KIPANOLTIJKEJ ITECH MIKILIS UAN AMO KIMACHILIJ

¿Keniuj momikilij Enoc? Uelis tikijtoskej ke amo semi momati inemilis sayoj ke okachi amo momati keniuj momikilij. Amatajkuilol Génesis sayoj kijtoua: “Enoc kisentokak nentinemik iuan Dios akin melauak. Ompa amo kisentokakok, porin Dios kikuik” (Génesis 5:24). ¿Toni kijtosneki maj Dios kikuini Enoc? Seki Biblias itech Hebreos 11:5 kijtouaj ke Dios kiuikak Enoc iluikak. Sayoj ke nejon amo ueliskia mochiuas, porin Biblia kinextia ke yejua Cristo Jesús akin yekinika oksepa kimakakej nemilis uan yajki iluikak (Juan 3:13).

Yejua ika, ¿toni kijtosneki maj Enoc kipanoltianij itech mikilis uan maj amo kimachiliani? Xa Jiova kipanoltij ika nejmachkayot Enoc itech mikilis uan ijkon amo tajyouiskia. Sayoj ke ¿keniuj kimatik achto ke momikiliskia, ke ‘kiyolpaktijtinemik Dios’? Xa ika inepaleuil Dios, kiitak keniuj nejin taltikpak mokepas se xochital. Satepan ke Jiova kinextij ika nejin taman ke kiseliaya tein kichiuak, Enoc momikilij. Pablo se imomachtijkauj Jesús ika tajtoj Enoc uan oksekin takamej uan siuamej akin amo kikaujkej Dios, yejua kijkuiloj: “Nochi nijin [...] takuautamatinenke iuan Dios” (Hebreos 11:13). Satepan ke momikilij, akin kitauelitayaj xa kitemojkej inakayo, sayoj ke amo uelik kiajsikej porin Jiova kichiuak maj poliui. Ijkon amo kichiuiliskiaj tein amo kinamiki nion kikuiskiaj itech inintaueyichiualis tein amo melauak.b

Ika nochi nejin tein tikitakejya, maj tiknemilikan tein kipanok ijkuak yaya momikilitiya. Xikonnemili nejin, sayoj ke xikonelnamiki ke xa ijkon panok. Enoc cholojtok uan tel sioujtokya. Akin kinmatiltij tanejmachtilis tel kualantokej uan kiikantokaj. Axkan, Enoc kiajsi kampa uelis moseuis uan motatis, sayoj ke kiyekmati ke niman kiajsiskej. Kimati ke kimiktitij uan amo kiikneliskej, ijkon kemej moseuia kitataujtia Dios. Ompa senkis yolseui uan Dios kichiua maj kiita ke moajsi itech se tal tein uejka yetok.

Tein kiita ompa senkis taman ke tein kiitani. Kiita ke semi takualtsinkan ijkon kemej xochital Edén, sayoj ke nikan amo moajsij querubines akin tajpixtokej maj amo akin kalaki. Kinita miakej takamej uan siuamej akin senkis paktokej uan chikaujkej. Nochin yolseujkanemij. Amo akin tetauelita nion kitajyouiltiaj porin kiueyichiuaj Dios, ijkon kemej kipanok Enoc. Ika nejin tein kiitak, Enoc senkis kimati ke Jiova kitasojta uan ke kiyolpaktia. Kimati ke ompa nemis, ompa yeski ichan. Ijkon kemej senkis yolseui, Enoc kitsakua iixtololouan uan momikilia.

Hasta axkan, kisentoka kochtok itech mikilis, Jiova kiyekpia itech iueyi tanemilil. Kemej motenkauak Jesús xiujmej satepan, ejkos tonal keman nochin akin momikilijkejya uan yetokej itech itanemilil Dios, kikakiskej itajtol Cristo uan ualkisaskej kampa kinpachojkej uan oksepa kitaposkej ininixtololouan uan kiitaskej se kualtsin taltikpak kampa onkas yolseuilis (Juan 5:28, 29).