16, 17. 1) ¿Toni tachiualis ika tami neskayot tein Jesús kijtoj? 2) ¿Keyej tikajsikamatij ke nejon tachiualis mochiuas satepan?

¹⁶ Makuiltika: akin yolmelaujkej tel petaniskej. Tein achtook kijtojka Jesús ke mochiuas, tami ika nejin tajtolmej: “Itech ne tonalmej akin yolmelaujkej tel petaniskej kemej tonal itech itekiuajyo ininTajtsin” (Mat. 13:43, TNM). ¿Kemanian uan kani mochiuas? Tein Jesús achtook kijtoj, mochiuas satepan ompa iluikak, uan amo axkan nikan taltikpak.f ¿Toni techuika maj ijkon tikajsikamatikan? Maj tikitakan ome taman.

¹⁷ Yekinika, maj tikitakan kemanian mochiuaskia itajtoluan Jesús. Yejua kijtoj: “Itech nejon tonalmej akin yolmelaujkej tel petaniskej”. Tajtol “itech nejon tonalmej” kijtosneki tein Jesús yekin kijtojka ke kitamotaskej tikonijtik amo kuali xiuit. Nejon mochiuas itech itamian okachi ueyi tajyouilis. Yejua ika, no itech nejon tonalmej tokniuan taixpejpenalmej “tel petaniskej”. Ojpatika, maj tikitakan kani mochiuas nejon. Jesús kiyeknextij ke akin yolmelaujkej “petaniskej [...] itech itekiuajyo ininTajtsin”. Nejin kijtosneki ke nochin tokniuan taixpejpenalmej akin amo kikauaj Dios tein moajsiskejok nikan taltikpak satepan ke panos yekinika taman itech okachi ueyi tajyouilis, senkis kinseliskejya kemej taixpejpenalmej. Ijkuak, kemej Jesús achtook kijtojka tein panoskia itech okachi ueyi tajyouilis, kinsentiliskej ne iluikak (Mat. 24:31). Ompa kampa petaniskej “itech itekiuajyo ininTajtsin”, uan kampa tepitsin satepan keman panos neteuilis Armagedón, mochiuaskej kemej inovia Jesús akin yolpaki keman akin ‘tamati keme ichkatsin [...] monamiktis’ (Apoc. 19:6-9).