Maski José motayokoltiaya nejon amo kichiuak maj mosenkaua. Ta peuak tekiti uan kiixtalij tel kuali kichiuas, nejon kipaleuij maj Jiova kitiochiua. Potifar niman kiitak nejon. Kiajsikamatik ke komo kipiaya okachi yejua porin Jiova kitiochiujtoya itakeual. Ijkon kemej panouayaj tonalmej, iteko José okachi iuan takuaujtamatia, hasta kiixtalij maj kiixyekana nochi tein kipiaya (Génesis 39:3-6).

Maj tiksentokakan tikitakan tein kipanok José. Panokya miak xiujmej uan José moskaltij uan mochiuak se takat chikauak uan kuakualtsin. Tetayokoltij tikijtoskej, ke nejon kiualkuiliskia ouijkayomej, porin akin kuakualtsin uelis kinyolnotsas akin amo kuali tanemililmej kipiaj.