Jiova kiluij Samuel: “Xiyouj ichan Jesé. Semej ikoneuan yeski ojpatika tekiuaj itech xolal Israel”. Yejua ika Samuel yajki, uan keman kiitak akin tayekanaya, kinemilij: “Yejua nejin telpoch kiixpejpenak”. Sayoj ke Jiova kiluij Samuel ke amo yejua katka, uan no kiluij: “Nejua nikita keniuj yekmelauj tamatij taltikpakneminij, amo sayoj nikita keniuj moitaj tapani”.

Jesé kiualkuilij Samuel okseki chikuasen ikoneuan. Sayoj ke Samuel kijtoj: “Jiova amo kiixpejpenak nion semej. ¿Tikinpia okachi konemej?”. Jesé kinankilij: “Sayoj poliui xokoyot, David, akin kinyekpixtok ichkamej”. Keman David kalakik, Jiova kiluij Samuel: “¡Yejua nejin!”. Ompa Samuel kikuatekilij aceite David. Ijkon kiixpejpenak maj yeskia ojpatika tekiuaj itech xolal Israel.

Seki tonalmej satepan, israelitas yaya moteuitij iniuan filisteos, akin iniuan moajsia se tateuijkej tel uejkapantik, akin motokaytiaya Goliat. Mojmostaj, Goliat kinkejkelouaya israelitas uan kintsajtsiliaya: “Xiktitanikan se takat maj moteui nouan. Komo nechtani, timochiuaskej nanmotekitikauan. Komo nejua nitatani, namejuan nanmochiuaskej nantotekitikauan”.

David yajki kampa tateuianij israelitas kitalijkaj inintakenkaluan kinkauilito takual iikniuan akin katkaj tateuianij. Ompa kikakik tein Goliat tsajtsia uan kijtoj: “¡Nejua nimoteuis iuan!”. Tekiuaj Saúl kinankilij: “Sayoj ke semi tiokichpilok”. David kiluij: “Jiova nechpaleuis”.

Ompa, Saúl kitalilij tein yejua ika tateuiaya, sayoj ke David kijtoj: “Amo niuelis nitateuis komo nimotalilia nejin”. Yejua ika David kikuik iateuitats, oso se mekat tein tachijchiuj kemej uelis ika se kitamotas tet. Yajki itech se atauit, kiololoj makuil tet tein ajalaxtik uan kinkalakij itech imorral. Ompa tsikuinik kampa yetoya Goliat. Nejon ueyi takat kijtoj chikauak: “¡Tejua, okichpiltsin, xiuiki uan tikitas! Nikchiuati maj mitskuakan totomej uan koujtajtapialmej”. David amo mouik. Yejua chikauak kinankilij: “Tejua titateuiki ika se espada uan se lanza, sayoj ke nejua nitateuiti itokaykopa Jiova. Amo touan titateuijtok, titateuijtok iuan Dios. Nochin kiitaskej ke Jiova okachi chikauak ke se espada oso se lanza. Yejuatsin namechtemaktiti tomako”.

Ompa, David kitalij se tet itech iateuitats uan kitamotak ika nochi ichikaualis. Ika inepaleuil Jiova, tet motokato iixkuako Goliat. Nejin ueyi takat uetsito miket. Uan filisteos cholojteujkej. ¿Tejua titakuaujtamati iuan Jiova ijkon kemej David?

Satepan ke David kimiktij Goliat, tekiuaj Saúl kiixtalij maj kinixyekana itateuijkauan. David tatanik itech miak neteuilismej uan kitelixmatiaj. Nochipa keman mokepaya satepan ke tamia neteuilis, siuamej kisayaj kinamikitij, mijtotijtiyayaj uan mokuikatijtiyayaj: “Saúl kinmiktij miles, sayoj ke David kinmiktij majtakti miles”. Yejua ika, Saúl peuak kinexikoluia uan kinekia kimiktis.

David tel kuali kitsotsonaya arpa. Se tonal, keman kitatsotsonilijtoya Saúl, tekiuaj kitamotilij ilanza. Sayoj ke David ijsiujka mijkuanij, uan lanza motokak itech tepamit. Satepan, Saúl miakpa kitemoj kimiktis. Yejua ika, David choloj uan motatij taluakyan.

Saúl kitemoto iniuan 3,000 tateuianij. Kemej amo kimatia, Saúl kalakik itech ostok kampa David uan itateuijkauan motatijtoyaj. Itateuijkauan David kiichtakailuijkej: “Axkan uelis tikmiktis Saúl”. David ichtaka motokij uan kitekilij sentakoton itilmaj. Sayoj ke satepan tel amo kuali momachilij porin amo kipoujkaitak tekiuaj akin Jiova kiixpejpenak. Yejua ika amo kinkauak itateuijkauan maj kimiktikan Saúl. Keman Saúl kisak, David kiluij chikauak: “Ueliskia nimitsmiktis, uan amo nimitsmiktij”. ¿Tiknemilia ke Saúl peuak kiyekita David?

Amo. Saúl kisentokak kitemojtinemik David. Se youak, David uan isobrino, Abisái, ichtaka kalakkej kampa Saúl uan itateuijkauan kochtoyaj. Hasta Abner, akin kiyekpiaya Saúl, kochtoya. Abisái kiluij David: “¡Axkan uelis tikmiktiskej! Xinechkaua maj nikmikti Saúl”. Sayoj ke David kinankilij: “Jiova kitatsakuiltis. Okachi kuali xikui ilanza uan ikontsin tein ika atayi, uan tiyouij”.

Satepan, David pankisak itech se tepet tein ompakauin moajsia, kampa uelia kipanitaya itakenkaluan Saúl. David tsajtsik: “¡Abner! ¿Keyej amo tikyekpiak tekiuaj? ¿Kani yetok ikontsin uan ilanza?”. Saúl kitenixmatik David uan kiluij: “Ueliskia tinechmiktis, uan amo tinechmiktij. Axkan nikita ke tejua tiyeski ojpatika tekiuaj itech xolal Israel”. Ompa Saúl mokepak ichan. Sayoj ke amo nochin ichankauan Saúl kitauelitayaj David.

Iokichpil Saúl akin tayekanaya motokaytiaya Jonatán, uan katka se tateuijkej yolchikauak. David kijtoj ke Jonatán okachi ijsiujka yaya ke se águila uan ke okachi chikauak katka ke se tekuani. Se tonal, Jonatán kinitak itech se tepekuapan 20 tateuianij filisteos. Yejua ika kiluij takat akin kiuikiliaya tein ika tateuiaya: “Tikinteuiskej sayoj komo Jiova techmatiltia maj tiyakan. Komo filisteos techiluiaj maj tipankisakan, tikmatiskej ke moneki tikinteuiskej”. Filisteos kintsajtsilijkej: “¡Xipankisakan uan touan ximoteuikan!”. Ompa Jonatán uan itapaleuijkauj pankiskej uan kinmiktijkej.

Kemej Jonatán katka iokichpil Saúl akin tayekanaya, yejua yeskia tekiuaj satepan ke ipopaj momikiliskia. Sayoj ke Jonatán kimatia ke Jiova kiixpejpenka David maj yejua yeskia tekiuaj itech xolal Israel, uan amo kinexikoluiaya. Jonatán uan David tel kuali mouikakej. Motenkaujkej ke mopaleuiskiaj. Jonatán kimakak David itilmaj, iespada, iarco uan icinturón uan ijkon kinextij ke katkaj tasojiknimej.

Keman David kicholuijtinemia Saúl, Jonatán kiitato uan kiluij: “Ximoyolchikaua. Jiova mitsixpejpenak ximochiua xitekiuaj. Hasta nopopaj kuali kimati nejon”. ¿Tikuelitaskia tikpias se motasojikniuj kemej Jonatán?

Jonatán miakpa motemakak momikilis porin kinekia kipaleuis itasojikniuj. Yejua kimatia ke ipopaj, tekiuaj Saúl, kinekia kimiktis David, yejua ika kiluij: “Komo tikmiktia David, titajtakos. Yejua amo kichiuani nion teyi tein amo kuali”. Saúl tel kualanik iuan Jonatán. Seki xiujmej satepan, Saúl uan Jonatán momikilijkej itech se neteuilis.

Satepan ke Jonatán momikilij, David kitemoj Mefibóset, akin katka iokichpil Jonatán. Keman kiajsik, kiluij: “Nimitsyekpias nochi monemilis porin tel kuali nimouikaya iuan mopopaj. Tinemis nochan uan titakuas nouan”. David amo keman kielkauak itasojikniuj, Jonatán.

Keman Saúl momikilij, David mochiuak tekiuaj. Kipiaya 30 xiujmej. Panokej miak xiujmej, uan se youak, keman yetoya ikalkuako, kiitak se siuat tel kuakualtsin. David kimatik ke motokaytiaya Bat-Seba uan ke inamik katka se tateuijkej akin motokaytiaya Urías. David tanauatij maj kiualkuilianij ichan, iuan motekak, uan Bat-Seba mokokoxkatalij. David kitemoj kitatis tein kichiujka. Yejua ika kiluij akin kinixyekanaya itateuijkauan maj kitaliani Urías taixpan, uan maj satepan kikauanij iselti. Urías momikilij itech nejon neteuilis, uan satepan David monamiktij iuan Bat-Seba.

Sayoj ke Jiova kiitak nochi tein amo kuali tein panoka. ¿Toni kichiuaskia? Kititanik tanauatijkej Natán maj tajtoti iuan David. Natán kiluij: “Moajsia se takat tominpixkej akin kinpiaya miak ichkamej, uan se takat akin sayoj kipiaya se ichkatsin tein kiteltasojtaya. Takat tominpixkej kikuilij iichkatsin”. David tel kualanik uan kijtoj: “¡Nejon takat tominpixkej moneki mikis!”. Ijkuak, Natán kiluij: “¡Tejua nejon takat tominpixkej!”. David moteltayokoltij uan kiluij Natán: “Nitajtakoj iixpan Jiova”. Nejon tajtakol kiualkuilij David miak kuejmolmej, uan no ichankauan. Jiova kitatsakuiltij David, sayoj ke kikauak maj kisentokani nemini porin amo kitatijok tein kichiujka uan yolyemanik katka.

David kinekia kichijchiuilis Jiova se templo. Sayoj ke Jiova kiixpejpenak Salomón, ikonetsin David, maj kichijchiua. Yejua ika David peuak kisentilia nochi tein Salomón kitekitiltiskia uan kijtoj: “Itemplo Jiova moneki yeski tel kualtsin. Salomón semi telpochok, sayoj ke niksentiliti nochi tein monekis uan ijkon nikpaleuis”. David kitetayokolij miak tomin tein kipiaya tein ika mochijchiuaskia templo. Kintemoj kuali tekitinij, kisentilij oro uan plata, uan kiualkuik cedro tein onkaya Tiro uan Sidón. Keman David yaya momikilitiya, kimakak Salomón amamej kampa nesia keniuj kichijchiuas templo uan kiluij: “Jiova nechnauatij maj nikijkuilo nejin uan maj nimitsmaka. Yejuatsin mitspaleuis. Amo ximoui. Ximoyolchikaua uan xikchiua tekit”.