5, 6. ¿Akoni katka Eliasib uan Tobías uan keyej moteluikayaj?

⁵ (Xikonixtajtolti Nehemías 13:4-9.) Nikan taltikpak techyoualoua miak taman tein amo chipauak, yejua ika semi techouijmaka timoajsiskej tichipaujkej. Maj tiknemilikan tein kipanok Eliasib akin katka tayekankatiopixkat uan Tobías se ammonita akin xa amo semi ueyichiujkej katka itech tekiuajyot persa ompa Judea. Achto, Tobías uan akin iniuan mouikaya amo kinekiaj maj Nehemías kiyekchijchiuani tepamit tein kiyoualouaya Jerusalén (Neh. 2:10). Uan no, iTanauatil Dios kiniluiaya maj amo kinkauanij ammonitas maj moajsinij ikalakyan templo (Deut. 23:3). Yejua ika, ¿keyej Eliasib kitakauiliskia itech templo se takat kemej Tobías?

⁶ Tobías moteluikaya iuan Eliasib. Tobías, ijkon kemej ikonetsin, Jehohanán, monamiktij iuan se siuat judía uan miakej judíos tel kuali kiitayaj Tobías (Neh. 6:17-19). Uan no, Manasés, se iixuiuj Eliasib, monamiktij iuan iichpoch Sanbalat, akin taixyekanaya Samaria tein katka semej akin iuan tel tekitia Tobías (Neh. 13:28). Xa yejua ika tayekankatiopixkat Eliasib mokauak maj kichiualti tein amo kuali se akin amo taneltokaya uan taixnamikia. Sayoj ke Nehemías kinextij ke amo kikauaya Jiova ijkuak kikalantamotak nochi tein ompa tapiaya Tobías.

8. ¿Toni moneki amo tikelkauaskej tein uelis techchiualtiskej akin iniuan timouikaj?

⁸ Semi kuali maj tikelnamikikan ke komo “timouikatinemij iuan nekes ten amo yolchipauke, [...] techmajmauaske ika tajtakolme” (1 Cor. 15:33). Sekin tochankauan uelis techuikaskej maj tikchiuakan tein amo kuali. Eliasib kinkauilijka se kuali neskayot israelitas keman senkis kipaleuij Nehemías maj moyekchijchiuani tepamit tein kiyoualouaya Jerusalén (Neh. 3:1). Sayoj ke satepan keman peuak mouika iuan Tobías uan oksekin, yolik kiuikak maj kichiuani seki taman tein amo kipaleuij maj moajsi chipauak iixpan Jiova. Sayoj ke komo timosentiliaj iniuan akin kitekitiliaj Dios, techyolchikauaskej maj tikchiuakan tein kuali, kemej timomachtiskej Biblia, tiyaskej nechikolmej uan titanojnotsaskej. Tochankauan akin techpaleuiaj maj tikchiuakan itanejnekilis Dios semi tikintasojtaj.