Miércoles 3 metsti septiembre
José […] kichiuak tein iángel Jehová kinauatij uan monamiktij iuan María (Mat. 1:24).
José mokauaya maj Jehová kiixyekana uan nejon kipaleuiaya maj mochiua okachi kuali tetakauj. Kemej expa Jehová kinauatij toni monekia kichiuas para kinyekpias ichankauan. Uan niman kichiuak maski ouij kikisak (Mat. 1:20; 2:13-15, 19-21). Kemej kitakamatik Jehová, José uelik kiyekpiak María para maj amo teyi kipanouani. Xa nejon kichiuak maj María okachi kitasojtani uan maj kipoujkaitani. Namejuan tetakauan, no uelis nankichiuaskej kemej José uan nankitemoskej tayolmajxitilismej itech Biblia tein namechpaleuis xikinyekpiakan namochankauan. Komo nankichiuaj nejin maski monekis nankipataskej seki taman, nankinextiskej ke nankitasojtaj namosiuatsin uan okachi kuali namouikaskej. Se tokniuj siuat akin kayot Vanuatu uan panoua 20 xiujmejya ke monamiktij, kijtoua: “Keman nikita ke notakatsin kitemoua maj kiixyekana Jehová uan kichiua tein yejuatsin tanauatia, okachi nikpoujkaita. Kuali nimomachilia uan nitakuaujtamati itech tein kiixtalia kichiuas”. w23.05 21 § 5
Jueves 4 metsti septiembre
Ompa yetos se ojti, kemaj, se ojti tein motokaytia Ojti tein Chipauak (Is. 35:8).
Judíos akin mokepaskiaj monekiaj yeskij “se xolal chipauak” iixpan ininDios (Deut. 7:6). Sayoj ke amo nochin akin kisayaj de Babilonia kichiujtoyaj tein kuali, uan monekia mopataskej para kiyolpaktiskej Jehová. Miakej judíos yolkaj ompa Babilonia, uan nesi ke no peuak tanemiliaj uan nemiaj ijkon kemej babilonios. 69 xiujmej satepan ke judíos mokepkej Israel, tekiuaj Nehemías semi kimoujkaitak maj ininkoneuan nejon judíos amo tajtouanij hebreo (Deut. 6:6, 7; Neh. 13:23, 24). ¿Keniuj kitasojtaskiaj Jehová uan kiueyichiuaskiaj komo amo kiajsikamatiaj tajtol hebreo tein ika moijkuiloj iTajtol Dios? (Esd. 10:3, 44). Yejua ika judíos monekia kipataskej miak taman, sayoj ke okachi amo ouij kinkisaskia keman yetoskiaj Israel, kampa oksepa kiueyichiujtoyaj Jehová kemej yejuatsin kiyolpaktiaya (Neh. 8:8, 9). w23.05 15 § 6, 7
Viernes 5 metsti septiembre
Jehová kinpaleuia nochin akin uetsisnekij uan kinchikaua nochin akin amo kipiaj chikaualis (Sal. 145:14.
Tein melauj, maski tiknejnekiskej tikchiuaskej tein tikixtalijkej, uelis panos teisa tein techtsakuilis. Xa techpanos ‘tein amo tikchiaj’ yejua ika amo tikpiaskejok tiempo para tikchiuaskej tein tikixtalijkaj (Ecl. 9:11). Oso tikpiaskej ouijkayomej uan amo tiknekiskejok tikchiuaskej tein tikixtalijkaj uan amo tiueliskejok (Prov. 24:10). Uan no, kemej titajtakolejkej timopolouaj, uan nejon xa uelis kichiuas maj okachi ouij techkisa tikchiuaskej tein tikixtalijkej (Rom. 7:23). Oso xa sayoj tisioujtokej (Mat. 26:43). ¿Toni techpaleuis maj amo timosenkauakan? Xikonelnamiki ke komo ayamo tikonchiua teisa, amo kijtosneki ke amo tionuelisok. Biblia kijtoua ke xa ipa tikpanoskej miak taman ouijkayomej. Sayoj ke no techiluia maj tiuelikan tikchiuakan tein tikixtalijtokej. Keman tiksentokaj tikchiuaj tein tikixtalijkej maski tikpiaj ouijkayomej, tiknextiliaj Jehová ke tiknekij tikyolpaktiskej. Yejuatsin semi yolpaki keman mitsonita ke tionmochikaua tikonchiuas tein tikonixtalijtok. w23.05 30 § 14, 15