Panokya majtakti xiuit keman Abrahán iuan iueyi kalyetouanij, kipanauijkej ueyiat Éufrates uan ijkon kalakiskiaj itech tal Canaán. Sara kipaleuiani inamik ika nochi iyolo ijkon kemej youij itech se tal kampa amo taixmatij, porin kimati ke yejua tapaleuis maj mochiua tein Jiova kiixtalijtok, maj itechkopa ichankauan ualeua se konetsin uan maj mochiua se altepet. Sayoj ke ¿keniuj tapaleuiskia Sara? Yejua amo ueli kinpia konemej uan kipia 75 xiujmej. Xa motajtania: “¿Keniuj mochiuas tein Dios motenkauani komo nejua niksentoka kemej inamik Abrahán?”. Moajsikamati maj kitekipachouani nejon oso hasta maj yolijsiuini.

Sara amo kiitaya tein kikauak, ta kiitaya tein kiseliskia. Yejua ika, nochi xiujmej keman nenkej itech takenkalmej, kipaleuij inamik kiajchiuas takenkali, kinpeuas tapialmej uan oksepa kiketsas takenkali. Sayoj ke kiixnamikiskiaok okseki taman tein mopataskia uan okseki ouijkayomej. Jiova oksepa kiluij Abrahán tein motenkaujtoya kichiuas, sayoj ke kisentokaya amo ika tajtouaya Sara (Génesis 13:14-17; 15:5-7).

Ompa, Sara kiixejekoj ke monekia tajtos iuan Abrahán ika se taman tein yejua kinemilijtoya. Xionmonemili keniuj iixko kinextia miak taman tein kimachilia uan kijtoua: “¡Ika kualtakayot! Jiova amo nechkauani maj nikinpia konemej”. Satepan, kiluia inamik maj kinpia konemej iuan isiuatakeual, Agar. ¿Tikonnemilia keniuj kiouijmakak kitajtanis inamik maj kichiua nejon? Axkan nejon tein kichiuak Sara uelis amo kuali tikitaskej, sayoj ke itech nejon tonalmej semi moitaya maj se takat kipiani okse inamik oso okse siuat uan ijkon kipiaskia se ikonetsin tein kikauiliskia nochi.b ¿Kichiuak nejon porin kinemiliaya ke ijkon ikoneuan Abrahán mochiuaskiaj se altepet kemej Dios kiixtalijka? Amo tikmatij, maski katka ouij, kichiuak. Sayoj ke ¿keniuj tanankilij Abrahán? Biblia kijtoua ke “kikakik” Sara (Génesis 16:1-3).

¿Kiteajsikamatiltia nejon tein panok ke Jiova kiyololinij Sara maj kilui nejon Abrahán? Amo, ta tein kiluij kinextia se taman tein miakej kinemiliaj. Yejua kineltokaya ke Jiova kichiujtoya maj kipia nejon kuejmolmej uan amo kinemiliaya ke yejuatsin ueliskia kiyektalis. Tein melauj, Sara semi tajyouij ika tein kiluij inamik maj kichiua, sayoj ke no kinextij ke amo sayoj itech tanemiliaya. ¡Axkan amo ijkon kichiuaj! Miakej sayoj inintech tanemiliaj. Komo tiktayekanaltiaj itanejnekilis Dios uan amo tein tejuan tiknejnekij, tiknextijtoskej ke titakuaujtamatij kemej Sara.