BIBLIOTECA ITECH TEPOS Watchtower

Maj tikpatiuitakan nemilis kemej Dios kipatiuita

“Xiksentokakan itech inetasojtalis Dios”
- 5, 6. ¿Keniuj kinextij Tanauatil tein kiselij Moisés ke esti iaxka Dios uan ke kitelpia ipatiuj? (No xikonita recuadro “Maj tikpatiuitakan imin nemilis tapialmej”.)
  
  ⁵ Nejin ome principios no monextij itech Tanauatil tein kiselij Moisés. Itech Levítico 17:10, 11, Jiova kijtoua: “Komo akin yeski taltikpaknenkej [...] [tein kikuas] tein yeski taman esti, yekmelauj nechkualantis nejon taltikpaknenkej tein kikuajtos esti, uan nikixpolos kampa namejuan nannemij. Porin nemilis yetok itech esti, uan nejua niktalij esti itech altar maj kiixtsakua nanmotajtakoluan, porin esti yejua tein kiixtsakua tajtakol, ta nemilis yetok ompa” (xikonita recuadro, “Esti kiixtsakua tajtakolmej”).a
  
  ESTI KIIXTSAKUA TAJTAKOLMEJ
  
  Keman se israelita kitapanauiliaya se itanauatil Dios, ueliaok mopaleuiaya. Kemej Biblia kinextia ke nemilis yetok itech esti, tajtakolchiujkej uelia kimiktiaya se tapial uan kitemakaya itech altar (Levítico 4:27-31). Komo moyolnonotsaya, nejon nemaktil oso netetayokolil kiixtsakuaya oso kipojpolouaya sayoj nejon tajtakol.
  
  Tajtol bíblico tein mokepa “kiixtsakua”, kiteajsikamatiltia “iixpatka teisa”, uan no “itentsak teisa” (kemej itentsak se tapalkat tein kualtsin kitenamiki). Sayoj ke amo moajsia niose tapial tein ueliskia motemakaskia, tein senkis kiixtsakuaskia oso kipojpoloskia itajtakoluan se taltikpaknenkej. Sayoj ke nejon nemaktilmej oso netetayokolilmej ika tapialmej, kiixnextiaya nemaktil tein motemakaskia satepan, tein senkis kiixtsakuaskia tajtakolmej (Hebreos 10:1, 4).
  
  Uan nejon mochiuak keman “motemaktij yejua mismo [Jesucristo] uan motekauilij maj kimiktikan sepa san” (Hebreos 10:10). Inemilis Cristo tein amo kipiaya tajtakol, tein moixnextiaya ika “itasojmouiskaesyotsin [...] [tein katka kemej] ichkamej ten yek chipauak”, senkis ijkuitik katka kemej nemilis tein Adán kipoloj (1 Pedro 1:19). Ika nejin, Jiova kinextij ueyi netasojtalis uan tamatilis. Uan no, mochiuak ijkon kemej tajtani melaujkayot. Uan ika nejon, yejuatsin kichiuak maj tiuelikan tikpiakan “nemakixtilis para sen nachipa” (Hebreos 9:11, 12; Juan 3:16; Apocalipsis 7:14).

Maj tikpatiuitakan nemilis kemej Dios kipatiuita

“Xiksentokakan itech inetasojtalis Dios”
- a Keman amaix Investigación y Ciencia ika tajtoj itanauatil Dios tein kijtoua “nemilis yetok itech esti”, kijtoj: “Uelis tikijtoskej ke esti amo sayoj kiixnextia nemilis, ta melauak nochi taman células tein kipia esti tel tapaleuia maj onka nemilis”.