanamakanij, kuali sentekitikej keman mochiujtoya nejin tekit. Uelik tikchiujkej ijsiujka nochi nejin tekit uan kuali tikuikej tomin tein kitemakaj sayoj porin techpaleuij ichikaualis Jehová”.

Nicholas Ahladis, akin kinpaleuia akin kitajtolkepaj amaixmej, kijtoua: “Tokniuan takepanij akin amo ueliaj kisayaj, semi yolpakkej keman kinmakakej ininmicrófonos. Maski amo uelia senyetoyaj iniuan oksekin, uelik mosenpaleuijkej para takepaskej uan kichiuaskej grabación de tanojnotsmej, videos uan nekuikatilmej itech panoua 500 tataman tajtolmej”.

Nejin tekit semej de nochin tekimej tein mochiujkej itech 2020 para tikpiaskej toueyi nechikol tein uejkaua eyi tonal “¡Maj tiyolpakikan nochipa!”. Nochi nejin uelik mokouak porin namejuan nantapaleuijkej ika namotomin itech donate.jw.org uan kemej ipa nankichiuanij.