¿Tamatij kemej ajuach motajtoluan?
TOTANOJNOTSALIS motelneki, sayoj ke seki taltikpakneminij amo ijkon kinemiliaj. Maski moajsij akin kinyolnotsa kimatiskej toni kijtoua Biblia, amo kiitaj ke moneki momachtiskej touan.
Maj tikitakan tein panok iuan se takat akin motokaytia Gavin. Yejua yaya nechikolmej, sayoj ke amo kinekia kiselis se nemachtil. ¿Keyej? Yejua kijtoua ke amo semi kiixmatia Biblia uan ke amo kinekia maj oksekin kimatinij nejon. Uan no, amo kinekia pouis itech nion se taneltokalis uan amo kinekia maj kikajkayauakan. ¿Toni tikonnemilia ika tein kipanouaya Gavin? ¿Tikonnemilia ke onkaya se taman kemej ueliskia se kipaleuis? Tein Biblia tamachtia uelis kintelpaleuis taltikpakneminij. Yejua ika, Jiova kiniluij israelitas ke itajtoluan yeskiaj “kemej ajuach” uan “kemej mixkiouit tein uetsi itech xiuit” (Deut. 31:19, 30; 32:2). Maj tikitakan naui taman tein kipia ajuach tein kuali kiixnextia keniuj uelis tikinpaleuiskej tataman taltikpakneminij ika iTajtol Dios (1 Tim. 2:3, 4).
¿KEYEJ TOTANOJNOTSALIS TAMATI KEMEJ AJUACH?
Ajuach yemanik. Ajuach mochiua youak ika sesekejekat uan nesi itech miak taman tein moajsi panian. ¿Keyej kijtoua Biblia ke itajtoluan Jiova katkaj “kemej ajuach”? Porin yejuatsin kinnojnotsaya itekitikauan ika yemankayot uan kualtakayot. ¿Keniuj uelis tikchiuaskej kemej yejuatsin? Keman tikpoujkaitaskej tein kineltokaj akin tikinnojnotsaj uan tikinyoleuaskej maj tanemilikan itech tein tikiniluiaj uan maj yejuan taixejekokan. Komo tiknextiaj ke yekmelauj tiknekij tikinpaleuiskej, yejuan okachi kikakiskej tein tikiniluiskej uan okachi kinpaleuis.
Ajuach teyolseuia. Totanojnotsalis yeski kemej ajuach komo kinyolseuia oso kichiua maj kuali momachilikan taltikpakneminij. ¿Keniuj uelis tikchiuaskej nejin? Maj tiknemilikan keniuj uelis tikinpaleuiskej maj kiixmatikan Biblia. Maj oksepa ika titajtokan Gavin. Yekinika, se tokniuj akin motokaytia Chris kitajtanij ox kiuelitaskia momachtis Biblia, sayoj ke amo kichikaujkauij maj kilui ke kemaj, ta kitemouaya maj Gavin kuali momachiliani nochipa keman ika tajtouayaj tein tamachtia Biblia. Chris kimelauilij ke Biblia ika tajtoua se taman tein tayekantok uan ke komo kiixmatia nejin taman kipaleuiskia maj okachi kuali kiajsikamati tein moijtoua itech nechikolmej. Uan no, kiluij ke tein achtook moijtojka itech Biblia ke panoskia kipaleuij maj kineltoka ke melauak tein kijtoua. Miakpa ika tajtojkej tein achtook moijtojka itech Biblia. Gavin okachi kuali momachilij uan kinekik kiselis se nemachtil ika Biblia.
Ajuach tapaleuia maj onka nemilis. Itech ueyi altepet Israel, moajsij tonalmej keman tel tona uan tauaki uan kemansa amo kioui miak metsti. Komo amo onkaskia ajuach, xiujmej kuetauiskiaj uan uakiskiaj. Biblia kijtoj ke itech totonaluan taltikpakneminij kitelnekiskiaj “kikakiskej itajtoluan Jiova” (Amós 8:11). Kitelnekiskiaj kikakiskej itamachtilis Dios, kemej yeskia tel amiktoskiaj. Yejua ika, Biblia kijtoua ke keman taixpejpenalmej kiteixmatiltiaj kuali tanauatilmej ika iTekiuajyo Dios tamatij kemej “iajuach Jiova” (Miq. 5:7). Uan okseki tokniuan akin moixmatij kemej ‘okseki ichkamej’ kinpaleuiaj (Juan 10:16). Tein tikteixmatiltiaj yejua se taman tein Jiova ika kinpaleuia akin kinekij kiixmatiskej okachi uan mochiuaskej itasojikniuan. ¿Tikitaj ke kitelpia ipatiuj nejon tamachtilis?
Ajuach se itatiochiualis Jiova (Deut. 33:13). Akin kiseliaj tamachtilis tein melauak uelis kiitaskej totanojnotsalis kemej se tatiochiualis oso se netetayokolil. Gavin kiitak ke nemachtil ika Biblia tein kiselij katka se tatiochiualis porin kipaleuij maj kiajsi itanankililuan nochi netajtanilmej tein kipiaya. Tepitsin satepan moauij uan axkan ika miak pakilis kiteixmatiltia kuali tanauatilmej ika iTekiuajyo Dios iuan inamik, Joyce.
Itaixpantijkauan Jiova noyampa taltikpak kiteixmatiltiaj tein kuali tein kichiuas iTekiuajyo Dios
MAJ TIKPATIUITAKAN TOTANOJNOTSALIS
Komo tikitaj ke totanojnotsalis tamati kemej ajuach, tikitaskej ke kipia miak ipatiuj nochi chikaujkayot tein tikchiuaskej. ¿Keyej? Porin sayoj tepitsin ajuach amo semi tapaleuia, sayoj ke keman mosentilia tel miak, tal kuechauaya. No ijkon, xa tikitaskej ke toselti amo tikchiuaj ueyi tekit. Sayoj ke millones itaixpantijkauan Jiova tiksenchiuaj maj totanojnotsalis ajsi “tech nochi senmanauak” (Mat. 24:14). Kemej tikitaj, totanojnotsalis se itatiochiualis Jiova. Uan uelis yeski kemej ajuach yemanik, tein teyolseuia uan tapaleuia maj onka nemilis.