1, 2. 1) ¿Toni kiixpejpenak kichiuas Moisés keman kipiaya 40 xiujmej? (Xikonita taixkopin ipeujyan tamachtilis.) 2) ¿Keyej Moisés kiixpejpenak tajyouis iuan ixolal Dios?

MOISÉS kimatia toni ueliskia kiselis ompa Egipto. Kiitaya uejueyi kalmej tein kipiayaj akin tominpiayaj, uan yejua kiselijkaj kemej tekonetsin ichan tekiuaj. “Moisés kimachtijtiyajke miak tataman tamachilis ten ueliaj in egipcios”, tein kijtosneki ke xa momachtij tein onkak iluikak, ijkon kemej tapoualis tein kitekitiltiaj keman kichiuaj miak taman tein ouij, momachtij keniuj kichijchiuaskej uejueyi kalmej, tein momachtiaj tamatinij uan okseki uejueyi nemachtilmej (Hech. 7:22). Yejua ueliskia kipias miak tomin, chikaualis uan tanauatil, seki taman tein okseki egipcios amo ueliaj kipiayaj.

² Maski ijkon, keman kipiaya 40 xiujmej kiixpejpenak kichiuas se taman tein tekiuaj uan ichankauan xa semi kimoujkaitakej. Amo sayoj kiixpejpenak nemis kemej oksekin egipcios, ta kiixpejpenak tajyouis iniuan takeualmej. ¿Keyej? Porin kipiaya takuaujtamatilis (xikonixtajtolti Hebreos 11:24-26). Kemej Moisés takuaujtamatia, amo sayoj kiitak tein ueliskia kipias ompa Egipto, ta takuaujtamatik iuan Jiova akin “amo kitstinemik”, uan kiyekneltokak ke yejuatsin kichiuas tein motenkauak (Heb. 11:27).

6. 1) ¿Keyej Moisés “amo kineyik ok [...] ma kipouakan [...] tekoneu den isuapil den rey Faraón”? 2) ¿Keyej tikonnemilia ke Moisés kiixpejpenak tein okachi kuali?

⁶ Itakuaujtamatilis Moisés no kiyekanak keman kiixpejpenak toni kichiuaskia. “Moisés takuautamatinemik iuan Dios. lka ya nojon yejua, kuak tagamajsik ya, [...] amo kineyik ok [...] ma kipouakan [...] tekoneu den isuapil den rey Faraón.” (Heb. 11:24.) Yejua amo kinemilij ke ueliskia kipias se ueyi tanauatil itech tekiuajyot, uan kitekitilis Dios ika itomin uan chikaualis tein kipiaskia uan ika nejon kinpaleuiskia iikniuan israelitas. Ta yejua kiteltasojtaya Jiova uan yejua ika kiixtalijka kitekitilis ika nochi iyolo, inemilis uan ichikaualis (Deut. 6:5). Uan tein kiixpejpenak kipaleuij maj amo kijyouiskia tein amo kuali. Israelitas kiuikakej miak taman tein kipiaya ipatiuj tein moajsia ompa Egipto (Éx. 12:35, 36). Faraón kipinaujtijkej uan kichiujkej maj ixpoliui (Sal. 136:15). Sayoj ke Moisés kisentokaya yoltoya uan Dios kiixtalij maj kiixyekanani uan maj kipaleuiani se xolal maj makisani. Itech inemilis kiajsik tein yekmelauj kuali.