¿AKONI amo kiuelita mouikas iniuan akin yolyemankej? Sayoj ke tetayokoltij tikijtoskej ke axkan amo semi moajsij taltikpakneminij akin yolyemankej, uan okachiok akin uejueyi chiuanimej oso kipiaj tanauatil. ¿Toni uelis tikijtoskej ika Jiova, Akin okachi ueyichiujkej itech iluikak uan taltikpak? ¿Yolyemanik yejuatsin? Tanauatijkej Jeremías kijkuiloj seki tajtolmej tein kinankilia nejin netajtanilmej. (Xikonixtajtolti Lamentaciones 3:20, 21.)

Jeremías senkis kineltokaya ke Jiova ‘moixpiloskia’ kampa yetokej taltikpakneminij tein moyolnonotsaj. Nejin tajkuilol no mokepani ijkon: “Tejua titemos kampa niyetok” (Diccionario de figuras de dicción usadas en la Biblia, tein iaxka Ethelbert W. Bullinger). ¡Nejin tajtolmej kinextia ke Dios semi teiknelia! Jiova, akin “Ueyichiujkej itech nochi taltikpak”, ika miak pakilis moixpiloua oso temoua kampa yetokej itekitikauan uan kinpaleuia maj kiyektalikan ininnemilis uan maj oksepa kipiakan itatiochiualis (Salmo 83:18). Nejin kiyolchikauak tanauatijkej Jeremías akin amo keman kikauak Dios. Yejua ika amo yolijsiuik, ta kichiak maj Jiova kiixtaliani tonal keman kinmakixtiskia itekitikauan tein moyolnonotskej (versículo 21).