¿No ijkon tiontanemilia? Xa tikonixtalijka tikonixtajtoltis Biblia, sayoj ke teisa mitsontsakuilij. Miakej, ijkuak kinemiliaj kiixtajtoltiskej Biblia kiitaj ke semi ouij. Sayoj ke ¿ijkon tikonnemiliskia komo tikonmatiskia ke tein kijtoua Biblia uelis mitsonpaleuis xionyolpaki itech monemilis? ¿Uan komo tikonmatiskia ke onkak okseki taman tein mitsonpaleuis maj mitsonyolnotsa tikonixtajtoltis? ¿Tikonuelitaskia tikonmatis keniuj Biblia uelis mitsonpaleuis?

Xikonita tein kijtojkej sekin akin peujkej kiixtajtoltiaj Biblia uan kiitakej keniuj kinpaleuij.

Ezekiel, akin kipia panoua 20 xiujmej, kijtoua: “Achto nikatka kemej akin amo kimatij toni kichiuaskej ika ininnemilis, sayoj ke nikixtajtoltis Biblia nechpaleuiani maj nikmati toni nikchiuas ika nonemilis. Kipia tayolmajxitilismej tein mojmostaj semi tapaleuiaj”.

Frieda, akin no kipia kemej veinte xiujmej, kimelaua: “Nejua nikualania ika tein yeski taman, sayoj ke tein nikixtajtoltijtok itech Biblia, nechpaleuiani maj ueli niktsakuili nokualanyo. Amo semiok nikualani uan axkan okachi kuali nimouika iniuan oksekin”.

Se siuat akin kipia panoua 50 xiujmej, akin itokay Eunice kijtoua: “Nechpaleuijtok maj okachi niknexti tein kuali uan maj nikpata seki taman tein nikchiua tein amo semi nechpaleuia”.

Tikonixtajtoltis Biblia uelis mitsonpaleuis okachi xionyolpaki itech monemilis, ijkon kemej kinpaleuij akin ininka titajtojkejya uan oksekin tel miakej millones (Isaías 48:17, 18). No uelis mitsonpaleuis kuali xiontaixejeko, kuali xikonixpejpena akoni kuali iniuan tionmouikas, amo senkis xionmotekipacho uan tein okachi moneki, xikonixmati akoni toTachijchiujkauj. Tayolmajxitilismej tein kipia Biblia, Dios kitemaka, yejua ika nochipa techpaleuis komo tikchiuaj tein kijtoua. Yejuatsin nochipa kuali techyolmajxitia.

Tein moneki yejua se peuas. Itech okseki tamachtilismej tikonajsis tayolmajxitilismej tein mitsonpaleuiskej xionpeua xikonixtajtolti Biblia uan maj mitsonyolpakti tikonchiuas.

¿Keniuj uelis tikonixtajtoltis Biblia kemej mitsonyolpaktis uan kemej okachi mitsonpaleuis? Xikonita makuil tayolmajxitilismej tein kinpaleuiani miakej akin kiixtajtoltiaj Biblia.

Xikontemo kampa kuali tiontaixtajtoltis. Xikontemo kampa amo teyi mitsontapololtis, kampa onkas kuali tanex uan kampa amo semi tatsaktos, nejon mitsonpaleuis okachi kuali xikonixtajtolti Biblia.

Xiontaixtajtolti ika se kuali tanemilil. Biblia se netetayokolil tein toueyiTajtsin techmaka. Komo tikonneki maj senkis mitsonpaleui keman tikonixtajtoltis, moneki tikonchiuas ijkon kemej se konetsin kichiua ijkuak kinejmachkaki tein ipopaj kimachtia. Amo xikonkaua maj nion se tanemilil tein amo tapaleuia, kitsakuili maj Dios mitsonmachti (Salmo 25:4).

Xionmotataujti achto ke tionpeuas. Biblia kipia itanemililuan Dios, yejua ika moneki maj techpaleui maj tikajsikamatikan. Yejuatsin motenkaua ke kinmakas iespíritu akin kitajtaniaj (Lucas 11:13). Iyektikatsin espíritu uelis mitsonpaleuis xikonajsikamati keniuj tanemilia toTachijchiujkauj. Uan ijkon kemej panoskej tonalmej tikonajsikamatis hasta “in tamachilisme den kachi ouijke” (1 Corintios 2:10).

Xikonajsikamati tein tikonixtajtoltia. Amo sayoj xiontaixtajtolti. Keman tikonixtajtoltijtos Biblia, xiontanemili itech tein tikonixtajtoltijtok. Xionmotajtani: “¿Toni taman tein kuali kinextij akin ika tajtoua nejin tajkuilol? ¿Keniuj uelis nikchiuas tein nimomachtijtok?”.

Xikonixtali tionmomachtis. Komo tikonneki maj mitsonyolpakti tein tikonixtajtoltia itech Biblia moneki tionmochikauas tionmomachtis teisa tein mitsonpaleuis itech monemilis. Uelis tikonixtalis okachi tikonixmatis Dios, okachi tikonnextis tein kuali, tionmochiuas okachi kuali takat akin namikej oso okachi kuali siuat akin namikej uan okseki tamanok. Satepan xikonixpejpena tajkuilolmej itech Biblia tein mitsonpaleuiskej ijkon xikonchiua.a

Nejin makuil tayolmajxitilismej mitsonpaleuiskej xionpeua, sayoj ke ¿toni mitsonpaleuis maj okachi mitsonyolnotsa tein tikonixtajtoltia itech Biblia? Itech okse tamachtilis tikitaskej.

Kemej tikonita Biblia ijkuak tikonixtajtoltia uelis kichiuas maj mitsonyolnotsa oso amo. Maj tikitakan seki taman tein mitsonpaleuis maj mitsonyolnotsa tikonixtajtoltis Biblia.

Xikonixpejpena se Biblia tein kuali kitajtolkepkej uan tein kipia tajtolmej tein axkan mokuij. Komo keman tikonixtajtoltia tikonajsi miak tajtolmej tein amo tikonajsikamati oso tein amo mokuijok, uelis kichiuas maj amo mitsonyolpakti tikonixtajtoltis. Yejua ika, xikontemo se Biblia tein kikui tajtolmej tein amo ouij moajsikamatij uan tein ajsis itech moyolo. Uan no moneki maj ajsito uan maj takuaujtamach.a

Xikonkui tein yankuik kisani. Axkan, Biblia amo sayoj moajsi itech amat ta no itech tataman teposmej. Uelis tikonixtajtoltis itech Internet oso tikontemouis itech se computadora, tableta oso teléfono. Seki teposmej kipiaj tein mitsonpaleuis xikonita keniuj kitajtolkepanij se versículo itech okseki Biblias oso keniuj mouika iuan okseki tajkuilolmej. Uan komo tikonneki tikonkakis, no moajsi ika audio. Miakej kiuelitaj kikakiskej keman youij itech tepos ijkuak tekititij, keman tapaktokej oso kichiuaj okse taman tein amo ouij. ¿Katiyejua okachi mitsonpaleuia? ¿Keyej amo tikonyejyekoua semej?

Xikontemo okachi. Amatajkuilolmej tein kimelauaj okachi tein kijtoua Biblia mitsonpaleuiskej okachi xikonajsikamati tein tikonixtajtoltia. Ompa tikonajsis mapas tein kinextiaj talmej uan xolalmej tein ininka tajtoua Biblia nejin mapas mitsonpaleuiskej xikonnemili tein panok ompa. Uan no, seki tamachtilismej tein kisani itech nejin amaix uan itech taxelol “Enseñanzas bíblicas” tein moajsi itech jw.org, Internet kampa timoteixmatiltiaj mitsonpaleuiskej xikonajsikamati miak tajkuilolmej tein kipia Biblia.

Xikonpata kemej tikonixtajtoltia. Komo tikonita ke semi ouij tikonixtajtoltis Biblia kampa peua hasta kampa tami, xionpeua kampa mitsonyolnotsas. Komo tikonneki okachi tikonixmatis aksa akin Biblia semi ika tajtoua, uelis tikonixtajtoltis tein kichiuak itech inemilis. Recuadro “Xikonixmati akin ininka tajtoua Biblia” uelis mitsonpaleuis komo tikonneki tikonixmatis semej akin ika motajtoua. No uelis tikonixtajtoltis sejse tamachtilis tein kipia Biblia oso ijkon kemej moijkuilojtiyajkej. ¿Keyej amo tikonyejyekoua semej?

Biblia amo kemej okseki amatajkuilolmej. Ompa tikajsij tein techyolmajxitia toTachijchiujkauj (2 Timoteo 3:16). Tein kijtoua uelis semi mitsonpaleuis. Tein melauj, Biblia kiyekijtoua: “In Tajtoltsin de Dios kipia uelilis uan kitemaka nemilis” (Hebreos 4:12). Nejin amatajkuilol uelis mitsonpaleuis itech ome taman: yekinika ika tayolmajxitilismej tein mitsonpaleuiskej mojmostaj uan ojpatika tikonixmatis Dios uan tein motenkaua (1 Timoteo 4:8; Santiago 4:8).

Temaka tayolmajxitilismej tein tapaleuiaj mojmostaj. Biblia tayolmajxitia itech seki taman tein senkis mouika iuan se inemilis uan itech okseki taman.

• Keniuj se mouikas iniuan oksekin (Efesios 4:31, 32; 5:22, 25, 28, 33).

• Keniuj se paktos uan kuali se momachilis (Salmo 37:8; Proverbios 17:22).

• Keniuj se chipaujkanemis (1 Corintios 6:9, 10).

• Keniuj se kiitas tomin (Proverbios 10:4; 28:19; Efesios 4:28).a

Ompa Asia, se telpoch uan se ichpoch akin yekin monamiktijkaj kiitakej keniuj tel tapaleuia tein Biblia tayolmajxitia. Ijkon kemej miakej akin yekin monamiktiaj, kinouijmakak momatiskej sennemiskej uan kuali monojnotsaskej. Sayoj ke peujkej kichiuaj tein kiixtajtoltiaj itech Biblia. ¿Keniuj kinpaleuij? Vicent, takat akin namikej, kimelaua: “Tein nikixtajtoltij itech Biblia nechpaleuij maj nikmelaua ika netasojtalis ouijkayomej tein se kipia kemej namikuanij. Tikchiuaskej tein tayolmajxitia Biblia kichiuani maj tiyolpakikan”. Inamik, Annalou, no ijkon kijtoua: “Tikixtajtoltiskej tein kichiujkej akin ininka tajtoua Biblia techtelpaleuij. Axkan niyolpaki uan no nechyolpaktia tein tikixtalijtokej tiksenchiuaskej”.

Tapaleuia maj se kiixmati Dios. Vicent kijtoua ke Biblia amo sayoj kipaleuiani itech inenamiktilis, ta no kijtoua: “Nikixtajtoltis Biblia, nechpaleuiani maj okachi nimotoki iuan Jiova kemej amo keman nikchiuani”. Tein kijtoj kinextia se taman tein motelneki: Biblia uelis mitsonpaleuis okachi xikonixmati Dios. Ijkon amo sayoj mitsonpaleuis tein tayolmajxitia, ta no kuali iuan tionmouikas. Uan tikonitas ke iTajtol kijtoua ke tikseliskej tein kuali satepan, kampa uelis senkis tiyolpakiskej nochipaya (1 Timoteo 6:19). Nejon se taman tein nion se amatajkuilol uelis kitemakas.

Komo tionpeua tikonixtajtoltia Biblia uan tikonchiua mojmostaj, tejuatsin no uelis okachi kuali tionnemis axkan uan okachi kuali tikonixmatis Dios. Sayoj ke, keman tikonixtajtoltis xa uelis tikonpias miak netajtanilmej. Keman ijkon mitsonpanos, xikonelnamiki tein kichiuak ueyichiujkej etíope akin nemik panoua ome mil xiuit achto. Nejin takat kipiaya miak netajtanilmej ika tein kiixtajtoltij itech tajkuilolmej. Felipe, se imomachtijkauj Jesús, kitajtanij ox kiajsikamatia tein kiixtajtoltijtoya uan yejua kinankilij: “¿Kenin uelis nikajsikamatis? Ta, amo aken nechyekmejmelauilia”.b Ompa kikauak maj kipaleuiani Felipe akin katka se kuali tamachtijkej (Hechos 8:30, 31, 34). No ijkon, komo tejuatsin tikonneki maj aksa mitsonpaleui okachi kuali xikonajsikamati Biblia, timitsonyoleuaj xiontajtani itech jw.org, Internet kampa timoteixmatiltiaj oso xiontajkuilo uan itech nejin amaix tikonajsis kani uelis tikontitanis kampa okachi amo uejka. No uelis tiontajtos iniuan itaixpantijkauan Jiova akin nemij ompakauin kampa tionnemi oso tionyas itech se Kali kampa tiMosentiliaj. Timitsonyoleuaj xikontemo se Biblia axkan uan xikonkaua maj mitsonpaleui itech monemilis.