Miakej ouij kinkisa kitasojtaskej Dios porin kinemiliaj ke amo akin ueli kimati akoni, amo toka motekipachoua oso ke hasta tetajyouiltia. Xikonita tein sekin kijtouanij:

• “Maski niktajtaniaya Dios maj nechpaleui, nikmachiliaya ke amo keman nechkakia. Niknemiliaya ke Dios amo teyi kimachiliaya.” (Marco, Italia.)

• “Niknekia niktekitilis Dios, sayoj ke nikitaya ke amo noka motekipachouaya. Nikitaya kemej se Dios tetajyouiltijkej akin sayoj kineki techtatsakuiltis. Niknemiliaya ke amo yolkuali katka.” (Rosa, Guatemala.)

• “Keman nisiuapilok katka, niknemiliaya ke Dios sayoj kitemouaya tonepololuan uan ika nejon techtatsakuiltiaya. Satepan peuak niknemilia ke amo tetasojta, kemej yeskia se tekiuaj akin kinixyekana taltikpakneminij sayoj ke amo ininka motekipachoua.” (Raimunda, Canadá.)

¿Uan tejuatsin toni tikonnemilia? ¿Amo keman uelis tiktasojtaskej Dios? Tel miak xiujmej, akin kineltokaj Cristo motajtanianij nejin. Itech xiujmej 500 hasta kemej 1500 itech totonaluan tel miakej amo motataujtiayaj iuan Dios. ¿Keyej? Porin kimouiliayaj. Momachtijkej Will Durant kijtoj ijkon: “¿Keniuj ueliskia se tajtakojkej kitataujtis se Dios akin amo tetasojta uan tamouilil?”.

¿Keyej taltikpakneminij kinemiliaj ke ijkon tamati Dios? ¿Toni yekmelauj tamachtia Biblia? ¿Okachi amo ouij techkisaskia tiktasojtaskej komo tikmatiskiaj keniuj yekmelauj tamati?

TEIN KIJTOUAJ TALTIKPAKNEMINIJ

“Amo ueli senkis tikyekijtouaj ox Dios kipia itokay. Uan komo kipiaskia, amo tikmatiskiaj katiyejua.” (Tamachtijkej David Cunningham, itech iamatajkuilol Theological Studies.)

TEIN BIBLIA KIJTOUA

Dios kijtoj: “Nejua niJiova. Yejua nejin notokay” (Isaías 42:8). Jiova se tokayit itech tajtol hebreo tein kijtosneki “Yejuatsin Kichiua maj Mochiua” (Génesis 2:4, nota).

Jiova kineki maj tiktekitiltikan itokay. Biblia kijtoua: “Xikijtokan itokay. Xikteixmatiltikan itech okseki xolalmej itachiualisuan. Xikijtokan ke itokay moueyitalij” (Isaías 12:4).

Jesús kitekitiltij itokay Dios uan kinixmatiltij imomachtijkauan. Tein melauj, se tonal kitataujtij iTajtsin: “Nejua nikinixmatiltij motokay”. ¿Keyej kichiuak? Yejua kijtoj: “Uan ijkon netasojtalis tein ika tinechtasojtak maj iniuan yeto, uan nejua iniuan” (Juan 17:26, TNM).

KEYEJ MOTELNEKI

Walter Lowrie, akin momachtia tein kichiuaj itech taneltokalis, kijkuiloj: “Taltikpaknenkej akin amo kiixmati Dios ika itokay, amo yekmelauj kiixmati [...] uan amo ueli kitasojta komo kiixmati sayoj kemej se chikaualis”.

Se takat akin monotsa Victor chijchikueyitika yaya tiopan, sayoj ke kimachiliaya ke amo senkis kiixmatia Dios. Yejua kijtoua: “Keman nikmatik ke Dios monotsa Jiova, nikmachilij kemej yeskia yekin timoixmatkej. Uelik nikixmatik Dios akin nochipa ika tajtouayaj. Peuak nikita kemej se aksa akin yekmelauj nemi uan mochiuak notasojikniuj”.

Uan Jiova motokia iniuan “akin [tanemiliaj] itech itokay” uan motenkaua: “Nikinnextilis teiknelilis, ijkon kemej se takat kinextilia teiknelilis ikonetsin akin kitekitilia” (Malaquías 3:16, 17). Dios no kintatiochiuia akin kinotsaj ika itokay. Biblia kijtoua: “Nochin akin kijtouaj itokay Jiova makisaskej” (Romanos 10:13, TNM).

TEIN KIJTOUAJ TALTIKPAKNEMINIJ

Amaix El Diccionario Akal crítico de Teología kijtoua: “Trinidad yejua tein amo akin kiajsikamati kampa ika motajtoua ke eyin pouij itech sayoj se Dios, tePopaj, teKonetsin uan Yektikatsin Espíritu”. Uan Diccionario abreviado del cristianismo no kijtoua: “Católicos, ortodoxos, anglicanos uan protestantes kitojtokaj nejin tamachtilis”.

TEIN BIBLIA KIJTOUA

Jesús, iKonetsin Dios, amo keman kijtoj ke katka kemej iPopaj. Ta kijtoj: “Nejuatsin niyo inauaktsinko Notajtsin Dios. Porin [...] Yejuatsin ya ne kachi ueyi chiuke uan ke Nejuatsin” (Juan 14:28). Uan no, kiiluij semej imomachtijkauan: “Nitejkoti ya ne kampa yetika no Dios uan kampa yetika namo Dios” (Juan 20:17).

Yektikatsin espíritu amo se dios. Yekinika itatojtokakauan Cristo “kinkemik yektikatsin espíritu”, uan Jiova kijtoj: “Niktalis tepitsin noespíritu ininpan nochi tataman taltikpakneminij” (Hechos 2:1-4, 17, TNM). Yektikatsin espíritu yejua ichikaualis Dios tein tekititok, amo poui itech Trinidad.

KEYEJ MOTELNEKI

Católicos Karl Rahner uan Herbert Vorgrimler, akin momachtiaj tein kipia Biblia, kijtouaj ke Trinidad “amo ueliskia moajsikamatis komo amo onkaskia tein kimelauaskia, uan maski onkaskia tein kimelauaskia amo senkis moajsikamati”. Sayoj ke, ¿uelis tiktasojtaskej aksa akin amo ueli tikixmatij nion tikajsikamatij keniuj tamati? Amo. Yejua ika, tamachtilis ika Trinidad kichiua maj amo tiktasojtakan Dios.

Marco, akin ika titajtojkej itech yekinika tamachtilis, kiitaya Trinidad kemej se teisa tein kitsakuiliaya maj amo ueli motoki iuan Dios. Kijtoua: “Niknemiliaya ke Dios amo kinekia maj nikixmati, uan nejon kichiuaya maj okachi amo nikajsikamatini uan maj nikitani ke amo kitekipachoua tein techpanoua”. Sayoj ke “Dios amo se Dios ten kinmanelouilia tataman tanauatil para ika kinkuatapololtis in tokniuan” (1 Corintios 14:33). Yejuatsin amo motatia, ta techiluia keniuj tamati. Jesús kiyekijtoj: “Tejuan tijudíos, kema, tikajsikamatij akoni tikmouistiliaj” (Juan 4:22).

Marco kisentoka kijtoua: “Keman nimomachtij ke Dios amo poui itech se Trinidad, uelik nikpiak se kuali uikalis iuan”. Kemaj, komo tikitaj Jiova kemej se aksa akin yekmelauj nemi uan amo kemej aksa akin amo ueli se kiixmati, okachi amo ouij techkisas tiktasojtaskej. Biblia kijtoua: “Nochi nekes ten amo tetasojtatinemij, yejuan nojonkes tanextijtinemij ke amo kixmatke Totajtsin Dios, porin [...] Yejuatsin tetasojtatinemi” (1 Juan 4:8).

TEIN KIJTOUAJ TALTIKPAKNEMINIJ

“Niman keman aksa momikilia, komo kichiuak uejueyi tajtakolmej ialma youi miktan kampa kitatsakuiltiaj, itech ‘tit tein amo keman seui’.” (Catecismo de la Iglesia Católica.) Uan seki tamachtianij itech taneltokalis kijtouaj ke akin moajsij miktan senkis mouejkatilijkej iuan Dios.

TEIN BIBLIA KIJTOUA

“Nemilis [oso alma] tein tajtakoua... yejua momikilis.” (Ezequiel 18:4.) Akin momikilijkejya “amo kimatijok nion teyi” (Eclesiastés 9:5). Komo alma momikilia uan mikemej amo teyi kimatijok, ¿keniuj uelis tajyouiskej itech “tit tein amo keman seui” oso hasta moyolkokoskej porin uejka moajsij iuan Dios?

Itech Biblia, tajtolmej tein ualeuaj itech tajtol hebreo uan griego tein miakpa kikepaj kemej “miktan”, tein melauj kijtosneki kampa moseuijtokej akin momikilijkejya. Kemej neskayot, keman Job kijyouij se ueyi kokolis, kitataujtij Dios: “Maj itech Seol xinechtaliani” (Job 14:13). Job kinekia moseuis itech se taltekoch, amo kampa tajyouijtoskia oso kampa okachi mouejkatiliskia iuan Dios.

KEYEJ MOTELNEKI

Komo tiknemiliaj ke Dios tetajyouiltia, nejon amo kichiua maj tiktasojtakan, ta maj timouejkatilikan. Rocío, akin nemi México kijtoua: “Keman katka nikonetok nechmachtijkej ke onkak se miktan kampa techichinouaj. Kemej nimotelmoujtiaya niknemiliaya ke Dios amo tetasojta nion kinextia ke yolkuali. Niknemiliaya ke katka tauel uan amo kineki maj nion akin mopolo”.

Rocío kipatak itanemilil keman momachtij itech Biblia keniuj tamati Dios uan kimatik keniuj moajsij mikemej. Yejua kijtoj: “Keman nikmatik nejin, nikmachilij kemej yeskia nechkixtilijkej se tamamal. Peuak nitakuaujtamati ke Dios kineki maj kuali tinemikan, ke techtasojta uan ke nejua ueli niktasojta. Axkan nikita kemej se tepopaj akin kinmajchana ikoneuan uan kineki maj kuali nemikan” (Isaías 41:13).

Miakej mochikauaj chipaujkanemiskej porin amo kinekij maj kintatsakuiltikan miktan, sayoj ke Dios amo kineki maj tiktekitilikan sayoj porin tikmouiliaj. Jesús kijtoj: “Xiktasojtakan in Toueyitekotsin to Dios” (Marcos 12:29, 30). Uan no, keman tikmatij ke Dios nochi kichiua ika melaujkayot, uelis titakuaujtamatiskej ke tein kiixtalijtok kichiuas amo uejkaua, no yeski ika melaujkayot. Ijkon kemej Elihú, akin katka itasojikniuj Job, ika takuaujtamatilis uelis tikijtoskej: “¡Uejka yetok maj Dios akin melauak kichiua tein tel amo kuali, uan akin kipia nochi uelilis maj kichiua tein amo melauak!” (Job 34:10).

Se tonal, itech xolal Jerusalén, Jesús ika tajtoj iPopaj, Jiova, uan kiyeknextij inintakajkayaualis taixyekananij itech taneltokalis akin moajsiaj itech nejon tonalmej (Juan 8:12-30). Tein kijtoj nejon tonal techmachtia keniuj moneki tikyekitaskej kemej kineltokaj taltikpakneminij ke tamati Dios. Yejua kijtoj: “Komo namejuan nankisentokaj nankiyektakamatiyoue nochi ten namechilijtok, ijkuakon melau nanmochiuaske nannomomachtijkauan. Uan ijkon nankajsikamatiyaske de ne Tajtoltsin ten yek melau. Uan [...] yejua ne namechtojtomatiu de namotajtakoluan” (Juan 8:31, 32).

Keman kijtoj “Nankisentokaj nankiyektakamatiyoue”, Jesús kiixtalij se taman tein techpaleuis maj tikitakan ox tein tamachtiaj itech taneltokalis yejua “ten yek melauj”. Keman tikonkakis se taman tamachtilis tein kinextis keniuj tamati Dios, xionmotajtani: ¿Mouika nejin tamachtilis ika itajtoluan Jesús, oso itamachtilis, uan ika tein kijtoua nochi Biblia? Xikonchiua ijkon kemej akin kikakkej Pablo uan “kiyektemoliayaj in Tajtoltsin de Dios ten yejuan kipiayaj inmako. Uan kixejekoltiayaj kox in tanojnotsalis de Pablo sen youi ya iuan in Tajtoltsin de Dios” (Hechos 17:11).

Marco, Rosa, uan Raimunda, akin ininka titajtojkej itech yekinika tamachtilis, ika miak nejmachkayot kiyekitakej tein kineltokayaj keman momachtijkej Biblia iniuan itaixpantijkauan Jiova. ¿Keniuj momachilijkej keman kimatkej tein melauak?

Marco: “Akin techmachtiaya, nochipa kitekitiltiaya Biblia keman kinankiliaya nochi netajtanilmej tein nejua uan nonamik tikpiayaj. Peuak tiktasojtaj Jiova, uan peuak okachi kuali timouikaj kemej namikuanij”.

Rosa: “Yekinika, niknemiliaya ke Biblia sayoj katka se amatajkuilol tein kipia inintanemililuan taltikpakneminij tein kineki kinextis keniuj xa tamati Dios. Sayoj ke, itech Biblia yolik monankilijtiyaj nonetajtaniluan. Axkan, nikita ke Jiova yekmelauj nemi uan ueli nitakuaujtamati iuan”.

Raimunda: “Niktataujtij Dios maj nechpaleui maj nikixmati. Seki tonalmej satepan, nonamik uan nejua peujkej timomachtiaj Biblia. ¡Axkan kemaj tikmatkej keniuj yekmelauj moixmati Jiova! Titelyolpakij porin tikmatkej keniuj yekmelauj tamati Dios”.

Biblia amo sayoj kiyeknextia ke amo melauak tamachtilis tein ika kiteixmatiltiaj Dios; ta kitematiltia tein yekmelauj yejuatsin kinextia tein semi kualtsin. Nejin moajsi itech iTajtol tein mochijchiuak ika inepaleuil, uan techpaleuia maj “tikajsikamatikan nochi in uelilisme ten Dios techtayokolijtinemi”, tein kijtosneki, maj tikajsikamatikan keniuj yekmelauj moixmati Dios uan itanejnekilis (1 Corintios 2:12). Xikontemo keniuj Biblia tamachtia keniuj tamati Dios, katiyejua itanejnekilis uan tein panos satepan. Uelis tiontajtanis maj mitsonmachtikan ika Biblia itech www.pr418.com/ncj oso iuan se itaixpantijkauj Jiova. Tikyekmatij ke komo ijkon tikonchiua, tikonitas ke uelis tikontasojtas Dios kemej amo keman tikonnemiliaya ke ueliskia.