²⁰ Dios kipaleuia Jonás maj tanemili. Achto kiiluia ke tanauatijkej moyolkokojtok porin uakik se tatok tein moskaltij itech se youal tein yejua nion kitokak uan nion kiatekij. Uan satepan kitajtania: “¿Keyej amo nikiknelis ueyi xolal Nínive kampa moajsij panoua ciento veinte mil taltikpakneminij, akin amo kimatij kani moajsi ininyekmay uan ininopochmay, ijkon kemej miak tapialmej tein ompa moajsij?” (Jon. 4:10, 11).c

21. 1) ¿Toni Jiova kinekia kiajsikamatiltis Jonás ika neskayot tein kikuik? 2) ¿Keniuj uelis techmachtis amatajkuilol Jonás?

²¹ ¿Ueli tikajsikamatij tein Jiova kinekia kiteajsikamatiltis ika nejin neskayot? Jonás nion tepitsin kiyekpiak nejon tatok. Sayoj ke, Jiova kinmakatoya nemilis akin moajsiaj Nínive uan kinmakaya tein kinpaleuiskia maj kisentokakan yoltokan, kemej kichiua iuan nochi tein yoltok itech taltikpak. ¿Keniuj Jonás okachi kitasojtaya se tatok ke 120,000 taltikpakneminij uan nochi inintapialuan? Moyekita ke kinextij ke sayoj itech tanemiliaya. Semi kitayokoltij keman uakik tatok sayoj porin amo kiyekauiliayaok. Uan no kualanik keman kiitak ke amo ixpoliujkej akin nemiaj Nínive sayoj porin kiitaya itanejnekilis. Iueyinekilis kiuikaya maj kineki kinextis ke yejua amo mopolojtoya uan maj kisentokani kuali kiitanij kemej tanauatijkej. Tein kipanok Jonás techpaleuia maj tikitakan ox kuali yetok tanemilil tein tiknextiaj. Tein melauj, tinochin moneki timochikauaskej amo sayoj totech titanemiliskej. ¡Semi tiktasojkamatiliaj Jiova porin techmachtia ika nejmachkayot maj titeiknelikan, maj titetapojpoluikan uan maj ininka titanemilikan oksekin kemej kichiua yejuatsin!