Jeremías 31:15 kijtoua: “Yejua nejin tein kijtoua Jiova: ‘Mokaki se tajtol ompa Ramá, yoltajyouilis uan tayokolchokalis; Raquel akin kinchokilia ikoneuan. Amo kinekik maj kiyolseuianij ika tein panok iniuan ikoneuan, porin yejuan amo nemijok’”.

Tein yeski tein kijtosneki, keman Jeremías kijtoj ke Raquel kinchokiliaya ikoneuan kiixnextij se taman tein mochiuak miak xiujmej satepan, keman Jesús kinekiaj kimiktiskej ijkuak katka konetsin. Tekiuaj Herodes tanauatij maj kinmiktianij nochin konemej akin kipiayaj ome xiuit uan akin ayamo kiajxitiayaj akin nemiaj Belén, tein moajsia kampa ika sur iuan Jerusalén. Xionmonemili keniuj nejon temomauan tel chokayaj porin ‘amo nemiajok’ ininkoneuan. Nejon tayokolchokalis kemej yeskia mokakia hasta Ramá, tein moajsia kampa ika norte iuan Jerusalén (Mat. 2:16-18).

Ika nejin, keman Jeremías kijtoj ke Raquel kinchokiliaya ikoneuan kuali kiixnextij ueyi tayokol tein kimachilijkej temomauan judías porin kinmiktilijkej ininkoneuan, itech itonaluan Jeremías uan itech itonaluan Jesús. Sayoj ke tikyekmatij ke akin momikilijkej uan yajkej “itech tal tein iaxka taixnamikkej”, tein kijtosneki mikilis, “yekmelauj moualkepaskej” keman moajokuiskej (Jer. 31:16; 1 Cor. 15:26).